ಆರೋಗ್ಯ & ರುಚಿ.. ಒಂದೇ ಪ್ಲೇಟಿನಲ್ಲಿ! ಮನೆಯಲ್ಲೇ ಮಾಡಿ ಸೋಯಾ ಬೀಟ್ರೂಟ್ ಪುಲಾವ್.. ತುಂಬಾ ಈಸಿ

ನೀವು ಊಟಕ್ಕೆ ಹೊಸತನ ಮತ್ತು ಆರೋಗ್ಯದ ಸ್ಪರ್ಶ ನೀಡುವ ಅಡುಗೆ ಹುಡುಕುತ್ತಿದ್ದೀರಾ? ಹಾಗಾದರೆ, ಸೋಯಾ ಮತ್ತು ಬೀಟ್ರೂಟ್‌ನಿಂದ ತಯಾರಿಸಿದ ಈ ಪುಲಾವ್ (Soya Beetroot Pulao) ಒಂದು ಅದ್ಭುತ ಆಯ್ಕೆ. ಇದು ಕೇವಲ ರುಚಿಕರವಾದ ತಿಂಡಿಯಲ್ಲ. ಇದರಲ್ಲಿರುವ ಸೋಯಾ ಮತ್ತು ಬೀಟ್ರೂಟ್‌ನಿಂದ ದೇಹಕ್ಕೆ ಅಗತ್ಯವಾದ ಪೋಷಕಾಂಶಗಳು ಸಿಗುತ್ತವೆ. ಕುಕ್ಕರ್‌ನಲ್ಲಿ ಸುಲಭವಾಗಿ ತಯಾರಿಸಬಹುದಾದ ಈ ತಿಂಡಿಯಿಂದ ನಿಮ್ಮ ಸಮಯ ಉಳಿತಾಯವಾಗುತ್ತದೆ. ಅಲ್ಲದೆ, ಸಂಪೂರ್ಣ ಪೌಷ್ಟಿಕಾಂಶ ಭರಿತ ಊಟವನ್ನು ಸಿದ್ಧಪಡಿಸಬಹುದು. ಇದನ್ನು ಮನೆಯಲ್ಲಿ ಸುಲಭ ತಯಾರಿಸಬಹುದು. ಇದಕ್ಕೆ ಬೇಕಾಗುವ ಪದಾರ್ಥಗಳು ಮತ್ತು ತಯಾರಿಸುವ ವಿಧಾನ ಇಲ್ಲಿದೆ.

ಇಂದಿನ ತ್ವರಿತ ಜೀವನಶೈಲಿಯಲ್ಲಿ, ಆರೋಗ್ಯಕರ ಮತ್ತು ರುಚಿಕರವಾದ ಅಡುಗೆಗಳನ್ನು ತಯಾರಿಸುವುದು ಒಂದು ಸವಾಲು. ಆದರೆ, ಸರಿಯಾದ ಪದಾರ್ಥಗಳು ಮತ್ತು ಸರಳ ವಿಧಾನವನ್ನು ಬಳಸಿದರೆ, ಪೌಷ್ಠಿಕತೆಯ ಜೊತೆಗೆ ರುಚಿಯನ್ನು ಸಹ ಕಾಪಾಡಿಕೊಳ್ಳಬಹುದು. ಸೋಯಾ ಬೀಟ್ರೂಟ್ ಪುಲಾವ್ ಇಂತಹದ್ದೇ ಒಂದು ತಿಂಡಿ. ಇದರಲ್ಲಿ ಅಕ್ಕಿಯ ಮೃದುತ್ವ, ಬೀಟ್ರೂಟ್‌ನ ನೈಸರ್ಗಿಕ ಬಣ್ಣ ಮತ್ತು ಸೋಯಾದ ಪ್ರೋಟೀನ್ ಶಕ್ತಿ ಒಂದುಗೂಡುತ್ತದೆ. ನೀವು ಸಸ್ಯಾಹಾರಿಗಳು ಪ್ರೋಟೀನ್ ಮತ್ತು ಫೈಬರ್ ಭರಿತ ಆಹಾರವನ್ನು ಹುಡುಕುತ್ತಿದ್ದರೆ, ಸೋಯಾ ಬೀಟ್ರೂಟ್ ಪುಲಾವ್ (Soya Beetroot Pulao Recipe) ಉತ್ತಮ ಆಯ್ಕೆಯಾಗಿದೆ.

ಸೋಯಾ ಬೀಟ್ರೂಟ್ ಪುಲಾವ್ ತಯಾರಿಸಲು ಬೇಕಾಗುವ ಪದಾರ್ಥಗಳು

• ಅಕ್ಕಿ - 1 ಕಪ್
• ಬೀಟ್ರೂಟ್ - 1
• ಸೋಯಾ ಚಂಕ್ಸ್ - 1/2 ಕಪ್
• ಈರುಳ್ಳಿ - 1
• ಟೊಮೆಟೊ - 1
• ಹಸಿ ಮೆಣಸಿನಕಾಯಿ - 2
• ಶುಂಠಿ-ಬೆಳ್ಳುಳ್ಳಿ ಪೇಸ್ಟ್ - 1 ಸ್ಪೂನ್
• ತುಪ್ಪ - 1 ಸ್ಪೂನ್
• ನೀರು - 1 ಕಪ್
• ಜೀರಿಗೆ - 1/2 ಸ್ಪೂನ್
• ಬಿರಿಯಾನಿ ಎಲೆ - ಸ್ವಲ್ಪ (1)
• ಲವಂಗ - 2
• ಏಲಕ್ಕಿ - 2
• ದಾಲ್ಚಿನ್ನಿ ತುಂಡು - 1
• ಅರಿಶಿನ ಪುಡಿ - 1/4 ಸ್ಪೂನ್
• ಕೆಂಪು ಮೆಣಸಿನ ಪುಡಿ - 1/2 ಸ್ಪೂನ್
• ಗರಂ ಮಸಾಲಾ - 1/2 ಸ್ಪೂನ್
• ಕೊತ್ತಂಬರಿ ಪುಡಿ - 1/2 ಸ್ಪೂನ್
• ಉಪ್ಪು - ರುಚಿಗೆ ತಕ್ಕಷ್ಟು

ಸೋಯಾ ಬೀಟ್ರೂಟ್ ಪುಲಾವ್ ತಯಾರಿಸುವ ವಿಧಾನ

ಮೊದಲು, ಸೋಯಾ ಚಂಕ್ಸ್‌ಗಳನ್ನು ಒಂದು ಚಿಟಿಕೆ ಉಪ್ಪಿನೊಂದಿಗೆ 5 ನಿಮಿಷಗಳ ಕಾಲ ನೀರಿನಲ್ಲಿ ಕುದಿಸಿ. ನೀರನ್ನು ಬಸಿದು, ಹೆಚ್ಚುವರಿ ನೀರನ್ನು ಹಿಂಡಿ ತೆಗೆದು ಪಕ್ಕಕ್ಕಿಡಿ. ನಂತರ, ಪ್ರೆಶರ್ ಕುಕ್ಕರ್‌ನಲ್ಲಿ ತುಪ್ಪವನ್ನು ಬಿಸಿ ಮಾಡಿ. ಅದಕ್ಕೆ ಜೀರಿಗೆ ಮತ್ತು ಇಡೀ ಮಸಾಲೆಗಳಾದ ಬಿರಿಯಾನಿ ಎಲೆ, ಲವಂಗ, ಏಲಕ್ಕಿ, ದಾಲ್ಚಿನ್ನಿ ಹಾಕಿ. ಇವು ಸಿಡಿಯುವವರೆಗೆ ಹುರಿಯಿರಿ.

ಈಗ, ಕತ್ತರಿಸಿದ ಈರುಳ್ಳಿ, ಹಸಿ ಮೆಣಸಿನಕಾಯಿ ಮತ್ತು ಶುಂಠಿ-ಬೆಳ್ಳುಳ್ಳಿ ಪೇಸ್ಟ್ ಹಾಕಿ. ಹಸಿ ವಾಸನೆ ಹೋಗುವವರೆಗೆ ಹುರಿಯಿರಿ. ಬಳಿಕ ತುರಿದ ಬೀಟ್ರೂಟ್ ಮತ್ತು ಟೊಮೆಟೊ ಜೊತೆಗೆ ಮಸಾಲೆಗಳಾದ ಅರಿಶಿನ ಪುಡಿ, ಕೆಂಪು ಮೆಣಸಿನ ಪುಡಿ, ಗರಂ ಮಸಾಲಾ, ಕೊತ್ತಂಬರಿ ಪುಡಿ ಮತ್ತು ಉಪ್ಪು ಹಾಕಿ. 4 ರಿಂದ 5 ನಿಮಿಷಗಳ ಕಾಲ ಬೇಯಿಸಿ.

ಅಂತಿಮವಾಗಿ, ನೆನೆಸಿದ ಅಕ್ಕಿ ಮತ್ತು ಬೇಯಿಸಿದ ಸೋಯಾ ಚಂಕ್ಸ್‌ಗಳನ್ನು ಹಾಕಿ. ಮಸಾಲೆಗಳೊಂದಿಗೆ ಚೆನ್ನಾಗಿ ಮಿಕ್ಸ್ ಮಾಡಿ. ನೀರನ್ನು ಸೇರಿಸಿ, ಎರಡು ಸಿಳ್ಳೆ ಬರುವವರೆಗೆ ಪ್ರೆಶರ್ ಕುಕ್ ಮಾಡಿ. ಪ್ರೆಶರ್ ತನ್ನಷ್ಟಕ್ಕೆ ತಾನೇ ಕಡಿಮೆಯಾಗಲು ಬಿಡಿ. ಇಷ್ಟು ಮಾಡಿದರೆ, ನಿಮ್ಮ ರುಚಿಕರವಾದ ಸೋಯಾ ಬೀಟ್ರೂಟ್ ಪುಲಾವ್ ಸಿದ್ಧ. ಇದನ್ನು ಮೊಸರು ಮತ್ತು ಉಪ್ಪಿನಕಾಯಿ ಜೊತೆ ಸವಿಯಬಹುದು.