ಹತ್ತಿಗಿಂತಲೂ ಮೃದುವಾದ ದೋಸೆ ಮಾಡಿ..! ಉದ್ದು-ಅಕ್ಕಿ ಬಳಸಬೇಡಿ..!

ಬೆಳಗ್ಗಿನ ತಿಂಡಿ ಚೆನ್ನಾಗಿರಬೇಕು, ಎಲ್ಲರು ಇಷ್ಟಮಟ್ಟು ಮನೆ ಮಂದಿಯಲ್ಲ ಸವಿದು ಹೊಗಳಬೇಕು ಎಂಬ ಆಸೆ ಗೃಹಿಣಿಯರಲ್ಲಿ ಇರುತ್ತೆ. ಇದಕ್ಕಾಗಿ ಅವರು ಬೆಳಗ್ಗೆ ತಿಂಡಿಗೆ ವಿವಿಧ ರೀತಿಯ ಖಾದ್ಯಗಳ ಮಾಡುವುದು, ಹೊಸ ಬಗೆಯ ತಿನಿಸು ಮಾಡುವುದು ಸೇರಿ ಹಲವು ರೀತಿಯಲ್ಲಿ ಬೆಳಗ್ಗೆಯ ತಿಂಡಿ ರುಚಿಕರವಾಗಿರುವಂತೆ ನೋಡಿಕೊಳ್ಳುತ್ತಾರೆ.

ಆದ್ರೆ ನಿತ್ಯ ಹೊಸ ಬಗೆಯ ತಿಂಡಿ ಮಾಡುವುದು ಸವಾಲಿನ ಕೆಲಸ. ಬೆಳಗ್ಗೆ ಎದ್ದಾಗ ಇಡೀ ದಿನದ ಕೆಲಸಗಳು ಕಣ್ಣ ಮುಂದಿರುತ್ತವೆ. ಹೀಗಿರುವಾಗ ತಿಂಡಿಯ ಕುರಿತು ಹೆಚ್ಚು ಯೋಚಿಸಲು ಸಮಯವಿರುವುದಿಲ್ಲ. ಆದರೆ ನಾವು ಅಂದುಕೊಂಡಂತೆ ಯಾವ ತಿಂಡಿ ಮಾಡಬೇಕೋ ಅದನ್ನೇ ರುಚಿಕರವಾಗಿ ಮಾಡಲು ನಿರ್ಧರಿಸುತ್ತೇವೆ.

ಹಾಗಾದ್ರೆ ಬೆಳಗ್ಗೆಯ ತಿಂಡಿಗೆ ನೀವು ದೋಸೆ ಮಾಡುವುದು ಕಾಮನ್ ಆದ್ರೆ ಅದೇ ದೋಸೆಯನ್ನ ವಿಶೇಷವಾಗಿ ವಿಭಿನ್ನ ರೀತಿಯಲ್ಲಿ ಮಾಡಿದರೆ ಹೇಗೆ? ಹೌದು ದೋಸೆಯನ್ನ ಹತ್ತಿಯಂತೆ ಮೃದುವಾಗಿ ಎಲ್ಲರಿಗೂ ಇಷ್ಟವಾಗುವ ರೀತಿ ಮಾಡಬಹುದು. ಇದಕ್ಕೆ ಹೆಚ್ಚಿನ ಶ್ರಮದ ಅಗತ್ಯವೇನು ಇರುವುದಿಲ್ಲ. ಬದಲಿಗೆ ನಾವು ಹಿಂದಿನ ದಿನ ಹಿಟ್ಟು ರೆಡಿ ಮಾಡುವಾಗ ಸಣ್ಣದ ಟ್ರಿಕ್ಸ್ ಫಾಲೋ ಮಾಡಿದರೆ ಬೆಳಗ್ಗೆ ಹತ್ತಿಯಂತೆ ಮೃದುವಾದ ದೋಸೆ ರೆಡಿ ಮಾಡಬಹುದು.

ಇನ್ನು ಉದ್ದಿನ ಬೇಳೆ ಹಾಕದೆಯೇ ಮೃದುವಾದ ದೋಸೆ ಮಾಡುವ ರೆಸಿಪಿ ಬಗ್ಗೆ ನಿಮಗೆ ತಿಳಿದಿದ್ಯಾ? ಇಲ್ಲಾ ಎಂದಾದರೆ ನಾವಿಂದು ಈ ಕುರಿತು ಹೇಳುತ್ತೇವೆ ಕೇಳಿ. ಉದ್ದು ಬಳಸದೆ ಕೇವಲ 2 ವಸ್ತುಗಳ ಬಳಸಿ ಮೃದುವಾದ ಹೂವಿನಂತಹ ದೋಸೆ ಮಾಡಬಹುದು.

ಹಾಗಾದ್ರೆ ಈ ದೋಸೆ ಮಾಡುವುದು ಹೇಗೆ? ಇದಕ್ಕೆ ಯಾವೆಲ್ಲಾ ವಸ್ತು ಬೇಕು? ಹಿಟ್ಟು ರೆಡಿ ಮಾಡಿಕೊಳ್ಳುವುದು ಹೇಗೆ? ದೋಸೆ ಮಾಡುವ ವಿಧಾನವೇನು ಎಂಬುದನ್ನು ನಾವಿಂದು ತಿಳಿದುಕೊಳ್ಳೋಣ.

ಮೃದುವಾದ ದೋಸೆ ಮಾಡಲು ಬೇಕಾಗುವ ಪದಾರ್ಥಗಳು

• ಚಿರೋಟಿ ರವೆ - 2 ಕಪ್
• ತೆಂಗಿನ ತುರಿ - 1 ಕಪ್
• ಎಣ್ಣೆ

ಮೃದುವಾದ ದೋಸೆ ಮಾಡುವುದು ಹೇಗೆ?

ಒಂದು ಪಾತ್ರೆಗೆ ರವೆ ಹಾಕಿಕೊಂಡು ಅದಕ್ಕೆ ನೀರು ಹಾಕಿಕೊಳ್ಳಿ. ಸರಿಯಾಗಿ ರವೆ ನೆನೆಯುವಂತೆ ನೀರು ಹಾಕಿ ತಟ್ಟೆ ಮುಚ್ಚಿ 10 ನಿಮಿಷ ಬಿಡಿ. ಬಳಿಕ ಇದನ್ನು ಮಿಕ್ಸಿ ಜಾರ್‌ಗೆ ಹಾಕಿಕೊಳ್ಳಿ, ಇದಕ್ಕೆ ತೆಂಗಿನ ತುರಿ ಸಹ ಹಾಕಿಕೊಂಡು ಸ್ವಲ್ಪ ನೀರು ಹಾಕಿಕೊಂಡು ರುಬ್ಬಿಕೊಳ್ಳಿ. ರುಬ್ಬಿಕೊಳ್ಳುವ ವೇಳೆ ರುಚಿಗೆ ತಕ್ಕಷ್ಟು ಉಪ್ಪು ಹಾಕಿಕೊಳ್ಳಿ.

ಹಿಟ್ಟು ನುಣ್ಣಗೆ ಆಗುವಂತೆ ರುಬ್ಬಿಕೊಳ್ಳಬೇಕು. ಬಳಿಕ ಈ ಹಿಟ್ಟನ್ನು ಮತ್ತೊಂದು ಪಾತ್ರೆಗೆ ಹಾಕಿ ಇಡಿ. ಈ ಹಿಟ್ಟನ್ನು ಒಂದು ದಿನ ರಾತ್ರಿ ಬಿಡಬೇಕು. ಮಾರನೆ ದಿನ ಬೆಳಗ್ಗೆ ಈ ಹಿಟ್ಟನ್ನು ಚೆನ್ನಾಗಿ ಕಲಸಿಕೊಳ್ಳಿ. ಇದಕ್ಕೆ ನೀರು ಹಾಕಿಕೊಳ್ಳುವ ಅಗತ್ಯವಿಲ್ಲ. ಇನ್ನು ಬೆಳಗ್ಗೆ ಹಿಟ್ಟು ಮಾಡಿಕೊಳ್ಳುವುದಾದರೆ ಸ್ವಲ್ಪ ಸೋಡಾ ಪುಡಿ ಸಹ ಹಾಕಿಕೊಳ್ಳಬೇಕು. ಆದರೆ ಹಿಂದಿನ ದಿನ ಹಿಟ್ಟು ಮಾಡುವುದಾದರೆ ಸೋಡಾ ಪುಡಿ ಬಳಸುವ ಅಗತ್ಯವಿಲ್ಲ.

ಬಳಿಕ ಒಲೆ ಮೇಲೆ ಕಾವಲಿ ಇಟ್ಟು ಬಿಸಿಯಾಗಲು ಬಿಡಿ. ಬಳಿಕ ಇದಕ್ಕೆ ಎಣ್ಣೆ ಹಾಕಿಕೊಂಡು ಈರುಳ್ಳಿ ಮೂಲಕ ಚೆನ್ನಾಗಿ ಉಜ್ಜಿಕೊಳ್ಳಬೇಕು. ಬಳಿಕ ಹಿಟ್ಟನ್ನು ಕಾವಲಿ ಮೇಲೆ ಹಾಕಿ ದೋಸೆ ಮಾಡಿಕೊಳ್ಳಿ. ದೋಸೆಯನ್ನ ಎರಡೂ ಕಡೆಗಳಲ್ಲಿ ಕಾಯಲು ಬಿಡಿ. 3 ನಿಮಿಷ ಕಾಯಿಸಿದರೆ ಸಾಕಾಗುತ್ತದೆ. ಇಷ್ಟಾದರೆ ನಿಮ್ಮ ಮುಂದೆ ಹತ್ತಿಯಂತಹ ದೋಸೆ ರೆಡಿಯಾಗುತ್ತದೆ. ಇದೆ ವಿಧಾನದಲ್ಲಿ ಎಲ್ಲಾ ದೋಸೆ ಮಾಡಿಕೊಳ್ಳಿ.

ಈ ದೋಸೆಯನ್ನು ಕಡಲೆ ಚಟ್ನಿ, ತೆಂಗಿನ ಕಾಯಿ ಚಟ್ನಿ ಜೊತೆ ಸವಿಯಲು ನೀಡಿದರೆ ಸಿಕ್ಕಾಪಟ್ಟೆ ರುಚಿ ನೀಡಲಿದೆ.