ಈ ಉಪ್ಮಾ ತಿಂದ್ರೆ ಸಾಕು! ತೂಕ ಇಳಿಕೆಯಾಗುತ್ತೆ, ಹೊಟ್ಟೆಯೂ ತುಂಬುತ್ತೆ

ಉಪವಾಸದ ದಿನಗಳಲ್ಲಿ ಏನು ತಿನ್ನಬೇಕು? ಅನ್ನದ ಪರ್ಯಾಯವಾಗಿ ಏನು ಬಳಸಬಹುದು? ಪೌಷ್ಟಿಕತೆ ಕಳೆದುಕೊಳ್ಳದೇ, ಹಸಿವು ತಣಿಸುವುದಕ್ಕೆ ಯಾವ ತಿನಿಸು ಉತ್ತಮ? ಈ ರೀತಿಯ ಪ್ರಶ್ನೆಗಳು ಪ್ರತಿಯೊಬ್ಬರ ಮನದಲ್ಲೂ ಮೂಡುವುದು ಸಾಮಾನ್ಯ. ಈ ಸಂದರ್ಭಗಳಲ್ಲಿ ಸಾಮಾ ಉಪ್ಮಾ (Sama Rice Upma) ಅತ್ಯುತ್ತಮ ಆಯ್ಕೆ. ಸಾಮಾ ಅನ್ನವನ್ನು ಉಪವಾಸದ ಅಕ್ಕಿ ಎಂದೇ ಕರೆಯುತ್ತಾರೆ. ಇದರಿಂದ ತಯಾರಾಗುವ ಉಪ್ಮಾ ರುಚಿಕರವಾಗಿದ್ದು, ಆರೋಗ್ಯಕ್ಕೂ ಉತ್ತಮ ಆಹಾರವಾಗಿದೆ. ಈ ಲೇಖನದಲ್ಲಿ ಸಾಮಾ ಉಪ್ಮಾ ತಯಾರಿಸಲು ಬೇಕಾದ ಪದಾರ್ಥಗಳು ಮತ್ತು ತಯಾರಿಸುವ ವಿಧಾನವನ್ನು (Sama Upma Recipe) ತಿಳಿಸಲಾಗಿದೆ.

ಸಾಮಾ ಒಂದು ರೀತಿಯ ಸಣ್ಣ ರಾಗಿ. ಇದನ್ನು ಉಪವಾಸದ ಆಹಾರವಾಗಿ ಹೆಚ್ಚಾಗಿ ಬಳಸುತ್ತಾರೆ. ಈ ಸಾಮಾ ಅಕ್ಕಿಯಿಂದ ತಯಾರಿಸುವ ಉಪ್ಮಾ ಸುಲಭವಾಗಿ ಜೀರ್ಣವಾಗುವ ಒಂದು ಗ್ಲೂಟೆನ್-ಫ್ರೀ ಆಹಾರವಾಗಿದೆ. ಇದು ಕೇವಲ ಉಪವಾಸದ ದಿನಗಳಿಗೆ ಮಾತ್ರ ಸೀಮಿತವಾಗಿಲ್ಲ. ಇದು ನಿಮ್ಮ ದೈನಂದಿನ ಆರೋಗ್ಯಕರ ಉಪಹಾರಕ್ಕೂ ಒಂದು ಉತ್ತಮ ಆಯ್ಕೆ. ಇದು ಕಡಿಮೆ ಕ್ಯಾಲೋರಿಗಳನ್ನು ಹೊಂದಿದ್ದು, ದೇಹಕ್ಕೆ ಅಗತ್ಯವಾದ ಶಕ್ತಿಯನ್ನು ನೀಡುತ್ತದೆ. ಹಾಗಾಗಿ, ತೂಕ ಇಳಿಸಿಕೊಳ್ಳಲು ಬಯಸುವವರಿಗೆ ಇದು ಹೇಳಿ ಮಾಡಿಸಿದ ಆಹಾರ. ಇದರ ರುಚಿ ಮತ್ತು ಆರೋಗ್ಯಕರ ಗುಣಗಳು ಇದನ್ನು ಎಲ್ಲರಿಗೂ ಇಷ್ಟವಾಗುವಂತೆ ಮಾಡುತ್ತವೆ.

ಸಾಮಾ ಉಪ್ಮಾ ಮಾಡಲು ಬೇಕಾಗುವ ಸಾಮಗ್ರಿಗಳು

• ಸಾಮಾ ಅಕ್ಕಿ
• ಕಡಲೆಕಾಯಿ
• ಹಸಿ ಮೆಣಸಿನಕಾಯಿ
• ಶುಂಠಿ
• ಕರಿಬೇವಿನ ಎಲೆಗಳು
• ಆಲೂಗಡ್ಡೆ
• ತುಪ್ಪ ಅಥವಾ ಎಣ್ಣೆ
• ಸೈಂಧವ ಲವಣ (ಉಪವಾಸದ ಉಪ್ಪು)
• ನಿಂಬೆ ರಸ
• ನೀರು
• ಹಸಿ ಕೊತ್ತಂಬರಿ ಸೊಪ್ಪು

ಸಾಮಾ ಉಪ್ಮಾ ತಯಾರಿಸುವ ವಿಧಾನ

ಮೊದಲಿಗೆ, ಒಂದು ಕಪ್ ಸಮ ಅಕ್ಕಿಯನ್ನು ಚೆನ್ನಾಗಿ ತೊಳೆದು 10 ನಿಮಿಷಗಳ ಕಾಲ ನೀರಿನಲ್ಲಿ ನೆನೆಸಿಡಿ. ಇದರಿಂದ ಅಕ್ಕಿ ಮೃದುವಾಗಿ ಬೇಗ ಬೇಯುತ್ತದೆ. ಒಂದು ಬಾಣಲೆಯಲ್ಲಿ ತುಪ್ಪ ಅಥವಾ ಎಣ್ಣೆ ಬಿಸಿ ಮಾಡಿ. ಬಿಸಿಯಾದ ನಂತರ ಅದಕ್ಕೆ ಕರಿಬೇವಿನ ಎಲೆಗಳು, ಸಣ್ಣಗೆ ಹೆಚ್ಚಿದ ಹಸಿ ಮೆಣಸಿನಕಾಯಿ ಮತ್ತು ತುರಿದ ಶುಂಠಿಯನ್ನು ಹಾಕಿ ಹುರಿಯಿರಿ. ಈಗ ಅದೇ ಬಾಣಲೆಗೆ ಸಣ್ಣಗೆ ಹೆಚ್ಚಿದ ಆಲೂಗಡ್ಡೆಯನ್ನು ಸೇರಿಸಿ, ಅದು ಸ್ವಲ್ಪ ಮೃದುವಾಗುವವರೆಗೆ ಬೇಯಿಸಿ. ನಂತರ, ಹುರಿದ ಕಡಲೆಕಾಯಿಯನ್ನು ಸೇರಿಸಿ ಚೆನ್ನಾಗಿ ಮಿಕ್ಸ್‌ ಮಾಡಿ.

ಈಗ ನೆನೆಸಿದ ಸಮ ಅಕ್ಕಿಯಲ್ಲಿರುವ ನೀರನ್ನು ಸಂಪೂರ್ಣವಾಗಿ ಬಸಿದು, ಅದನ್ನು ಬಾಣಲೆಗೆ ಹಾಕಿ. ಹಸಿರು ಮೆಣಸಿನಕಾಯಿ, ಶುಂಠಿ ಮತ್ತು ಆಲೂಗಡ್ಡೆಯೊಂದಿಗೆ ಅಕ್ಕಿಯನ್ನು ಲಘುವಾಗಿ ಹುರಿಯಿರಿ. ನಂತರ 2 ಕಪ್ ನೀರು ಮತ್ತು ರುಚಿಗೆ ತಕ್ಕಷ್ಟು ಸೈಂಧವ ಲವಣವನ್ನು ಸೇರಿಸಿ. ಬಾಣಲೆಯನ್ನು ಮುಚ್ಚಿ, ಕಡಿಮೆ ಉರಿಯಲ್ಲಿ 10 ನಿಮಿಷಗಳ ಕಾಲ ಬೇಯಲು ಬಿಡಿ. ನೀರು ಸಂಪೂರ್ಣವಾಗಿ ಹೀರಿಕೊಂಡ ನಂತರ ಮತ್ತು ಅಕ್ಕಿಯ ಕಾಳುಗಳು ಉಬ್ಬಿದ ನಂತರ, ಒಲೆ ಆಫ್ ಮಾಡಿ.

ಬಾಣಲೆಯನ್ನು ಆಫ್ ಮಾಡಿದ ನಂತರ, ನಿಂಬೆ ರಸ ಸೇರಿಸಿ ಚೆನ್ನಾಗಿ ಮಿಶ್ರಣ ಮಾಡಿ. ನಂತರ ಸಣ್ಣಗೆ ಹೆಚ್ಚಿದ ಹಸಿ ಕೊತ್ತಂಬರಿ ಸೊಪ್ಪಿನಿಂದ ಅಲಂಕರಿಸಿ. ಇಷ್ಟು ಮಾಡಿದರೆ ರುಚಿಕರವಾದ ಮತ್ತು ಆರೋಗ್ಯಕರ ಸಾಮಾ ಉಪ್ಮಾ ಸಿದ್ಧ. ಇದನ್ನು ಬಿಸಿ ಇರುವಾಗಲೇ ಸವಿಯಬಹುದು.

ಸಾಮಾ ಅಕ್ಕಿ ಸೇವನೆಯ ಪ್ರಯೋಜನಗಳು

• ಉಪವಾಸದಲ್ಲಿ ಶಕ್ತಿ: ಇದು ಹೊಟ್ಟೆಯನ್ನು ಹಗುರವಾಗಿರಿಸಿ ದೀರ್ಘಕಾಲದವರೆಗೆ ಹಸಿವಾಗದಂತೆ ತಡೆಯುತ್ತದೆ.

• ಹೆಚ್ಚಿನ ಫೈಬರ್ ಮತ್ತು ಪ್ರೋಟೀನ್: ಇದು ಉತ್ತಮ ಫೈಬರ್ ಮತ್ತು ಪ್ರೋಟೀನ್ ಅಂಶವನ್ನು ಹೊಂದಿದ್ದು, ಸಮತೋಲಿತ ಆಹಾರಕ್ಕೆ ಅಗತ್ಯವಾಗಿದೆ.

• ತೂಕ ಇಳಿಕೆಗೆ ಸಹಕಾರಿ: ಕಡಿಮೆ ಕ್ಯಾಲೋರಿಗಳನ್ನು ಹೊಂದಿರುವ ಕಾರಣ ಇದು ತೂಕ ಇಳಿಕೆಗೆ ಉತ್ತಮ ಆಯ್ಕೆ.

• ಹೃದಯದ ಆರೋಗ್ಯ: ಸಾಮಾ ಅಕ್ಕಿ ರಕ್ತದಲ್ಲಿನ ಸಕ್ಕರೆ ಮತ್ತು ಕೊಲೆಸ್ಟ್ರಾಲ್ ಮಟ್ಟವನ್ನು ನಿಯಂತ್ರಿಸಲು ಸಹಾಯ ಮಾಡುತ್ತದೆ.