ನವರಾತ್ರಿ ಉಪವಾಸಕ್ಕೆ 10 ನಿಮಿಷದಲ್ಲಿ ಈ ಸಬ್ಬಕ್ಕಿ ವಡೆ ರೆಡಿ.. ಮಾಡೋದು ಸಿಕ್ಕಾಪಟ್ಟೆ ಸುಲಭ

ನವರಾತ್ರಿ ಹಬ್ಬವು ಕೇವಲ ಭಕ್ತಿ, ಶ್ರದ್ಧೆ ಮತ್ತು ಆರಾಧನೆಗೆ ಸೀಮಿತವಲ್ಲ. ಇದು ವಿಭಿನ್ನ ಹಾಗೂ ವಿಶೇಷವಾದ ಆಹಾರ ಪದಾರ್ಥಗಳನ್ನು ಸವಿಯುವ ಕಾಲವೂ ಹೌದು. ಈ ಒಂಬತ್ತು ದಿನಗಳ ಕಾಲ ದೇಶಾದ್ಯಂತ ಭಕ್ತರು ನವರಾತ್ರಿ (Navratri) ಉಪವಾಸ ವ್ರತ ಆಚರಿಸಿ, ದುರ್ಗಾ ದೇವಿಯ ವಿವಿಧ ಸ್ವರೂಪಗಳನ್ನು ಪೂಜಿಸುತ್ತಾರೆ. ಈ ಉಪವಾಸದ ಸಮಯದಲ್ಲಿ ಧಾನ್ಯಗಳನ್ನು ಸಾಮಾನ್ಯವಾಗಿ ಸೇವಿಸುವುದಿಲ್ಲ. ಬದಲಾಗಿ ಹಣ್ಣು, ಹಾಲು, ಸಬ್ಬಕ್ಕಿ ಅಥವಾ ಸಾಬುದಾನ, ಆಲೂಗಡ್ಡೆ ಮತ್ತು ಕೆಲವು ನಿರ್ದಿಷ್ಟ ಆಹಾರ ಪದಾರ್ಥಗಳಿಗೆ ಆದ್ಯತೆ ನೀಡಲಾಗುತ್ತದೆ. ಇಂತಹ ಆಹಾರಗಳಲ್ಲಿ ಸಬ್ಬಕ್ಕಿ ವಡೆ ಅಥವಾ ಸಾಬುದಾನ ವಡೆ (Sabudana Vada) ಅತ್ಯಂತ ಜನಪ್ರಿಯ ಮತ್ತು ಬಾಯಿಗೂ ರುಚಿಸುವಂತಹ ಉಪವಾಸ ಖಾದ್ಯವಾಗಿದೆ.

ಸಬ್ಬಕ್ಕಿ ವಡೆಗಳು (sabudana wada) ಹೊರಗೆ ಗರಿಗರಿಯಾಗಿ ಮತ್ತು ಒಳಗೆ ಮೃದುವಾಗಿರುತ್ತವೆ. ಇವು ರುಚಿಯನ್ನು ನೀಡುವುದರ ಜೊತೆಗೆ ದೇಹಕ್ಕೆ ಅಗತ್ಯವಾದ ಶಕ್ತಿಯನ್ನೂ ಒದಗಿಸುತ್ತವೆ. ನವರಾತ್ರಿ ಹಬ್ಬದ ಉಪವಾಸದ ಸಂದರ್ಭದಲ್ಲಿ ದೈಹಿಕವಾಗಿ ಚೈತನ್ಯದಿಂದಿರಲು ಮತ್ತು ಹಸಿವನ್ನು ನೀಗಿಸಲು ಸಬ್ಬಕ್ಕಿ ವಡೆ ಅತ್ಯುತ್ತಮ ಆಯ್ಕೆಯಾಗಿದೆ. ಹಾಗಿದ್ರೆ, ಸಬ್ಬಕ್ಕಿ ವಡೆ ತಯಾರಿಸಲು ಬೇಕಾಗುವ ಸಾಮಗ್ರಿಗಳು ಮತ್ತು ತಯಾರಿಸುವ ವಿಧಾನವನ್ನು (Sabudana Vada Recipe) ತಿಳಿಯೋಣ ಬನ್ನಿ.

ಸಬ್ಬಕ್ಕಿ ವಡೆ ತಯಾರಿಸಲು ಬೇಕಾಗುವ ಸಾಮಗ್ರಿಗಳು

• ಸಾಬುದಾನ ಅಥವಾ ಸಬ್ಬಕ್ಕಿ - ಒಂದು ಕಪ್
• ಆಲೂಗಡ್ಡೆ - ಎರಡು (ಬೇಯಿಸಿ ಹಿಸುಕಿದ)
• ಹಸಿ ಮೆಣಸಿನಕಾಯಿ - ಎರಡು (ಸಣ್ಣಗೆ ಕತ್ತರಿಸಿದ)
• ಕಡಲೆಕಾಯಿ - ಕಾಲು ಕಪ್
• ತುರಿದ ಶುಂಠಿ - ಒಂದು ಸಣ್ಣ ತುಂಡು
• ಉಪ್ಪು - ರುಚಿಗೆ ತಕ್ಕಷ್ಟು ಕಲ್ಲು
• ಕೊತ್ತಂಬರಿ ಸೊಪ್ಪು - ಸಣ್ಣಗೆ ಕತ್ತರಿಸಿದ್ದು
• ನಿಂಬೆ ರಸ - ಒಂದು ಚಮಚ
• ಕರಿಯಲು ಅಗತ್ಯವಾದ ಎಣ್ಣೆ.

ಸಬ್ಬಕ್ಕಿ ವಡೆ ತಯಾರಿಸುವ ವಿಧಾನ

- ಮೊದಲಿಗೆ, ಸಬ್ಬಕ್ಕಿಯನ್ನು ಚೆನ್ನಾಗಿ ತೊಳೆಯಿರಿ. ಅದರ ಎರಡು ಪಟ್ಟು ನೀರಿನಲ್ಲಿ ನಾಲ್ಕರಿಂದ ಐದು ಗಂಟೆಗಳ ಕಾಲ ನೆನೆಸಿಡಿ. ನೆನೆಸಿದ ನಂತರ, ಹೆಚ್ಚುವರಿ ನೀರನ್ನು ಸಂಪೂರ್ಣವಾಗಿ ಬಸಿದು ತೆಗೆಯಬೇಕು.

- ಇದಾದ ಬಳಿಕ, ದೊಡ್ಡ ಬಟ್ಟಲಿನಲ್ಲಿ ನೆನೆಸಿದ ಸಬ್ಬಕ್ಕಿ, ಬೇಯಿಸಿದ ಆಲೂಗಡ್ಡೆ, ಹುರಿದ ಕಡಲೆಕಾಯಿ ಪುಡಿ, ಹಸಿ ಮೆಣಸಿನಕಾಯಿ, ಶುಂಠಿ, ಕೊತ್ತಂಬರಿ ಸೊಪ್ಪು, ಕಲ್ಲು ಉಪ್ಪು ಮತ್ತು ನಿಂಬೆ ರಸವನ್ನು ಸೇರಿಸಿ ಚೆನ್ನಾಗಿ ಮಿಶ್ರಣ ಮಾಡಿ.

- ಈಗ ಆ ಮಿಶ್ರಣದಿಂದ ಸಣ್ಣ ಸಣ್ಣ ಉಂಡೆಗಳನ್ನು ಮಾಡಿ. ನಂತರ ಅವುಗಳನ್ನು ವಡೆ ಆಕಾರಕ್ಕೆ ಬರುವಂತೆ ಸ್ವಲ್ಪ ಚಪ್ಪಟೆ ಮಾಡಿ. ಇದು ವಡೆಗಳು ಸಮವಾಗಿ ಕರಿಯಲು ಸಹಾಯ ಮಾಡುತ್ತದೆ.

- ಬಳಿಕ ಒಂದು ಬಾಣಲೆಯಲ್ಲಿ ಎಣ್ಣೆಯನ್ನು ಹಾಕಿ ಬಿಸಿ ಮಾಡಿ. ಅದಕ್ಕೆ ವಡೆಗಳನ್ನು ಹಾಕಿ. ಎರಡೂ ಬದಿಗಳು ಗೋಲ್ಡನ್ ಬ್ರೌನ್ ಬಣ್ಣ ಬರುವವರೆಗೆ ಕರಿಯಿರಿ.

- ಇಷ್ಟು ಮಾಡಿದರೆ ಸಾಕು, ಬಿಸಿ ಬಿಸಿಯಾದ ಸಬ್ಬಕ್ಕಿ ಅಥವಾ ಸಾಬುದಾನ ವಡೆ ಸಿದ್ಧ. ಇವುಗಳನ್ನು ಚಟ್ನಿ ಅಥವಾ ಮೊಸರಿನೊಂದಿಗೆ ಸವಿಯಬಹುದು.

ಸಬ್ಬಕ್ಕಿಯ ಆರೋಗ್ಯ ಪ್ರಯೋಜನಗಳು

ಸಬ್ಬಕ್ಕಿಯು ದೇಹಕ್ಕೆ ತ್ವರಿತ ಶಕ್ತಿಯನ್ನು ಒದಗಿಸುವ ಕಾರ್ಬೋಹೈಡ್ರೇಟ್‌ಗಳ ಉತ್ತಮ ಮೂಲವಾಗಿದೆ. ಆಲೂಗಡ್ಡೆಯು ಹೊಟ್ಟೆ ತುಂಬಿದ ಅನುಭವ ನೀಡಿ, ಶಕ್ತಿಯನ್ನು ಉಳಿಸಿಕೊಳ್ಳಲು ಸಹಾಯ ಮಾಡುತ್ತದೆ. ಕಡಲೆಕಾಯಿಯಲ್ಲಿ ಪ್ರೋಟೀನ್, ಆರೋಗ್ಯಕರ ಕೊಬ್ಬುಗಳು ಮತ್ತು ಶಕ್ತಿ ವರ್ಧಕ ಗುಣಗಳಿವೆ. ಶುಂಠಿ ಮತ್ತು ಮೆಣಸಿನಕಾಯಿಗಳು ಜೀರ್ಣಕ್ರಿಯೆಯನ್ನು ಸುಧಾರಿಸಿ, ವಡೆಗೆ ವಿಶಿಷ್ಟವಾದ ರುಚಿ ನೀಡುತ್ತವೆ.

ಉಪವಾಸಕ್ಕೆ ಪರಿಪೂರ್ಣ ಆಯ್ಕೆ

ನವರಾತ್ರಿ ಉಪವಾಸದ ಸಮಯದಲ್ಲಿ ದೇಹವನ್ನು ಚಟುವಟಿಕೆಯಿಂದ ಇರಿಸಿಕೊಳ್ಳಲು ಪೌಷ್ಟಿಕ ಆಹಾರ ಅತ್ಯಗತ್ಯ. ಸಬ್ಬಕ್ಕಿ ವಡೆಗಳು ಕೇವಲ ರುಚಿಕರ ಮತ್ರವಲ್ಲ. ಜೊತೆಗೆ ದೇಹಕ್ಕೆ ಅಗತ್ಯವಾದ ಶಕ್ತಿ ಒದಗಿಸುತ್ತವೆ. ಇದೇ ಕಾರಣಕ್ಕಾಗಿ ಇದು ನವರಾತ್ರಿಯ ಅತ್ಯಂತ ಜನಪ್ರಿಯ ಉಪವಾಸದ ರೆಸಿಪಿಯಲ್ಲಿ ಒಂದಾಗಿದೆ. ಈ ನವರಾತ್ರಿಯಲ್ಲಿ, ನಿಮ್ಮ ಕುಟುಂಬದೊಂದಿಗೆ ಸಬ್ಬಕ್ಕಿ ವಡೆಗಳನ್ನು ತಯಾರಿಸಿ, ದುರ್ಗಾ ದೇವಿಗೆ ಭಕ್ತಿ ಸಲ್ಲಿಸಿ.