ಅಪರೂಪದ ಹಲಸಿನಕಾಯಿ ಸಾಂಬಾರ್ ಮಾಡುವುದು ಹೇಗೆ? ಈ ರುಚಿ ಸವಿದಿದ್ದೀರಾ?

ಬೇಸಿಗೆಯ ಸಮಯ ಆರಂಭಗೊಳ್ಳುತ್ತಿದ್ದರೆ ಹಲಸಿನ ಕಾಯಿಯ ಸೀಸನ್ ಆರಂಭಗೊಳ್ಳಲಿದೆ. ಹಲಸಿನ ಹಣ್ಣಿನ ಹಲವು ಖಾದ್ಯಗಳ ಮಾಡುವುದು ಸಾಮಾನ್ಯ. ಅದರಂತೆ ಹಲಸಿನ ಕಾಯಿಯ ಹಲವು ಬಗೆಯ ಖಾದ್ಯಗಳನ್ನು ಸಹ ಮಾಡಿ ಸವಿಯೋದು ನೋಡಬಹುದು. ಹಲಸಿನ ಕಾಯಿಯ ಸಾಂಬಾರ್ ಮಾಡಿದ್ರೆ ಊಟದೊಂದಿಗೆ ಅದ್ಭುತ ರುಚಿ ತರಲಿದೆ.

ಎಲ್ಲಾ ಕಾಲದಲ್ಲೂ ಈ ಹಲಸಿನ ಕಾಯಿ ಸಾಂಬಾರ್ ಮಾಡಲು ಸಿಗುವುದಿಲ್ಲ. ಅಪರೂಪಕ್ಕೆ ಸಿಗುವ ಈ ಹಲಸಿನಕಾಯಿಯ ಸಾಂಬಾರ್ ಮಾಡಿದ್ರೆ ಮನೆ ಮಂದಿಗೆಲ್ಲಾ ಇಷ್ವವಾಗುತ್ತೆ. ಹಾಗೆ ಊಟದೊಂದಿಗೆ ಮಾತ್ರವಲ್ಲದೆ ತಿಂಡಿಯೊಂದಿಗೂ ಇದನ್ನು ಸವಿಯಲು ಬಯಸುತ್ತಾರೆ. ಆದ್ರೆ ಹಲವರಿಗೆ ಈ ಹಲಸಿನಕಾಹಿ ಸಾಂಬಾರ್ ಮಾಡುವುದು ಹೇಗೆ ಅನ್ನೋದು ತಿಳಿದಿರೋದಿಲ್ಲ.

ನಾವಿಂದು ಮನೆಯಲ್ಲಿ ಸುಲಭವಾಗಿ ಈ ಹಲಸಿನಕಾಯಿ ಸಾಂಬಾರ್ ಮಾಡುವ ಕುರಿತಾಗಿ ತಿಳಿದುಕೊಳ್ಳೋಣ. ಯಾವ ರೀತಿ ಇದನ್ನು ಹೆಚ್ಚಿಕೊಳ್ಳಬೇಕು. ಯಾವೆಲ್ಲಾ ಮಸಾಲೆ ಪದಾರ್ಥವನ್ನು ಹಾಕಿ ಮಾಡಬೇಕು ಎಂಬುದು ಹಾಗೆ ಎಷ್ಟು ಸಮಯ ಹಿಡಿಯಲಿದೆ ಎಂಬೆಲ್ಲಾ ಮಾಹಿತಿಯನ್ನು ಇಲ್ಲಿ ತಿಳಿದುಕೊಳ್ಳೋಣ.

ಹಲಸಿನಕಾಯಿ ಸಾಂಬಾರ್ ಮಾಡಲು ಯಾವೆಲ್ಲಾ ವಸ್ತುಗಳು ಬೇಕು

• ಹಲಸಿನಕಾಯಿ- ಒಂದು
• ಟೊಮೆಟೋ
• ಈರುಳ್ಳಿ
• ಲವಂಗ
• ಚಕ್ಕೆ
• ಸಾಂಬಾರ್ ಪುಡಿ
• ತೆಂಗಿನಕಾಯಿ ತುರಿ
• ಕೊತ್ತಂಬರಿ ಸೊಪ್ಪು
• ಉಪ್ಪು
• ಎಣ್ಣೆ
• ಶುಂಠಿ ಬೆಳ್ಳುಳ್ಳಿ ಪೇಸ್ಟ್
• ಖಾರದ ಪುಡಿ

ಹಲಸಿನಕಾಯಿ ಸಾಂಬಾರ್ ಮಾಡುವುದು ಹೇಗೆ?

ಹಲಸಿನಕಾಯಿಯ ಸಿಪ್ಪೆ ತೆಗೆದು ಅನಂತರ ಸಣ್ಣದಾಗಿ ಹೆಚ್ಚಿಕೊಂಡು ನೀರಿನಲ್ಲಿ ಹಾಕಿಡಬೇಕು. ಈ ಸಾಂಬಾರ್‌ ಗೆ ನೀವು ಅವರೆಕಾಳು ಹಾಕಿ ಮಾಡಿಕೊಳ್ಳಬಹುದು. ಈಗ ಮಿಕ್ಸಿ ಜಾರ್ ತೆಗೆದುಕೊಂಡು ಅದಕ್ಕೆ ತೆಂಗಿನಕಾಯಿ ತುರಿ, 2 ಟೊಮೆಟೋ, 2 ಈರುಳ್ಳಿ, ಚಕ್ಕೆ ಲವಂಗ, ಸಾಂಬಾರ್ ಪುಡಿ, ಕೊತ್ತಂಬರಿ ಸೊಪ್ಪು ಹಾಕಿಕೊಂಡು ನೀರು ಹಾಕಿ ನುಣ್ಣಗೆ ರುಬ್ಬಿ ತೆಗೆದಿಟ್ಟುಕೊಳ್ಳಿ.

ಒಲೆ ಮೇಲೆ ಕುಕ್ಕರ್ ಇಟ್ಟು ಅದಕ್ಕೆ ಎಣ್ಣೆ ಹಾಕಿ ಬಿಸಿಯಾಗಲು ಬಿಡಿ. ಅನಂತರ ಸಾಸಿವೆ, ಈರುಳ್ಳಿ, ಕರಿಬೇವು, ಶುಂಠಿ ಬೆಳ್ಳುಳ್ಳಿ ಪೇಸ್ಟ್, ಟೊಮೆಟೋ ಹಾಕಿ ಫ್ರೈ ಮಾಡಿಕೊಳ್ಳಿ. 2 ನಿಮಿಷ ಬಿಟ್ಟು ಈಗ ರುಬ್ಬಿಕೊಂಡಿದ್ದ ಮಸಾಲೆಯಲ್ಲಿ ಅರ್ಧ ಭಾಗ ಮಾತ್ರ ಈಗ ಕುಕ್ಕರ್‌ಗೆ ಹಾಕಿ ಮಿಶ್ರಣ ಮಾಡಿಕೊಳ್ಳಿ. ಅನಂತರ ಇದಕ್ಕೆ ಕತ್ತರಿಸಿ ಇಟ್ಟುಕೊಂಡಿದ್ದ ಹಲಸಿನಕಾಯಿ ಅನ್ನು ಸಹ ಇದಕ್ಕೆ 2ರಿಂದ 3 ನಿಮಿಷ ಫ್ರೈ ಮಾಡಿಕೊಳ್ಳಿ.

ಈಗ ರುಬ್ಬಿದ್ದ ಎಲ್ಲಾ ಮಸಾಲೆಯನ್ನು ಇದಕ್ಕೆ ಹಾಕಿ ಮತ್ತೆ 2 ನಿಮಿಷ ಫ್ರೈ ಮಾಡಿಕೊಳ್ಳಿ. ಅನಂತರ ನೀರು ಸೇರಿಸಿಕೊಳ್ಳಿ, ನಿಮಗೆ ಯಾವ ಪ್ರಮಾಣದಲ್ಲಿ ಸಾಂಬಾರ್ ಇರಬೇಕೋ ಆ ಹದಕ್ಕೆ ನೀರು ಹಾಕಿ. ಕೊನೆಯಲ್ಲಿ ರುಚಿಗೆ ತಕ್ಕಷ್ಟು ಉಪ್ಪು ಸಹ ಹಾಕಿಕೊಳ್ಳಿ. ಈಗ ಮುಚ್ಚಳ ಮುಚ್ಚಿ 1 ಸೀಟಿ ಹೊಡೆಯಲು ಬಿಡಿ. ಇದಾದ ಬಳಿಕ ಕುಕ್ಕರ್ ತಣ್ಣಗಾದ ಬಳಿಕ ಮುಚ್ಚಳ ತೆಗೆದು ಒಮ್ಮೆ ಮಿಶ್ರಣ ಮಾಡಿಕೊಳ್ಳಿ.

ಇಷ್ಟಾದರೆ ಸಾಂಬಾರ್ ಸಿದ್ದವಾಗುತ್ತೆ. ಬೇಕಿದ್ದರೆ ಒಗ್ಗರಣೆಯೂ ಹಾಕಿಕೊಳ್ಳಬಹುದು, ಇಲ್ಲದಿದ್ದರೆ ಹೀಗೆಯೇ ಸವಿಯಬಹುದು. ನೀವು ಸಹ ಮನೆಯಲ್ಲಿ ಹಲಸಿನಕಾಯಿ ಸಾಂಬಾರ್ ಅನ್ನು ಮಾಡಿ ನೋಡಿ.