2 ಆಲೂಗೆಡ್ಡೆ ಇದ್ದರೆ.. ಈ ರೀತಿ ಮಸಾಲ ಪೂರಿ ಮಾಡಿ! ಒಮ್ಮೆ ತಿಂದ್ರೆ ನಿಮ್ಮ ಕೈ ರುಚಿ ಹೊಗಳೋದು ಗ್ಯಾರಂಟಿ

ಎರಡು ಆಲೂಗೆಡ್ಡೆ ಇದ್ದರೆ ಸಾಕು! ಈ ರೀತಿ ಮಸಾಲ ಪೂರಿ ಮಾಡಿ ನೋಡಿ.. ಮಕ್ಕಳಿಗೆ ಇದು ತುಂಬಾ ಇಷ್ಟವಾಗುತ್ತೆ. ಒಮ್ಮೆ ತಿಂದರೆ ಎಲ್ಲರೂ ನಿಮ್ಮ ಅಡುಗೆಯನ್ನು ಹೊಗಳೋದು ಗ್ಯಾರಂಟಿ. ಹೌದು, ವಿಶೇಷ ಸಂದರ್ಭಗಳಲ್ಲಿ ಅಥವಾ ಮನೆಯಲ್ಲಿ ತರಕಾರಿಗಳು ಇಲ್ಲದಿದ್ದಾಗ ರುಚಿಕರವಾದ ಅಡುಗೆಗೆ ಹುಡುಕಾಡುತ್ತಿದ್ದರೆ, ಆಲೂ ಮಸಾಲ ಪೂರಿ (Potato Masala Puri) ಅತ್ಯುತ್ತಮ ಆಯ್ಕೆ.

ಇದು ಕೇವಲ ರುಚಿಕರ ಅಷ್ಟೇ ಅಲ್ಲ, ನೋಡಲು ಕೂಡ ಆಕರ್ಷಕವಾಗಿದ್ದು, ಮಕ್ಕಳಿಂದ ಹಿಡಿದು ಹಿರಿಯರವರೆಗೆ ಎಲ್ಲರೂ ಇಷ್ಟಪಡುವ ತಿನಿಸಾಗಿದೆ. ಮನೆಯಲ್ಲೇ ಸುಲಭವಾಗಿ ಇದನ್ನು ತಯಾರಿಸಬಹುದಾಗಿದೆ. ಸಾಮಾನ್ಯ ಪೂರಿಗಿಂತ ಭಿನ್ನವಾಗಿರುವ ಈ ಆಲೂ ಮಸಾಲ ಪೂರಿಯು ಮೃದುವಾಗಿರುತ್ತದೆ. ಅಲ್ಲದೆ, ಮಸಾಲೆಯುಕ್ತವಾಗಿರುವುದರಿಂದ ತಿನ್ನಲು ಬಹಳ ಆನಂದ ನೀಡುತ್ತದೆ.

Photo Credit: ಸಂಗ್ರಹ ಚಿತ್ರ

ಆಲೂ ಮಸಾಲ ಪೂರಿಯ ವಿಶೇಷತೆ ಅಂದ್ರೆ ಇದಕ್ಕೆ ಪ್ರತ್ಯೇಕ ಪಲ್ಯ ಅಥವಾ ಸಾರಿನ ಅಗತ್ಯವಿಲ್ಲ. ಇದನ್ನು ಹಾಗೆಯೇ ಅಥವಾ ಮೊಸರು, ಚಟ್ನಿಯಂತಹ ಸರಳ ಅಡ್ಡ ತಿನಿಸುಗಳೊಂದಿಗೆ ಸವಿಯಬಹುದು. ಈ ಪೂರಿಗೆ ಬೇಕಾದ ಸಾಮಗ್ರಿಗಳು ಮತ್ತು ತಯಾರಿಸುವ ವಿಧಾನ (Aloo Masala Puri Recipe) ಇಲ್ಲಿದೆ.

ಆಲೂ ಮಸಾಲ ಪೂರಿಗೆ ಬೇಕಾಗುವ ಸಾಮಗ್ರಿಗಳು

• ಗೋಧಿ ಹಿಟ್ಟು
• ಆಲೂಗೆಡ್ಡೆ
• ಹಸಿ ಮೆಣಸಿನಕಾಯಿ
• ಶುಂಠಿ
• ಅಚ್ಚ ಖಾರದ ಪುಡಿ
• ಅರಿಶಿನ ಪುಡಿ
• ಗರಂ ಮಸಾಲ
• ಓಮದ ಕಾಳು (ಅಜ್ವೈನ್)
• ಕೊತ್ತಂಬರಿ ಸೊಪ್ಪು
• ಉಪ್ಪು
• ಎಣ್ಣೆ

ಆಲೂ ಮಸಾಲ ಪೂರಿ ತಯಾರಿಸುವ ವಿಧಾನ

- ಮೊದಲಿಗೆ, ಒಂದು ಅಗಲವಾದ ಪಾತ್ರೆಯಲ್ಲಿ ಗೋಧಿ ಹಿಟ್ಟನ್ನು ತೆಗೆದುಕೊಳ್ಳಿ. ಇದಕ್ಕೆ ಚೆನ್ನಾಗಿ ಬೇಯಿಸಿ ಪುಡಿ ಮಾಡಿಟ್ಟುಕೊಂಡ ಆಲೂಗೆಡ್ಡೆಯನ್ನು ಸೇರಿಸಿ. ಆಲೂಗೆಡ್ಡೆಯನ್ನು ಯಾವುದೇ ಗಡ್ಡೆಗಳು ಇಲ್ಲದಂತೆ ಮ್ಯಾಶ್ ಮಾಡುವುದು ಬಹಳ ಮುಖ್ಯ. ಇಲ್ಲದಿದ್ದರೆ, ಪೂರಿಗಳು ಸರಿಯಾಗಿ ಉಬ್ಬುವುದಿಲ್ಲ.

- ಈಗ ಹಿಟ್ಟಿಗೆ ಸಣ್ಣಗೆ ಹೆಚ್ಚಿದ ಹಸಿ ಮೆಣಸಿನಕಾಯಿ, ತುರಿದ ಶುಂಠಿ, ಅರಿಶಿನ, ಖಾರದ ಪುಡಿ, ಗರಂ ಮಸಾಲ ಮತ್ತು ರುಚಿಗೆ ತಕ್ಕಷ್ಟು ಉಪ್ಪು ಸೇರಿಸಿ.

- ನಂತರ ಓಮದ ಕಾಳುಗಳನ್ನು ಕೈಯಲ್ಲಿ ಸ್ವಲ್ಪ ಉಜ್ಜಿ ಹಿಟ್ಟಿಗೆ ಹಾಕಿ. ಇದು ಜೀರ್ಣಕ್ರಿಯೆಗೆ ಮತ್ತು ರುಚಿಗೆ ತುಂಬಾ ಪ್ರಯೋಜನಕಾರಿ. ಕೊನೆಯಲ್ಲಿ ಸಣ್ಣಗೆ ಹೆಚ್ಚಿದ ಕೊತ್ತಂಬರಿ ಸೊಪ್ಪು ಸೇರಿಸಿ.

- ಮೊದಲು ಎಲ್ಲ ಸಾಮಗ್ರಿಗಳನ್ನು ನೀರಿನ ಸಹಿತ ಚೆನ್ನಾಗಿ ಬೆರೆಸಿ. ಇದು ಆಲೂಗೆಡ್ಡೆಯ ತೇವಾಂಶವನ್ನು ಹಿಟ್ಟಿನೊಂದಿಗೆ ಸೇರಿಸಲು ಸಹಾಯ ಮಾಡುತ್ತದೆ.

- ನಂತರ ಒಂದು ಚಮಚ ಎಣ್ಣೆ ಸೇರಿಸಿ, ಸ್ವಲ್ಪ ಸ್ವಲ್ಪವೇ ನೀರು ಬೆರೆಸುತ್ತಾ ಗಟ್ಟಿಯಾದ ಪೂರಿ ಹಿಟ್ಟಿನಂತೆ ಕಲಸಿಕೊಳ್ಳಿ. ಹಿಟ್ಟು ತುಂಬಾ ಮೃದುವಾದರೆ ಪೂರಿ ಹೆಚ್ಚು ಎಣ್ಣೆ ಹೀರಿಕೊಳ್ಳುತ್ತದೆ. ಆದ್ದರಿಂದ, ಗಟ್ಟಿಯಾಗಿರುವುದು ಉತ್ತಮ.

- ಕಲಸಿದ ಹಿಟ್ಟನ್ನು ಹತ್ತು ಅಥವಾ ಹದಿನೈದು ನಿಮಿಷಗಳ ಕಾಲ ಮುಚ್ಚಿಡಿ. ಇದರಿಂದ ಹಿಟ್ಟು ಸರಿಯಾಗಿ ನೆನೆಯುತ್ತದೆ ಮತ್ತು ಪೂರಿಗಳು ಹೆಚ್ಚು ಮೃದುವಾಗುತ್ತವೆ.

- ಕಲಸಿದ ಹಿಟ್ಟಿನಿಂದ ಸಣ್ಣ ಸಣ್ಣ ಉಂಡೆಗಳನ್ನು ಮಾಡಿಕೊಳ್ಳಿ. ಲಟ್ಟಣಿಗೆಯ ಸಹಾಯದಿಂದ ಪೂರಿಗಳನ್ನು ಲಟ್ಟಿಸಿ.

- ಮಸಾಲ ಪೂರಿಗಳನ್ನು ಸಾಮಾನ್ಯ ಪೂರಿಗಳಿಗಿಂತ ಸ್ವಲ್ಪ ದಪ್ಪವಾಗಿ ಲಟ್ಟಿಸಬೇಕು. ಆಗ ಮಾತ್ರ ಅವು ಚೆನ್ನಾಗಿ ಉಬ್ಬುತ್ತವೆ.

- ಈಗ ಒಂದು ಕಡಾಯಿಯಲ್ಲಿ ಎಣ್ಣೆಯನ್ನು ಚೆನ್ನಾಗಿ ಬಿಸಿ ಮಾಡಿ. ಎಣ್ಣೆ ಸರಿಯಾಗಿ ಕಾದ ನಂತರ ಉರಿಯನ್ನು ಮಧ್ಯಮ ಮಟ್ಟದಲ್ಲಿರಿಸಿ, ಲಟ್ಟಿಸಿದ ಪೂರಿಯನ್ನು ಎಣ್ಣೆಗೆ ಹಾಕಿ.

- ಪೂರಿಯ ಮೇಲೆ ಸೌಟಿನಿಂದ ನಿಧಾನವಾಗಿ ಒತ್ತಿದರೆ ಅದು ಚೆನ್ನಾಗಿ ಉಬ್ಬಿ ಬರುತ್ತದೆ. ಎರಡೂ ಬದಿಗಳು ಹೊಂಬಣ್ಣ ಬರುವವರೆಗೆ ಕರಿದು, ಎಣ್ಣೆಯಿಂದ ಹೊರತೆಗೆಯಿರಿ.

ಯಾರೊಂದಿಗೆ ಸೇವಿಸಬೇಕು?

ಬಿಸಿ ಬಿಸಿಯಾದ ಈ ಆಲೂ ಮಸಾಲ ಪೂರಿಯನ್ನು ವಿವಿಧ ಅಡ್ಡ ತಿನಿಸುಗಳೊಂದಿಗೆ ಸವಿಯಬಹುದು.

• ತಣ್ಣನೆಯ ಮೊಸರು ಅಥವಾ ರಾಯತ. ಇದು ಮಸಾಲೆಯುಕ್ತ ಪೂರಿಗೆ ಅದ್ಭುತ ಜೋಡಿ.

• ಮಾವಿನಕಾಯಿ ಉಪ್ಪಿನಕಾಯಿ ಪೂರಿಯ ರುಚಿಯನ್ನು ಮತ್ತಷ್ಟು ಹೆಚ್ಚಿಸಲು ಸಹಾಯ ಮಾಡುತ್ತದೆ.

• ಪುದೀನಾ ಚಟ್ನಿ ಆರೋಗ್ಯಕರ ಮತ್ತು ಅದೇ ಸಮಯದಲ್ಲಿ ರುಚಿಕರವಾದ ಅನುಭವವನ್ನು ನೀಡುತ್ತದೆ.

• ತಣ್ಣಗಾದ ಮೇಲೆಯೂ ರುಚಿಯಾಗಿರುವುದರಿಂದ, ಇದನ್ನು ಪ್ರವಾಸಕ್ಕೆ ಹೋಗುವಾಗ ಅಥವಾ ಮಕ್ಕಳಿಗೆ ಲಂಚ್ ಬಾಕ್ಸ್‌ಗೆ ನೀಡಲು ಅತ್ಯುತ್ತಮ ಆಯ್ಕೆ.