ಎಗ್‌ ಇಷ್ಟ, ಪನ್ನೀರ್ ಕೂಡ ಇಷ್ಟ ಎಂದಾದರೆ ಇಲ್ಲಿದೆ ಎಗ್‌ ಪನ್ನೀರ್ ಕರಿ

ಮೊಟ್ಟೆ-ಪನ್ನೀರ್‌ ಇಮಗೆ ತುಂಬಾ ಇಷ್ಟ ಎಂದಾದರೆ ಇದೆರಡೂ ಸೇರಿಸಿ ಮಾಡುವ ಎಗ್‌-ಪನ್ನೀರ್‌ ಕರಿ ಟ್ರೈ ಮಾಡಿದರೆ ಹೇಗೆ? ಎಗ್‌ ಪನ್ನೀರ್ ಕರಿ ತುಂಬಾ ಸುಲಭದ ರೆಸಿಪಿಯಾಗಿದೆ, ಇದನ್ನು ಮಾಡುವುದು ಕೂಡ ತುಂಬಾ ಸುಲಭ ಕೂಡ ಹೌದು, ಅಲ್ಲದೆ ಟೇಸ್ಟ್‌ ರೆಸ್ಟೋರೆಂಟ್‌ನಲ್ಲಿ ಸಿಗುವಂತಿರುತ್ತದೆ. ಬನ್ನಿ ಎಗ್‌ ಪನ್ನೀರ್‌ ಸರಳ ರೆಸಿಪಿ ನೋಡೋಣ:

100 ಗ್ರಾಂ ಪನ್ನೀರ್
ಮೊಟ್ಟೆ 3-4 ( ಹೆಚ್ಚು ಮೊಟ್ಟೆ ಬೇಕಾದರೂ ಹಾಕಬಹುದು)
ಟೊಮೆಟೊ 3-4
ಈರುಳ್ಳಿ 1
ಖಾರದ ಪುಡಿ 1/2 ಚಮಚ
ಕಾಶ್ಮೀರಿ ಮೆಣಸಿನ ಪುಡಿ 1/2 ಚಮಚ
ಕೊತ್ತಂಬರಿ ಪುಡಿ 1 ಚಮಚ
1/4 ಚಮಚ ಗರಂ ಮಸಾಲ ಪುಡಿ
ಸ್ವಲ್ಪ ಶುಂಠಿ (ಪೇಸ್ಟ್)
ಸ್ವಲ್ಪ ಬೆಳ್ಳುಳ್ಳಿ (ಪೇಸ್ಟ್)
ಗೋಡಂಬಿ 8-10
ಅರಿಶಿಣ ಪುಡಿ ಅರ್ಧ ಚಮಚ
ಕೊತ್ತಂಬರಿ ಸೊಪ್ಪು
ರುಚಿಗೆ ತಕ್ಕ ಉಪ್ಪು
ಎಣ್ಣೆ 2 ಚಮಚ

ಮಾಡುವ ವಿಧಾನ

1. ನೀವು ಮೊದಲಿಗೆ ಮೊಟ್ಟೆಯನ್ನು ಬೇಯಿಸಿ, ಸಿಪ್ಪೆ ಸುಲಿದು ಇಡಿ
2. ಪನ್ನೀರ್‌ ನಿಮಗೆ ಬೇಕಾದ ಆಕಾರ-ಗಾತ್ರದಲ್ಲಿ ಕತ್ತರಿಸಿ
3. ಈಗ ನೀವು ಪನ್ನೀರ್‌ ಅನ್ನು ಎಣ್ಣೆಯಲ್ಲಿ ಸ್ವಲ್ಪ ರೋಸ್ಟ್ ಮಾಡಿ ತೆಗೆದಿಡಿ
4. ಟೊಮೆಟೊವನ್ನು ಪೇಸ್ಟ್‌ ಮಾಡಿಡಿ
5. ಶುಂಠಿ ಮತ್ತು ಬೆಳ್ಳುಳ್ಳಿ ಪೇಸ್ಟ್ ಬೇಡ ಎಂದರೆ ಜಜ್ಜಿ ಇಡಿ
6. ಇಷ್ಟು ಸಿದ್ಧತೆ ಮಾಡಿಕೊಂಡ ಮೇಲೆ ಸಾರಿನ ಪಾತ್ರೆ ಸ್ಟೌವ್‌ ಮೇಲೆ ಇಡಿ
7. ಪಾತ್ರೆಗೆ ಎಣ್ಣೆ ಹಾಕಿ ಬಿಸಿ ಮಾಡಿ
8. ನಂತರ ಶುಂಠಿ-ಬೆಳ್ಳುಳ್ಳಿ ಪೇಸ್ಟ್‌ ಹಾಕಿ, ಮೆಣಸಿನ ಪುಡಿ, ಕೊತ್ತಂಬರಿ ಪುಡಿ, ಗರಂ ಮಸಾಲ ಪುಡಿ, ಅರಿಶಿಣ ಪುಡಿ ಸೇರಿಸಿ
9. ಈರುಳ್ಳಿ ಹಾಕಿ, ಈರುಳ್ಳಿ ಕಂದು ಬಣ್ಣಕ್ಕೆ ಬರುವವರೆಗೆ ಫ್ರೈ ಮಾಡಿ
10. ಗೋಡಂಬಿ ಪೇಸ್ಟ್‌ ಸೇರಿಸಿ, ಬಳಿಕ ಟೊಮೆಟೊ ಪೇಸ್ಟ್‌ ಸೇರಿಸಿ, ಸ್ವಲ್ಪ ನೀರು ಸೇರಿಸಿ ಕುದಿಸಿ
11. ಮಿಶ್ರಣ ಕುದಿ ಬರಲಾರಂಭಿಸಿದಾಗ ಬೇಯಿಸಿದ ಮೊಟ್ಟೆ ಕತ್ತರಿಸಿ ಹಾಕಿ, ಪನ್ನೀರ್‌ ಸೇರಿಸಿ ಕಡಿಮೆ ಉರಿಯಲ್ಲಿ 10 ನಿಮಿಷ ಬೇಯಿಸಿ
12. ನಂತರ ಸ್ವಲ್ಪ ನಿಂಬೆರಸ ಸೇರಿಸಿ, ಕೊತ್ತಂಬರಿ ಸೊಪ್ಪಿನಿಂದ ಅಲಂಕರಿಸಿ.

ಸಲಹೆ:

• ಈ ಎಗ್‌ ಪನ್ನೀರ್ ಮಾಡಲು ಹೆಚ್ಚಿನ ಸಮಯ ಬೇಕಾಗಿಲ್ಲ, ಅರ್ಧ ಗಂಟೆಯೊಳಗೆ ಈ ಸಾರು ಮಾಡಬಹುದು.
• ಈ ಸಾರು ಬ್ರೇಕ್‌ಫಾಸ್ಟ್‌ಗೂ ಸೈ, ಲಂಚ್‌ , ಡಿನ್ನರ್‌ಗೂ ಸೈ, ಹಾಗಾಗಿ ಇದನ್ನು ಮಾಡಿದರೆ ಚಪಾತಿ, ರೊಟ್ಟಿ ಈ ಬಗೆಯ ಆಹಾರದ ಜೊತೆಯೂ ಸವಿಯಬಹುದು, ಅನ್ನದ ಜೊತೆಯೂ ಸವಿಯಬಹುದು.
• ನೀವು ಎಗ್ ಮಸಾಲ ಬೇಕಿದ್ದರೆ ಸೇರಿಸಬಹುದು, ಫ್ಲೇವರ್ ಇನ್ನೂ ಭಿನ್ನವಾಗಿರುತ್ತದೆ.
• ಟೊಮೆಟೊ ತುಂಬಾ ಹಣ್ಣಾಗಿರುವುದು ಬಳಸಿ
• ಗೋಡಂಬಿ ಬೇಡ ಅಂದರೆ ಬಳಸದೆಯೂ ಇರಬಹುದು.