Easy Rasam Recipe: ಟೊಮೆಟೋ ಬಳಸದೆ ಹೊಸ ರೀತಿ ರಸಂ ಮಾಡಿ ನೋಡಿ..! ಇಲ್ಲಿದೆ ಸುಲಭದ ತಿಳಿಸಾರು!

Easy Rasam Recipe: ನೀವುಗಳು ಮಧ್ಯಾಹ್ನದ ಊಟಕ್ಕೆ ಇಲ್ಲವೆ ರಾತ್ರಿಯ ಊಟಕ್ಕೆ ರುಚಿ ರುಚಿಯಾಗಿ ರಸಂ ಮಾಡಿ ಸವಿಯುವುದನ್ನು ಇಷ್ಟಪಡಬಹುದು. ಅದರಲ್ಲೂ ಸುಲಭವಾಗಿ ಎಲ್ಲರಿಗೂ ಇಷ್ಟವಾಗುವಂತಹ ರುಚಿಯಲ್ಲಿ ಟೊಮೆಟೋದಿಂದ ರಸಂ ಮಾಡೋದು ನೋಡಿರುತ್ತೀರಿ. ಆದ್ರೆ ಟೊಮೆಟೋ ಇಲ್ಲದೆ ಇದ್ದಾಗ ಅಥವಾ ಮಳೆಗಾಲದ ಸಮಯದಲ್ಲಿ ಟೊಮೆಟೋ ಬೆಲೆ ಅಧಿಕವಾದಾಗ ಏನು ಮಾಡುತ್ತೀರಿ?

ಹೌದು ಟೊಮೆಟೋ ಬೆಲೆ ಹೆಚ್ಚಾದಾಗ ರಸಂ ಮಾಡಿ ಸವಿಯುವುದು ಅಂದರೆ ದುಬಾರಿ ಬೆಲೆ ನೀಡಿದಂತೆ. ಆದ್ರೆ ನಾವಿಂದು ಟೊಮೆಟೋ ಬಳಸದೆಯೇ ರುಚಿ ರುಚಿಯಾದ ರಸಂ ಮಾಡಿ ಸವಿಯುವ ಕುರಿತು ತಿಳಿದುಕೊಳ್ಳೋಣ. ರಸಂ ಮಾಡಲು ಟೊಮೆಟೋ ಅಗತ್ಯ ಇದ್ದೇ ಇರಲಿದೆ. ಆದ್ರೆ ಈ ರೀತಿಯ ವಿಧಾನದಲ್ಲಿ ನೀವು ರಸಂ ಮಾಡುವುದಾರೆ ಟೊಮೆಟೋ ಅವಶ್ಯಕತೆಯೇ ಇರುವುದಿಲ್ಲ.

ಹಾಗಾದ್ರೆ ಹೊಸ ರೀತಿಯಾಗಿ ಟೊಮೆಟೋ ಬಳಸದೆಯೇ ರಸಂ ಮಾಡುವುದು ಹೇಗೆ? ಈ ರಸಂ ಮಾಡಲು ಯಾವೆಲ್ಲಾ ಪದಾರ್ಥಗಳು ಬೇಕು? ಮಾಡುವ ವಿಧಾನವೇನು? ಮಾಡಲು ಎಷ್ಟು ಸಮಯ ಹಿಡಿಯಲಿದೆ ಎಂಬುದನ್ನು ನಾವಿಂದು ತಿಳಿದುಕೊಳ್ಳೋಣ.

ಟೊಮೆಟೋ ಬಳಸದೆ ರಸಂ ಮಾಡಲು ಯಾವೆಲ್ಲಾ ವಸ್ತುಗಳು ಬೇಕಾಗುತ್ತವೆ?

• ನಿಂಬೆ ಹಣ್ಣು ಗಾತ್ರದಷ್ಟು ಹುಣಸೆ ಹುಳಿ
• ಜೀರಿಗೆ
• ಕಾಳು ಮೆಣಸು
• ಕೊತ್ತಂಬರಿ ಸೊಪ್ಪು
• ಕರಿಬೇವಿನ ಸೊಪ್ಪು
• ಸಾಸಿವೆ
• ಇಂಗು ಚಿಟಿಕೆಯಷ್ಟು
• ಬೆಳ್ಳುಳ್ಳಿ
• ಒಣ ಮೆಣಸು
• ಅರಿಶಿನ ಪುಡಿ
• ಉಪ್ಪು ರುಚಿಗೆ ತಕ್ಕಷ್ಟು
• ಎಣ್ಣೆ

ಟೊಮೆಟೋ ಬಳಸದೆ ರಸಂ ಮಾಡುವ ವಿಧಾನವೇನು?

ಮೊದಲು ಒಂದು ಬೌಲ್‌ಗೆ ಹುಣಸೆ ಹುಳಿಯನ್ನು ಹಾಕಿ ನೀರು ಹಾಕಿ ನೆನೆಸಿಟ್ಟುಕೊಳ್ಳಿ. ಈಗ ಒಂದು ಮಿಕ್ಸಿ ಜಾರ್‌ಗೆ ಜೀರಿಗೆ, ಕಾಳು ಮೆಣಸು ಹಾಕಿಕೊಂಡು ನುಣ್ಣಗೆ ಪುಡಿ ಮಾಡಿಕೊಳ್ಳಿ. ಈಗ ನೆನೆಸಿಟ್ಟ ಹುಣಸೆ ಹುಳಿಯನ್ನು ಕಿವುಚಿಕೊಂಡು ಅದರ ಹೊಟ್ಟನ್ನು ತೆಗೆದು ಬರಿ ಹುಳಿ ನೀರನ್ನು ಮಾತ್ರ ಇಟ್ಟುಕೊಳ್ಳಿ. ಅದಕ್ಕೆ ಸ್ವಲ್ಪ ನೀರು ಸಹ ಹಾಕಿಟ್ಟುಕೊಳ್ಳಿ.

ಈಗ ಒಲೆ ಮೇಲೆ ಒಂದು ಬಾಣಲೆ ಇಟ್ಟು ಅದಕ್ಕೆ ಎಣ್ಣೆ ಹಾಕಿ ಬಳಿಕ ಸಾಸಿವೆ, ಚಿಟಿಕೆ ಇಂಗು, ಬೆಳ್ಳುಳ್ಳಿ, ಒಣ ಮೆಣಸು ಹಾಕಿ ಒಂದು ನಿಮಿಷಗಳ ಕಾಲ ಫ್ರೈ ಮಾಡಿಕೊಳ್ಳಿ. ಕೊನೆಯಲ್ಲಿ ಕರಿಬೇವಿನ ಸೊಪ್ಪು ಹಾಕಿ ಮಿಕ್ಸ್ ಮಾಡಿಕೊಳ್ಳಿ. ನಂತರ ಮೊದಲು ಕಿವುಚಿ ರೆಡಿ ಮಾಡಿಕೊಂಡಿದ್ದ ಹುಣಸೆ ಹುಳಿ ನೀರು ಹಾಕಿಕೊಳ್ಳಿ.

ಈಗ ಮೊದಲೇ ರುಬ್ಬಿ ಇಟ್ಟಿದ್ದ ಜೀರಿಗೆ, ಕಾಳು ಮೆಣಸಿನ ಪುಡಿಯನ್ನು ಇದಕ್ಕೆ ಹಾಕಿ ಮಿಕ್ಸ್ ಮಾಡಬೇಕು. ಹಾಗೆ ಉಪ್ಪು, ಅರಶಿಣ ಹಾಕಿ ಮಿಕ್ಸ್ ಮಾಡಿಕೊಳ್ಳಿ. ಹಾಗೆ ಇದಕ್ಕೆ ನೀರು ಹಾಕಿ ತೆಳ್ಳಗೆ ಮಾಡಿಕೊಂಡು ಕುದಿಬರಲು ಬಿಡಬೇಕು. ಈ ರೀತಿ 10 ನಿಮಿಷ ಕುದಿಬರಲು ಬಿಟ್ಟು ಮತ್ತೆ ಮಿಕ್ಸ್ ಮಾಡಿಕೊಳ್ಳಿ. ಅನಂತರ ಕೊನೆಯಲ್ಲಿ ಕೊತ್ತಂಬರಿ ಸೊಪ್ಪು ಹಾಕಿ ಮಿಕ್ಸ್ ಮಾಡಿ ಇಳಿಸಿಕೊಂಡರೆ ನಿಮ್ಮ ಮುಂದೆ ಟೊಮೆಟೋ ಹಾಕದ ರಸಂ ರೆಡಿಯಾಗುತ್ತದೆ. ನೀವು ಸಹ ಊಟದ ಜೊತೆಗೆ ಇದನ್ನು ಮಾಡಿ ನೋಡಿ.

ಹಾಗೆ ಈ ರೀತಿಯ ರಸಂ ನಿಮ್ಮ ಆರೋಗ್ಯಕ್ಕೂ ಕೂಡ ಬಹಳ ಉತ್ತಮ. ಇದರಲ್ಲಿನ ಶುಂಠಿ, ಜೀರಿಗೆ, ಹುಳಿ ಅಂಶ ನಿಮ್ಮ ಆರೋಗ್ಯ ಸುಧಾರಣೆಗೆ ಸಹಕಾರಿಯಾಗಲಿದೆ, ಅದರಲ್ಲೂ ಮಳೆಗಾಲದ ಸಮಯದಲ್ಲಿ ಕಾಲೋಚಿತವಾಗಿ ಕಾಡುವಂತಹ ಶಿತ, ಕೆಮ್ಮು ಸಮಸ್ಯೆಗಳಿಗೆ ಇದು ಸುಲಭದ ಪರಿಹಾರ ನೀಡಬಹುದು. ಇದನ್ನು ಮಾಡಲು ಕೂಡ ಹೆಚ್ಚು ಸಮಯ ಹಿಡಿಯುವುದಿಲ್ಲ. ಹೀಗಾಗಿ ಕಡಿಮೆ ವಸ್ತುಗಳ ಬಳಸಿಕೊಂಡು ಸುಲಭವಾಗಿ ಮಾಡಿ ಮುಗಿಸಬಹುದು.