ಇದು ಮ್ಯಾಗಿ ಎಗ್ ಆಮ್ಲೆಟ್: 10 ನಿಮಿಷದಲ್ಲಿ ಎರಡು ಪಟ್ಟು ರುಚಿ.. ಮಾಡೋದು ಹೇಗೆ?

10 ನಿಮಿಷಗಳಲ್ಲಿ ಮ್ಯಾಗಿ ಆಮ್ಲೆಟ್ ರೆಡಿ. ಎರಡು ಪಟ್ಟು ರುಚಿ, ಮಜಾ ಡಬಲ್! ಬೆಳಗ್ಗೆ ಬೇಗನೆ ತಿಂಡಿ ಮಾಡುವ ಬಗ್ಗೆ ಅಥವಾ ಸಂಜೆ ಬಿಸಿ ಬಿಸಿ ಸ್ನ್ಯಾಕ್ಸ್‌ ಏನು ಮಾಡುವುದು ಎಂಬ ಚಿಂತಿಯೇ? ಇಂತಹ ಸಮಯದಲ್ಲಿ ನೆನಪಾಗುವ ಎರಡು ಅಡುಗೆಗಳೆಂದರೆ ಮ್ಯಾಗಿ (maggi) ಮತ್ತು ಆಮ್ಲೆಟ್ (omelette). ಇವೆರಡೂ ಮಕ್ಕಳು ಮತ್ತು ದೊಡ್ಡವರ ನೆಚ್ಚಿನ ತಿನಿಸುಗಳು. ಈ ಎರಡು ಜನಪ್ರಿಯ ತಿನಿಸುಗಳನ್ನು ಒಟ್ಟಿಗೆ ಸೇರಿಸಿದರೆ ಹೇಗಿರುತ್ತೆ ಎಂಬ ಕಲ್ಪನೆಯಿಂದ ಹುಟ್ಟಿಕೊಂಡಿದ್ದೇ ಮ್ಯಾಗಿ ಆಮ್ಲೆಟ್ (Maggi Egg Omelette).

ಇದು ಸಾಮಾನ್ಯ ಆಮ್ಲೆಟ್‌ಗಿಂತ ಭಿನ್ನವಾಗಿದ್ದು, ಮೃದುವಾದ ಆಮ್ಲೆಟ್ ಒಳಗೆ ಮಸಾಲೆಯುಕ್ತ ಮ್ಯಾಗಿ ನೂಡಲ್ಸ್‌ನ ರುಚಿ ನೀಡುತ್ತದೆ. ಈ ತಿನಿಸು ಮಾಡುವುದು ಸುಲಭ. ಆದರೆ, ಇದರ ರುಚಿ ಅದ್ಭುತವಾಗಿದೆ. ಇದನ್ನು ತಯಾರಿಸಲು ಹೆಚ್ಚು ಸಮಯ ಬೇಕಾಗಿಲ್ಲ. ನಿಮ್ಮ ಮಕ್ಕಳು ಉಪಹಾರ ತಿನ್ನಲು ಮೊಂಡುತನ ಮಾಡಿದರೆ, ಈ ಮ್ಯಾಗಿ ಆಮ್ಲೆಟ್ ಮಾಡಿ ಕೊಡಿ. ಅವರು ಖಂಡಿತಾ ಇಷ್ಟಪಟ್ಟು ತಿನ್ನುತ್ತಾರೆ. ರುಚಿಕರವಾದ ಮ್ಯಾಗಿ ಆಮ್ಲೆಟ್ (maggi omelette recipe) ಮಾಡುವ ವಿಧಾನ ಇಲ್ಲಿದೆ.

ಮ್ಯಾಗಿ ಆಮ್ಲೆಟ್‌ಗೆ ಅಗತ್ಯವಿರುವ ಪದಾರ್ಥಗಳು

• ಮ್ಯಾಗಿ ನೂಡಲ್ಸ್ -1 ಪ್ಯಾಕೆಟ್
• ಮೊಟ್ಟೆಗಳು - 2
• ಈರುಳ್ಳಿ - 1 (ಸಣ್ಣಗೆ ಹೆಚ್ಚಿದ್ದು)
• ಹಸಿ ಮೆಣಸಿನಕಾಯಿ -1 ಅಥವಾ 2
• ಶುಂಠಿ ಪೇಸ್ಟ್ - ½ ಚಮಚ
• ಕೊತ್ತಂಬರಿ ಸೊಪ್ಪು - ಸ್ವಲ್ಪ
• ಉಪ್ಪು - ರುಚಿಗೆ ತಕ್ಕಷ್ಟು
• ಎಣ್ಣೆ ಅಥವಾ ಬೆಣ್ಣೆ - 2 ಚಮಚ

ಮ್ಯಾಗಿ ಆಮ್ಲೆಟ್‌ ಮಾಡುವ ವಿಧಾನ

ಮ್ಯಾಗಿ ಆಮ್ಲೆಟ್ ತಯಾರಿಸುವುದು ಹೇಗೆ ಎಂಬುದು ಇಲ್ಲಿದೆ. ಮಸಾಲೆಯುಕ್ತ ಮ್ಯಾಗಿ ಹಾಗೂ ಮೊಟ್ಟೆಯ ಮಿಶ್ರಣವನ್ನು ಒಳಗೊಂಡಿರುವ ಈ ರೆಸಿಪಿ ಅತ್ಯಂತ ರುಚಿಕರವಾಗಿರುತ್ತದೆ. ಆರೋಗ್ಯಕ್ಕೂ ಒಳ್ಳೆಯದು. ಮೊದಲಿಗೆ, ಮ್ಯಾಗಿ ತಯಾರಿಕೆಯ ವಿಧಾನ ತಿಳಿಯೋಣ.

ಒಂದು ಪಾತ್ರೆಯಲ್ಲಿ ಸ್ವಲ್ಪ ನೀರನ್ನು ಹಾಕಿ. ನೀರು ಕುದಿಯುತ್ತಿದ್ದಂತೆ ಮ್ಯಾಗಿ ಮತ್ತು ಅದರ ಮಸಾಲೆ ಸೇರಿಸಿ. ಮ್ಯಾಗಿ ಚೆನ್ನಾಗಿ ಬೆಂದ ನಂತರ, ನೀರು ಸಂಪೂರ್ಣವಾಗಿ ಇಂಗಿಹೋಗಿರಬೇಕು. ಮ್ಯಾಗಿಯಲ್ಲಿ ನೀರು ಉಳಿದಿದ್ದರೆ, ಆಮ್ಲೆಟ್ ಮೆತ್ತಗಾಗಬಹುದು. ಮ್ಯಾಗಿ ಬೆಂದ ನಂತರ ತಣ್ಣಗಾಗಲು ಪಕ್ಕಕ್ಕಿಡಿ.

ನಂತರ ಮೊಟ್ಟೆ ಮಿಶ್ರಣವನ್ನು ಸಿದ್ಧಪಡಿಸಿಕೊಳ್ಳಬೇಕು. ಒಂದು ಬೌಲ್‌ಗೆ ಎರಡು ಮೊಟ್ಟೆಗಳನ್ನು ಒಡೆದು ಹಾಕಿಕೊಳ್ಳಿ. ಇದಕ್ಕೆ ಸಣ್ಣಗೆ ಹೆಚ್ಚಿದ ಈರುಳ್ಳಿ, ಹಸಿ ಮೆಣಸಿನಕಾಯಿ, ಕೊತ್ತಂಬರಿ ಸೊಪ್ಪು, ಶುಂಠಿ ಪೇಸ್ಟ್ ಮತ್ತು ಚಿಟಿಕೆ (ರುಚಿಗೆ ತಕ್ಕಷ್ಟು) ಉಪ್ಪು ಹಾಕಿ. ಈ ಮಿಶ್ರಣವನ್ನು ನೊರೆ ಬರುವವರೆಗೆ ಚೆನ್ನಾಗಿ ಕಲಕಿ. ಈರುಳ್ಳಿ ಮತ್ತು ಶುಂಠಿ ಪೇಸ್ಟ್ ಸೇರಿಸುವುದರಿಂದ ಆಮ್ಲೆಟ್‌ನ ರುಚಿ ಹಾಗೂ ಸುವಾಸನೆ ಹೆಚ್ಚುತ್ತದೆ.

ಇನ್ನು ಆಮ್ಲೆಟ್‌ನಲ್ಲಿ ಮ್ಯಾಗಿ ತುಂಬಿಸುವ ಪ್ರಕ್ರಿಯೆ. ನಾನ್ ಸ್ಟಿಕ್ ಪ್ಯಾನ್‌ನಲ್ಲಿ 1-2 ಚಮಚ ಎಣ್ಣೆ ಹಾಕಿ ಬಿಸಿ ಮಾಡಿ. ಎಣ್ಣೆ ಬಿಸಿಯಾದ ನಂತರ, ಮೊಟ್ಟೆ ಮಿಶ್ರಣವನ್ನು ಹಾಕಿ ವೃತ್ತಾಕಾರದಲ್ಲಿ ಹರಡಿ. ಆಮ್ಲೆಟ್‌ನ ಕೆಳಭಾಗ ಸ್ವಲ್ಪ ಬೆಂದ ಬಳಿಕ, ಅದರ ಒಂದು ಬದಿಯಲ್ಲಿ ಬೇಯಿಸಿದ ಮ್ಯಾಗಿ ನೂಡಲ್ಸ್‌ ಅನ್ನು ಸಮಾನವಾಗಿ ಹರಡಿ.

ಅಂತಿಮವಾಗಿ, ಮಡಚಿ ಬೇಯಿಸುವುದು. ಮ್ಯಾಗಿ ಹಾಕಿದ ನಂತರ, ಒಂದು ನಿಮಿಷ ಸಣ್ಣ ಉರಿಯಲ್ಲಿ ಬೇಯಿಸಿ. ನಂತರ ಆಮ್ಲೆಟ್‌ ಅನ್ನು ಮ್ಯಾಗಿ ಇರುವ ಬದಿಯ ಮೇಲೆ ಎಚ್ಚರಿಕೆಯಿಂದ ಮಡಚಿ. ಎರಡೂ ಕಡೆ ಚಿನ್ನದ ಬಣ್ಣ ಬರುವವರೆಗೆ ಮತ್ತು ಗರಿಗರಿಯಾಗುವವರೆಗೆ ಬೇಯಿಸಿ. ಇಷ್ಟು ಮಾಡಿದರೆ ಸಾಕು, ಬಿಸಿ ಬಿಸಿ ಮ್ಯಾಗಿ ಆಮ್ಲೆಟ್ ಈಗ ಸಿದ್ಧ. ಇದನ್ನು ಟೊಮೆಟೊ ಕೆಚಪ್‌ನೊಂದಿಗೆ ಸೇವಿಸಿದರೆ ರುಚಿ ಮತ್ತಷ್ಟು ಹೆಚ್ಚಾಗುತ್ತದೆ.