ಚಿತ್ರಾನ್ನ ಪಲಾವ್‌ಗಿಂತ ರುಚಿ ನೀಡುವ ದಾಲ್ ರೈಸ್..! ಮಾಡೋದು ಹೇಗೆ?

ಬೆಳಗ್ಗೆ ತಿಂಡಿಗೆ ಹಾಗೂ ಮಧ್ಯಾಹ್ನ ಬಾಕ್ಸ್ ತೆಗೆದುಕೊಂಡು ಹೋಗುವವರು ಹೆಚ್ಚಾಗಿ ರೈಸ್ ಐಟಂ ಅನ್ನೇ ತಿಂಡಿಯಾಗಿ ಮಾಡುತ್ತಾರೆ. ಏಕೆಂದರೆ ಈ ರೀತಿ ಅನ್ನದಿಂದ ಯಾವುದಾದರು ಖಾದ್ಯ ಮಾಡಿ ಸವಿಯುವುದು ಸುಲಭ ಹಾಗೂ ಕಡಿಮೆ ಖರ್ಚು, ಕಡಿಮೆ ವಸ್ತುಗಳ ಬಳಸಿ ಕಡಿಮೆ ಸಮಯದಲ್ಲಿ ಮಾಡಬಹುದು. ಹೀಗಾಗಿ ಅನ್ನದಿಂದ ಮಾಡುವ ಖಾದ್ಯ ಎಲ್ಲರಿಗೂ ಪ್ರಿಯ.

ಅದರಲ್ಲೂ ಚಿತ್ರಾನ್ನ, ಪುಳಿಯೋಗರೆ, ಪಲಾವ್ ನಂತಹ ಖಾದ್ಯ ಎಲ್ಲರ ಮನೆಯ ಫೇವರಿಟ್ ತಿಂಡಿ. ಆದ್ರೆ ಎಲ್ಲರಿಗೂ ನಿತ್ಯ ಇದನ್ನೇ ಮಾಡಿ ಸವಿಯುವುದು ಅಂದ್ರೆ ಬೇಸರ. ಏನಾದರು ವಿಶೇಷ ತಿಂಡಿ ಮಾಡಿ ಬಾಕ್ಸ್‌ಗೆ ತೆಗೆದುಕೊಂಡು ಹೋಗಬೇಕು ಎಂದ ಆಸೆ ಇದ್ದೇ ಇರುತ್ತೆ. ಆದ್ರೆ ಯಾವ ತಿಂಡಿ ಮಾಡಿ ಸವಿಯಬೇಕು ಎಂಬುದು ತಿಳಿದಿರುವುದಿಲ್ಲ.

ಇಂತಹ ಮಂದಿಗಾಗಿ ನಾವಿಂದು ಹೊಸ ರೀತಿಯ ದಾಲ್ ರೈಸ್ ಮಾಡುವುದನ್ನು ತಿಳಿದುಕೊಳ್ಳೋಣ. ಈ ರೈಸ್ ಚಿತ್ರಾನ್ನ, ಪುಳಿಯೋಗರೆ ಸೇರಿ ಎಲ್ಲಾ ತಿಂಡಿಗಳಿಗಿಂತಲೂ ರುಚಿಕರವಾಗಿರುತ್ತೆ. ದಾಲ್ ರೈಸ್ ಬೆಳಗ್ಗೆ ಹಾಗೂ ಮಧ್ಯಾಹ್ನ ಬಾಕ್ಸ್‌ಗೆ ಹಾಕಿಕೊಂಡು ಸವಿಯಲು ಹೇಳಿ ಮಾಡಿಸಿದ ಖಾದ್ಯ. ಹಾಗಾದ್ರೆ ಇದನ್ನು ಮಾಡುವುದು ಹೇಗೆ?

ದಾಲ್ ರೈಸ್ ಮಾಡಲು ಯಾವೆಲ್ಲಾ ಪದಾರ್ಥಗಳು ಬೇಕು?, ಮಾಡುವ ವಿಧಾನವೇನು? ಮಾಡಲು ಎಷ್ಟು ಸಮಯ ಹಿಡಿಯುತ್ತೆ, ಯಾವೆಲ್ಲಾ ಕ್ರಮ ಅನುಸರಿಸಬೇಕು ಎಂಬೆಲ್ಲಾ ಮಾಹಿತಿಯನ್ನು ನಾವಿಂದು ತಿಳಿದುಕೊಳ್ಳೋಣ.

ದಾಲ್ ರೈಸ್ ಮಾಡಲು ಬೇಕಾಗುವ ವಸ್ತುಗಳು

• ಅಕ್ಕಿ - 2 ಕಪ್
• ತೊಗರಿ ಬೇಳೆ- ಕಾಲು ಕಪ್
• ಸಾಸಿವೆ
• ಜೀರಿಗೆ
• ಬೆಳ್ಳುಳ್ಳಿ
• ತುಪ್ಪ
• ಈರುಳ್ಳಿ
• ಟೊಮೆಟೋ
• ಈಂಗು
• ಕರಿಬೇವು
• ಉಪ್ಪು
• ಎಣ್ಣೆ
• ಹಸಿ ಮೆಣಸು
• ಒಣಮೆಣಸು

ದಾಲ್ ರೈಸ್ ಮಾಡುವುದು ಹೇಗೆ?

ಮೊದಲು ಕುಕ್ಕರ್ ಅನ್ನು ಒಲೆ ಮೇಲೆ ಇಟ್ಟು ಇದಕ್ಕೆ ಎಣ್ಣೆ ಹಾಕಿಕೊಳ್ಳಿ, ಈ ಎಣ್ಣೆ ಬಿಸಿಯಾದ ಬಳಿಕ ಇದಕ್ಕೆ ಸಾಸಿವೆ, ಜಿಟಿಕೆ ಇಂಗು, ಜೀರಿಗೆ, ಜಜ್ಜಿಕೊಂಡಿರುವ ಬೆಳ್ಳುಳ್ಳಿ, ಕರಿವೇವು, ಹಸಿ ಮೆಣಸು, ಎರಡು ಒಣ ಮೆಣಸು ಹಾಕಿಕೊಂಡು ಫ್ರೈ ಮಾಡಿ. ಬಳಿಕ ಇದಕ್ಕೆ ಒಂದು ಈರುಳ್ಳಿ ಕತ್ತರಿಸಿ ಹಾಕಿಕೊಂಡು 2 ನಿಮಿಷಗಳ ಕಾಲ ಫ್ರೈ ಮಾಡಿ. ಫ್ರೈ ಮಾಡುವಾಗ ಉರಿ ಸಣ್ಣದಾಗಿ ಇರಲಿ.

ಈಗ 2 ನಿಮಿಷದ ಬಳಿಕ 2 ಟೊಮೆಟೋವನ್ನು ಚಿಕ್ಕದಾಗಿ ಹೆಚ್ಚಿಕೊಂಡಿರುವುದನ್ನು ಹಾಕಿ. ಬಳಿಕ ಇದಕ್ಕೆ ಅರಶಿನ, ಉಪ್ಪು ಹಾಕಿಕೊಂಡು ಫ್ರೈ ಮಾಡಿ. ಟೊಮೆಟೋ ಬೆಂದು ಹಸಿ ವಾಸನೆ ಹೋಗುವವರೆಗೆ ಫ್ರೈ ಮಾಡಿ. ನಂತರ ಇದಕ್ಕೆ 2 ಕಪ್ ಅಳತೆಯಲ್ಲಿ ನೀರು ಹಾಕಿಕೊಳ್ಳಿ. ಇದಕ್ಕೆ ಕಾಲು ಕಪ್ ತೊಗರಿ ಬೇಳೆ ತೊಳೆದು ನೀರಿನಲ್ಲಿ 15 ನೆನೆಸಿಟ್ಟು ಈ ಕುಕ್ಕರ್‌ಗೆ ಹಾಕಿಕೊಳ್ಳಿ.

ಈಗ ನೀರು ಹಾಕಿದ ಕಪ್‌ನಲ್ಲಿಯೇ ಒಂದು ಕಪ್ ಅಕ್ಕಿ ತೆಗೆದುಕೊಂಡು ಚೆನ್ನಾಗಿ ನೀರಿನಲ್ಲಿ ತೊಳೆದು ಬಳಿಕ ಕುಕ್ಕರ್‌ಗೆ ಹಾಕಿಕೊಂಡು ಚೆನ್ನಾಗಿ ತಿರುಗಿಸಿ. ಈಗ ಒಂದು ಸ್ಪೂನ್ ತುಪ್ಪ ಹಾಕಿಕೊಳ್ಳಿ, ತುಪ್ಪ ಇಲ್ಲದಿದ್ದರೂ ನಡೆಯುತ್ತೆ. ಈಗ ಕುಕ್ಕರ್ ಮುಚ್ಚಳ ಮುಚ್ಚಿ 2 ಸೀಟಿ ಹೊಡೆಯಲು ಬಿಡಬೇಕು. ಎರಡು ಸೀಟಿಯ ಬಳಿಕ ಕುಕ್ಕರ್ ತಣ್ಣಗಾಗಲು ಹಾಗೆಯೇ ಬಿಡಿ.

ಕುಕ್ಕರ್ ತಣ್ಣಗಾದ ಬಳಿಕ ಅದರ ಮುಚ್ಚಳ ತೆಗೆದು ಒಮ್ಮೆ ಚೆನ್ನಾಗಿ ಮಿಕ್ಸ್ ಮಾಡಿ. ಇಷ್ಟಾದರೆ ನಿಮ್ಮ ಮುಂದೆ ದಾಲ್ ರೈಸ್ ರೆಡಿಯಾಗುತ್ತದೆ. ನೀವು ಸಹ ಮನೆಯಲ್ಲಿ ಒಮ್ಮೆ ಟ್ರೈ ಮಾಡಿ ನೋಡಿ. ಮಾಡುವುದು ಕೂಡ ಬಹಳ ಸುಲಭ.