2 ವಸ್ತು ಇದ್ರೆ ಪೂರಿ ರೆಡಿ..! ಸೈಡ್ ಬ್ಯುಸಿನೆಸ್ ಆಗಿಯೂ ಹಣ ಮಾಡಬಹುದು!!

ನೀವು ರಸ್ತೆ ಬದಿಯ ಪಾನಿಪೂರಿ, ಗೋಲ್ ಗಪ್ಪವನ್ನ ಬಾಯಿ ಚಪ್ಪರಿಸಿ ಸವಿದಿರುತ್ತೀರಿ. ಪಾನಿಪೂರಿ, ಮಸಾಲ ಪೂರಿ, ಅಂದ್ರೆ ಯಾರಿಗೆ ತಾನೆ ಇಷ್ಟವಾಗೊಲ್ಲ. ಮಕ್ಕಳು, ಕಾಲೇಜು ಹುಡುಗ ಹುಡುಗಿಯರು, ಹಿರಿಯರು ಎಲ್ಲರು ಬಹಳ ಇಷ್ಟ ಪಟ್ಟು ಸವಿಯುತ್ತಾರೆ. ಸಂಜೆ ಸಮಯದಲ್ಲಿ ಈ ಅಂಗಡಿಗಳ ಮುಂದೆ ಜನರ ದಂಡೇ ನೆರೆದಿರುತ್ತೆ.

ಹಾಗೆ ನಾವು ಈ ಪಾನಿಪೂರಿಯನ್ನು ಮನೆಯಲ್ಲೂ ಕೂಡ ಮಾಡಿ ಸವಿದಿರುತ್ತೇವೆ. ಅಲ್ಲದೆ ಅಂಗಡಿಯಲ್ಲಿ ಸಿಗುವ ಪೂರಿಯನ್ನು ತಂದು ಮನೆಯಲ್ಲಿ ಮಾಡಿರುತ್ತೇವೆ, ಆದ್ರೆ ನಾವಿಂದು ಮನೆಯಲ್ಲೇ ಈ ಪೂರಿಯನ್ನು ಮಾಡುವ ಕುರಿತು ತಿಳಿಯೋಣ. ಏಕೆಂದರೆ ಈ ಪೂರಿಯನ್ನು ಮಾಡುವಾಗ ಯಾವ ರೀತಿಯ ವಸ್ತು ಬಳಸುತ್ತಾರೆ ಹೇಗೆಲ್ಲಾ ಹಿಟ್ಟನ್ನು ಮಾಡುತ್ತಾರೆ ಎಂಬ ಹಲವು ವಿಡಿಯೋಗಳ ನೋಡಿದ್ದೇವೆ.

ಹಾಗೆ ರಸ್ತೆ ಬದಿಯ ತಿನಿಸುಗಳು ಆರೋಗ್ಯದ ದೃಷ್ಟಿಯಿಂದ ಎಷ್ಟು ಅಪಾಯಕಾರಿಯಾಗಿ ಬದಲಾಗಿವೆ ಎಂಬುದನ್ನು ಕೂಡ ನಾವು ನೋಡಿದ್ದೇವೆ. ಹೀಗಾಗಿ ಮನೆಯಲ್ಲೇ ಇಂತಹ ರುಚಿಕರ ತಿನಿಸುಗಳ ಮಾಡಿ ಸವಿಯಲು ಜನ ಮುಂದಾಗುತ್ತಾರೆ. ಹಾಗೆ ಈ ಪೂರಿಯನ್ನು ಕೆಲವರು ಸೈಡ್ ಬ್ಯುಸಿನೆಸ್ ಆಗಿಯೂ ಮಾಡುತ್ತಾರೆ. ಮನೆಯಲ್ಲೇ ಪೂರಿಗಳ ಮಾಡಿ ಅದನ್ನು ಮಾರಾಟ ಮಾಡುತ್ತಾರೆ.

ಹಾಗಾದ್ರೆ ನಾವಿಂದು ಈ ಪೂರಿಯನ್ನು ಮನೆಯಲ್ಲೇ ಮಾಡುವುದು ಹೇಗೆ ಎಂಬ ಕುರಿತು ತಿಳಿದುಕೊಳ್ಳೋಣ. ಪೂರಿ ಮಾಡಲು ಯಾವೆಲ್ಲಾ ವಸ್ತುಗಳು ಬೇಕು?, ಮಾಡುವ ವಿಧಾನವೇನು?, ಮಾಡಲು ಎಷ್ಟು ಸಮಯ ಬೇಕಾಗುತ್ತದೆ ಎಂಬುದನ್ನು ನಾವಿಂದು ತಿಳಿಯೋಣ.

ಪೂರಿ ಮಾಡಲು ಬೇಕಾಗುವ ಪದಾರ್ಥಗಳು ಯಾವುದು?

• ಚಿರೋಟಿ ರವೆ ಅಥವಾ ಹೋಳಿಗೆ ರೆವೆ
• ಎಣ್ಣೆ

ಪೂರಿ ಮಾಡುವ ವಿಧಾನವೇನು?

ಒಂದು ತಟ್ಟೆಯಲ್ಲಿ ಎರಡು ಕಪ್ ಚಿರೋಟಿ ರವೆ ತೆಗೆದುಕೊಂಡು ಮಿಕ್ಸ್ ಮಾಡಿ ನಂತರ ಇದಕ್ಕೆ ಮುಕ್ಕಾಲು ಕಪ್‌ನಷ್ಟು ಬಿಸಿ ಎಣ್ಣೆಯನ್ನು ಹಾಕಿ ಕಲಸಿಕೊಳ್ಳಬೇಕು. ಈ ಎಣ್ಣೆ ಚೆನ್ನಾಗಿ ಹೊಂದಿಕೊಳ್ಳುವಂತೆ ಮಿಕ್ಸ್ ಮಾಡಿ. ಈಗ ಉಗುರು ಬೆಚ್ಚಗಿನ ನೀರುನ್ನು ತೆಗೆದುಕೊಂಡು ಸ್ವಲ್ಪ ಸ್ವಲ್ಪ ನೀರು ಹಾಕಿಕೊಳ್ಳುತ್ತಾ ಕಲಸಿಕೊಳ್ಳಬೇಕು.

ಈ ಹಿಟ್ಟನ್ನು 10 ನಿಮಿಷ ಹದ ಮಾಡಬೇಕು. ಇದು ಚಪಾತಿ ಹಿಟ್ಟಿಗಿಂತ ಮೃದುವಾಗಿ ಬರಬೇಕು. ಎಷ್ಟು ಸಾಧ್ಯವೋ ಅಷ್ಟು ಚೆನ್ನಾಗಿ ನಾದಿಕೊಳ್ಳಬೇಕು. ನಂತರ ಈ ಹಿಟ್ಟನ್ನು ಒಣಗಲು ಬಿಡಬೇಡಿ. ಪಾತ್ರೆಯಲ್ಲಿ ಹಾಕಿ ಅದರ ಮೇಲೆ ಬಟ್ಟೆ ಅಥವಾ ಎಣ್ಣೆ ಹಚ್ಚಿರುವ ಪ್ಲಾಸ್ಟಿಕ್ ಮುಚ್ಚಿ ಇಡಿ. ಈಗ ಸ್ವಲ್ಪ ಸ್ವಲ್ಪ ಹಿಟ್ಟು ತೆಗೆದುಕೊಂಡು ಉಂಡೆ ಕಟ್ಟಿಕೊಂಡು ನಂತರ ಚಪಾತಿಯಂತೆ ಲಟ್ಟಿಸಿಕೊಳ್ಳಬೇಕು.

ಲಟ್ಟಿಸಿಕೊಂಡ ಬಳಿಕ ಯಾವುದಾದರು ಅಳತೆಯ ವೃತ್ತಾಕಾರದ ವಸ್ತುವಿನಿಂದ ಈ ಚಪಾತಿಯಂತಹ ಹಿಟ್ಟನ್ನು ಸಣ್ಣದಾಗಿ ಕತ್ತರಿಸಿಕೊಳ್ಳಿ. ಒಂದು ಚಪಾತಿಯಂತಹ ರಚನೆಯಲ್ಲಿ ಸುಮಾರು 6ರಿಂದ 8 ಪುರಿ ಬರುವಂತೆ ಕತ್ತರಿಸಿಕೊಳ್ಳಿ. ಒಂದೊಂದೇ ಪೂರಿಯನ್ನು ಲಟ್ಟಿಸಿಕೊಂಡರೆ ಸಮಯ ಹಿಡಿಯುತ್ತದೆ, ಹೀಗಾಗಿ ಪ್ಲಾನ್ ಅನುಸರಿಸಿದರೆ ಬೇಗ ಮಾಡಬಹುದು.

ಈಗ ಒಲೆ ಮೇಲೆ ಎಣ್ಣೆಯನ್ನು ಬಿಸಿ ಮಾಡಿಕೊಳ್ಳಿ. ನಂತರ ಸ್ವಲ್ಪ ಸ್ವಲ್ಪ ಪೂರಿಯನ್ನು ಎಣ್ಣೆಗೆ ಬಿಟ್ಟು ಮಧ್ಯಮ ಉರಿಯಲ್ಲಿ ಕರಿದುಕೊಳ್ಳಿ. ಪೂರಿಯನ್ನು ಎರಡೂ ಕಡೆಗಳಲ್ಲಿ ಚೆನ್ನಾಗಿ ಕರಿದುಕೊಳ್ಳಿ. ಎಣ್ಣೆಗೆ ಬಿಟ್ಟಾಗ ಪೂರಿ ಉಬ್ಬಿಕೊಂಡು ಬರುತ್ತದೆ. ಪೂರಿಯನ್ನು ಎಣ್ಣೆಯಿಂದ ತೆಗೆದು ತಣ್ಣಗಾಗಲು ಬಿಡಿ. ತಣ್ಣಗಾದ ಬಳಿಕ ಪ್ಲಾಸ್ಟಿಕ್ ಕವರ್‌ಗೆ ಹಾಕಿಕೊಂಡು ಗಾಳಿ ಹೋಗದಂತೆ ಕಟ್ಟಿದರೆ ಆಯಿತು.

ಇದನ್ನು ನೀವು ಮನೆಯಲ್ಲಿ ಪಾನಿಪೂರಿ ಸವಿಯಲು ಮಾಡಬಹುದು, ಇಲ್ಲವೆ ಈ ಪೂರಿಗಳನ್ನ ಮಾಡಿ ಮಾರಾಟ ಕೂಡ ಮಾಡಬಹುದು. ನೀವು ಕೂಡ ಮನೆಯಲ್ಲಿ ಇದನ್ನು ಒಮ್ಮೆ ಟ್ರೈ ಮಾಡಿ ನೋಡಿ.