ಮಟನ್ ಬಿರಿಯಾನಿಯೂ ಜುಜುಬಿ! ನಾಟಿ ಸ್ಟೈಲ್ ಮಶ್ರೂಮ್ ದೊನ್ನೆ ಬಿರಿಯಾನಿ ಮಾಡಿ.. ಗಮ್ಮತ್ತೇ ಬೇರೆ!

ಇದರ ಗಮ್ಮತ್ತೇ ಬೇರೆ! ನಾಟಿ ಸ್ಟೈಲ್ ಮಶ್ರೂಮ್ ದೊನ್ನೆ ಬಿರಿಯಾನಿ ಮಾಡಿ ನೋಡಿ.. ಇದರ ಮುಂದೆ ಮಟನ್ ಬಿರಿಯಾನಿಯೂ ಜುಜುಬಿ. ಬಿರಿಯಾನಿ ಅಂದರೆ ಸಾಕು, ಬಹುತೇಕರಿಗೆ ಅದು ನಾನ್-ವೆಜ್ ಪದಾರ್ಥ ಎಂದೇ ಅನಿಸುತ್ತದೆ. ಆದರೆ, ಸಸ್ಯಹಾರಿಗಳಿಗೂ ಬಿರಿಯಾನಿಯ ಅದ್ಭುತ ರುಚಿ ಸವಿಯುವ ಅವಕಾಶವಿದೆ. ನಾವಿಂದು ಈ ಲೇಖನದಲ್ಲಿ ಅಂತಹ ಒಂದು ವಿಶೇಷ ಬಿರಿಯಾನಿ ಬಗ್ಗೆ ತಿಳಿಸಿಕೊಡಲಿದ್ದೇವೆ. ಇದು ಕರ್ನಾಟಕದ ವಿಶಿಷ್ಟ ಶೈಲಿಯ ಮಶ್ರೂಮ್ ಡೋನ್ನೆ ಬಿರಿಯಾನಿಯ (Mushroom Donne Biryani) ಕಥೆ. ಈ ಬಿರಿಯಾನಿಯು ಕೇವಲ ರುಚಿಯಲ್ಲಿ ಮಾತ್ರವಲ್ಲ, ತಯಾರಿಕೆಯ ವಿಧಾನವೂ ವಿಶೇಷವಾಗಿದೆ.

ಡೋನ್ನೆ ಎಂದರೆ ಒಣಗಿದ ಎಲೆಗಳಿಂದ ಮಾಡಿದ ಬಟ್ಟಲು, ಇದರಲ್ಲಿ ಈ ಬಿರಿಯಾನಿ ಬಡಿಸುವುದರಿಂದ ಇದಕ್ಕೆ ಆ ಹೆಸರು ಬಂದಿದೆ. ಸಾಮಾನ್ಯ ಬಿರಿಯಾನಿಯ ಪರಿಚಿತ ರುಚಿಯಿಂದ ಬೇಸರವಾಗಿದ್ದರೆ, ಒಮ್ಮೆ ವಿಶಿಷ್ಟ ಮಶ್ರೂಮ್ ಡೊನ್ನೆ ಬಿರಿಯಾನಿಯನ್ನು ಪ್ರಯತ್ನಿಸಿ. ಇದರ ಪ್ರತಿ ಅಕ್ಕಿ ಕಾಳೂ ಮುತ್ತಿನಂತೆ ಹೊಳೆಯುತ್ತದೆ, ಮತ್ತು ರುಚಿ ಬೇರೆಯದೇ ಹಂತದಲ್ಲಿದೆ. ಅದರಲ್ಲೂ ಬೆಂಗಳೂರಿನ ಪ್ರಸಿದ್ಧ ಮಶ್ರೂಮ್ ಡೋನ್ನೆ ಬಿರಿಯಾನಿ (Donne Biryani) ವೀಕೆಂಡ್ ಮಜವನ್ನು ಮತ್ತಷ್ಟು ಹೆಚ್ಚಿಸುತ್ತದೆ. ಈ ವಿಶೇಷ ಡೋನ್ನೆ ಬಿರಿಯಾನಿಗೆ ಬೇಕಾಗುವ ಪದಾರ್ಥಗಳು ಮತ್ತು ತಯಾರಿಸುವ ವಿಧಾನವನ್ನು ಇಲ್ಲಿ ತಿಳಿಯಿರಿ.

ಮಶ್ರೂಮ್ ದೊನ್ನೆ ಬಿರಿಯಾನಿಗೆ ಬೇಕಾಗುವ ಪದಾರ್ಥಗಳು

• ಅಕ್ಕಿ
• ಅಣಬೆಗಳು
• ತುಪ್ಪ
• ಎಣ್ಣೆ
• ಲವಂಗ
• ಬಿರಿಯಾನಿ ಎಲೆ
• ಕಾಳುಮೆಣಸು
• ಏಲಕ್ಕಿ
• ಕಲ್ಲುಹೂವು
• ಜಾಪತ್ರೆ
• ಪುದೀನಾ
• ಕೊತ್ತಂಬರಿ ಸೊಪ್ಪು
• ಹಸಿಮೆಣಸು
• ದಾಲ್ಚಿನ್ನಿ
• ಶಾಜೀರಾ
• ಸ್ಟಾರ್ ಅನೈಸ್ (ಚಕ್ರಮೊಗ್ಗು)
• ಈರುಳ್ಳಿ
• ಶುಂಠಿ-ಬೆಳ್ಳುಳ್ಳಿ ಪೇಸ್ಟ್
• ಉಪ್ಪು
• ಖಾರದ ಪುಡಿ
• ಅರಿಶಿನ

ಮಶ್ರೂಮ್ ದೊನ್ನೆ ಬಿರಿಯಾನಿ ಮಾಡುವ ವಿಧಾನ

ಬಿರಿಯಾನಿಗೆ ರುಚಿ ನೀಡುವ ಎರಡು ಪ್ರತ್ಯೇಕ ಪೇಸ್ಟ್‌ಗಳನ್ನು ತಯಾರಿಸಿಕೊಳ್ಳಬೇಕು. ಇದು ಮಸಾಲೆಗಳ ಸಮ್ಮಿಲನದಿಂದ ಆರಂಭವಾಗುತ್ತದೆ. ಈರುಳ್ಳಿ, ಮೆಣಸು, ಲವಂಗ, ಏಲಕ್ಕಿ, ಮತ್ತು ದಾಲ್ಚಿನ್ನಿಗಳನ್ನು ಚೆನ್ನಾಗಿ ಹುರಿದು, ನಂತರ ನುಣ್ಣಗೆ ರುಬ್ಬಿ. ಇದು ಬಿರಿಯಾನಿಗೆ ಒಂದು ವಿಶಿಷ್ಟವಾದ ಮಸಾಲೆಯ ರುಚಿ ನೀಡುತ್ತದೆ. ಈಗ ಹಸಿಮೆಣಸು, ಪುದೀನಾ, ಕೊತ್ತಂಬರಿ ಮತ್ತು ಮೆಂತ್ಯ ಸೊಪ್ಪುಗಳನ್ನು ಸ್ವಲ್ಪ ಹುರಿದು, ನಂತರ ನೀರು ಸೇರಿಸಿ ನುಣ್ಣಗೆ ರುಬ್ಬಿಕೊಳ್ಳಿ.

ಇವುಗಳನ್ನು ತಯಾರಿಸಿಕೊಂಡ ನಂತರ, ಅಣಬೆ, ಅಕ್ಕಿ (ಚಿಟ್ಟಿ ಮುತ್ತ್ಯಾಳು ರೈಸ್) ಮತ್ತು ಇತರ ಪದಾರ್ಥಗಳು ತಯಾರಾಗುತ್ತವೆ. ಈಗ ಒಂದು ದೊಡ್ಡ ಪಾತ್ರೆಯಲ್ಲಿ ಎಣ್ಣೆ ಹಾಕಿ ಬಿಸಿ ಮಾಡಿ. ಅದಕ್ಕೆ ಈರುಳ್ಳಿ ಮತ್ತು ಶುಂಠಿ-ಬೆಳ್ಳುಳ್ಳಿ ಪೇಸ್ಟ್ ಹಾಕಿ ಚೆನ್ನಾಗಿ ಹುರಿಯಿರಿ. ನಂತರ ಅಣಬೆಗಳನ್ನು ಸೇರಿಸಿ. ಅಣಬೆಗಳು ಮೃದುವಾದ ನಂತರ, ಉಪ್ಪು, ಖಾರದ ಪುಡಿ, ಅರಿಶಿನ ಮತ್ತು ಮೊಸರು ಸೇರಿಸಿ. ಈ ಮಿಶ್ರಣಕ್ಕೆ ಈಗಾಗಲೇ ತಯಾರಿಸಿದ ಎರಡು ಪೇಸ್ಟ್‌ಗಳನ್ನು ಹಾಕಿ ಚೆನ್ನಾಗಿ ಬೆರೆಸಿ.

ಈಗ ಕಥೆಯ ಕ್ಲೈಮ್ಯಾಕ್ಸ್. ನೆನೆಸಿದ ಅಕ್ಕಿಯನ್ನು ಸೇರಿಸಿ, ಬಿಸಿ ನೀರನ್ನು ಹಾಕಿ. ಈ ಹಂತದಲ್ಲಿ ಮಸಾಲೆ ಮತ್ತು ನೀರು ಸಮಪ್ರಮಾಣದಲ್ಲಿ ಬೆರೆಯುವುದನ್ನು ಖಚಿತಪಡಿಸಿಕೊಳ್ಳಿ. ಬಿರಿಯಾನಿಯನ್ನು ಮೊದಲು 7 ರಿಂದ 8 ನಿಮಿಷಗಳ ಕಾಲ ಹೆಚ್ಚಿನ ಉರಿಯಲ್ಲಿ, ನಂತರ 10 ನಿಮಿಷಗಳ ಕಾಲ ಕಡಿಮೆ ಉರಿಯಲ್ಲಿ ಬೇಯಿಸಿ. ನಂತರ ಪಾತ್ರೆಯನ್ನು ಮುಚ್ಚಿ, 15 ನಿಮಿಷಗಳ ಕಾಲ ಹಾಗೆಯೇ ಬಿಡಿ. ಇದರಿಂದ ಬಿರಿಯಾನಿ ಪರಿಪೂರ್ಣವಾಗಿ ಬೇಯುತ್ತದೆ. ಇಷ್ಟು ಮಾಡಿದರೆ, ರುಚಿಕರವಾದ ಬೆಂಗಳೂರಿನ ಪ್ರಸಿದ್ಧ ಮಶ್ರೂಮ್ ದೊನ್ನೆ ಬಿರಿಯಾನಿ ಸಿದ್ಧ. ಇದನ್ನು ಬಿಸಿಬಿಸಿಯಾಗಿ ಸವಿದರೆ, ಅದರ ರುಚಿ ಸ್ವರ್ಗಕ್ಕೆ ಸಮಾನ. ಇದು ಆರೋಗ್ಯ ಮತ್ತು ರುಚಿಯ ಅದ್ಭುತ ಸಮ್ಮಿಲನವಾಗಿದೆ.