ಜಸ್ಟ್ ನೀರು ಸೇರಿಸಿ.. ಈ ಅದ್ಭುತ ರುಚಿಯ ಚಟ್ನಿ ರೆಡಿ! ಮಿಕ್ಸಿ ಬಳಸದೆ ಮಾಡೋದು ಹೇಗೆ?

ಮಿಕ್ಸಿ ಬಳಸದೆ ಚಟ್ನಿ ಮಾಡುವುದು ಹೇಗೆ? ನೀವು ಚಟ್ನಿ ಮಾಡಲು ಪ್ರತಿದಿನ ಮಿಕ್ಸರ್ ಬಳಸುತ್ತಿದ್ದರೆ, ಈ ಸ್ಮಾರ್ಟ್ ವಿಧಾನ ಅಳವಡಿಸಿಕೊಳ್ಳಿ. ಹೌದು, ಅಡುಗೆ ಮನೆಯಲ್ಲಿ ಟೈಮ್ ಉಳಿಸೋದು ಒಂದು ಕಲೆ. ಅದರಲ್ಲೂ ಬೆಳಗಿನ ಉಪಹಾರದ ತಯಾರಿಕೆಯಲ್ಲಿ. ದೋಸೆ, ಇಡ್ಲಿ, ಪರಾಟ ಅಥವಾ ಸ್ಯಾಂಡ್‌ವಿಚ್ ಯಾವುದೇ ಇರಲಿ, ಅವುಗಳೊಂದಿಗೆ ತಾಜಾ ಹಸಿರು ಚಟ್ನಿ (Green Chutney) ಇಲ್ಲದಿದ್ದರೆ ಆ ಉಪಾಹಾರವೇ ಅಪೂರ್ಣ ಎನಿಸುತ್ತದೆ.

ಆದರೆ, ಪ್ರತಿದಿನ ಬೆಳಗ್ಗೆ ಕೆಲಸದ ಆತುರದಲ್ಲಿ ಅಥವಾ ಕಾಲೇಜಿಗೆ ಹೊರಡುವ ಧಾವಂತದಲ್ಲಿ ಕೊತ್ತಂಬರಿ ಸೊಪ್ಪು ಬಿಡಿಸಿ, ತೊಳೆದು, ಮಿಕ್ಸಿ ಮಾಡುವುದು ಒಂದು ದೊಡ್ಡ ಶ್ರಮದಾಯಕ ಕೆಲಸವೇ ಸರಿ. ನೀವು ಪ್ರತಿದಿನ ಚಟ್ನಿ ರುಬ್ಬುವ ಜಗಳದಿಂದ ಮುಕ್ತಿ ಪಡೆಯಲು ಬಯಸುವುದಾದರೆ, ಇಲ್ಲಿದೆ ನಿಮಗೆ ಒಂದು ಸ್ಮಾರ್ಟ್ ಐಡಿಯಾ. ಅದುವೇ ಗ್ರೀನ್ ಚಟ್ನಿ ಪ್ರಿ-ಮಿಕ್ಸ್ (Green Chutney Premix).

ಇದು ಇನ್‌ಸ್ಟಂಟ್ ಕಾಫಿಯಂತೆಯೇ ಬಳಸಲು ಸುಲಭ. ಕೇವಲ ಒಂದು ಚಮಚ ಪ್ರಿ-ಮಿಕ್ಸ್‌ಗೆ ನೀರು ಸೇರಿಸಿದರೆ ಸಾಕು, ಕ್ಷಣಾರ್ಧದಲ್ಲಿ ಬಾಯಿ ಹೊಡಿಸುವ ತಾಜಾ ಹಸಿರು ಚಟ್ನಿ ಸಿದ್ಧವಾಗುತ್ತದೆ. ಪ್ರಿ-ಮಿಕ್ಸ್ ತಯಾರಿಸಲು ಅಗತ್ಯವಿರುವ ಸಾಮಗ್ರಿಗಳು ಹಾಗೂ ತಯಾರಿಸುವ ವಿಧಾನ (Green Chutney Premix Recipe) ಇಲ್ಲಿದೆ.

ಗ್ರೀನ್ ಚಟ್ನಿ ಪ್ರಿ-ಮಿಕ್ಸ್ ಎಂದರೇನು?

ಇದು ಹಸಿರು ಚಟ್ನಿ ತಯಾರಿಸಲು ಬೇಕಾಗುವ ಎಲ್ಲಾ ಪದಾರ್ಥಗಳನ್ನು ಒಣಗಿಸಿ, ನಂತರ ಪುಡಿ ಮಾಡಿ ಸಿದ್ಧಪಡಿಸಿದ ಮಿಶ್ರಣವಾಗಿದೆ. ಇದನ್ನು ಒಮ್ಮೆ ತಯಾರಿಸಿಟ್ಟುಕೊಂಡರೆ, ವಾರಗಟ್ಟಲೆ ಅಥವಾ ತಿಂಗಳುಗಟ್ಟಲೆ ಮಿಕ್ಸಿ ಬಳಕೆಯಿಲ್ಲದೆ ಚಟ್ನಿ ಮಾಡಬಹುದು. ಪ್ರಯಾಣ ಮಾಡುವವರಿಗೆ, ಹಾಸ್ಟೆಲ್ ವಿದ್ಯಾರ್ಥಿಗಳಿಗೆ ಅಥವಾ ಅಡುಗೆ ಮಾಡಲು ಸಮಯವಿಲ್ಲದ ಬ್ಯಾಚುಲರ್‌ಗಳಿಗೆ ಇದು ನಿಜಕ್ಕೂ ವರದಾನ.

ಪ್ರಿ-ಮಿಕ್ಸ್ ತಯಾರಿಸಲು ಅಗತ್ಯವಿರುವ ಸಾಮಗ್ರಿಗಳು

• ಹಸಿ ಕೊತ್ತಂಬರಿ ಸೊಪ್ಪು
• ಪುದೀನಾ ಎಲೆಗಳು
• ಶುಂಠಿ
• ಹಸಿ ಮೆಣಸಿನಕಾಯಿ
• ಹುರಿಗಡಲೆ (ಪುಟಾಣಿ)
• ಉಪ್ಪು
• ಚಾಟ್ ಮಸಾಲ

ಗ್ರೀನ್ ಚಟ್ನಿ ಪ್ರಿ-ಮಿಕ್ಸ್ ತಯಾರಿಸುವ ವಿಧಾನ

- ಮೊದಲಿಗೆ ಕೊತ್ತಂಬರಿ ಸೊಪ್ಪು ಮತ್ತು ಪುದೀನಾ ಎಲೆಗಳನ್ನು ನೀರಿನಲ್ಲಿ ಚೆನ್ನಾಗಿ ತೊಳೆದು ಸ್ವಚ್ಛಗೊಳಿಸಿ. ಮಣ್ಣು ಅಥವಾ ಕಸ ಇಲ್ಲದಂತೆ ನೋಡಿಕೊಳ್ಳಿ. ತೊಳೆದ ನಂತರ ಅವುಗಳಲ್ಲಿರುವ ನೀರನ್ನು ಸಂಪೂರ್ಣವಾಗಿ ಸೋಸಿ, ಯಾವುದೇ ತೇವಾಂಶ ಉಳಿಯದಂತೆ ಮಾಡಿ.

- ಪ್ರಿ-ಮಿಕ್ಸ್ ಹೆಚ್ಚು ಕಾಲ ಬಾಳಿಕೆ ಬರಲು ತೇವಾಂಶ ರಹಿತವಾಗಿರಬೇಕು. ತೊಳೆದ ಸೊಪ್ಪನ್ನು ಹತ್ತಿ ಬಟ್ಟೆಯ ಮೇಲೆ ಹರಡಿ ನೆರಳಿನಲ್ಲಿ ಚೆನ್ನಾಗಿ ಒಣಗಿಸಿ. ಶುಂಠಿ ಮತ್ತು ಹಸಿಮೆಣಸಿನಕಾಯಿಯನ್ನು ಸಣ್ಣದಾಗಿ ಹೆಚ್ಚಿ ಅದನ್ನು ಕೂಡ ಸ್ವಲ್ಪ ಹೊತ್ತು ಒಣಗಿಸಿ. ನೆನಪಿಡಿ: ಬಿಸಿಲಿನಲ್ಲಿ ಒಣಗಿಸಿದರೆ ಸೊಪ್ಪಿನ ಬಣ್ಣ ಕಪ್ಪಾಗಬಹುದು, ಆದ್ದರಿಂದ ನೆರಳಿನಲ್ಲಿ ಒಣಗಿಸುವುದು ಉತ್ತಮ.

- ಒಂದು ಒಣಗಿದ ಮಿಕ್ಸಿ ಜಾರ್ ತೆಗೆದುಕೊಳ್ಳಿ (ಅದರಲ್ಲಿ ಒಂದು ಹನಿ ನೀರೂ ಇರಬಾರದು). ಈಗ ಒಣಗಿದ ಕೊತ್ತಂಬರಿ, ಪುದೀನಾ, ಶುಂಠಿ, ಹಸಿಮೆಣಸಿನಕಾಯಿ, ಹುರಿಗಡಲೆ, ಉಪ್ಪು ಮತ್ತು ಚಾಟ್ ಮಸಾಲ ಸೇರಿಸಿ. ಖಂಡಿತಾ ನೀರು ಸೇರಿಸಬೇಡಿ. ಎಲ್ಲವನ್ನೂ ನುಣ್ಣಗೆ ಪುಡಿ ಮಾಡಿ.

- ಸಿದ್ಧವಾದ ಪುಡಿಯನ್ನು ಹೊರತೆಗೆದು ಗಾಳಿಯಾಡದ ಡಬ್ಬದಲ್ಲಿ ಹಾಕಿಡಿ. ಇದನ್ನು ಫ್ರಿಡ್ಜ್‌ನಲ್ಲಿಟ್ಟರೆ ಸುಮಾರು ಎರಡು ತಿಂಗಳವರೆಗೆ ತಾಜಾ ಆಗಿರುತ್ತದೆ.

ಪ್ರಿ-ಮಿಕ್ಸ್‌ನಿಂದ ಚಟ್ನಿ ತಯಾರಿಸುವುದು ಹೇಗೆ?

ನಿಮಗೆ ಚಟ್ನಿ ಬೇಕಾದಾಗ, ಒಂದು ಬೌಲ್‌ಗೆ ಒಂದು ಚಮಚ ಪ್ರಿ-ಮಿಕ್ಸ್ ಪುಡಿಯನ್ನು ಹಾಕಿ. ಅದಕ್ಕೆ ಬೇಕಾದಷ್ಟು ನೀರು ಸೇರಿಸಿ ಚೆನ್ನಾಗಿ ಮಿಶ್ರಣ ಮಾಡಿ. ಬೇಕಿದ್ದರೆ, ಎರಡು ಹನಿ ನಿಂಬೆ ರಸ ಸೇರಿಸಿದರೆ ಬಾಯಿ ನೀರೂರಿಸುವ, ಚಟಪಟಿಯಾದ ಹಸಿರು ಚಟ್ನಿ ತಕ್ಷಣವೇ ಸಿದ್ಧ.

ಒಟ್ಟಾರೆ, ನಿಮ್ಮ ಮನೆಯಲ್ಲಿಯೇ ಸುಲಭವಾಗಿ 'ಗ್ರೀನ್ ಚಟ್ನಿ ಪ್ರಿ-ಮಿಕ್ಸ್' ತಯಾರಿಸಿಟ್ಟುಕೊಳ್ಳಿ. ಇದರಿಂದ ಪ್ರತಿದಿನ ಬೆಳಗಿನ ಚಟ್ನಿ ರುಬ್ಬುವ ಶ್ರಮದಿಂದ ಮುಕ್ತಿ ಪಡೆಯಿರಿ. ಕೇವಲ ಒಂದು ಚಮಚ ಪ್ರಿ-ಮಿಕ್ಸ್‌ಗೆ ನೀರು ಸೇರಿಸಿದರೆ ಸಾಕು, ಕ್ಷಣಾರ್ಧದಲ್ಲಿ ತಾಜಾ ಮತ್ತು ರುಚಿಕರವಾದ ಹಸಿರು ಚಟ್ನಿ ಸಿದ್ಧವಾಗುತ್ತದೆ.