ದೀಪಾವಳಿಗೆ ಮನೆಯಲ್ಲೇ ಮಾಡಿ ಅದ್ಭುತ ರುಚಿಯ ಈ ಬರ್ಫಿ! ಲಕ್ಷ್ಮಿ ದೇವಿಗೆ ಬಲು ಪ್ರಿಯ.. ಹೀಗೆ ತಯಾರಿಸಿ

ಈ ದೀಪಾವಳಿಗೆ ಮನೆಯಲ್ಲಿಯೇ ಮಾಡಿ ನೋಡಿ ಗೋಡಂಬಿ-ಬಾದಾಮಿ-ಪಿಸ್ತಾ ಬರ್ಫಿ. ಲಕ್ಷ್ಮಿ ದೇವಿಯೂ ಮೆಚ್ಚುವಳು. ಮನೆಯವರು ಸಹ ಆಹಾ.. ಇಂಥ ರುಚಿ! ಎನ್ನುತ್ತಾರೆ. ಹೌದು, ದೀಪಾವಳಿ ಹಬ್ಬದಂದು (Diwali) ಮನೆಯಲ್ಲಿ ಸಿಹಿ ತಿಂಡಿ ಇಲ್ಲದಿದ್ದರೆ ಹಬ್ಬ ಅಪೂರ್ಣ ಎನಿಸುತ್ತದೆ. ಸಾಮಾನ್ಯವಾಗಿ, ದೀಪಾವಳಿ ಪೂಜೆಗೂ ಮುನ್ನ ಮನೆಯಲ್ಲಿ ರುಚಿಕರ ಸಿಹಿ ತಯಾರಿಸುವ (Diwali sweets) ಸಂಪ್ರದಾಯವಿದೆ. ಇದನ್ನು ಮನೆಗೆ ಬಂದ ಅತಿಥಿಗಳಿಗೂ ನೀಡಬಹುದು ಮತ್ತು ಲಕ್ಷ್ಮೀ ದೇವಿಗೆ ನೈವೇದ್ಯವಾಗಿಯೂ ಅರ್ಪಿಸಬಹುದು.

ಈ ದೀಪಾವಳಿಗೆ ನೀವು ವಿಶಿಷ್ಟ ಹಾಗೂ ರುಚಿಕರ ಸಿಹಿ ತಿಂಡಿ ಮಾಡಲು ಯೋಜಿಸುತ್ತಿದ್ದರೆ, ಕಾಜು (ಗೋಡಂಬಿ), ಬಾದಾಮ್ ಮತ್ತು ಪಿಸ್ತಾ ಬರ್ಫಿ (Kaju Badam Pista Barfi) ಅತ್ಯುತ್ತಮ ಆಯ್ಕೆಯಾಗಿದೆ. ಇದು ಮಕ್ಕಳಿಂದ ಹಿಡಿದು ದೊಡ್ಡವರವರೆಗೂ ಎಲ್ಲರನ್ನೂ ಮೆಚ್ಚಿಸುತ್ತದೆ. ಜೊತೆಗೆ ಸಾಮಾನ್ಯ ಹಾಲಿನ ಬರ್ಫಿಯನ್ನು ಮರೆತುಬಿಡುವಷ್ಟು ಟೇಸ್ಟಿ ಆಗಿರುತ್ತದೆ. ಈ ಬರ್ಫಿಯನ್ನು (burfi) ಕೇವಲ 20-25 ನಿಮಿಷಗಳಲ್ಲಿ ಸಿದ್ಧಪಡಿಸಬಹುದು. ಬನ್ನಿ, ಮನೆಯಲ್ಲಿ ಸುಲಭವಾಗಿ ತಯಾರಿಸುವುದು ಹೇಗೆ ಎಂದು ಈ ಲೇಖನದಲ್ಲಿ ತಿಳಿಯೋಣ.

ಗೋಡಂಬಿ, ಬಾದಾಮ್ ಮತ್ತು ಪಿಸ್ತಾ ಬರ್ಫಿ ತಯಾರಿಸಲು ಬೇಕಾಗುವ ಸಾಮಗ್ರಿಗಳು

• ಗೋಡಂಬಿ (ಕಾಜು) - 1 ಕಪ್
• ಬಾದಾಮಿ (ಬಾದಾಮ್) - 1/2 ಕಪ್
• ಪಿಸ್ತಾ - 1/2 ಕಪ್
• ಕೋವಾ - 1 ಕಪ್
• ಸಕ್ಕರೆ - 3/4 ಕಪ್
• ಹಾಲು - 1/4 ಕಪ್
• ತುಪ್ಪ - 1 ಸ್ಪೂನ್
• ಏಲಕ್ಕಿ ಪುಡಿ - 1/2 ಸ್ಪೂನ್

ಗೋಡಂಬಿ, ಬಾದಾಮ್ ಮತ್ತು ಪಿಸ್ತಾ ಬರ್ಫಿ ತಯಾರಿಸುವ ವಿಧಾನ

ಮೊದಲಿಗೆ, ಗೋಡಂಬಿ (kaju), ಬಾದಾಮ್ (badam), ಪಿಸ್ತಾ (pista) ಬರ್ಫಿ (barfi) ತಯಾರಿಸಲು ಡ್ರೈಫ್ರೂಟ್ಸ್‌ಗಳನ್ನು ನಯವಾದ ಪುಡಿ ಮಾಡಿಕೊಳ್ಳಬೇಕು. ಗೋಡಂಬಿ, ಬಾದಾಮಿ ಮತ್ತು ಪಿಸ್ತಾಗಳನ್ನು ಮಿಕ್ಸರ್ ಗ್ರೈಂಡರ್‌ಗೆ ಹಾಕಿ ಎಣ್ಣೆ ಬಿಡದಂತೆ ನುಣ್ಣಗೆ ಪುಡಿ ಮಾಡಿಕೊಳ್ಳಿ. ನಂತರ, ದಪ್ಪ ತಳದ ಬಾಣಲೆಯಲ್ಲಿ ತುಪ್ಪ ಬಿಸಿ ಮಾಡಿ. ಖೋಯಾವನ್ನು ಸೇರಿಸಿ. ಖೋಯಾ ತಿಳಿ ಕಂದು ಬಣ್ಣಕ್ಕೆ ಬರುವವರೆಗೆ ಅಥವಾ ಉತ್ತಮ ಪರಿಮಳ ಬರುವವರೆಗೆ ನಿಧಾನ ಉರಿಯಲ್ಲಿ ಹುರಿಯಿರಿ.

ಖೋಯಾ ಹುರಿದ ನಂತರ, ಅದಕ್ಕೆ ಡ್ರೈಫ್ರೂಟ್ಸ್ ಪುಡಿ ಸೇರಿಸಿ ಚೆನ್ನಾಗಿ ಮಿಕ್ಸ್ ಮಾಡಿ. ಬಳಿಕ ಹಾಲು ಮತ್ತು ಸಕ್ಕರೆ ಬೆರಸಿ. ಸಕ್ಕರೆ ಸಂಪೂರ್ಣವಾಗಿ ಕರಗಿ ಮಿಶ್ರಣ ದಪ್ಪವಾಗುವವರೆಗೆ, ಸುಮಾರು 5 ನಿಮಿಷಗಳ ಕಾಲ ಬೇಯಿಸಿ. ಮಿಶ್ರಣವು ಪಾತ್ರೆಯ ಅಂಚುಗಳನ್ನು ಬಿಟ್ಟು ಒಂದಾಗುವವರೆಗೆ ಕೈ ಆಡಿಸುತ್ತಲೇ ಇರಿ. ಗಂಟುಗಳಾಗದಂತೆ ನೋಡಿಕೊಳ್ಳಿ. ಮಿಶ್ರಣ ಸರಿಯಾದ ಹದಕ್ಕೆ ಬಂದ ನಂತರ, ಏಲಕ್ಕಿ ಪುಡಿ ಸೇರಿಸಿ ಚೆನ್ನಾಗಿ ಮಿಕ್ಸ್ ಮಾಡಿ.

ಈಗ ಒಂದು ತಟ್ಟೆ ಅಥವಾ ಟ್ರೇಗೆ ತುಪ್ಪ ಸವರಿ. ತಯಾರಾದ ಬರ್ಫಿ ಮಿಶ್ರಣವನ್ನು ಈ ಟ್ರೇಗೆ ಸುರಿದು, ಸ್ಪೂನ್ ಬಳಸಿ ಎಲ್ಲೆಡೆ ಸಮನಾಗಿ ಹರಡಿ. ಬರ್ಫಿ ಸೆಟ್ ಆಗಲು ಸುಮಾರು 15-20 ನಿಮಿಷಗಳ ಕಾಲ ತಣ್ಣಗಾಗಲು ಬಿಡಿ. ಸಂಪೂರ್ಣವಾಗಿ ತಣ್ಣಗಾದ ನಂತರ, ಬರ್ಫಿಯನ್ನು ನಿಮ್ಮ ಇಚ್ಛೆಯಂತೆ ಚೌಕಾಕಾರ ಅಥವಾ ಡೈಮಂಡ್ ಆಕಾರದ ತುಂಡುಗಳಾಗಿ ಕತ್ತರಿಸಿ. ಇಷ್ಟು ಮಾಡಿದರೆ, ಮನೆಯಲ್ಲಿಯೇ ರುಚಿಕರವಾದ ಮತ್ತು ಕ್ರಂಚಿ ಕಾಜು ಬಾದಾಮ್ ಪಿಸ್ತಾ ಬರ್ಫಿ ಸಿದ್ಧವಾಗುತ್ತದೆ. ಇದನ್ನು ಮೊದಲು ಲಕ್ಷ್ಮೀ ದೇವಿಗೆ ಅರ್ಪಿಸಿ, ನಂತರ ಅತಿಥಿಗಳಿಗೆ ಹಂಚಿ. ಉಳಿದ ಬರ್ಫಿಯನ್ನು ಗಾಳಿಯಾಡದ ಡಬ್ಬದಲ್ಲಿ ಸಂಗ್ರಹಿಸಿ, ದೀರ್ಘಕಾಲದವರೆಗೆ ಬಳಸಬಹುದು.