ಬ್ಯಾಚುಲರ್ಸ್‌ಗಾಗಿ ಸಿಂಪಲ್ ಬಿರಿಯಾನಿ! ಕುಕ್ಕರ್‌ನಲ್ಲಿ ಮಾಡಿ ಢಾಬಾ ಸ್ಟೈಲ್‌ ಎಗ್ ಬಿರಿಯಾನಿ.. ಉದುರು ಉದುರಾಗಲು ಹೀಗೆ ಮಾಡಿ

ಬ್ಯಾಚುಲರ್ಸ್‌ಗಾಗಿ ಅತೀ ಸುಲಭ ಈ ಬಿರಿಯಾನಿ! ಅತೀ ಕಡಿಮೆ ಪದಾರ್ಥ ಬಳಸಿ ಮಾಡಿ ಈ ಸ್ಪೆಷಲ್ ಬಿರಿಯಾನಿ. ಉದುರು ಉದುರಾದ ಅನ್ನಕ್ಕೆ ಹೀಗೆ ಮಾಡಿ. ಹೌದು, ನಾನ್‌ವೆಜ್ ಪ್ರಿಯರ ಪಾಲಿಗೆ ಬಿರಿಯಾನಿ (Biryani) ಅತ್ಯಂತ ಅಚ್ಚುಮೆಚ್ಚಿನ ಖಾದ್ಯ. ಸಾಮಾನ್ಯವಾಗಿ ಚಿಕನ್ ಅಥವಾ ಮಟನ್ ಬಿರಿಯಾನಿ ತಯಾರಿಸಲು ಹೆಚ್ಚು ಸಮಯ ಮತ್ತು ಶ್ರಮ ಬೇಕಾಗುತ್ತದೆ.

ಆದರೆ, ಅಷ್ಟೇ ರುಚಿಕರವಾದ ಎಗ್ ಬಿರಿಯಾನಿಯನ್ನು ಕಡಿಮೆ ಸಮಯದಲ್ಲಿ ಸುಲಭವಾಗಿ ಮನೆಯಲ್ಲೇ ಸಿದ್ಧಪಡಿಸಬಹುದು. ಅದರಲ್ಲೂ ಹೋಟೆಲ್ ಅಥವಾ ಢಾಬಾಗಳಲ್ಲಿ ಸಿಗುವಂತಹ ಘಮಘಮಿಸುವ ಎಗ್ ಬಿರಿಯಾನಿಯನ್ನು (Egg Biryani) ಮನೆಯಲ್ಲೇ ಸರಳವಾಗಿ ಮಾಡುವ ವಿಧಾನ ಇಲ್ಲಿದೆ.

ಬಿರಿಯಾನಿ ಕೇವಲ ಅಡುಗೆಯಲ್ಲ, ಅದು ಒಂದು ಭಾವನೆ. ವಿಭಿನ್ನ ಮಸಾಲೆಗಳ ಸಮ್ಮಿಲನ ಹಾಗೂ ಬಾಸುಮತಿ ಅಕ್ಕಿಯ ಸುಗಂಧ ಎಲ್ಲರನ್ನೂ ಸೆಳೆಯುತ್ತದೆ. ಮೊಟ್ಟೆ ಪ್ರಿಯರಿಗೆ ಢಾಬಾ ಶೈಲಿಯ ಎಗ್ ಬಿರಿಯಾನಿ (Egg Biryani Recipe) ಅತ್ಯಂತ ಇಷ್ಟವಾಗುತ್ತದೆ. ಇದು ಪೌಷ್ಟಿಕಾಂಶಭರಿತವಾಗಿದ್ದು, ಮೊಟ್ಟೆಯ ಉತ್ತಮ ಗುಣಮಟ್ಟದ ಪ್ರೋಟೀನ್ ಹೊಂದಿದೆ. ಚಿಕನ್ ಬಿರಿಯಾನಿಗಿಂತ ಅರ್ಧದಷ್ಟು ಸಮಯದಲ್ಲಿ ತಯಾರಾಗುವ ಇದು, ಅತಿಥಿಗಳಿಗೆ ಕೂಡ ಅತ್ಯುತ್ತಮ ಆಯ್ಕೆ.

ಈ ಬಿರಿಯಾನಿ ತಯಾರಿಸಲು ಬೇಕಾಗುವ ಸಾಮಗ್ರಿಗಳು

• ಅಕ್ಕಿ (ಬಾಸುಮತಿ ಅಕ್ಕಿ)
• ಮೊಟ್ಟೆಗಳು
• ಈರುಳ್ಳಿ
• ಹಸಿ ಮೆಣಸಿನಕಾಯಿ
• ಶುಂಠಿ-ಬೆಳ್ಳುಳ್ಳಿ ಪೇಸ್ಟ್

ಮಸಾಲೆಗಳು

• ತೇಜಪತ್ರ
• ಲವಂಗ
• ಕಾಳುಮೆಣಸು
• ದಾಲ್ಚಿನ್ನಿ
• ಪುಲಾವ್ ಅಥವಾ ಬಿರಿಯಾನಿ ಮಸಾಲಾ
• ಎಣ್ಣೆ ಅಥವಾ ತುಪ್ಪ
• ರುಚಿಗೆ ತಕ್ಕಷ್ಟು ಉಪ್ಪು
• ಕೊತ್ತಂಬರಿ ಸೊಪ್ಪು
• ನಿಂಬೆ ರಸ

ಢಾಬಾ ಸ್ಟೈಲ್‌ ಬಿರಿಯಾನಿ ತಯಾರಿಸುವ ವಿಧಾನ

- ಮೊದಲಿಗೆ, ಮೊಟ್ಟೆಗಳನ್ನು ಗಟ್ಟಿಯಾಗಿ ಬೇಯಿಸಿಕೊಂಡು, ಸಿಪ್ಪೆ ತೆಗೆದು ಪಕ್ಕಕ್ಕಿಡಿ.

- ಹೆಚ್ಚು ರುಚಿಗಾಗಿ, ಈ ಬೇಯಿಸಿದ ಮೊಟ್ಟೆಗಳ ಮೇಲೆ ಉಪ್ಪು ಮತ್ತು ಅಚ್ಚಖಾರದ ಪುಡಿ ಸವರಿ ಲಘುವಾಗಿ ಹುರಿಯಬಹುದು.

- ಈಗ ಬಿರಿಯಾನಿ ಪಾತ್ರೆ ಅಥವಾ ಕುಕ್ಕರ್‌ನಲ್ಲಿ ಎಣ್ಣೆ ಬಿಸಿ ಮಾಡಿ. ಕಾದ ಎಣ್ಣೆಗೆ ತೇಜಪತ್ರ, ಲವಂಗ, ದಾಲ್ಚಿನ್ನಿ, ಮತ್ತು ಕಾಳುಮೆಣಸು ಸೇರಿಸಿ. ಇವು ಚಿಟಪಟ ಅಂದಾಗ ಹೆಚ್ಚಿದ ಈರುಳ್ಳಿ ಮತ್ತು ಹಸಿಮೆಣಸಿನಕಾಯಿ ಹಾಕಿ ಈರುಳ್ಳಿ ಹೊಂಬಣ್ಣಕ್ಕೆ ಬರುವವರೆಗೆ ಹುರಿಯಿರಿ.

- ನಂತರ ಶುಂಠಿ-ಬೆಳ್ಳುಳ್ಳಿ ಪೇಸ್ಟ್ ಸೇರಿಸಿ ಹಸಿ ವಾಸನೆ ಸಂಪೂರ್ಣವಾಗಿ ಹೊರಹೋಗುವವರೆಗೆ ಹುರಿಯುವುದನ್ನು ಮುಂದುವರಿಸಿ.

- ಢಾಬಾ ಸ್ಟೈಲ್‌ ರುಚಿಗೆ ಇದೊಂದು ಪ್ರಮುಖ ಹಂತ. ಇದೇ ಒಗ್ಗರಣೆಗೆ ಹಸಿ ಮೊಟ್ಟೆಗಳನ್ನು ಒಡೆದು ಹಾಕಿ, ಚೆನ್ನಾಗಿ ಕೈಯಾಡಿಸಿ ಭುರ್ಜಿ ತಯಾರಿಸಿಕೊಳ್ಳಿ. ಇದು ಅನ್ನದೊಂದಿಗೆ ಮಸಾಲೆ ತರಹ ಬೆರೆತು, ಬಿರಿಯಾನಿಯ ರುಚಿಯನ್ನು ಇನ್ನಷ್ಟು ಹೆಚ್ಚಿಸುತ್ತದೆ.

- ಈಗ ತೊಳೆದು, ನೆನೆಸಿಟ್ಟ ಬಾಸುಮತಿ ಅಕ್ಕಿಯನ್ನು ಸೇರಿಸಿ ಒಂದು ನಿಮಿಷ ಮಸಾಲೆಗಳೊಂದಿಗೆ ಲಘುವಾಗಿ ಹುರಿಯಿರಿ.

- ನಂತರ ಪುಲಾವ್ ಮಸಾಲಾ ಅಥವಾ ಬಿರಿಯಾನಿ ಮಸಾಲಾ ಹಾಗೂ ರುಚಿಗೆ ತಕ್ಕಷ್ಟು ಉಪ್ಪು ಸೇರ್ಪಡೆ ಮಾಡಿ ಚೆನ್ನಾಗಿ ಮಿಕ್ಸ್ ಮಾಡಿ.

- ಈ ಮಿಶ್ರಣಕ್ಕೆ ನೀರನ್ನು ಸೇರಿಸಿ (ಒಂದು ಕಪ್ ಅಕ್ಕಿಗೆ ಎರಡು ಕಪ್ ನೀರು). ಅಕ್ಕಿ ಅರ್ಧದಷ್ಟು ಬೆಂದಾಗ, ಮೇಲೆ ಬೇಯಿಸಿಟ್ಟ ಮೊಟ್ಟೆಗಳನ್ನು ಇರಿಸಿ.

- ಈಗ ಸ್ವಲ್ಪ ನಿಂಬೆ ರಸವನ್ನು ಸಮವಾಗಿ ಹಾಕಿ. ನಂತರ ಪಾತ್ರೆಯ ಮುಚ್ಚಳವನ್ನು ಮುಚ್ಚಿ, ಉರಿಯನ್ನು ಕಡಿಮೆ ಮಾಡಿ, ಅನ್ನ ಪೂರ್ತಿಯಾಗಿ ಬೇಯಲು (ದಮ್) ಬಿಡಿ.

- ನೀರೆಲ್ಲಾ ಇಂಗಿ ಅನ್ನ ಉದುರು ಉದುರಾಗಿ ಬೆಂದ ನಂತರ, ಮೇಲೆ ಸಣ್ಣದಾಗಿ ಹೆಚ್ಚಿದ ಕೊತ್ತಂಬರಿ ಸೊಪ್ಪನ್ನು ಉದುರಿಸಿ. ಈಗ ನಿಮ್ಮ ಘಮಘಮಿಸುವ ಢಾಬಾ ಸ್ಟೈಲ್‌ ಎಗ್ ಬಿರಿಯಾನಿ ಸವಿಯಲು ಸಿದ್ಧ.

- ಈ ಬಿಸಿಬಿಸಿ ಎಗ್ ಬಿರಿಯಾನಿಯನ್ನು ತಣ್ಣನೆಯ ಮೊಸರು ಬಜ್ಜಿ (ರೈತಾ), ಈರುಳ್ಳಿ ಸ್ಲೈಸ್ ಮತ್ತು ನಿಂಬೆಹಣ್ಣಿನೊಂದಿಗೆ ಸೇವಿಸಿದರೆ ಅದರ ರುಚಿ ಮಸ್ತ್ ಇರುತ್ತೆ.

- ನಿಮ್ಮ ಊಟದ ಡಬ್ಬಿಗೆ (ಲಂಚ್ ಬಾಕ್ಸ್) ಕೊಂಡೊಯ್ಯಲು ಸಹ ಇದು ಸೂಕ್ತವಾದ ಮತ್ತು ರುಚಿಕರವಾದ ಆಯ್ಕೆ.