100% ಢಾಬಾ ಸ್ಟೈಲ್‌ ರುಚಿ! ಮನೆಯಲ್ಲೇ ಮಾಡಿ ಸ್ಪೈಸಿ ಚಿಕನ್ ಚಿಲ್ಲಿ.. ಅತೀ ಸುಲಭ ವಿಧಾನ

ಮನೆಯಲ್ಲೇ ಮಾಡಿ ಢಾಬಾ ಸ್ಟೈಲ್‌ ರುಚಿ! ನಿಮಿಷಗಳಲ್ಲೇ ಖಾರ ಖಾರ ಚಿಕನ್ ಚಿಲ್ಲಿ ರೆಡಿ.. ಅತೀ ಸುಲಭ ವಿಧಾನ ಇದು. ಹೌದು, ನಾನ್‌ವೆಜ್ ಪ್ರಿಯರಿಗೆ, ಅದರಲ್ಲೂ ಮಸಾಲೆಯುಕ್ತ ಖಾದ್ಯಗಳನ್ನು ಇಷ್ಟಪಡುವವರಿಗೆ 'ಢಾಬಾ ಶೈಲಿಯ ಚಿಕನ್ ಚಿಲ್ಲಿ' (Dhaba Style Chicken Chilli) ಒಂದು ಅತ್ಯುತ್ತಮ ಆಯ್ಕೆ. ಹೆದ್ದಾರಿ ಬದಿಯ ಧಾಬಾಗಳ ವಿಶಿಷ್ಟ ಘಮ ಮತ್ತು ರುಚಿಗೆ ಹೆಚ್ಚಿನವರು ಮಾರುಹೋಗುತ್ತಾರೆ.

ಅದೇ ಆಸ್ವಾದವನ್ನು ಈಗ ನಿಮ್ಮ ಅಡುಗೆಮನೆಯಲ್ಲೇ ಸುಲಭವಾಗಿ ಪಡೆಯಬಹುದು. ಇದನ್ನು ಸ್ಟಾರ್ಟರ್ ಆಗಿ ಅಥವಾ ಅನ್ನ, ನೂಡಲ್ಸ್, ಚಪಾತಿಗಳೊಂದಿಗೆ ಸೈಡ್ ಡಿಶ್ ಆಗಿ ಸವಿಯಬಹುದು. ಮನೆಯಲ್ಲಿಯೇ ಢಾಬಾ ಶೈಲಿಯ ಚಿಕನ್ ಚಿಲ್ಲಿ ತಯಾರಿಸುವುದು ಈಗ ಸರಳ. ಈ ಮಸಾಲೆಯುಕ್ತ ಚಿಕನ್ ರೆಸಿಪಿಯ ತಯಾರಿಸುವ ವಿಧಾನ (Dhaba Style Chicken Chilli Recipe) ಹಾಗೂ ರುಚಿಯ ರಹಸ್ಯಗಳನ್ನು ಈ ಲೇಖನದಲ್ಲಿ ತಿಳಿಸಲಾಗಿದೆ. ಚಿಕನ್ ಪ್ರಿಯರಿಗೆ ಇದು ಖಂಡಿತಾ ಇಷ್ಟವಾಗುತ್ತದೆ, ಹಾಗಾಗಿ ಒಮ್ಮೆ ಪ್ರಯತ್ನಿಸಿ ನೋಡಿ.

Photo Credit: ಸಂಗ್ರಹ ಚಿತ್ರ

ಚಿಕನ್ ಚಿಲ್ಲಿಗೆ ಬೇಕಾಗುವ ಸಾಮಗ್ರಿಗಳು

• ಬೋನ್‌ಲೆಸ್ ಚಿಕನ್
• ಹಸಿ ಮೆಣಸಿನಕಾಯಿ
• ಈರುಳ್ಳಿ
• ಸಿಮ್ಲಾ ಮಿರ್ಚ್ (ಕ್ಯಾಪ್ಸಿಕಂ - ಉದ್ದಕ್ಕೆ ಹೆಚ್ಚಿದ್ದು)
• ಶುಂಠಿ - ಬೆಳ್ಳುಳ್ಳಿ ಪೇಸ್ಟ್
• ಸೋಯಾ ಸಾಸ್
• ಟೊಮೆಟೊ ಸಾಸ್
• ಕೆಂಪು ಮೆಣಸಿನ ಪುಡಿ
• ಕಾಳುಮೆಣಸಿನ ಪುಡಿ
• ರುಚಿಗೆ ತಕ್ಕಷ್ಟು ಉಪ್ಪು
• ಕೊತ್ತಂಬರಿ ಸೊಪ್ಪು
• ಒಗ್ಗರಣೆಗೆ ಎಣ್ಣೆ

ಚಿಕನ್ ಚಿಲ್ಲಿ ತಯಾರಿಸುವ ವಿಧಾನ

- ಮೊದಲು, ಚಿಕನ್ ತುಂಡುಗಳನ್ನು ಚೆನ್ನಾಗಿ ತೊಳೆದು ನೀರು ಸೋಸಿಕೊಳ್ಳಿ. ಇದಕ್ಕೆ ಅರ್ಧ ಚಮಚ ಉಪ್ಪು, ಕಾಳುಮೆಣಸಿನ ಪುಡಿ ಮತ್ತು 1 ಚಮಚ ಸೋಯಾ ಸಾಸ್ ಸೇರಿಸಿ ಚೆನ್ನಾಗಿ ಬೆರೆಸಿ. ಇದನ್ನು 15 ರಿಂದ 20 ನಿಮಿಷಗಳ ಕಾಲ ನೆನೆಯಲು ಬಿಡಿ. ಇದರಿಂದ ಮಸಾಲೆ ಚಿಕನ್‌ಗೆ ಚೆನ್ನಾಗಿ ಹಿಡಿಯುತ್ತದೆ.

- ಒಂದು ಬಾಣಲೆಯಲ್ಲಿ ಎಣ್ಣೆ ಬಿಸಿ ಮಾಡಿ. ಮ್ಯಾರಿನೇಟ್ ಮಾಡಿದ ಚಿಕನ್ ತುಂಡುಗಳನ್ನು ಹಾಕಿ, ಹೊಂಬಣ್ಣ ಬಂದು ಚಿಕನ್ ಬೇಯುವವರೆಗೆ ಕರಿಯಿರಿ. ನಂತರ ಒಂದು ತಟ್ಟೆಗೆ ತೆಗೆದಿಟ್ಟುಕೊಳ್ಳಿ.

- ಅದೇ ಬಾಣಲೆಯಲ್ಲಿ 2 ಚಮಚ ಎಣ್ಣೆ ಉಳಿಸಿಕೊಂಡು, ಶುಂಠಿ-ಬೆಳ್ಳುಳ್ಳಿ ಪೇಸ್ಟ್ ಹಾಕಿ ಒಂದು ನಿಮಿಷ ಹುರಿಯಿರಿ. ನಂತರ ಹೆಚ್ಚಿದ ಈರುಳ್ಳಿ, ಹಸಿ ಮೆಣಸಿನಕಾಯಿ ಮತ್ತು ಸಿಮ್ಲಾ ಮಿರ್ಚ್ ಸೇರಿಸಿ. ತರಕಾರಿಗಳು ಅತಿಯಾಗಿ ಬೇಯಬಾರದು, ಅವುಗಳ ಗರಿಗರಿತನ ಹಾಗೆಯೇ ಇರಲಿ.

- ಈಗ ಉರಿಯನ್ನು ಕಡಿಮೆ ಮಾಡಿ, ಟೊಮೆಟೊ ಸಾಸ್, ಉಳಿದ ಸೋಯಾ ಸಾಸ್, ಕೆಂಪು ಮೆಣಸಿನ ಪುಡಿ, ರುಚಿಗೆ ತಕ್ಕಷ್ಟು ಉಪ್ಪು ಮತ್ತು ಕಾಳುಮೆಣಸಿನ ಪುಡಿ ಸೇರಿಸಿ ಮಿಕ್ಸ್ ಮಾಡಿ. ಸಾಸ್ ಸೀದು ಹೋಗದಂತೆ ಬೇಕಿದ್ದಲ್ಲಿ ಸ್ವಲ್ಪ ನೀರು ಚಿಮುಕಿಸಬಹುದು.

- ಈಗ ಮೊದಲೇ ಫ್ರೈ ಮಾಡಿಟ್ಟ ಚಿಕನ್ ತುಂಡುಗಳನ್ನು ಮಸಾಲೆಯೊಳಗೆ ಹಾಕಿ. ಸಾಸ್ ಮತ್ತು ಮಸಾಲೆ ಚಿಕನ್‌ಗೆ ಸರಿಯಾಗಿ ಅಂಟಿಕೊಳ್ಳುವಂತೆ 5 ನಿಮಿಷಗಳ ಕಾಲ ಸಣ್ಣ ಉರಿಯಲ್ಲಿ ಕೈಯಾಡಿಸಿ. ಚಿಕನ್ ಸಾಸ್ ಅನ್ನು ಚೆನ್ನಾಗಿ ಹೀರಿಕೊಂಡ ನಂತರ ಸ್ಟೌವ್ ಆಫ್ ಮಾಡಿ.

- ಅಂತಿಮವಾಗಿ ಸಣ್ಣಗೆ ಹೆಚ್ಚಿದ ಹಸಿ ಕೊತ್ತಂಬರಿ ಸೊಪ್ಪನ್ನು ಚಿಮುಕಿಸಿ ಅಲಂಕರಿಸಿ. ಈಗ ಬಿಸಿಬಿಸಿಯಾದ, ಮಸಾಲೆಯುಕ್ತ ಢಾಬಾ ಶೈಲಿಯ ಚಿಕನ್ ಚಿಲ್ಲಿ (Restaurant Style Chicken Chilli) ಸವಿಯಲು ಸಿದ್ಧ.

ಚಿಕನ್ ಚಿಲ್ಲಿ ರುಚಿ ಹೆಚ್ಚಿಸಲು ಟಿಪ್ಸ್

• ಚಿಕನ್ ಮೃದುವಾಗಿರಲು ಮ್ಯಾರಿನೇಷನ್ ಮಾಡುವಾಗ ಒಂದು ಮೊಟ್ಟೆ ಮತ್ತು ಸ್ವಲ್ಪ ಕಾರ್ನ್ ಫ್ಲೋರ್ ಸೇರಿಸಬಹುದು.

• ಧಾಬಾ ಸ್ಟೈಲ್ ಬಣ್ಣಕ್ಕಾಗಿ ಒಂದು ಚಿಟಿಕೆ 'ರೆಡ್ ಫುಡ್ ಕಲರ್' ಬಳಸಬಹುದು.

• ಹೆಚ್ಚು ಖಾರ ಬೇಕಿದ್ದಲ್ಲಿ, ಮಿಶ್ರಣಕ್ಕೆ ಚಿಲ್ಲ ಸಾಸ್ ಕೂಡ ಸೇರಿಸಬಹುದು.

ಹೊರಗಿನ ಹೋಟೆಲ್ ಆಹಾರಕ್ಕಿಂತ ಮನೆಯಲ್ಲೇ ತಯಾರಿಸಿದ ಈ ಚಿಕನ್ ಚಿಲ್ಲಿ ಆರೋಗ್ಯಕರ ಮತ್ತು ಹೆಚ್ಚು ರುಚಿಕರವಾಗಿರುವುದು. ಮಕ್ಕಳಿಂದ ಹಿರಿಯರವರೆಗೆ ಎಲ್ಲರೂ ಇದನ್ನು ಇಷ್ಟಪಟ್ಟು ತಿನ್ನುತ್ತಾರೆ. ನಿಮ್ಮ ಮುಂದಿನ ಪಾರ್ಟಿ ಅಥವಾ ವೀಕೆಂಡ್ ಸ್ಪೆಷಲ್ ಅಡುಗೆಗೆ ಇದನ್ನೊಮ್ಮೆ ಟ್ರೈ ಮಾಡಿ.