ಚೀನಾದಲ್ಲಿ ಹೊಸ ಬಗೆಯ ಹಂದಿ ಜ್ವರ: ಕಾದಿದೆಯೇ ಮತ್ತೊಂದು ಸಾಂಕ್ರಾಮಿಕ ಪಿಡುಗಿನ ಅಪಾಯ?

ಹೊಸ ವೈರಸ್ ಬಗ್ಗೆ ವಿಜ್ಞಾನಿಗಳು ಏನು ಹೇಳಿದ್ದಾರೆ?

Proceedings of the National Academy of Sciences ಜರ್ನಲ್‌ನಲ್ಲಿ ಪ್ರಕಟವಾಗಿರುವ ವರದಿಯಲ್ಲಿ ಈ ರೋಗದ ಗುಣ ಲಕ್ಷಣಗಳ ಬಗ್ಗೆ ತಿಳಿಯಲು ಹಾಗೂ ಇದು ಹರಡುವುದನ್ನು ತಡೆಗಟ್ಟಲು ಹಂದಿ ಫಾರ್ಮ್‌ನಲ್ಲಿ ಕೆಲಸ ಮಾಡುವ ಕಾರ್ಮಿಕರ ಆರೋಗ್ಯದ ಕಡೆಗೆ ತೀವ್ರ ನಿಗಾ ಇಡಬೇಕಾಗಿದೆ ಎಂದು ವಿಜ್ಞಾನಿಗಳು ಹೇಳಿದ್ದಾರೆ.

ಸಾಂಕ್ರಾಮಿಕ ಪಿಡುಗು ಆಗುವ ಸಾಧ್ಯತೆ

ವಿಶ್ವದಲ್ಲಿ ಕೊರೊನಾ ಸಾಂಕ್ರಾಮಿಕ ಪಿಡುಗು ಇಲ್ಲವಾಗಿಸಲು ಸತತ ಪ್ರಯತ್ನ ನಡೆಯುತ್ತಿದೆ. ಅದರ ಜೊತೆಗೆ ಇದೀಗ ಈ ಹೊಸ ಕೆಟ್ಟ ಇನ್‌ಫ್ಲುಂಜಾ ಹರಡುವುದನ್ನು ತಡೆಯುವ ಅಗ್ಯತವಿದ್ದು ತಜ್ಞರು ಈ ನಿಟ್ಟಿನಲ್ಲಿ ಕಾರ್ಯ ನಿರ್ವಹಿಸುತ್ತಿದ್ದಾರೆ.

ಈ ಹಿಂದೆ ಹಂದಿಯಿಂದ ಸ್ವೈನ್ ಫ್ಲೂ/ ಹಂದಿ ಜ್ವರ ಎಂಬ ಸಾಂಕ್ರಾಮಿಕ ಪಿಡುಗು ಹಬ್ಬಿತು. ಈ ಜ್ವರ ವರ್ಷಗಳ ಕಾಲ ಅಟ್ಟಹಾಸ ಮೆರೆದಿತ್ತು, ಮೊದಲಿಗೆ ಮೆಕ್ಸಿಕೋದಲ್ಲಿ ಸ್ಟೈನ್‌ ಫ್ಲೂ ಕಂಡು ಬಂದಿತ್ತು.

ಸ್ವೈನ್ ಫ್ಲೂ ಅಥವಾ H1N1 ನಿಯಂತ್ರಣಕ್ಕೆ ಔಷಧಿ

ಹಂದಿ ಜ್ವರಕ್ಕೆ ಕಾರಣವಾದ A/H1N1pdm09 ನಿಯಂತ್ರಣಕ್ಕೆ ಲಸಿಕೆ ಲಭ್ಯವಿದ್ದು ವರ್ಷಕ್ಕೊಮ್ಮೆ ಈ ಲಸಿಕೆ ತೆಗೆದುಕೊಳ್ಳುವುದರಿಂದ H1N1 ತಡೆಗಟ್ಟಬಹುದಾಗಿದೆ.

ಈಗ ಕಂಡು ಬಂದಿರುವ ಹಂದಿ ಜ್ವರಕ್ಕೆ ಕೂಡ 2009ರ ಸ್ವೈನ್ ಫ್ಲೂ ಹೋಲಿಕೆಯಿದ್ದು, ಆದರೆ ಕೆಲವೊಂದು ವ್ಯತ್ಯಾಸಗಳಿವೆ ಎಂದು ವಿಜ್ಞಾನಿಗಳು ಹೇಳಿದ್ದಾರೆ.

ಇದೀಗ ಸದ್ಯಕ್ಕೆ ದೊಡ್ಡ ಅಪಾಯ ಸೃಷ್ಟಿಸಿಲ್ಲ, ಇದರ ಬಗ್ಗೆ ಹೆಚ್ಚಿನ ಅಧ್ಯಯನ ನಡೆಯುತ್ತಿದ್ದು, ಈ ಹೊಸ ವೈರಸ್ ಅನ್ನು ವಿಜ್ಞಾನಿಗಳು G4 EA H1N1 ಎಂದು ಕರೆದಿದ್ದಾರೆ.

ನಿರ್ಲಕ್ಷ್ಯ ಮಾಡಲೇಬಾರದು

ಈ ಹಂದಿ ಜ್ವರ ಇತ್ತೀಚೆಗೆ ಚೀನಾದ ಹಂದಿ ಫಾರ್ಮ್‌ನಲ್ಲಿ ಕೆಲಸ ಮಾಡುವ ಕಾರ್ಮಿಕರಲ್ಲಿ ಕಂಡು ಬಂದಿತ್ತು, ಈಗಾಗಲೇ ಹಂದಿ ಜ್ವರಕ್ಕೆ ಇರುವ ಲಸಿಕೆಯಿಂದ ಈ ಹೊಸ ಬಗೆಯ ಹಂದಿ ಜ್ವರ ನಿಯಂತ್ರಿಸಲು ಸಾಧ್ಯವಿಲ್ಲ, ಆದರೆ ಹೊಸ ಬಗೆಯ ಹಂದಿ ಜ್ವರ ಮಟ್ಟ ಹಾಕಲು ಮತ್ತಷ್ಟು ಅಧ್ಯಯನ ನಡೆಯಬೇಕಾಗಿದೆ.

ಯುಕೆಯ ನಾಟಿಂಗ್ಹ್ಯಾಮ್ ಯೂನಿರ್ವಸಿಟಿಯ ಪ್ರೊ. ಕಿನ್‌ ಚೋ ಚಾಂಗ್ ಬಿಬಿಸಿ ಜೊತೆ ಮಾತನಾಡುತ್ತಾ' ಈಗ ನಾವು ಕೊರೊನಾವೈರಸ್‌ನಿಂದ ಬಳಲಿದ್ದೇವೆ, ಆದರೆ ಹೊಸ ವೈರಸ್ ಕಡೆ ಸ್ವಲ್ಪವೂ ನಿರ್ಲಕ್ಷ್ಯ ಸಲ್ಲದು' ಎಂದು ಹೇಳಿದ್ದಾರೆ.

ಮನುಷ್ಯರು ಕಾಡು ಪ್ರಾಣಿಗಳು ಹಾಗೂ ಇತರ ಪ್ರಾಣಿಗಳ ಸಂಪರ್ಕಕಕ್ಕೆ ಬಂದಾಗ ಅವುಗಳಲ್ಲಿ ವೈರಸ್‌ ಇದ್ದರೆ ಅದು ಮನುಷ್ಯನ ದೇಹಕ್ಕೆ ಹರಡಿ, ಒಬ್ಬರಿಂದ ಮತ್ತೊಬ್ಬರಿಗೆ ಹರಡಿ ಸಾಂಕ್ರಾಮಿಕ ರೋಗವಾಗುತ್ತದೆ. ಇದೀಗ ಕೊರೊನಾವೈರಸ್‌ ಜೊತೆ ಜೊತೆಗೆ ಈ ಹೊಸ ಬಗೆಯ ಹಂದಿ ಜ್ವರದ ಬಗ್ಗೆ ಎಚ್ಚರಿಕೆಯಿಂದ ಇರದಿದ್ದರೆ ಅಪಾಯ ತಪ್ಪಿದ್ದಲ್ಲ.