ಬಿಳಿಕೂದಲಿನ ಸಮಸ್ಯೆ- ಕಾರಣ ತಿಳಿದು, ಆರೈಕೆ ಶುರುಮಾಡಿ!

ಥೈರಾಯ್ಡ್ ಗ್ರಂಥಿಯ ಕಾಯಿಲೆ

ಕೂದಲು ನೆರೆಯಲು ಪ್ರಮುಖ ಕಾರಣ ಥೈರಾಯ್ಡ್ ಗ್ರಂಥಿಯಾಗಿದೆ. ಒಂದು ವೇಳೆ ಈ ಗ್ರಂಥಿಯಿಂದ ಸ್ರವಿತವಾದ ರಸದೂತಗಳ ಪ್ರಮಾಣ ಅಗತ್ಯಕ್ಕಿಂತ ಕಡಿಮೆಯಾದರೂ ಹೆಚ್ಚಾದರೂ ಕೂದಲು ಬಿಳಿಯಾಗುವುದು ಸಂಶೋಧನೆಗಳಿಂದ ಕಂಡುಬಂದಿದೆ. ಹಾಗಾಗಿ ನಿಯಮಿತ ಸಮಯದಲ್ಲಿ ಥೈರಾಯ್ಡ್ ಗ್ರಂಥಿಯ ಕಾರ್ಯಕ್ಷಮತೆಯನ್ನು ಸೂಕ್ತ ಪರೀಕ್ಷೆಗಳಿಂದ ತಾಳೆನೋಡುತ್ತಿದ್ದು ಅಗತ್ಯ ಚಿಕಿತ್ಸೆ ಮತ್ತು ಆರೈಕೆಯನ್ನು ಪಡೆಯುವುದರಿಂದ ಕೂದಲು ಬೇಗನೇ ಹಣ್ಣಾಗುವುದನ್ನು ತಪ್ಪಿಸಬಹುದು.

ವಿಟಮಿನ್ ಬಿ12 ಕೊರತೆ

ನಿಮ್ಮ ಆಹಾರದ ಮೂಲಕ ಅಗತ್ಯವಿದ್ದಷ್ಟು ಪ್ರಮಾಣದ ವಿಟಮಿನ್ ಬಿ12 (ಅಥವಾ ಕೋಬಾಲಾಮಿನ್ -Cobalamin)ಪೋಷಕಾಂಶ ಲಭ್ಯವಾಗದೇ ಇದ್ದರೆ ಕೂದಲು ನೆರೆಯುವ ಸಂಭವ ಹೆಚ್ಚಾಗಿದೆ. ಕೂದಲ ಪೋಷಣೆಗೆ ವಿಟಮಿನ್ ಬಿ12 ಜೊತೆಗೇ ಸತು ಮತ್ತು ತಾಮ್ರಗಳೂ ಅವಶ್ಯವಾಗಿವೆ.

ವಿಟಮಿನ್ ಬಿ12 ಕೊರತೆ

ಹಾಗಾಗಿ ಕೂದಲ ಆರೈಕೆಗೆ ವಿಟಮಿನ್ ಬಿ12 ಧಾರಾಳವಾಗಿರುವ ಆಹಾರಗಳನ್ನು ಸೇವಿಸುವುದು ಅಗತ್ಯವಾಗಿದೆ. ಸಾಗರ ಉತ್ಪನ್ನಗಳು, ಮೀನು, ಏಕದಳ ಧಾನ್ಯಗಳು, ಮಾಂಸ, ಹಾಲು, ಚೀಸ್, ಮೊಟ್ಟೆಗಳು ಮೊದಲಾದವುಗಳಲ್ಲಿ ಈ ಪೋಷಕಾಂಶಗಳಿರುವುದರಿಂದ ಸೂಕ್ತ ಪ್ರಮಾಣದ ಸೇವನೆ ಕೂದಲು ನೆರೆಯುವುದನ್ನು ತಡೆಯುತ್ತದೆ.

ಆನುವಂಶೀಯವಾಗಿ ಬರುವ ಸಾಧ್ಯತೆ

ಈ ತೊಂದರೆ ಆನುವಂಶಿಕವಾಗಿಯೂ ಬರುವ ಸಾಧ್ಯತೆ ದಟ್ಟವಾಗಿದೆ. ಒಂದು ವೇಳೆ ನಿಮ್ಮ ತಂದೆ ಅಥವಾ ತಾಯಿಯ ಮನೆಯವರಲ್ಲಿ ಈ ತೊಂದರೆ ಕಾಣಿಸಿದ್ದರೆ ನಿಮಗೂ ಈ ತೊಂದರೆ ಬರುವ ಸಾಧ್ಯತೆ ಹೆಚ್ಚಾಗಿದೆ.

ಧೂಮಪಾನ

ಯಾವುದೇ ಅಂಗಕ್ಕೂ ಒಳ್ಳೆಯದಲ್ಲದ ಧೂಮಪಾನ ನಿಮ್ಮ ಕೂದಲಿಗೂ ಹಾನಿಕಾರಕವಾಗಿದೆ. ಧೂಮಪಾನದಿಂದ ರಕ್ತದಲ್ಲಿ ಫ್ರೀ ರ್‍ಯಾಡಿಕಲ್ ಎಂಬ ವಿಷವಸ್ತು ರಕ್ತವನ್ನು ಪ್ರವೇಶಿಸಿ ಮೆಲನಿನ್ ಉತ್ಪಾದನೆಗೆ ಧಕ್ಕೆಯುಂಟುಮಾಡುತ್ತದೆ. ಪರಿಣಾಮವಾಗಿ ಸಾಕಷ್ಟು ಪ್ರಮಾಣದಲ್ಲಿ ಮೆಲನಿನ್ ಇಲ್ಲದೇ ಕೂದಲು ಬಿಳಿಯಾಗಿ ಬೆಳೆಯುತ್ತದೆ.

ಒತ್ತಡ

ಮಾನಸಿಕ ಒತ್ತಡ ಹಲವು ಕಾಯಿಲೆಗಳಿಗೆ ಆಹ್ವಾನ ನೀಡುವಂತೆಯೇ ಕೂದಲ ಬಣ್ಣಕ್ಕೂ ಮಾರಕವಾಗಿದೆ. ಅಲ್ಲದೇ ಕೂದಲ ಉದುರುವಿಕೆಗೂ ಕಾರಣವಾಗಿದೆ. ಮಾನಸಿಕ ಆಘಾತ, ದುಃಖ, ಕಳವಳ ಮೊದಲಾದವು ರಕ್ತದಲ್ಲಿನ ರಸದೂತಗಳ ಪ್ರಮಾಣಗಳನ್ನು ಏರುಪೇರು ಮಾಡಿ ಮೆಲನಿನ್ ಉತ್ಪಾದನೆಯನ್ನು ಕಡಿಮೆಗೊಳಿಸುತ್ತದೆ. ಪರಿಣಾಮವಾಗಿ ಕೂದಲು ನೆರೆಯತೊಡಗುತ್ತದೆ.

ಅಸಮರ್ಪಕ ಆಹಾರ

ನಿಮ್ಮ ಆಹಾರ ಸಂತುಲಿತವಾಗಿರಬೇಕು ಎಂದು ವೈದ್ಯರು ಸಲಹೆ ನೀಡುತ್ತಾರೆ. ಆದರೆ ಈ ಬಗ್ಗೆ ನಾವು ಗಮನ ನೀಡುವುದು ಕಡಿಮೆ. ಏಕೆಂದರೆ ನಾವೆಲ್ಲಾ ತೊಂದರೆ ಆವರಿಸುವವರೆಗೂ ರಕ್ಷಣೆಯನ್ನು ಮುಂದೂಡುವ ಸ್ವಭಾವದವರು. ಸಂತುಲಿತ ಆಹಾರದಲ್ಲಿ ನಾವು ಇಷ್ಟಪಡದ ಆಹಾರಗಳಿದ್ದರೂ ಅನಿವಾರ್ಯವಾಗಿ ಸೇವಿಸುವುದು ಅಗತ್ಯವಾಗಿದೆ. ಇದರಿಂದ ದೇಹಕ್ಕೆ ಅಗತ್ಯವಾದ ಎಲ್ಲಾ ಪೋಷಕಾಂಶಗಳು ಲಭ್ಯವಾಗಿ ಆರೋಗ್ಯದೊಂದಿಗೇ ಕೂದಲು ನೆರೆಯುವುದನ್ನೂ ತಡೆಗಟ್ಟಬಹುದು.

ಬೇಗನೇ ರಜೋನಿವೃತ್ತಿ ಕಾಲ ಬರುವುದು

ತಮ್ಮ ಜೀವಿತಾವಧಿಯಲ್ಲಿ ಬೇಗನೇ ರಜೋನಿವೃತ್ತಿ ಪಡೆದ ಮಹಿಳೆಯರು ಈ ತೊಂದರೆಗೆ ಹೆಚ್ಚು ಒಳಗಾಗುತ್ತಾರೆ. ಇದರ ಆರೈಕೆಗೆ ವೈದ್ಯರ ಸಲಹೆ ಮೇರೆ ಚಿಕಿತ್ಸೆ ಪಡೆದುಕೊಳ್ಳುವುದು ಅಗತ್ಯವಾಗಿದೆ.