ಎರಡನೇ ಮಗುವಾದಾಗ ಮೊದಲ ಮಗುವಿನ ಮನಸ್ಸಿನ ಮೇಲೆ ಬೀರುವ ಪ್ರಭಾವವೇನು?

ಮೊದಲ ಮಗುವಾದಾಗ ಅಪ್ಪ-ಅಮ್ಮನ ಗಮನವೆಲ್ಲಾ ಆ ಮಗುವಿನ ಮೇಲೇ ಇರುತ್ತದೆ, ಎಷ್ಟು ಮುದ್ದಿಸಿದರೂ ಸಾಲದು, ಆ ಮಗುವಿನ ಲಾಲನೆ-ಪಾಲನೆ ಕಡೆಗೆ ತುಂಬಾನೇ ಗಮನ ಕೊಡುತ್ತಾರೆ. ಮೊದಲ ಮಗುವಿಗೆ ಸಿಗುವ ಸ್ಪೆಷಲ್‌ ಕೇರ್‌ ಎರಡನೇ ಮಗುವಿಗೆ ಸಿಗುವುದಿಲ್ಲ.

ಆದರೆ ಎರಡನೇ ಮಗುವಾದಾಗ ಮೊದಲನೇ ಮಗುವಿನ ಮನಸ್ಸಿನ ಮೇಲೆ ಕೆಲವೊಂದು ಪರಿಣಾಮ ಬೀರಬಹುದು. ಮಗುವಿಗೆ ಇದ್ದಕ್ಕಿದ್ದಂತೆ ತಾನು ಒಂಟಿ, ಅಪ್ಪ-ಅಮ್ಮ ನನ್ನನ್ನು ಮುದ್ದಿಸುತ್ತಿಲ್ಲ ಎಂಬ ಭಾವನೆ ಮೂಡುವ ಅಪಾಯವು ಇದೆ. ಆದ್ದರಿಂದ ಎರಡನೇ ಮಗುವಿಗೆ ಪ್ಲ್ಯಾನ್ ಮಾಡುವಾಗ ಅಥವಾ ಎರಡನೇ ಮಗುವಿನ ಆಗಮನವಾಗುತ್ತಿದೆ ಎಂದು ಗೊತ್ತಾದಾಗ ಮೊದಲ ಮಗುವನ್ನು ಮಾನಸಿಕವಾಗಿ ಸಿದ್ಧ ಮಾಡಬೇಕಾಗಿದೆ.

ಪೋಷಕರಲ್ಲೂ ಗೊಂದಲವಿರುತ್ತದೆ
ಎರಡನೇ ಮಗುವಿನ ಆಗಮನವಾಗುತ್ತಿದೆ ಎಂದು ತಿಳಿದಾಗ ದಂಪತಿಗೆ ತುಂಬಾನೇ ಖುಷಿಯಾಗುವುದು. ಎಷ್ಟೋ ಜನ ಮೊದಲ ಮಗು ಒಂಟಿಯಾಗಿ ಬೆಳೆಯಬಾರದು ನಮ್ಮ ಮಗುವಿಗೆ ಒಡಹುಟ್ಟಿದವರು ಬೇಕು ಎಂದು ಸೆಕೆಂಡ್ ಮಗುವಿಗೆ ಪ್ಲ್ಯಾನ್ ಮಾಡಿರುತ್ತಾರೆ. ಆದರೆ ಯಾವಾಗ ಸೆಕೆಂಡ್‌ ಪ್ರೆಗ್ನೆನ್ಸಿ ಕನ್‌ಫರ್ಮ್‌ ಆಗುವುದೋ ಖುಷಿಯ ಜೊತೆಗೆ ತುಂಬಾ ಒಂದು ರೀತಿಯ ಗೊಂದಲದ ಮನಸ್ಥಿತಿ ಕೂಡ ಉಂಟಾಗುವುದು. ಎರಡನೇ ಮಗು ಬಂದ ಮೇಲೆ ಮೊದಲ ಮಗುವಿನ ಕಡೆ ನಮ್ಮ ಗಮನ ಕಡಿಮೆಯಾಗುವುದೇ? ಎಂಬ ಗೊಂದಲ , ನೋವು ಕಾಡುವುದು.

ಎರಡನೇ ಮಗುವಾದ ಬಳಿಕ
ಎರಡನೇ ಮಗುವಾದ ಬಳಿಕ ಮೊದಲ ಮಗುವಿಗಿಂತ ಎರಡನೇ ಮಗುವಿನ ಕಡೆಗೆ ಹೆಚ್ಚಿನ ಗಮನ ಕೊಡುತ್ತೇವೆ. ಅದು ಚಿಕ್ಕ ಮಗು ಎಂಬ ಕಾರಣಕ್ಕೆ ತುಂಬಾನೇ ಗಮನ ಕೊಡುತ್ತೇವೆ. ದೊಡ್ಡ ಮಗು ಎಂದ ಮಾತ್ರ ಒಂದು ವರ್ಷ ದೊಡ್ಡವನು/ದೊಡ್ಡವಳಾದರೂ ನಾವು ಆ ಮಗುವಿನಿಂದ ಅಣ್ಣ-ಅಕ್ಕನ ನಡವಳಿಕೆ ನಿರೀಕ್ಷೆ ಮಾಡಲಾರಂಭಿಸುತ್ತೇವೆ. ಇಬ್ಬರು ಒಂದು ವಸ್ತುವಿಗೆ ಗಲಾಟೆ ಮಾಡುತ್ತಿದ್ದರೆ ಅವನು/ಅವಳು ಚಿಕ್ಕವನು ಅಲ್ವ? ಕೊಡು ಎಂದು ಹೇಳುತ್ತೇವೆ. ಪ್ರತಿಯೊಂದು ವಿಷಯಕ್ಕೆ ಆ ಮಗುವಿನ ತಲೆಗೆ ಅಣ್ಣ-ಅಕ್ಕನ ಜವಾಬ್ದಾರಿ ಹೊರೆಸುತ್ತೇವೆ.

ಮಗುವಿಗೆ ನನ್ನನ್ನು ಅಪ್ಪ-ಅಮ್ಮ ಪ್ರೀತಿಸುತ್ತಿಲ್ಲ ಎಂಬ ಭಾವನೆ ಮೂಡುವಂತಾಗಬಾರದು
ಎರಡನೇ ಮಗುವಾದಾಗ ಇದೊಂದು ಅಪಾಯವಿದೆ. ತಮ್ಮ ಅಥವಾ ತಂಗಿ ಬಂದ ಮೇಲೆ ಅಮ್ಮ-ಅಪ್ಪನ ಪ್ರೀತಿ ಕಡಿಮೆಯಾಗಿದೆ ಎಂದು ಮಗುವಿಗೆ ಅನಿಸಲಾರಂಭಿಸಿದರೆ ಅದು ಅವರ ಪುಟಾಣಿ ಮನಸ್ಸಿನ ಮೇಲೆ ತುಂಬಾನೇ ಗಂಭೀರ ಪ್ರಬಾವ ಬೀರುವುದು. ಆದ್ದರಿಂದ ಈ ವಿಷಯದ ಕಡೆಗೆ ಪೋಷಕರು ತುಂಬಾನೇ ಗಮನಹರಿಸಬೇಕು. ಎರಡನೇ ಮಗು ಬರುತ್ತಿದೆ ಎಂದು ತಿಳಿದ ತಕ್ಷಣದಿಂದ ಮೊದಲನೇ ಮಗುವನ್ನು ತಮ್ಮ ಅಥವಾ ತಂಗಿಯನ್ನು ಸ್ವೀಕರಿಸುವ ಮನಸ್ಥಿತಿಗೆ ಸಿದ್ಧತೆ ಮಾಡಬೇಕು. ನೀವು ಆ ಕುರಿತು ಹೇಳುತ್ತಿದ್ದರೆ ದೊಡ್ಡವರಲ್ಲಿ ತಮ್ಮ-ತಂಗಿ ಮೇಲೆ ಪ್ರೀತಿ ಹೆಚ್ಚಾಗುವುದು. ಆವಾಗ ಅವರು ಎಷ್ಟೇ ಚಿಕ್ಕವರಾದರೂ ತಮ್ಮ-ತಂಗಿಯ ಮೇಲೆ ಅಕ್ಕರೆ ತೋರುತ್ತಾರೆ, ಅವರು ಪರಿಸ್ಥಿತಿಗೆ ಸುಲಭವಾಗಿ ಹೊಂದಿಕೊಳ್ಳುತ್ತಾರೆ.