ದೆಹಲಿ-ಎನ್‌ಸಿಆರ್‌ನಲ್ಲಿ ತೀವ್ರ ವಾಯು ಮಾಲಿನ್ಯ: ನಿಮ್ಮ ಶ್ವಾಸಕೋಶವನ್ನು ರಕ್ಷಿಸಿಕೊಳ್ಳಲು ಇಲ್ಲಿದೆ ತ್ವರಿತ ಗೈಡ್

ಬುಧವಾರ, ನವೆಂಬರ್ 4ರಂದು ದೆಹಲಿ-ಎನ್‌ಸಿಆರ್ ಪ್ರದೇಶದಲ್ಲಿ ಬೆಳಿಗ್ಗೆ ಏಳುತ್ತಿದ್ದಂತೆಯೇ ಗಾಳಿಯ ಗುಣಮಟ್ಟ ವಿಷಕಾರಿಯಾಗಿರುವುದು ಕಂಡುಬಂದಿದೆ. ಇಲ್ಲಿನ ವಾಯು ಗುಣಮಟ್ಟ ‘ಅತ್ಯಂತ ಕಳಪೆ’ಯಿಂದ ‘ತೀವ್ರ’ (Very Poor–Severe) ಹಂತ ತಲುಪಿದ್ದು, ಹಲವು ಮಾಲಿನ್ಯ ಮಾಪನ ಕೇಂದ್ರಗಳಲ್ಲಿ ‘ಸಿವಿಯರ್’ ಮಟ್ಟ ದಾಖಲಾಗಿದೆ. ಹೀಗಾಗಿ ಇಡೀ ಎನ್‌ಸಿಆರ್ ವ್ಯಾಪ್ತಿಯಲ್ಲಿ ‘ಹಂತ-2’ (Stage-II) ನಿಯಮಗಳನ್ನು ಜಾರಿಗೆ ತರಲಾಗಿದೆ. ಇದು ನಿಮ್ಮ ಬೆಳಗಿನ ವಾಕಿಂಗ್, ವ್ಯಾಯಾಮ ಹಾಗೂ ಕೆಲಸಕ್ಕೆ ತೆರಳುವ ದಿನಚರಿಯ ಮೇಲೆಯೂ ಪ್ರಭಾವ ಬೀರುತ್ತದೆ. ಈ ಕಲುಷಿತ ವಾತಾವರಣದಲ್ಲಿ ನಿಮ್ಮ ಶ್ವಾಸಕೋಶವನ್ನು ರಕ್ಷಿಸಿಕೊಳ್ಳಲು ಹಾಗೂ ಆರೋಗ್ಯ ಕಾಪಾಡಿಕೊಳ್ಳಲು ಇಲ್ಲಿದೆ ಸರಳ ಮತ್ತು ತ್ವರಿತ ಗೈಡ್. ಇದರಲ್ಲಿ ಮನೆಯೊಳಗಿನ ಸಣ್ಣ ವ್ಯಾಯಾಮ, N95 ಮಾಸ್ಕ್ ಧರಿಸುವ ಕ್ರಮ ಮತ್ತು ಏರ್ ಪ್ಯೂರಿಫೈಯರ್ ಬಳಕೆಯ ಸೂತ್ರಗಳು ಸೇರಿವೆ.

ಮೊದಲು 12 ನಿಮಿಷಗಳ ಟೈಮರ್ ಇಟ್ಟುಕೊಳ್ಳಿ. ಮೊದಲ 3 ನಿಮಿಷ ಜಾಯಿಂಟ್ ಮೊಬಿಲಿಟಿ (ಕೀಲುಗಳ ಸಡಿಲಿಕೆ) ಮತ್ತು ಲಘು ಮಾರ್ಚಿಂಗ್ ಮಾಡಿ. ನಂತರ 2 ನಿಮಿಷ ವಾಲ್ ಪುಶ್-ಅಪ್ಸ್ ಹಾಗೂ 2 ನಿಮಿಷ ಸ್ಟೆಪ್-ಅಪ್ಸ್ ವ್ಯಾಯಾಮ ಮಾಡಿ. ಬಳಿಕ 2 ನಿಮಿಷ ಗ್ಲೂಟ್ ಬ್ರಿಡ್ಜ್ ಅಥವಾ ಸೇತು ಬಂಧಾಸನ ಮಾಡಿ. ಕೊನೆಯ 3 ನಿಮಿಷ ಭ್ರಮರಿ ಪ್ರಾಣಾಯಾಮ ಮತ್ತು ನಿಧಾನವಾಗಿ ಮೂಗಿನಿಂದ ಉಸಿರಾಡುತ್ತಾ ದೇಹವನ್ನು ಕೂಲ್-ಡೌನ್ ಮಾಡಿ. ತಲೆ ಹಗುರವೆನಿಸಿದರೆ ಮಾತ್ರ ಬಾಲಾಸನ ಸೇರಿಸಿಕೊಳ್ಳಿ. ವ್ಯಾಯಾಮದ ವೇಳೆ ಅತಿಯಾದ ಆಯಾಸ ಮಾಡಿಕೊಳ್ಳಬೇಡಿ; ಕೇವಲ ಮೂಗಿನಿಂದಲೇ ಉಸಿರಾಟ ನಡೆಸಿ.

AQI ಪ್ರಯಾಣ ಭದ್ರತೆ: N95 ಮಾಸ್ಕ್ ಧರಿಸುವುದು ಮತ್ತು ಕಣ್ಣಿನ ಆರೈಕೆ

ಜನಸಂದಣಿ ಇರುವ ಕಡೆ ವಾಲ್ವ್ ಇಲ್ಲದ N95 ಅಥವಾ FFP2 ಮಾಸ್ಕ್ ಆಯ್ಕೆಮಾಡಿ. ನೋಸ್ ಕ್ಲಿಪ್ ಸರಿಯಾಗಿ ಹೊಂದಿಸಿ, ಸ್ಟ್ರ್ಯಾಪ್‌ಗಳನ್ನು ಸರಿಯಾದ ಜಾಗದಲ್ಲಿ ಹಾಕಿ ಗಾಳಿ ಎಲ್ಲೂ ಸೋರಿಕೆಯಾಗದಂತೆ ನೋಡಿಕೊಳ್ಳಿ. ಮುಖ್ಯವಾಗಿ ಕಣ್ಣಿನ ಬಳಿ ಗಾಳಿ ಸೋರುತ್ತಿದೆಯೇ ಎಂದು ಪರಿಶೀಲಿಸಿ. ಕಣ್ಣಿನ ಕಿರಿಕಿರಿ ತಪ್ಪಿಸಲು ಕಣ್ಣನ್ನು ಪೂರ್ತಿ ಮುಚ್ಚುವ ಗ್ಲಾಸ್ ಅಥವಾ ಚಷ್ಟ ಧರಿಸಿ. ವಾಹನಗಳಲ್ಲಿ ಪ್ರಯಾಣಿಸುವಾಗ ಕ್ಯಾಬಿನ್ ಏರ್ ರಿಸರ್ಕ್ಯುಲೇಶನ್ ಮೋಡ್ ಬಳಸಿ. ಹಳೆಯ ಕ್ಯಾಬಿನ್ ಫಿಲ್ಟರ್‌ಗಳನ್ನು ತಕ್ಷಣ ಬದಲಾಯಿಸಿ. ಕಣ್ಣುಗಳನ್ನು ಉಜ್ಜಬೇಡಿ, ಕೈಯಲ್ಲಿ ಸಾಲೈನ್ ವೈಪ್ಸ್ ಇಟ್ಟುಕೊಳ್ಳಿ.

ಮನೆಯ ಏರ್ ಪ್ಯೂರಿಫೈಯರ್ CADR ಸಾಮರ್ಥ್ಯ ಮತ್ತು ಸೀಲಿಂಗ್ ನಿಯಮಗಳು

ನಿಮ್ಮ ಕೊಠಡಿಯ ಗಾತ್ರಕ್ಕೆ ತಕ್ಕಂತೆ ಸೂಕ್ತ ಕ್ಲೀನ್ ಏರ್ ಡೆಲಿವರಿ ರೇಟ್ (CADR) ಹೊಂದಿರುವ ಪ್ಯೂರಿಫೈಯರ್ ಆಯ್ಕೆಮಾಡಿ. ಉದಾಹರಣೆಗೆ, 120 ಚದರ ಅಡಿಯ ಬೆಡ್‌ರೂಮ್‌ಗೆ ಗಂಟೆಗೆ 200–250 ಕ್ಯೂಬಿಕ್ ಮೀಟರ್ CADR ಹೊಂದಿರುವ ಸಾಧನ ಬೇಕಾಗುತ್ತದೆ. 180 ಚದರ ಅಡಿ ಕೊಠಡಿಗೆ 300–350 ರಷ್ಟು CADR ಅಗತ್ಯವಿರುತ್ತದೆ. ಹೊಗೆ ಹೆಚ್ಚಿರುವಾಗ ಕಿಟಕಿ ಮತ್ತು ಬಾಗಿಲುಗಳನ್ನು ಮುಚ್ಚಿಡಿ. ಸಣ್ಣಪುಟ್ಟ ಸಂದುಗಳನ್ನು ಟೇಪ್ ಅಥವಾ ಡ್ರಾಫ್ಟ್ ಸ್ಟಾಪರ್‌ಗಳಿಂದ ಸೀಲ್ ಮಾಡಿ. ಧೂಳು ಹಾರಿಸುವ ಬದಲು ಒದ್ದೆ ಬಟ್ಟೆಯಿಂದ ಮನೆಯ ಮೇಲ್ಮೈಗಳನ್ನು ಒರೆಸಿ.

ತೀವ್ರ AQI ವೇಳೆ ಮಕ್ಕಳು, ಹಿರಿಯರು ಮತ್ತು ಅಸ್ತಮಾ ರೋಗಿಗಳ ಕಾಳಜಿ

ಮಕ್ಕಳು ಮತ್ತು ಹಿರಿಯರಿಗೆ ವ್ಯಾಯಾಮದ ಅವಧಿಯನ್ನು ಕೇವಲ 1 ಅಥವಾ 2 ರೌಂಡ್‌ಗೆ ಸೀಮಿತಗೊಳಿಸಿ. ಅಸ್ತಮಾ ತೊಂದರೆ ಇದ್ದರೆ, ವೈದ್ಯರ ಸಲಹೆಯಂತೆ ಚಟುವಟಿಕೆ ಆರಂಭಿಸುವ 15 ನಿಮಿಷ ಮುನ್ನ ಸ್ಪೇಸರ್ ಬಳಸಿ ಇನ್ಹೇಲರ್ ತೆಗೆದುಕೊಳ್ಳಿ. ಉಸಿರು ಬಿಗಿಹಿಡಿಯುವ ಅಭ್ಯಾಸ ಮಾಡಬೇಡಿ. ಹೊರಗಿನಿಂದ ಮನೆಗೆ ಬಂದ ತಕ್ಷಣ ಸಾಲೈನ್ ನಿಂದ ಮೂಗನ್ನು (nasal rinse) ಶುಚಿಗೊಳಿಸಿ. ಎದೆ ಬಿಗಿತ, ವಿಸ್ಸಿಂಗ್ (ಉಸಿರಾಟದ ಶಬ್ದ), ತಲೆಸುತ್ತು ಅಥವಾ ಅತಿಯಾದ ಆಯಾಸ ಕಂಡುಬಂದರೆ ತಕ್ಷಣ ವ್ಯಾಯಾಮ ನಿಲ್ಲಿಸಿ ವೈದ್ಯರ ನೆರವು ಪಡೆಯಿರಿ. ಇಂತಹ ಪರಿಸ್ಥಿತಿಯಲ್ಲಿ ವಿಶ್ರಾಂತಿ ಪಡೆಯುವುದೂ ಸಹ ಒಂದು ರೀತಿಯ ತರಬೇತಿಯೇ.

Disclaimer: ಈ ಲೇಖನದಲ್ಲಿ ಒದಗಿಸಲಾದ ಮಾಹಿತಿಯು ಸಾಮಾನ್ಯ ಮಾಹಿತಿ ಮತ್ತು ಶೈಕ್ಷಣಿಕ ಉದ್ದೇಶಗಳಿಗಾಗಿ ಮಾತ್ರವಾಗಿದೆ. ವೃತ್ತಿಪರ ವೈದ್ಯಕೀಯ ಸಲಹೆ, ರೋಗನಿರ್ಣಯ ಅಥವಾ ಚಿಕಿತ್ಸೆಗೆ ಪರ್ಯಾಯವಾಗಿ ಇದನ್ನು ದೃಢೀಕರಿಸಿಲ್ಲ. ವೈದ್ಯಕೀಯ ಸ್ಥಿತಿಯ ಕುರಿತು ನೀವು ಹೊಂದಿರುವ ಯಾವುದೇ ಪ್ರಶ್ನೆಗಳಿಗೆ ಯಾವಾಗಲೂ ನಿಮ್ಮ ವೈದ್ಯರು ಅಥವಾ ಅರ್ಹ ಆರೋಗ್ಯ ಸಿಬ್ಬಂದಿಯ ಸಲಹೆಯನ್ನು ಪಡೆಯಿರಿ.