ಪತಿ ನಿಮ್ಮನ್ನು ನಿರ್ಲಕ್ಷಿಸುತ್ತಿದ್ದಾರಾ? ಹಾಗಾದ್ರೆ ಹೀಗೆ ಮಾಡಿ.

1. ಇಬ್ಬರ ನಡುವಿನ ಸಂವಹನವನ್ನು ಉತ್ತಮಪಡಿಸಿ

ಕುಳಿತು ಮಾತನಾಡಿದಾಗ ಮಾತ್ರ ಎಂತಹ ಸಮಸ್ಯೆಗಳಿದ್ದರೂ ಕೂಡ ಬಗೆಹರಿಯೋದಕ್ಕೆ ಸಾಧ್ಯ. ನಿಮ್ಮ ಪತಿ ನಿಮ್ಮನ್ನು ನಿರ್ಲಕ್ಷಿಸಿದರೆ ಆತನಲ್ಲಿ ಮಾತನಾಡಲು ಪ್ರಯತ್ನಿಸಿ. ಮುನಿಸಿದ್ದಾಗ ಪುರುಷರು ನಿಮ್ಮಲ್ಲಿ ಮಾತನಾಡಲು ಇಚ್ಛಿಸುವುದಿಲ್ಲ. ಆಗ ಹೇಗಾದರೂ ಮಾಡಿ ಆತನ ಸಮಸ್ಯೆ ಏನು ಎಂದು ಅರ್ಥಮಾಡಿಕೊಳ್ಳಿ. ನಿಮ ಪತಿ ನಿಮ್ಮಲ್ಲಿ ಕೋಪದಿಂದ ಜೋರಾಗಿ ಮಾತನಾಡಿದರೆ ನೀವು ಆ ಸಮಯದಲ್ಲಿ ಸುಮ್ಮನಿರಿ. ಅದನ್ನು ಬಿಟ್ಟು ನೀವು ಕೂಡ ಆತನ ವಿರುದ್ಧವಾಗಿ ಮಾತನಾಡಿದರೆ ಸಂಬಂಧ ಮತ್ತಷ್ಟು ಹಾಳಾಗುತ್ತದೆ.

2. ಪತಿಯನ್ನು ಪೀಡಿಸಬೇಡಿ, ಅವನಷ್ಟಕ್ಕೆ ಬಿಟ್ಟುಬಿಡಿ

ಕೆಲವೊದು ಬಾರಿ ನಿಮ್ಮ ಪತಿ ಏಕಾಂಗಿಯಾಗಿರಲು ಇಷ್ಟಪಡುತ್ತಾನೆ. ಈ ವೇಳೆ ಆತನನ್ನು ಪೀಡಿಸಬೇಡಿ. ಆತನಲ್ಲಿ ಪದೇ ಪದೇ ಕಾರಣವನ್ನು ಕೇಳಲು ಹೋಗಬೇಡಿ. ನಿಮ್ಮ ನಡವಳಿಕೆ ಅವನಿಗೆ ಇಷ್ಟವಾಗದೇ ಇರಬಹುದು. ಆತನಷ್ಟೆಗೆ ಬಿಟ್ಟು ಬಿಡಿ. ಎಲ್ಲ ಸರಿ ಹೋದಾಗ ಆತ ನಿಮ್ಮಲ್ಲಿ ನೋವನ್ನು ಹಂಚಿಕೊಳ್ಳುತ್ತಾನೆ.

3. ಧನಾತ್ಮಕವಾಗಿರಿ

ಆತನ ನಡವಳಿಕೆ ನಿಮಗೆ ಇಷ್ಟವಾಗದೇ ಇರಬಹುದು ಆಗ ನೀವು ಚಿಂತಾಕ್ರಾಂತರಾಗಬಾರದು. ಎಂದಿಗೂ ನಿಮ್ಮೊಳಗೆ ಋಣಾತ್ಮಕ ಆಲೋಚನೆಗಳನ್ನು ಒಳ ನುಸುಳಲು ಬಿಡಬೇಡಿ. ಆತನಿಗೆ ಬೇರೆ ಯಾವುದಾದರೂ ಸಂಬಂಧವಿರಬಹುದು ಎಂಬ ಅಲೋಚನೆಗಳು ಸಾಮಾನ್ಯವಾಗಿ ಕಾಡುತ್ತದೆ. ಆದರೆ ಅದಕ್ಕೆ ಅವಕಾಶಕೊಡಬೇಡಿ. ಒಂದು ಸಾರಿ ಅನುಮಾನದ ಹುಳ ನಿಮ್ಮ ಮನಸ್ಸನ್ನು ಹೊಕ್ಕಿ ಬಿಟ್ಟರೆ ಸಂಬಂಧ ತುಂಬಾ ದಿನ ಗಟ್ಟಿಯಾಗಿ ಇರುವುದಿಲ್ಲ.

4. ಸಂಗಾತಿಯೊಂದಿಗೆ ವಾದಿಸಬೇಡಿ

ಸಂಗಾತಿ ನಿಮ್ಮ ಜೊತೆ ಮಾತನಾಡದೇ ಇಗ್ನೋರ್‌ ಮಾಡಿದಾಗ ಬೇಸರವಾಗುವುದು ಸಹಜ. ಹಾಗಂತ ಆತನೊಂದಿಗೆ ನೀವು ಸಂಘರ್ಷಕ್ಕೆ ಇಳಿಯುವುದಕ್ಕೆ ಹೋಗಬೇಡಿ. ಮಾತಿಗೆ ಮಾತು ಬೆಳೆಸಲೇಬೇಡಿ. ಬದಲಾಗಿ ಕೊಂಚ ಹೊತ್ತು ಸುಮ್ಮನಿದ್ದು, ಆತ ಶಾಂತನಾಗಿದ್ದಾನೆ ಎಂದು ನಿಮಗೆ ಅನಿಸಿದಾಗ ಸಮಾಧಾನವಾಗಿ ಆತನಲ್ಲಿ ಮಾತನಾಡಿ. ಸಮಸ್ಯೆಯನ್ನು ಅರಿತುಕೊಳ್ಳಿ.

5. ಪರಿಸ್ಥಿತಿ ಅರ್ಥೈಸಿಕೊಳ್ಳಿ

ನಿಮ್ಮ ಮಧ್ಯೆ ಯಾವಾತ್ತಾದರೂ ಜಗಳ ಆಗಿರಬಹುದು. ಅಥವಾ ಯಾವುದಾದರೂ ವಿಚಾರಕ್ಕೆ ಮನಸ್ಥಾಪ ಬಂದಿರಬಹುದು. ಒಂದ ಕ್ಷಣ ಕುಳಿತು ಆಲೋಚಿಸಿ ನನ್ನ ವರ್ತನೆಯಿಂದ ಆತನ ಮನಸ್ಸಿಗೆ ನೋವಾಗಿರಬಹುದಾ ಅನ್ನೋದನ್ನ. ಒಂದು ವೇಳೆ ನೋವಾಗಿದ್ದು ನಿಜವೇ ಆದರೆ ಆತನ ಬಳಿ ಹೋಗಿ ಕ್ಷಮೆ ಕೇಳುವುದರಲ್ಲಿ ತಪ್ಪಿಲ್ಲ.

6. ಸಂಬಂಧದಲ್ಲಿ ಹೊಸತನವನ್ನು ಕಂಡುಕೊಳ್ಳಿ

ಸಂಬಂಧ ಹಳೆಯದಾದಂತೆ ಹುಡುಗರು ಆಸಕ್ತಿ ಕಳೆದುಕೊಂಡು ಬಿಡುತ್ತಾರೆ. ಇಂತಹ ಸಂದರ್ಭದಲ್ಲಿ ಪತಿಯು ಬೇರೆಡೆಗೆ ಆಕಷ್ಟಿತವಾಗುವುದು ಸಹಜ. ಆದರೆ ಅದಕ್ಕೆ ಅವಕಾಶ ನೀಡಬೇಡಿ. ಏನನ್ನಾದರೂ ಹೊಸತು ಮಾಡಿ ಗಂಡನನ್ನು ಖುಷಿ ಪಡಿಸಿ. ಮದುವೆಯ ಸಂದರ್ಭವನ್ನು ನೆನಪಿಸಲು ಆತನನ್ನು ಡೇಟ್‌ಗೆ ಕರೆದುಕೊಂಡು ಹೋಗಿ ಅಥವಾ ಆತನಿಗೆ ಉಡುಗೊರೆಗಳನ್ನು ನೀಡಿ. ಆಗ ಸಂಬಂಧಕ್ಕೆ ಮತ್ತೆ ಹೊಸ ಹುರುಪು ಬರುತ್ತದೆ.

7. ನಿಮ್ಮನ್ನು ನೀವು ಬ್ಯುಸಿಯಾಗಿ ಇಟ್ಟುಕೊಳ್ಳಿ

ಗಂಡ ನಿಮ್ಮನ್ನು ನಿರ್ಲಕ್ಷಿಸುತ್ತಿದ್ದಾನೆ ಎಂದು ಇಡೀ ದಿನ ಕೊರಗುತ್ತಾ ಕೂರಬೇಡಿ. ಬದಲಾಗಿ ನಿಮ್ಮನ್ನು ನೀವು ಬ್ಯುಸಿಯಾಗಿ ಇಟ್ಟುಕೊಳ್ಳಿ. ಏನಾದರೂ ಉಪಯೋಗವಾಗೋ ಕೆಲಸ ಮಾಡಿ. ಆ ಕೆಲಸದಲ್ಲಿ ಖುಷಿಯನ್ನು ಅನುಭವಿಸಿ. ಮಕ್ಕಳು ಅಥವಾ ಸ್ನೇಹಿತರ ಜೊತೆಗೆ ನಿಮ್ಮ ಸಮಯವನ್ನು ಕಳೆಯಿರಿ. ಆಗ ನಿಮಗೆ ಇಂತಹ ಆಲೋಚನೆಗಳು ಹತ್ತಿರವು ಸುಳಿಯೋದಿಲ್ಲ.

ಸಮಸ್ಯೆಗಳು ಬಂದಾಗ ಕುಗ್ಗಬಾರದು ದೈರ್ಯದಿಂದ ಎದುರಿಸಬೇಕು. ಸಂಬಂಧಗಳು ಅಂದರೆ ಹಾಗೆನೇ ಏರು-ಪೇರು ಇದ್ದೇ ಇರುತ್ತದೆ. ಹಾಗೆಂದ ಮಾತ್ರಕ್ಕೆ ನಾವು ಎಲ್ಲವನ್ನೂ ಕಳೆದುಕೊಂಡವರಂತೆ ಹತಾಶರಾಗಬಾರದು, ಬದಲಾಗಿ ಹೋರಾಡಬೇಕು.