ಸಂತೋಷದ ಸಂಸಾರಕ್ಕೆ ಬೇಕು ಆರೋಗ್ಯಕರ ದಾಂಪತ್ಯ

Relationship

oi-Reena

By Hema S

Published: Monday, June 11, 2012, 16:46 [IST]

ಮದುವೆ ಮನುಷ್ಯನ ಜೀವನದ ಪ್ರಮುಖವಾದ ಘಟ್ಟ. ಆದ್ದರಿಂದಲೇ ಮದುವೆಗೆ ಬಂದ ಹಿರಿಯರು ಹೊಸ ಬದುಕು ಹಸನಾಗಲಿ ಹಾರೈಸುತ್ತಾರೆ. ನಂತರ ಅವರು ಹಾರೈಕೆಯಂತೆ ಬಾಳುತ್ತಾರೆಯೇ ಅನ್ನುವುದು ಆ ದಂಪತಿಗಳ ಕೈಯಲ್ಲಿರುತ್ತದೆ! ಏಕೆಂದರೆ ಒಂದು ಸಂಸಾರ ಸಾಗಿಸುವುದು ಅಂದರೆ ಸುಲಭದ ಮಾತಲ್ಲ, ಇಬ್ಬರಲ್ಲೂ ಬಿಟ್ಟು ಕೊಡುವಿಕೆ ಮತ್ತು ಹೊಂದಾಣಿಕೆ ಇರಬೇಕಾಗುತ್ತದೆ, ಒಬ್ಬರ ಭಾವನೆಗಳನ್ನು ಮತ್ತೊಬ್ಬರು ಅರ್ಥೈಸಿಕೊಳ್ಳಬೇಕಾಗುತ್ತದೆ. ಆದರೆ ಮಾತ್ರ ಆ ಸಂಸಾರದಲ್ಲಿ ನೆಮ್ಮದಿ ಅನ್ನುವುದು ಇರುತ್ತದೆ.

ಮದುವೆಯ ನಂತರ ಮನೆಯವರು ಸಂತೋಷವಾಗಿದ್ದೀರ ಅಂತ ವಿಚಾರಿಸುತ್ತಾರೆ, ಆದರೆ ನೀವು ಮಾತ್ರ ನಿಮ್ಮ ಸಂಸಾರ ಆರೋಗ್ಯಕರವಾಗಿದೆಯೇ ಎಂದು ಗಮನಿಸಬೇಕು! ಮದುವೆಯಾದ ಶುರುವಿನಲ್ಲಿ ಎಲ್ಲರೂ ಸಂತೋಷವಾಗಿಯೇ ಇರುತ್ತಾರೆ, ಆದರೆ ನಂತರ ಸಣ್ಣ ಪುಟ್ಟ ಸಮಸ್ಯೆಗಳು ಕಂಡು ಬರುತ್ತದೆ. ಅದನ್ನೇ ಬೆಳೆಯಲು ಬಿಟ್ಟರೆ ಆ ಸಂತೋಷವೆಂಬುದು ಇಲ್ಲವಾಗುತ್ತದೆ. ಅದಕ್ಕೆ ಸಂಸಾರ ಆರೋಗ್ಯಕರವಾಗಿದೆಯೇ ಎಂದು ನೋಡಿಕೊಳ್ಳಿ. ಆರೋಗ್ಯಕರವಾಗಿದ್ದ ಸಂಸಾರದಲ್ಲಿ ಸಂತೋಷ ಮತ್ತು ನೆಮ್ಮದಿ ನೆಲೆಸಿರುತ್ತದೆ.

ಮದುವೆಯ ನಂತರ ತಾನು ಅಂತ ಯೋಚಿಸದೆ ನಾವು ಅಂತ ಯೋಚಿಸಬೇಕು ಅಂತ ಹಿರಿಯರು ಹೇಳುತ್ತಾರೆ. ನಾವು ಅಂತ ಯೋಚಿಸಿದಾಗ ಅಲ್ಲಿ ಇಬ್ಬರ ಭಾವನೆಗಳಿಗೆ ಬೆಲೆ ಇರುತ್ತದೆ. ನಾವು, ನಮ್ಮದು ಅಂತ ಯೋಚಿಸುವ ಬದಲು ನಾನು, ನನ್ನದು ಎಂಬ ಭಾವನೆ ದಂಪತಿಗಳಲ್ಲಿ ಒಬ್ಬರಿಗೆ ಇದ್ದರೆ ಸಾಕು ಆ ಸಂಸಾರ ಸುಖಕರವಾಗಿರುವುದಿಲ್ಲ. ಅಲ್ಲಿ ಪ್ರೀತಿಗಿಂತ ಅಹಂ ಹೆಚ್ಚಾಗುವುದು.

ಮತ್ತೊಂದು ಮುಖ್ಯವಾದ ಅಂಶವೆಂದರೆ ಇಬ್ಬರಿಗೂ ತಮ್ಮದೇ ಆದ ಸಮಯ ಕಳೆಯುವ ಸ್ವಾತಂತ್ರ್ಯ ಇರಬೇಕು. ಫ್ರೆಂಡ್ಸ್ ಜೊತೆ ಕಳೆಯಲು, ಮನೆಯವರ ಜೊತೆ ಕಳೆಯಲು ಅವಕಾಶ ಮತ್ತು ಸ್ವಾತಂತ್ರ್ಯ ಕೊಡಬೇಕು. ಗಂಡ ಗೆಳೆಯರ ಜೊತೆ ಪಾರ್ಟಿಗೆ ಹೋದ ಎಂದು ಹೆಂಡತಿ ರಂಪಾಟ ಮಾಡುವುದು, ತಾಯಿಗೆ ಮನೆಗೆ ಅಥವಾ ಫ್ರೆಂಡ್ಸ್ ಜೊತೆ ಹೊರಗಡೆ ಹೋಗಬೇಡವೆಂದು ಗಂಡ ಹೆಂಡತಿಗೆ ನಿರ್ಬಂಧ ಹಾಕುವುದು ಮಾಡಿದರೆ ಅಂತಹ ಸಂಸಾರ ಆರೋಗ್ಯಕರವಾಗಿರಲು ಸಾಧ್ಯವಿಲ್ಲ.

ಅದರಲ್ಲೂ ಸಂಸಾರವೆಂದ ಮೇಲೆ ನಂಬಿಕೆ ಮುಖ್ಯ. ಇವತ್ತು ಎಷ್ಟೋ ಸಂಸಾರಗಳು ಕೋರ್ಟಿಗೆ ಬರಲು ಕಾರಣ 'ಸಂಶಯ'. ಆದ್ದರಿಂದ ಪ್ರತಿಯೊಂದು ವಿಷಯದ ಬಗ್ಗೆ ಮನಬಿಚ್ಚಿ ಮಾತನಾಡಿದರೆ ಅಲ್ಲಿ ಸಂಶಯವೆಂಬುದು ಇರುವುದಿಲ್ಲ. ದಂಪತಿಗಳ ನಡುವೆ ಯಾವುದೇ ಮುಚ್ಚುಮರೆ ಇರಬಾರದು. ಕೆಲಸ ಕಾರ್ಯಗಳಲ್ಲಿ ಒಬ್ಬರಿಗೊಬ್ಬರು ಸಹಾಯ ಮಾಡಬೇಕು. ಗಂಡ-ಹೆಂಡತಿಯ ನಡುವೆ ಯಾವುದೇ ಕಾರಣಕ್ಕೂ ಬಿರುಕು ಬರಲು ಬಿಡಬಾರದು. ದಂಪತಿಗಳಲ್ಲಿ ಅತೃಪ್ತಿ, ಅಹಂ, ಮುಚ್ಚುಮರೆಯ ಗುಣಗಳಿದ್ದರರ ಮಾತ್ರ ಮೂರನೆಯ ವ್ಯಕ್ತಿ ಅವರಿಬ್ಬರ ಮಧ್ಯದಲ್ಲಿ ಪ್ರವೇಶಿಸುತ್ತಾನೆ/ತ್ತಾಳೆ. ಆ ರೀತಿ ಆಗದಿರಲು ಸಂಸಾರವನ್ನು ಆರೋಗ್ಯಕರವಾಗಿ ಇಟ್ಟುಕೊಳ್ಳಬೇಕು, ಆಗ ಸಂತೋಷ ದಾಂಪತ್ಯ ಜೀವನ ನಿಮ್ಮದಾಗುವುದು.