ಎಳ್ಳು, ಕೊಬ್ಬರಿ ಹಾಕಿ ಮಾಡುವ ಲಡ್ಡು

ಬೆಳಕಿನ ಹಬ್ಬ ದೀಪಾವಳಿ ಹತ್ತಿರವಾಗುತ್ತಿದೆ, ಈಗಾಗಲೇ ದೀಪಾವಳಿ ಹಬ್ಬಕ್ಕೆ ಮನೆಯಲ್ಲಿ ಸಿದ್ಧತೆ ನಡೆಯುತ್ತಿರುತ್ತದೆ. ಶಾಪಿಂಗ್ ಎಲ್ಲಿ ಮಾಡಬೇಕು , ಈ ದೀಪಾವಳಿಗೆ ಮನೆಗೆ ಯಾವ ವಸ್ತುಗಳನ್ನು ತರಬೇಕು, ಇವುಗಳ ಬಗ್ಗೆ ಈಗಾಗಲೇ ಪ್ಲಾನ್ ರೆಡಿಯಾಗಿರುತ್ತದೆ ಅಲ್ವಾ?

ಅದೇ ರೀತಿ ಈ ದೀಪಾವಳಿಗೆ ಬಗೆ-ಬಗೆಯ ಸಿಹಿ ತಿಂಡಿ ಮಾಡಬೇಕೆಂಬ ಪ್ಲಾನ್ ಕೂಡ ಇದ್ದೇ ಇರುತ್ತದೆ, ಹಬ್ಬದಲ್ಲಿ ಲಡ್ಡು ಮಾಡಬೇಕೆಂದು ಬಯಸುವುದಾದರೆ ಈ ಸರಳವಾದ ಲಡ್ಡು ಟ್ರೈ ಮಾಡಬಹುದು:

ಬೇಕಾಗುವ ಸಾಮಾಗ್ರಿಗಳು
ಕಡಲೆ ಹಿಟ್ಟು 3 ಕಪ್
ಎಳ್ಳು 4-5 ಚಮಚ ಸ್ಪೂನ್
ತೆಂಗಿನ ತುರಿ 1 ಕಪ್
ಬೆಲ್ಲ ಒಂದೂವರೆ ಕಪ್
8-9 ಟೇಬಲ್ ಸ್ಪೂನ್ ತುಪ್ಪ
ಸ್ವಲ್ಪ ಗೋಡಂಬಿ

ಮಾಡುವ ವಿಧಾನ:

* ದೊಡ್ಡ ಪಾತ್ರೆಗೆ ಕಡಲೆ ಹಿಟ್ಟನ್ನು ಹಾಕಿ, ಅದಕ್ಕೆ ಸ್ವಲ್ಪ ನೀರು ಸೇರಿಸಿ ಕಲೆಸಿ, ಮಿಶ್ರಣ ತರಿ ತರಿಯಾಗಿರಲಿ.

* ಈಗ 2 ಟೇಬಲ್ ಸ್ಪೂನ್ ಅನ್ನು ಪ್ಯಾನ್ ಗೆ ಹಾಕಿ ಗ್ಯಾಸ್ ಮೇಲೆ ಇಟ್ಟು ಬಿಸಿ ಮಾಡಿ, ತುಪ್ಪ ಬಿಸಿಯಾದಾಗ ಅದರಲ್ಲಿ ಕಡಲೆ ಹಿಟ್ಟು ಹಾಕಿ ಫ್ರೈ ಮಾಡಿ, ಒಂದು ಪಾತ್ರೆಯಲ್ಲಿ ಹಾಕಿಡಿ.

* ಈಗ ಅದೇ ಪ್ಯಾನ್ ಗೆ 1 ಚಮಚ ತುಪ್ಪ ಹಾಕಿ ಅದರಲ್ಲಿ ಎಳ್ಳು ಮತ್ತು ತೆಂಗಿನ ತುರಿ ಹಾಕಿ ಕಡಿಮೆ ಉರಿಯಲ್ಲಿ 4-5 ನಿಮಿಷ ಫ್ರೈ ಮಾಡಿ. ನಂತರ ಅದನ್ನು ತೆಗೆದು ಮತ್ತೊಂದು ಬಟ್ಟಲಿನಲ್ಲಿ ಇಡಿ.

* ನಂತರ ಉಳಿದ ತುಪ್ಪವನ್ನು ಪ್ಯಾನ್ ಗೆ ಹಾಕಿ ಅದಕ್ಕೆ ಬೆಲ್ಲ ಹಾಕಿ 2 ನಿಮಿಷ ಬಿಸಿ ಮಾಡಿ ಮತ್ತು ಸ್ವಲ್ಪ ಬೆಲ್ಲ ಹಾಕಿ ಬೆಲ್ಲ ಕರಗುವಷ್ಟು ಹೊತ್ತು ಬಿಸಿ ಮಾಡಿ.

* ಈಗ ಫ್ರೈ ಮಾಡಿಟ್ಟ ಹಿಟ್ಟು ಮತ್ತು ಎಳ್ಳು, ತೆಂಗಿನ ತುರಿಯನ್ನು ಹಾಕಿ ಚೆನ್ನಾಗಿ ಮಿಕ್ಸ್ ಮಾಡಿ, ಉರಿಯಿಂದ ಇಳಿಸಿ.

* ನಂತರ ಕೈಗೆ ತುಪ್ಪ ಸವರಿಕೊಂಡು ಆ ಮಿಶ್ರಣದಿಂದ ಚಿಕ್ಕ ಚಿಕ್ಕ ಉಂಡೆ ಕಟ್ಟಿ, ನಂತರ ಅದನ್ನು ಗೋಡಂಬಿಯಿಂದ ಅಲಂಕರಿಸಿದರೆ ರುಚಿಯಾದ ಲಡ್ಡು ಸವಿಯಲು ರೆಡಿ.