ಹುಳಿಹುಳಿ ಮಾವಿನಕಾಯಿ ಅನ್ನ : ನಿನಗಿನ್ನೇನು ಬೇಕಣ್ಣ?

ಚೈತ್ರದ ಚಿಗುರೊಂದಿಗೇ ಹೂವು-ಮಿಡಿಗೊಂಚಲು-ಕೋಗಿಲೆಯ ಪಾದಸ್ಪರ್ಶಿತ ಮಾವು ಪ್ರತ್ಯಕ್ಷ. ಉಪ್ಪಿನಕಾಯಿ ಆಮೇಲೆ ಮಾಡುವಿರಂತೆ... ಈಗ ಮಾವಿನಕಾಯಿ ಅನ್ನ ಮಾಡಿ ಸವಿಯಿರಿ. ಬೇಕಾಗುವ ಪದಾರ್ಥಗಳು :

2-3 ಮಾವಿನ ಕಾಯಿ
ಹಿಡಿ ಶೇಂಗಾ ಬೀಜ
7-8 ಗೋಡಂಬಿ
2-3 ಟೀ ಚಮಚದಷ್ಟು ಕಡಲೆಬೇಳೆ
4-5 ಹಸಿ ಮೆಣಸಿನಕಾಯಿ
ಕೊತ್ತಂಬರಿ ಸೊಪ್ಪು
8-10 ಕರಿಬೇವು ಎಲೆ
ಒಂದು ಚಿಟಿಕೆಯಷ್ಟು ಅರಿಶಿಣ ಪುಡಿ
ಟೀ ಚಮಚದಲ್ಲಿ ಸಾಸಿವೆ
ತುರಿದ ಒಣ ಕೊಬ್ಬರಿ
ಚೂರು ಬೆಲ್ಲ
1/2 ಕೆ.ಜಿ ಅಕ್ಕಿ

ಮಾಡುವ ವಿಧಾನ :

ಮೊದಲು ಒಂದು ಪಾತ್ರೆಯಲ್ಲಿ ಉದುರುದುರಾಗಿ ಅನ್ನ ಮಾಡಿಟ್ಟುಕೊಂಡಿರಿ. ಆನಂತರ ಮಾವಿನಕಾಯಿಗಳನ್ನು ಸ್ವಲ್ಪಹೊತ್ತು ನೀರಲ್ಲಿ ನೆನೆಸಿಟ್ಟು ಸಿಪ್ಪೆಯನ್ನು ತೆಗೆದು ಸಣ್ಣಗೆ ತುರಿದುಕೊಳ್ಳಿ. ತುರಿದುಕೊಂಡ ಮಾವಿನಕಾಯಿಯಲ್ಲಿ 3-4 ಹಸಿಮೆಣಸಿನಕಾಯಿ ಹಾಕಿ ನೀರನ್ನು ಬಳಸದೆ ಮಿಕ್ಸಿ ಮಾಡಿ ಇಡಿ.

ಇನ್ನೊಂದು ಬಾಣಲೆಯನ್ನು ಸ್ಟೋವ್‌ ಮೇಲೆ ಇಟ್ಟು ಅದರಲ್ಲಿ 2-3ಚಮಚ ಎಣ್ಣೆಯನ್ನು ಹಾಕಿ. ಕಡಲೆಬೇಳೆ, ಶೇಂಗಾ, ಗೋಡಂಬಿ ಹಾಕಿ ಚೆನ್ನಾಗಿ ಹುರಿದುಕೊಳ್ಳಿ. ಕೆಂಪು ಬಣ್ಣಕ್ಕೆ ಬಂದ ಮೇಲೆ ಹೆಚ್ಚಿಟ್ಟ ಕೊತ್ತಂಬರಿ ಸೊಪ್ಪು ಮತ್ತು ಕರಿಬೇವು ಅರಿಶಿಣ ಪುಡಿ, ಸ್ವಲ್ಪ ಕೆಂಪು ಮೆಣಸಿನಪುಡಿ ಹಾಕಿ ಸ್ವಲ್ಪ ಹೊತ್ತು ಹುರಿದು ನಂತರ ಮೊದಲೆ ಮಿಕ್ಸಿ ಮಾಡಿಕೊಂಡ ಮಾವಿನಕಾಯಿ ಮಿಶ್ರಣಕ್ಕೆ ಸೇರಿಸಿ.

ಕೊನೆಗೆ ಸ್ಟೋವ್‌ ಮೇಲಿಂದ ಬಾಣಲೆ ಕೆಳಗೆ ಇಳಿಸಿ ಅದರಲ್ಲಿ ಅನ್ನವನ್ನು ಚೆನ್ನಾಗಿ ಪ್ರೀತಿಯಿಂದ ಬೆರೆಸಿ. ರುಚಿ ನೋಡಿ..ಬಡಿಸಿ. ಉಪ್ಪು ಹಾಕುವುದು ಮರೆತಿರಾ?