ಬಿಸಿ ಬೇಳೆ ಭಾತ್ ಪೌಡರ್ ಮನೆಯಲ್ಲೇ ಮಾಡಿ...

Rice

oi-Sumalatha

By Sumalatha

Published: Saturday, December 3, 2011, 14:54 [IST]

ಬಿಸಿ ಬೇಳೆ ಭಾತ್ ಭಾರತದ ಪ್ರಸಿದ್ಧ ಖಾದ್ಯ ಎಂದರೆ ತಪ್ಪಿಲ್ಲ. ಆದರೆ ನಿಮ್ಮ ಮನೆಯಲ್ಲಿ ಮಾಡುವ ಬಿಸಿ ಬೇಳೆ ಭಾತ್ ಇನ್ನೂ ರುಚಿಯಾಗಿರಬೇಕೆಂದರೆ ಬಿಸಿ ಬೇಳೆ ಭಾತ್ ಗೆ ಹಾಕುವ ಪುಡಿಯನ್ನೂ ಮನೆಯಲ್ಲೇ ಮಾಡಿ. ಆಗ ನೋಡಿ ಬಿಸಿ ಬೇಳೆ ಭಾತ್ ರುಚಿಯ ಗಮ್ಮತ್ತು. ಯಾವಾಗಲೂ ಪುಡಿಗೆಂದು ಅಂಗಡಿಗೆ ಹೋಗುವ ಬದಲು ಒಮ್ಮೆ ಇದನ್ನು ಮನೆಯಲ್ಲೇ ತಯಾರಿಸಿ ಟೇಸ್ಟ್ ನೋಡಿ. ಸುಲಭವಾಗಿ ಪುಡಿ ತಯಾರಿಸುವ ರೀತಿಯನ್ನು ಇಲ್ಲಿ ತಿಳಿಯಿರಿ.

ಬಿಸಿಬೇಳೆ ಭಾತ್ ಪುಡಿಗೆ ಬೇಕಾಗುವ ಸಾಮಾನು:
* 10 ಒಣಮೆಣಸಿನಕಾಯಿ / ಖಾರಕ್ಕೆ ತಕ್ಕಷ್ಟು
* 2 ಚಮಚ ಧನಿಯಾ
* 1/2 ಚಮಚ ಮೆಂತ್ಯ
* 1 ಚಮಚ ಜೀರಿಗೆ
* 1/2 ಚಮಚ ಗಸಗಸೆ, 2 ಏಲಕ್ಕಿ, 4 ಲವಂಗ
* 1 ಇಂಚು ಚೆಕ್ಕೆ ಚೂರು
* 1/2 ಚಮಚ ಮೆಣಸು
* ಸ್ವಲ್ಪ ಒಣಕೊಬ್ಬರಿ
* 1 ಚಮಚ ಕಡಲೆ ಬೇಳೆ ಮತ್ತು 1 ಚಮಚ ಉದ್ದಿನಬೇಳೆ

ಬಿಸಿಬೇಳೆ ಭಾತ್ ಪುಡಿ ತಯಾರಿಸುವ ವಿಧಾನ:

ಪುಡಿಗೆಂದು ತಿಳಿಸಿರುವ ಸಾಮಗ್ರಿಗಳನ್ನು ಒಂದು ಚಮಚ ಎಣ್ಣೆಯೊಂದಿಗೆ ಸೀದು ಹೋಗದಂತೆ ಒಂದೊಂದಾಗಿ ಹುರಿದು, ಎಲ್ಲವನ್ನು ಸೇರಿಸಿ ಪುಡಿ ಮಾಡಿಟ್ಟುಕೊಂಡರೆ ಸಾಕು ಬಿಸಿಬೇಳೆಭಾತ್ ಪುಡಿ ರೆಡಿಯಾಗುತ್ತದೆ.

ಬಿಸಿಬೇಳೆಭಾತ್ ಪುಡಿಯನ್ನು ಮೊದಲೇ ಹೆಚ್ಚಾಗಿ ತಯಾರಿಸಿ, ಗಾಳಿಯಾಡದ ಡಬ್ಬದಲ್ಲಿ ಶೇಖರಿಸಿಟ್ಟುಕೊಂಡರೆ ಯಾವಾಗ ಬೇಕೋ ಆಗ ಭಾತ್ ತಯಾರಿಸುವುದು ಸುಲಭವಾಗುತ್ತದೆ. ಆದರೆ ತುಂಬಾ ತಿಂಗಳವರೆಗೆ ಪುಡಿ ಇಟ್ಟುಕೊಂಡರೆ ಸ್ವಾದ ಕಡಿಮೆಯಾಗುತ್ತದೆ. ಈ ಪುಡಿಯನ್ನು ಪ್ರಿಡ್ಜ್ ನಲ್ಲಿಟ್ಟರೆ ಇನ್ನೂ ಹೆಚ್ಚು ಕಾಲ ತಾಜಾ ಆಗಿರುತ್ತೆ.

ಈ ಪ್ರಮಾಣ ಒಂದು ಬಾರಿ ಬಿಸಿಬೇಳೆಭಾತ್ ತಯಾರಿಸುವುದಕ್ಕೆ ಮಾತ್ರ ಕೊಟ್ಟಿರುವುದು. ನಿಮಗೆ ಹೆಚ್ಚಿನ ಪ್ರಮಾಣದಲ್ಲಿ ಪುಡಿ ಬೇಕೆನಿಸಿದರೆ ಅದಕ್ಕೆ ತಕ್ಕಂತೆ ಸಾಮಗ್ರಿಗಳನ್ನು ಹೆಚ್ಚಿನ ಪ್ರಮಾಣದಲ್ಲಿ ಬಳಸಿ.

(ಕೃಪೆ: ಅಡಿಗೆ ಸವಿರುಚಿ)