ಶೀತ ಶಮನ ಮಾಡುತ್ತೆ ರುಚಿಕರ ಪುದೀನಾ ಸೂಪ್

ಚಳಿಗಾಲ ಬಂತೆಂದರೆ ಸಾಕು, ನೆಗಡಿ, ಕೆಮ್ಮು, ಗಂಟಲಿನ ಕೆರೆತ, ಜೀರ್ಣ ಕ್ರಿಯೆ ಸಂಬಂಧಿ ಸಮಸ್ಯೆ ಕಾಣಿಸಿಕೊಳ್ಳುತ್ತೆ. ಆದರೆ ಈ ಸಮಸ್ಯೆಗಳಿಗೆಲ್ಲಾ ಯಾವಾಗಲೂ ಮಾತ್ರೆಗಳ ಮೊರೆಹೋಗುವುದು ಒಳ್ಳೆಯ ಅಭ್ಯಾಸವಲ್ಲ. ಆದ್ದರಿಂದ ಈ ಆರೋಗ್ಯ ಸಂಬಂಧಿ ಸಮಸ್ಯೆಗಳನ್ನು ನೈಸರ್ಗಿಕವಾಗಿ ಉಪಶಮನ ಮಾಡುವ ಉಪಾಯವೊಂದು ಇಲ್ಲಿದೆ.

ಚಳಿಗಾಲದಲ್ಲಿ ಬಾಯಿಗೆ ಹಿತ ನೀಡುವುದರೊಂದಿಗೆ ಶೀತ ಶಮನ ಮಾಡುವ ಈ ರುಚಿಕರ ಪುದೀನಾ ಸೂಪನ್ನು ಸುಲಭವಾಗಿ ತಯಾರಿಸುವುದು ಹೇಗೆ ಎಂದು ಇಲ್ಲಿ ತಿಳಿದುಕೊಳ್ಳಿ.

ಪುದೀನಾ ಸೂಪ್ ಗೆ ಏನೇನು ಬೇಕು?
1 ಕಪ್ ತಾಜಾ ಪುದೀನಾ ಎಲೆ, ಸ್ವಲ್ಪ ಶುಂಠಿ ಪೇಸ್ಟ್, 1 ಚಮಚ ಹುಣಸೆ ರಸ, 1 ಚಮಚ ಜೀರಿಗೆ, ಸ್ವಲ್ಪ ಕೊತ್ತಂಬರಿ, 1 ಚಮಚ ಬೆಲ್ಲದ ಪುಡಿ, ರುಚಿಗೆ ತಕ್ಕಷ್ಟು ಉಪ್ಪು, 1 ಕೆಂಪು ಒಣ ಮೆಣಸಿನ ಕಾಯಿ, 1 ಚಮಚ ಸಾಸಿವೆ

ಪುದೀನಾ ಸೂಪ್ ತಯಾರಿಸುವ ವಿಧಾನ:
* ಒಂದು ಬಾಣಲೆಗೆ ಎಣ್ಣೆ ಹಾಕಿ ಕಾಯಿಸಿ ಅದಕ್ಕೆ ಜೀರಿಗೆ, ಸಾಸಿವೆ, ಪುದೀನಾ, ಶುಂಠಿ ಪೇಸ್ಟ್, ಕೊತ್ತಂಬರಿ ಮತ್ತು ಕೆಂಪು ಒಣ ಮೆಣಸಿನಕಾಯಿಯನ್ನು ಒಂದೆರೆಡು ನಿಮಿಷ ಹುರಿದುಕೊಳ್ಳಬೇಕು.

* ಈ ಮಿಶ್ರಣಕ್ಕೆ 2-3 ಕಪ್ ನೀರು ಹಾಕಿ, ಹುಣಸೆ ಹಣ್ಣಿನ ರಸ, ಬೆಲ್ಲ, ರುಚಿಗೆ ತಕ್ಕಷ್ಟು ಉಪ್ಪು ಬೆರೆಸಿ ಬಿಸಿಯಾಗಲು ಬಿಡಬೇಕು. ಈಗ ಪುದೀನಾ ಸೂಪ್ ಕುಡಿಯಲು ಸಿದ್ಧ. ಈ ಸೂಪನ್ನು ಬಿಸಿಯಿದ್ದಾಗಲೇ ಕುಡಿದರೆ ರುಚಿ ಹೆಚ್ಚು.