ಕಚ್ಚಾ ಟೊಮೆಟೊ ಚಟ್ನಿ ರುಚಿ ಒಮ್ಮೆ ನೋಡಿ!

Chutney

oi-Reena

By ರೀನಾಮಂಜು

Published: Tuesday, April 24, 2012, 9:46 [IST]

ನಾನು ಇವತ್ತು ನಿಮಗೆ ಸ್ವಲ್ಪಸ್ಪೆಷಲ್ ಚಟ್ನಿ ರೆಸಿಪಿ ತಿಳಿಸಿ ಕೊಡಲಿದ್ದೇನೆ. ನನ್ನ ಗೆಳತಿ ತಂದ ಚಟ್ನಿಯ ರುಚಿಗೆ ಮಾರುಹೋಗಿ ಅವರ ಅಮ್ಮನ ಹತ್ತಿರ ಕೇಳಿ ತಿಳಿದುಕೊಂಡ ಚಟ್ನಿ ಇದು. ತುಂಬಾ ರುಚಿಕರವಾದ ಚಟ್ನಿ ರೆಸಿಪಿ ನೀಡಿದ ವಿಧ್ಯಾ ಬಿ. ಕುಲಕರ್ಣಿ ಅಮ್ಮನಿಗೆ ಥ್ಯಾಂಕ್ಸ್ ಹೇಳುತ್ತಾ ಈ ಚಟ್ನಿ ರೆಸಿಪಿ ನಿಮ್ಮ ಮುಂದೆ ಇಡುತ್ತಿದ್ದೇನೆ. ಒಂದು ಚಟ್ನಿಗೆ ಏಕೆ ಇಷ್ಟೊಂದು ಹೈಪ್ ಅಂತ ಹುಬ್ಬೇರಿಸಬೇಡಿ. ಈ ಚಟ್ನಿ ಮಾಡಿ ರುಚಿ ಸವಿದರೆ ಅವರಿಗೆ ನೀವೂ ಕೂಡ ಥ್ಯಾಂಕ್ಸ್ ಹೇಳುವುದು ದಿಟ.

ಕಚ್ಚಾ ಟೊಮೆಟೊ ಚಟ್ನಿಗೆ ಬೇಕಾಗುವ ಸಾಮಾಗ್ರಿಗಳು:

* 2-3 ಕಚ್ಚಾ ಟೊಮೆಟೊ (ಕಾಯಿ ಟೊಮೆಟೊ)
* 15 ಹಸಿ ಮೆಣಸಿನ ಕಾಯಿ
* 1/2 ನಿಂಬೆ ಹಣ್ಣು
* 1/2 ಚಮಚ ಹುರಿದ ಎಳ್ಳಿನ ಪುಡಿ
* ಚಿಟಿಕೆಯಷ್ಟು ಇಂಗು
* 1/4 ಚಮಚ ಅರಿಶಿಣ ಪುಡಿ
* ರುಚಿಗೆ ತಕ್ಕ ಉಪ್ಪು

ಒಗ್ಗರಣೆಗೆ: ಕರಿಬೇವಿನ ಎಲೆ
ಸಾಸಿವೆ
ಎಣ್ಣೆ

ತಯಾರಿಸುವ ವಿಧಾನ:

1. ಟೊಮೆಟೊ ಮತ್ತು ಹಸಿಮೆಣಸಿನಕಾಯಿಯನ್ನು ತೊಳೆದು ಕತ್ತರಿಸಿಬೇಕು. ನಂತರ ಬಾಣಲೆಯಲ್ಲಿ ಎಣ್ಣೆ ಹಾಕಿ ಬಿಸಿ ಮಾಡಿ ಅದಕ್ಕೆ ಟೊಮೆಟೊ ಮತ್ತು ಹಸಿಮೆಣಸಿನಕಾಯಿ ಹಾಕಿ ಮೆತ್ತಗಾಗುವರೆಗೆ ಹುರಿಯಬೇಕು. ನಂತರ ಸ್ವಲ್ಪ ಇಂಗು 1 ನಿಮಿಷದ ಬಳಿಕ ಉರಿಯಿಂದ ತೆಗೆಯಬೇಕು.

2. ಈಗ ಎಳ್ಳಿನ ಪುಡಿಯನ್ನು ತವಾದಲ್ಲಿ ಹಾಕಿ ಸ್ವಲ್ಪ ಬಿಸಿ ಮಾಡಿ ಟೊಮೆಟೊ ಜೊತೆ ಹಾಕಬೇಕು.

3. ಈಗ ಅರಿಶಿಣ ಪುಡಿ, ರುಚಿಗೆ ತಕ್ಕ ಉಪ್ಪು ಸೇರಿಸಿ, ಸ್ವಲ್ಪ ನಿಂಬೆರಸ ಹಿಂಡಿ ಮಿಕ್ಸಿಯಲ್ಲಿ ಆಡಿಸಬೇಕು.

4. ನಂತರ ಬಾಣಲೆಗೆ ಎಣ್ಣೆ ಹಾಕಿ ಕರಿಬೇವಿನ ಎಲೆ ಮತ್ತು ಸಾಸಿವೆಯನ್ನು ಹಾಕಿ ಸಾಸಿವೆ ಚಟಾಪಟಾ ಶಬ್ದ ಬರುವಾಗ ಚಟ್ನಿಯನ್ನು ಸೇರಿಸಿ ಮಿಶ್ರ ಮಾಡಿ ಉರಿಯಿಂದ ಇಳಿಸಿದರೆ ರುಚಿಕರವಾದ ಕಚ್ಚಾ ಟೊಮೆಟೊ ಚಟ್ನಿ ರೆಡಿ.

ಈ ಚಟ್ನಿಯನ್ನು ಅನ್ನದ ಜೊತೆ, ಚಪಾತಿ ಜೊತೆ ಸವಿಯಲು ತುಂಬಾ ರುಚಿಕಕರವಾಗಿರುತ್ತದೆ. ಇದನ್ನು ತಯಾರಿಸಿದರೆ ಬೇಗನೆ ಹಾಳಾಗುವುದಿಲ್ಲ.