ರವೆ ದೋಸೆ ಮಾಡುವ ಶೈಲಿ ಗೊತ್ತಿದೆಯೇ?

Updated: Thursday, August 16, 2012, 12:12 [IST]

ರವೆ ದೋಸೆ, ರವೆ ಇಡ್ಲಿ ದಕ್ಷಿಣ ಭಾರತದ ಕಡೆ ತುಂಬಾ ಪ್ರಸಿದ್ಧಿಯನ್ನು ಪಡೆದಿದೆ. ದೋಸೆಗೆ ಬಳಸುವ ಸಾಮಾಗ್ರಿಗಳಲ್ಲಿ ಸ್ವಲ್ಪ ಭಿನ್ನವಾದ ಸಾಮಾಗ್ರಿ ಹಾಕಿದರೆ ಸಾಕು ಹೊಸ ರುಚಿಯ ದೋಸೆ ತಯಾರಿಸಬಹುದು. ಬೇರೆ-ಬೇರೆ ಸಾಮಾಗ್ರಿಗಳನ್ನು ಹಾಕಿದರೆ ವಿಭಿನ್ನ ರುಚಿಯ ದೋಸೆ ತಯಾರಿಸಬಹುದು ನಿಜ, ಆದರೆ ಅದನ್ನು ಮಾಡುವ ಶೈಲಿ ಗೊತ್ತಿರಬೇಕು, ಹಾಗಾದರೆ ಮಾತ್ರ ಆ ದೋಸೆಯನ್ನು ರುಚಿಕರವಾಗಿ ಮಾಡಲು ಸಾಧ್ಯ. ಇವತ್ತು ನಾವು ರವೆ ದೋಸೆ ತಯಾರಿಸುವ ವಿಧಾನ ತಿಳಿಯೋಣ.

ಬೇಕಾಗುವ ಸಾಮಾಗ್ರಿಗಳು:

* ಒಂದೂವರೆ ಕಪ್ ಸಣ್ಣ ರವೆ
* ಒಂದೂವರೆ ಕಪ್ ಅಕ್ಕಿ
* ಅರ್ಧ ಕಪ್ ಉದ್ದಿನ ಬೇಳೆ
* ಒಂದು ಕಪ್ ಹುಳಿ ಮೊಸರು
* ನಾಲ್ಕು ಆಲೂಗೆಡ್ಡೆ
* ಎರಡು ಈರುಳ್ಳಿ
* ಒಂದು ಚಮಚ ಸಾಸಿವೆ
* 1/4 ಚಮಚ ಅರಿಶಿಣ
* ಅರ್ಧ ಚಮಚ ಕೆಂಪು ಮೆಣಸಿನ ಪುಡಿ
* ಸ್ವಲ್ಪ ಕರಿಬೇವಿನ ಎಲೆ
* ರುಚಿಗೆ ತಕ್ಕ ಉಪ್ಪು
* ಸ್ವಲ್ಪ ಎಣ್ಣೆ

ತಯಾರಿಸುವ ವಿಧಾನ:

1. ಅಕ್ಕಿ ಮತ್ತು ಉದ್ದಿನ ಬೇಳೆಯನ್ನು 2 ಗಂಟೆಗಳ ಕಾಲ ನೀರಿನಲ್ಲಿ ನೆನೆ ಹಾಕಬೇಕು.

2. ನಂತರ ಸ್ವಲ್ಪ ಉಪ್ಪು ಹಾಕಿ ಅಕ್ಕಿ ಮತ್ತು ಉದ್ದಿನ ಬೇಳೆಯನ್ನು ನುಣ್ಣನೆ ಅರೆಯಬೇಕು.

3. ಸಣ್ಣ ರವೆಯನ್ನು ಮೊಸರಿನಲ್ಲಿ ಹಾಕಿ ಅರ್ಧ ಗಂಟೆ ಕಾಲ ಇಡಬೇಕು.

4. ನಂತರ ಮೊಸರಿನಲ್ಲಿ ಹಾಕಿದ್ದ ರವೆಗೆ ಅಕ್ಕಿ ಮತ್ತು ಉದ್ದಿನ ಬೇಳೆ ಹಿಟ್ಟು ಹಾಕಿ ಚೆನ್ನಾಗಿ ಮಿಶ್ರ ಮಾಡಿ 8 ಗಂಟೆಗಳ ಕಾಲ ಇಡಬೇಕು.

5. ನಂತರ ಆಲೂಗೆಡ್ಡೆಯನ್ನು ತುಂಬಾ ತೆಳ್ಳಗೆ, ಚಿಕ್ಕ ತುಂಡುಗಳಾಗಿ ಕತ್ತರಿಸಬೇಕು.

6. ಈರುಳ್ಳಿಯನ್ನು ಉದ್ದುದ್ದವಾಗಿ ಕತ್ತರಿಸಿ.

7. ಒಂದು ಪಾತ್ರೆಯಲ್ಲಿ ಎಣ್ಣೆ ಹಾಕಿ ಬಿಸಿ ಮಾಡಿ, ಸಾಸಿವೆ ಮತ್ತು ಕರಿಬೇವಿನ ಎಲೆ ಹಾಕಿ ಈರುಳ್ಳಿಯನ್ನು ಹಾಕಿ ಕಂದು ಬಣ್ಣ ಬರುವವರೆಗೆ ಹುರಿಯಬೇಕು. ನಂತರ ಆಲೂಗೆಡ್ಡೆ ಹಾಕಿ 2 ನಿಮಿಷ ಹುರಿದು, ಅರಿಶಿಣ ಪುಡಿ, ಕೆಂಪು ಮೆಣಸಿನ ಪುಡಿ, ರುಚಿಗೆ ತಕ್ಕ ಉಪ್ಪು ಹಾಕಿ ಸ್ವಲ್ಪ ನೀರು ಬೇಯಿಸಬೇಕು.

8. ನಂತರ ದೋಸೆ ತವಾವನ್ನು ಬಿಸಿ ಮಾಡಲು ಇಟ್ಟು ಒಂದು ಚಮಚ ಎಣ್ಣೆ ಹಾಕಿ ದೋಸೆಗೆ ಹುಯ್ಯಬೇಕು, ಹೊಟ್ಟು ಸ್ವಲ್ಪ ಬೆಂದಾಗ ಸ್ವಲ್ಪ ಆಲೂಗೆಡ್ಡೆ ಮಿಶ್ರಣ ಅದರ ಬೇಲೆ ಹಾಕಿ ಸೌಟ್ ನಿಂದ ಹರಡಿ, ದೋಸೆ ಬೆಂದಾಗ ತೆಗೆದರೆ ರುಚಿಯಾದ ರವೆ ದೋಸೆ ರೆಡಿ.

ಈ ರವೆ ದೋಸೆಗೆ ಸಾಂಬರ್ ಮತ್ತು ಚಟ್ನಿ ಬೆಸ್ಟ್ ಕಾಂಬಿನೇಷನ್.