ಮಳೆಗಾಲದ ಚಳಿಗೆ ಬಿಸಿಬಿಸಿ ಆಲೂ ಪರಾಟ

* ಭಾರತಿ ಎಚ್.ಎಸ್., ಜಯನಗರ

ಬೇಕಾಗುವ ಸಾಮಾನುಗಳು

ಗೋದಿ ಹಿಟ್ಟು 4 ಚಪಾತಿಗೆ ಆಗುವಷ್ಟು
ಬೇಯಿಸಿದ ಆಲುಗೆಡ್ಡೆ
ಕೆಂಪು ಮೆಣಸಿನ ಪುಡಿ 1/2 ಚಮಚ
ಅರಿಸಿನ ಪುಡಿ 1/2 ಚಮಚ
ಹೆಚ್ಚಿದ ಹಸಿ ಮೆಣಸಿನಕಾಯಿ 2
ಕೊತ್ತಂಬರಿ ಸೊಪ್ಪು ಸ್ವಲ್ಪ
ತುರಿದ ಶುಂಟಿ 1/2 ಚಮಚ
ರುಚಿಗೆ ಉಪ್ಪು

ತಯಾರಿಸುವ ವಿಧಾನ

ಮೊದಲು ಒಂದು ಬಟ್ಟಲಿಗೆ ಬೇಯಿಸಿದ ಆಲೂಗಡ್ಡೆ ಹಾಕಿಕೊಂಡು ಚೆನ್ನಾಗಿ ಪುಡಿ ಮಾಡಿಕೊಳ್ಳಿ. ಆದಕ್ಕೆ ಮಿಕ್ಕ ಎಲ್ಲ ಪದಾರ್ಥಗಳನ್ನು ಹಾಕಿ ಚೆನ್ನಾಗಿ ಬೆರೆಸಿರಿ. ನಂತರ ಮುಷ್ಠಿಯಲ್ಲಿ ನಿಂಬೆಹಣ್ಣು ಗಾತ್ರದ ಸಣ್ಣ ಸಣ್ಣ ಉಂಡೆ ಮಾಡಿ ತೆಗೆದಿಡಿ.

ಗೋದಿ ಹಿಟ್ಟನ್ನು ಚಪಾತಿಯ ಹದಕ್ಕೆ ನೀರು ಹಾಕಿ ಕಲಿಸಿಡಿ. ಹಿಟ್ಟನ್ನು ಪೂರಿ ಆಕಾರದಷ್ಟು ಕೈಯಲ್ಲಿ ತಟ್ಟಿಕೊಂಡು ಅದರ ಮಧ್ಯೆ ಆಲೂ ಉಂಡೆಗಳನ್ನು ಇಟ್ಟು ಹಿಟ್ಟಿನಿಂದ ಪೂರ್ತಿಯಾಗಿ ಮುಚ್ಚಿರಿ. ಒಬ್ಬಟ್ಟಿನ ಹೂರಣ ತುಂಬುವಂತೆ ಆಲೂ ಉಂಡೆಯನ್ನು ತುಂಬಬೇಕು.

ಗೋದಿ ಹಿಟ್ಟನ್ನು ಹಾಕಿಕೊಂಡು ಸ್ವಲ್ಪ ದಪ್ಪವಾಗಿ ಲಟ್ಟಿಸಿ ತವಾದ ಮೇಲೆ ಎಣ್ಣೆ ಅಥವಾ ಬೆಣ್ಣೆಯನ್ನು ಹಚ್ಚಿ ಎರಡು ಬದಿ ಹದವಾಗಿ ಬೇಯಿಸಿ. ಈಗ ರುಚಿಯಾದ ಆಲೂ ಪರಾಟ ಅಥವಾ ಆಲೂ ಪರೋಟ ರೆಡಿ. ಈ ಚಳಿಗೆ ಬಿಸಿ ಬಿಸಿ ಪರಾಟ ತಿನ್ನಲು ತುಂಬಾ ರುಚಿ.