ನೆನಪಿಡಿ, ಮಳೆಗಾಲದಲ್ಲಿ ಮೀನು ಆರೋಗ್ಯಕ್ಕೆ ಒಳ್ಳೆಯದಲ್ಲ...

ಮಳೆಗಾಲದಲ್ಲಿ ಜೀರ್ಣಾಂಗ ವ್ಯವಸ್ಥೆಯು ದುರ್ಬಲ

ಮಳೆಗಾಲದ ಸಮಯದಲ್ಲಿ ಜೀರ್ಣಾಂಗ ವ್ಯವಸ್ಥೆಯು ತುಂಬಾ ದುರ್ಬಲವಾಗಿರುವುದು. ಹೆಚ್ಚು ಭಾರವಾಗಿರುವುದನ್ನು ತಿಂದರೆ ಅದರಿಂದ ಜೀರ್ಣಕ್ರಿಯೆ ವ್ಯವಸ್ಥೆ ಮೇಲೆ ಪರಿಣಾಮ ಉಂಟಾಗಬಹುದು. ಮಳೆಗಾಲದಲ್ಲಿ ಮಂಸಾಹಾರವನ್ನು ತ್ಯಜಿಸಿದರೆ ತುಂಬಾ ಒಳ್ಳೆಯದು.

ಮಳೆಗಾಲದಲ್ಲಿ ನೀರು ಕಲುಷಿತವಾಗುವುದು

ಮಳೆಗಾಲದಲ್ಲಿ ನೀರು ಕಲುಷಿತವಾಗುವುದು ಸಾಮಾನ್ಯ. ಕಲುಷಿತ ನೀರಿನಿಂದ ಹಿಡಿದ ಮೀನನ್ನು ನೀವು ತಿಂದರೆ ಕಾಲರಾ, ಅತಿಸಾರ, ಕಾಮಾಲೆ ಮತ್ತು ಟೈಫಾಯ್ಡ್ ಆಗಬಹುದು.

ಮೀನುಗಳ ಮೊಟ್ಟೆ ಹೊಟ್ಟೆ ಸೇರಿದರೆ ಏನಾಗಬಹುದು?

ಮಳೆಗಾಲದಲ್ಲಿ ಹೆಚ್ಚಾಗಿ ಮೀನುಗಳು ಮೊಟ್ಟೆಯಿಡುವ ಸಮಯವಾಗಿದೆ. ಮೊಟ್ಟೆಯಿರುವ ಮೀನನ್ನು ನೀವು ತಿಂದರೆ ಆಗ ಆಹಾರ ವಿಷವಾಗಬಹುದು ಅಥವಾ ಹೊಟ್ಟೆಯಲ್ಲಿ ಸೋಂಕು ಕಾಣಿಸಬಹುದು.

ತಾಜಾ ಮೀನಲ್ಲ

ಮಳೆಗಾಲದಲ್ಲಿ ಬೇಡಿಕೆಯಿರುವ ಕಾರಣದಿಂದಾಗಿ ಮೇ ತಿಂಗಳ ಅಂತ್ಯದ ವೇಳೆ ಹಿಡಿದ ಮೀನನ್ನು ಸಂಗ್ರಹಿಸಿಡಲಾಗುತ್ತದೆ. ಮಳೆಗಾಲದಲ್ಲಿ ಮಾರಲಾಗುವ ಹೆಚ್ಚಿನ ಮೀನುಗಳು ತಾಜಾವಾಗಿರಲ್ಲ. ಮೀನು ಶೇಖರಣೆಯ ಜಾಗವು ಸ್ವಚ್ಛವಾಗಿರದಿದ್ದರೆ ಮೀನು ತಿಂದ ಮರುದಿನ ನಿಮಗೆ ವಾಂತಿಯಾಗಬಹುದು.

ನೀರು ಕಲುಷಿತಗೊಂಡರೆ ಏನಾಗುವುದು?

ನಗರಗಳ ಚರಂಡಿಯಲ್ಲಿರುವ ಎಲ್ಲಾ ರೀತಿಯ ಕಸಕಡ್ಡಿಗಳು ಮಳೆಗಾಲದ ನೀರಿಗೆ ಕೊಚ್ಚಿ ಹೋಗುವುದು. ಇದರಿಂದ ಕೆರೆ ಹಾಗೂ ಸಮುದ್ರದ ನೀರು ಕೂಡ ಕಲುಷಿತವಾಗುವುದು. ಮಳೆಗಾಲದಲ್ಲಿ ಈ ಕಾರಣದಿಂದಲೇ ನೀರು ವಿಷವಾಗುವುದು. ಇಂತಹ ನೀರಿನಿಂದ ಹಿಡಿದ ಮೀನು ತಿಂದರೆ ಆರೋಗ್ಯ ಕೆಡಬಹುದು.

ಮೀನಿನ ಸಂಗ್ರಹಣೆಗೆ ರಾಸಾಯನಿಕ ಬಳಕೆ

ಕೆಲವೊಂದು ಕಡೆಗಳಲ್ಲಿ ಮಳೆಗಾಲಕ್ಕೆ ಮೀನನ್ನು ಸಂಗ್ರಹಿಸಿಡಲು ರಾಸಾಯನಿಕಗಳನ್ನು ಬಳಸಲಾಗುವುದು. ಪಾಲಿಫಾಸ್ಪೇಟ್ ಮತ್ತು ಸಲ್ಫೇಟ್ ಬ್ಯಾಕ್ಟೀರಿಯಾ ಮತ್ತು ಫಂಗಲ್ ನ್ನು ದೂರವಿಡುತ್ತದೆ. ಆದರೆ ಈ ರಾಸಾಯನಿಕಗಳಿಂದ ಆರೋಗ್ಯಕ್ಕೆ ಹಾನಿಯಾಗುವುದು.