ಮೂಲವ್ಯಾಧಿ ತರುವ ಪ್ರಮುಖ ಅಂಶಗಳಿವು!

Wellness

oi-Reena

By Hema S

Published: Monday, June 4, 2012, 15:02 [IST]

ಮೂಲವ್ಯಾಧಿ ಅಥವಾ ಪೈಲ್ಸ್ ಬಂದರೆ ತುಂಬಾ ನೋವನ್ನು ಅನುಭವಿಸಬೇಕಾಗುತ್ತದೆ. ಇದು ಒಮ್ಮೆ ಬಂದರೆ ಗುಣಪಡಿಸಲು ಹರಸಾಹಸ ಮಾಡಬೇಕು. ಇದು ಬಂದರೆ ಪಥ್ಯದ ಊಟವನ್ನು ತಿಂದು ಸಾಕಾಗಿ ಹೋಗುವುದು. ಈ ಮೂಲವ್ಯಾಧಿ ಆಹಾರಕ್ರಮ ಮತ್ತು ಜೀವನಶೈಲಿಯಿಂದಾಗಿ ಹೆಚ್ಚಾಗುತ್ತಿದೆ ಎಂದು ಈಗಾಗಲೇ ಹೇಳಿದ್ದೇವೆ. ಉತ್ತಮ ಆಹಾರಕ್ರಮ ಪಾಲಿಸಿದರೆ ಪಥ್ಯ ಊಟ ತಿನ್ನಬೇಕಾಗಿ ಬರುವುದಿಲ್ಲ. ಆದರೆ ಹೆಚ್ಚಿನವರು ತಮಗೆ ಇಷ್ಟವಾದ ಆಹಾರ ಅಂತ ತಿನ್ನುತ್ತಾರೆ. ಆದರೆ ಅದು ಆರೋಗ್ಯಕ್ಕೆ ಒಳ್ಳೆಯದಾಗಿರುವುದಿಲ್ಲ. ಉದಾಹರಣೆಗೆ ಅಧಿಕ ಖಾರ ತಿನ್ನುವ ಅಭ್ಯಾಸ.

ಯಾವ ರೀತಿಯ ಆಹಾರಕ್ರಮ ಮತ್ತು ರೀತಿಯ ಜೀವನ ಶೈಲಿ ಈ ಸಮಸ್ಯೆ ಹೆಚ್ಚಾಗಲು ಕಾರಣವಾಗಿದೆ ಎಂದು ತಿಳಿಯೋಣ ಬನ್ನಿ.

ಆಹಾರಕ್ರಮ: ಕಡಿಮೆ ನಾರಿನಂಶವಿರುವ ಆಹಾರಕ್ರಮ ಮಲಬದ್ಧತೆ ಸಮಸ್ಯೆಗೆ ಮುಖ್ಯ ಕಾರಣವಾಗಿದೆ. ಆದ್ದರಿಂದ ಆಹಾರದಲ್ಲಿ ಈ ಕೆಳಗಿನ ಕ್ರಮಗಳನ್ನು ಅನುಸರಿಸುವುದು ಒಳ್ಳೆಯದು.
1. ನಾರಿನಂಶವಿರುವ ಆಹಾರ: ಅಧಿಕ ನಾರಿನಂಶವಿರುವ ಸೊಪ್ಪು, ತರಕಾರಿ, ಹಣ್ಣುಗಳು, ಸೌತೆಕಾಯಿ, ಮೂಲಂಗಿ, ಕ್ಯಾರೆಟ್ ಹೆಚ್ಚು ತಿನ್ನಬೇಕು. ಅದರಲ್ಲೂ ಮೂಲಂಗಿಯನ್ನು ಪೈಲ್ಸ್ ಅಥವಾ ಮೂಲವ್ಯಾಧಿ ಇರುವವರು ತಿಂದರೆ ಗುಣಮುಖವಾಗಲು ಸಹಾಯವಾಗುತ್ತದೆ. ಗೋಧಿ, ರಾಗಿ, ಜೋಳದ ಹಿಟ್ಟನ್ನು ಹೊಂದಿರಿ ಮಾಡದೆ ಬಳಸಿದರೆ ಅದರಲ್ಲಿರುವ ನಾರಿನಂಶ ಹಾಗೇ ಇರುತ್ತದೆ. ಪಾಲಿಶ್ ಮಾಡದಿರುವ ಅಕ್ಕಿಯನ್ನು ಬಳಸುವುದು ಒಳ್ಳೆಯದು.

2. ಮಿತಿಯಾದ ಉಪ್ಪಿನ ಸೇವನೆ: ಅತಿಯಾಗಿ ಉಪ್ಪು ತಿನ್ನುವುದರಿಂದ ದೇಹದ ರಕ್ತಪರಿಚಲನೆಯಲ್ಲಿ ನೀರಿನಂಶ ಹೆಚ್ಚಾಗುತ್ತದೆ. ಇದರಿಂದ ಗುದದ್ವಾರದಲ್ಲಿ ರಕ್ತನಾಳಗಳು ಉಬ್ಬಿಕೊಂಡು ಮೂಲವ್ಯಾಧಿಗೆ ಕಾರಣವಾಗುತ್ತದೆ.

3. ಚಟ: ಅತಿಯಾದ ಕಾಫಿ ಸೇವನೆ, ಅತಿಯಾದ ಮಸಾಲೆ ಪದಾರ್ಥಗಳು, ಮದ್ಯ, ತಂಪು ಪಾನೀಯಗಳು, ಧೂಮಪಾನ, ತಂಬಾಕು ತಿನ್ನುವುದು ಇವುಗಳ ಚಟವನ್ನು ಬೆಳೆಸಿಕೊಂಡರೆ ಇದು ಮೂಲವ್ಯಾಧಿಯನ್ನು ಹೆಚ್ಚು ಮಾಡುವುದು.

4. ತೂಕ: ಕೂತಲ್ಲಿಯೇ ಕೂತು ಕೆಲಸ ಮಾಡುವುದರಿಂದ ದೇಹದ ತೂಕ ಹೆಚ್ಚಾಗುತ್ತದೆ. ದೇಹದ ತೂಕವನ್ನು ಕಡಿಮೆ ಮಾಡಲು ಮಿತಿಯಲ್ಲಿ ತಿನ್ನುವುದು ಮತ್ತು ನಿಯಮಿತವಾದ ವ್ಯಾಯಾಮ ಮಾಡಬೇಕು.

4. ಮಲಮೂತ್ರಗಳನ್ನು ತಡೆಯುವುದು : ಹೆಚ್ಚಿನವರಲ್ಲಿ ಈ ಅಭ್ಯಾಸ ಇರುತ್ತದೆ. ಆದರೆ ಮಲಮೂತ್ರಗಳನ್ನು ತಡೆಯುವುದು ಒಳ್ಳೆಯ ಅಭ್ಯಾಸವಲ್ಲ. ಈ ರೀತಿ ತಡೆದರೆ ಮೂಲವ್ಯಾಧಿ ಬರುತ್ತದೆ ಅಲ್ಲದೆ ಮೂತ್ರ ತಡೆಯುವುದರಿಂದ ಕಿಡ್ನಿ ಸ್ಟೋನ್ ಉಂಟಾಗುತ್ತದೆ. ಅದರಲ್ಲೂ ಅನೇಕ ಮಹಿಳೆಯರು ಬೆಳಗಿನ ಸಮಯ ಮಲವಿಸರ್ಜನೆ ಮಾಡಬೇಕೆನಿಸಿದಾಗ ಮಾಡದೇ ಮನೆಗೆಲಸದ ಮಧ್ಯೆ ತಡೆದು ನಂತರ ವಿಸರ್ಜಿಸಲು ಹೋಗುವ ಅಭ್ಯಾಸ ಇಟ್ಟುಕೊಂಡಿರುತ್ತಾರೆ. ಈ ರೀತಿ ಮಾಡಿದರೆ ಮೂಲವ್ಯಾಧಿ ಉಂಟಾಗುತ್ತದೆ.

5. ಗರ್ಭಿಣಿಯರಲ್ಲಿ ಮೂಲವ್ಯಾಧಿ: ಗರ್ಭ ಧರಿಸಿದಾಗ ಹೊಟ್ಟೆಯ ಮಾಂಸಖಂಡಗಳು ಹಿಗ್ಗುವುದರಿಂದ ರಕ್ತನಾಳಗಳ ಮೇಲೆ ಒತ್ತಡ ಬೀಳುತ್ತದೆ. ಈ ರೀತಿ ಉಂಟಾಗುತ್ತಿದ್ದರೆ ಮಲಬದ್ಧತೆ ಉಂಟಾಗುತ್ತದೆ. ಆಗ ಸೇವನೆ ಮಾಡುವ ಕಬ್ಬಿಣಾಂಶದ ಮಾತ್ರೆಗಳೂ ಮಲಬದ್ಧತೆ ಉಂಟಾಗಲು ಒಂದು ಕಾರಣವಾಗಿದೆ. ಆದ್ದರಿಂದ ಈ ಸಮಯದಲ್ಲಿ ಅಧಿಕ ನಾರಿನಂಶವಿರುವ ಆಹಾರ ಸೇವನೆ ಒಳ್ಳೆಯದು. ಪದೇ ಪದೇ ಗರ್ಭಾಪಾತವಾಗುತ್ತಿದ್ದರೆ ಈ ರೀತಿಯ ಸಮಸ್ಯೆ ಕಂಡು ಬರುವ ಸಾಧ್ಯತೆ ಹೆಚ್ಚು.

5. ಒತ್ತಡ: ಅತೀಯಾದ ಭಾರ ಹೊರುವುದು, ಮಾನಸಿಕ ಒತ್ತಡ ಇವುಗಳು ಕೂಡ ದೇಹದ ಆರೋಗ್ಯ ಹಾಳಾಗಲು ಒಂದು ಕಾರಣವಾಗಿದೆ. ವ್ಯಾಯಾಮ ಮತ್ತು ಅಥವಾ ಯೋಗಾಭ್ಯಾಸ ಒಳ್ಳೆಯದು. ಅದರಲ್ಲೂ ನಗುವಿನ ವ್ಯಾಯಾಮ ಒಳ್ಳೆಯದು. ಪೈಲ್ಸ್ ಬಂದು ಚಿಕಿತ್ಸೆ ಮಾಡುವುದಕ್ಕಿಂತ ಅದು ಬರದಂತೆ ಒಳ್ಳೆಯ ಆಹಾರಕ್ರಮ ಪಾಲಿಸುವುದು ಒಳ್ಳೆಯದು.

Disclaimer: ಈ ಲೇಖನದಲ್ಲಿ ಒದಗಿಸಲಾದ ಮಾಹಿತಿಯು ಸಾಮಾನ್ಯ ಮಾಹಿತಿ ಮತ್ತು ಶೈಕ್ಷಣಿಕ ಉದ್ದೇಶಗಳಿಗಾಗಿ ಮಾತ್ರವಾಗಿದೆ. ವೃತ್ತಿಪರ ವೈದ್ಯಕೀಯ ಸಲಹೆ, ರೋಗನಿರ್ಣಯ ಅಥವಾ ಚಿಕಿತ್ಸೆಗೆ ಪರ್ಯಾಯವಾಗಿ ಇದನ್ನು ದೃಢೀಕರಿಸಿಲ್ಲ. ವೈದ್ಯಕೀಯ ಸ್ಥಿತಿಯ ಕುರಿತು ನೀವು ಹೊಂದಿರುವ ಯಾವುದೇ ಪ್ರಶ್ನೆಗಳಿಗೆ ಯಾವಾಗಲೂ ನಿಮ್ಮ ವೈದ್ಯರು ಅಥವಾ ಅರ್ಹ ಆರೋಗ್ಯ ಸಿಬ್ಬಂದಿಯ ಸಲಹೆಯನ್ನು ಪಡೆಯಿರಿ.