ಆಫೀಸ್ ನಲ್ಲಿ ಆಲಸ್ಯ ಓಡಿಸುವುದು ಹೇಗೆ?

Wellness

oi-Sumalatha

By Sumalatha

Published: Thursday, September 22, 2011, 15:22 [IST]

ಬೆಳ್ಳಂ ಬೆಳಗ್ಗೆ ಎದ್ದು, ಕೆಲಸಕ್ಕೆ ಬಂದು ಕೂತಿದ್ದರೂ ತೂಕಡಿಕೆ ಕಣ್ಣನ್ನು ಇನ್ನೂ ಬಿಟ್ಟು ಹೋಗಿರುವುದಿಲ್ಲ. ಇತ್ತ ಕೆಲಸವೂ ಮಾಡಲಾಗದೆ, ತೂಕಡಿಕೆಯನ್ನೂ ನಿಯಂತ್ರಿಸಲಾಗದೆ ಒದ್ದಾಡುವ ಪರಿಸ್ಥಿತಿ ಬಂದಿರುತ್ತೆ. ಆದರೆ ಆಫೀಸ್ ನಲ್ಲಿ ತೂಕಡಿಸಿದರೆ ನಿಮ್ಮ ಸಾಮರ್ಥ್ಯದ ಬಗ್ಗೆ ಇನ್ನೊಬ್ಬರಲ್ಲಿ ಸಂಶಯ ಮೂಡಬಹುದು.

ಆದ್ದರಿಂದ ಆಫೀಸಿನಲ್ಲಿ ನಿರುತ್ಸಾಹದಿಂದ ಹೊರಬರುವ ಕೆಲವು ಸಲಹೆಯನ್ನು ಇಲ್ಲಿ ನೀಡಲಾಗಿದೆ. ಇದನ್ನು ಪಾಲಿಸಿ ಚಟುವಟಿಕೆಯಿಂದ ಕೆಲಸ ಮಾಡುವುದು ಸಾಧ್ಯವಿದೆ.

ಆಫೀಸ್ ಆಲಸ್ಯದಿಂದ ಹೊರಬರಲು ಹೀಗೆ ಮಾಡಿ:

* ಒಂದು ಕಪ್ ಕಾಫಿ ಅಥವಾ ಟೀ: ಒಂದು ಕಪ್ ಕಾಫಿ ಅಥವಾ ಟೀ ಸೇವನೆಯಿಂದ ನಿಮ್ಮ ನಿದ್ದೆ ಹೊರಟು ಹೋಗುವುದಲ್ಲದೆ ಕೆಲಸ ಮಾಡಲು ಚೈತನ್ಯವನ್ನೂ ನೀಡುತ್ತದೆ. ಒಂದು ಕಪ್ ಕಾಫಿ 7-8 ಗಂಟೆಗಳವರೆಗೆ ನಿದ್ದೆ ನಿಮ್ಮ ಬಳಿ ಸುಳಿಯದಂತೆ ಮಾಡುತ್ತದೆ. ಆದರೆ ಕಾಫಿಯನ್ನು ಹೆಚ್ಚಾಗಿಯೂ ಸೇವಿಸಬಾರದು. ಇದರಿಂದ ಅಡ್ಡಪರಿಣಾಮ ಉಂಟಾಗಬಹುದು. ಕೆಲಸದ ಮಧ್ಯೆ ಆಗಾಗ್ಗೆ ನೀರು ಕುಡಿಯುತ್ತಿರಬಹುದು.

* ಬ್ರೇಕ್ ಫಾಸ್ಟ್ ಮರೆಯಬೇಡಿ: ಬೆಳಗಿನ ತಿಂಡಿ ಹಸಿವನ್ನು ಹೋಗಲಾಡಿಸಲು ಮಾತ್ರವಲ್ಲ, ಕೆಲಸ ಮಾಡಲು ಅವಶ್ಯಕವಾದ ಶಕ್ತಿಯನ್ನು ನೀಡುತ್ತದೆ. ಇಡೀ ದಿನ ಚೈತನ್ಯದಿಂದಿರಲು ಬೆಳಗಿನ ತಿಂಡಿ ಅತ್ಯವಶ್ಯಕ. ಆದರೆ ಕೆಲಸಕ್ಕೆ ಹೋಗುವ ಮಂದಿ ಬೆಳಗಿನ ತಿಂಡಿಯನ್ನು ನಿರ್ಲಕ್ಷಿಸುತ್ತಾರೆ. ಇದು ಅನಾರೋಗ್ಯಕರ ಜೀವನ ಕ್ರಮ. ಇದರಿಂದ ಇನ್ನಷ್ಟು ಸೋಮಾರಿತನ ಮೈಗೂಡಬಹುದು. ಆದರೆ ಬೆಳಗಿನ ತಿಂಡಿ ಲಘುವಾಗಿರಬೇಕಲು. ಹೆಚ್ಚು ಆಹಾರ ಸೇವಿಸಿದರೆ ಜೀರ್ಣಕ್ರಿಯೆಗೆ ಹೆಚ್ಚು ಶಕ್ತಿ ಉಪಯೋಗಗೊಂಡು ನಿಮ್ಮನ್ನು ಇಡೀ ದಿನ ಸೋಮಾರಿಗಳನ್ನಾಗಿ ಮಾಡಬಹುದು.

* ಬ್ರೇಕ್ ತೆಗೆದುಕೊಳ್ಳಿ: ಆಫೀಸ್ ನಲ್ಲಿ ನಿದ್ದೆ ಅಥವಾ ಜೋಂಪು ಹಿಡಿದಂತಾದರೆ ಆಗಾಗೆ ಕೆಲವು ನಿಮಿಷ ವಿರಾಮ ತೆಗೆದುಕೊಳ್ಳಿ. ಹಾಗೆಯೇ ಕುಳಿತುಕೊಂಡು ಕೆಲವು ಲಘು ವ್ಯಾಯಾಮ ಮಾಡಿ , ಆಗಾಗ್ಗೆ ನೀರನ್ನು ಕುಡಿಯುತ್ತಿರಿ. ಇದು ಕೆಲಸದಲ್ಲಿ ಏಕಾಗ್ರತೆ ಹೆಚ್ಚಿಸಲೂ ಸಹಾಯ ಮಾಡುತ್ತದೆ. ನಿಮ್ಮ ನಿದ್ದೆ ಮೂಡ್ ನಿಂದ ಹೊರಬರಲು ಪ್ರೀತಿ ಪಾತ್ರರೊಂದಿಗೆ ಕೆಲವು ಸಮಯ ಮಾತನಾಡಿದರೂ ಸರಿ.

* ರಾತ್ರಿ ಬೇಗ ನಿದ್ದೆ ಮಾಡಿ: ರಾತ್ರಿ ಹೊತ್ತು ಬೇಗ ನಿದ್ದೆ ಮಾಡಿದರೆ ಬೆಳಗ್ಗೆ ಆರಾಮವಾಗಿ ಎದ್ದು, ಯಾವುದೇ ಅಡ್ಡಿ ಆತಂಕವಿಲ್ಲದೆ ಕೆಲಸಕ್ಕೆ ಹೋಗಬಹುದು. ಮತ್ತು ಅವಶ್ಯಕ ನಿದ್ದೆ ಇರುವುದರಿಂದ ಆಫೀಸ್ ನಲ್ಲಿ ತೂಕಡಿಕೆ ಬರುವುದೂ ಕಡಿಮೆಯಾಗುತ್ತದೆ. ನಿದ್ದೆ ,ಮಾಡುವ 2-3 ಗಂಟೆಗೆ ಮುನ್ನ ಊಟ ಮಾಡಿರಬೇಕು. ಅನವಶ್ಯಕ ಕೆಲಸಗಳಲ್ಲಿ ಕಾಲ ಕಳೆಯುವುದಕ್ಕಿಂತ ಬೇಗನೆ ನಿದ್ದೆ ಮಾಡಿದರೆ ಕಣ್ಣಿಗೂ ವಿಶ್ರಾಂತಿ ನೀಡಿದಂತಾಗುತ್ತದೆ.

* ಬಿಳಿ ಬಣ್ಣದ ಆಹಾರ ತ್ಯಜಿಸಿ: ರಾತ್ರಿ ಸಮಯ ಬಿಳಿ ಬಣ್ಣದ ಆಹಾರಗಳನ್ನು, ಉದಾಹರಣೆಗೆ ಪಾಸ್ತಾ, ಅನ್ನ ಮುಂತಾದುವನ್ನು ಸೇವಿಸಿದರೆ ರಕ್ತದಲ್ಲಿನ ಸಕ್ಕರೆ ಅಂಶ ಹೆಚ್ಚಾಗುತ್ತದೆ. ಇದು ಬೆಳಗ್ಗೆ ಹೊತ್ತು ಹೆಚ್ಚು ಸೋಮಾರಿಯಾಗುವಂತೆ ಪ್ರಚೋದನೆ ನೀಡುತ್ತದೆ. ಆದ್ದರಿಂದ ರಾತ್ರಿ ಹೊತ್ತು ಬಿಳಿಯ ಬಣ್ಣದ ಈ ಆಹಾರ ಪದಾರ್ಥಗಳಿಂದ ದೂರವಿರುವುದು ಒಳಿತು.

ಇವಿಷ್ಟು ಸಲಹೆಗಳನ್ನು ಪಾಲಿಸಿದರೆ ಖಂಡಿತ ಆಫೀಸ್ ನಲ್ಲಿ ಆಲಸ್ಯದಿಂದ ಕಾಲ ಕಳೆಯುವುದನ್ನು ಮರೆತು ಚಟುವಟಿಕೆಯಿಂದ ಇರುವುದು ಸಾಧ್ಯವಿದೆ ಮತ್ತು ಈ ಮೂಲಕ ವೃತ್ತಿ ಜೀವನದಲ್ಲಿ ಮುನ್ನಡೆ ಸಾಧಿಸಲು ಸಹಕಾರಿಯಾಗುತ್ತದೆ.

Disclaimer: ಈ ಲೇಖನದಲ್ಲಿ ಒದಗಿಸಲಾದ ಮಾಹಿತಿಯು ಸಾಮಾನ್ಯ ಮಾಹಿತಿ ಮತ್ತು ಶೈಕ್ಷಣಿಕ ಉದ್ದೇಶಗಳಿಗಾಗಿ ಮಾತ್ರವಾಗಿದೆ. ವೃತ್ತಿಪರ ವೈದ್ಯಕೀಯ ಸಲಹೆ, ರೋಗನಿರ್ಣಯ ಅಥವಾ ಚಿಕಿತ್ಸೆಗೆ ಪರ್ಯಾಯವಾಗಿ ಇದನ್ನು ದೃಢೀಕರಿಸಿಲ್ಲ. ವೈದ್ಯಕೀಯ ಸ್ಥಿತಿಯ ಕುರಿತು ನೀವು ಹೊಂದಿರುವ ಯಾವುದೇ ಪ್ರಶ್ನೆಗಳಿಗೆ ಯಾವಾಗಲೂ ನಿಮ್ಮ ವೈದ್ಯರು ಅಥವಾ ಅರ್ಹ ಆರೋಗ್ಯ ಸಿಬ್ಬಂದಿಯ ಸಲಹೆಯನ್ನು ಪಡೆಯಿರಿ.