ವಿಶ್ವ ಹೃದಯದ ದಿನದಂದು, ಹೃದಯದ ಆರೋಗ್ಯಕ್ಕಾಗಿ ಸಲಹೆಗಳು

1.ಹೃದಯ ಪಕ್ಕಕ್ಕಿಟ್ಟು ಮಿದುಳಿಗೆ ಕೆಲಸ ಕೊಡಿ

ಎಣ್ಣೆ, ಕೊಲೆಸ್ಟ್ರಾಲು, ಬೊಜ್ಜು, ಸಿಗರೇಟು, ಜಂಕ್ ಫುಡ್ಡು, ಡಯಾಬಿಟಿಸ್ಸು, ಹೈಬಿಪಿ, ಅನಾರೋಗ್ಯಕರ ಜೀವನಶೈಲಿಯಿಂದ ಮುಷ್ಟಿಯಷ್ಟಿರುವ ಹೃದಯ ಹದಗೆಡುವುದು ಒತ್ತಟ್ಟಿಗಿರಲಿ, ಮೊದಲು ನಿಮ್ಮ ಹೃದಯ ಹೆಣ್ಣಿಗೆ ಅಥವಾ ಗಂಡಿಗೆ ನೀಡುವ ಮುನ್ನ ಇನ್ನೊಮ್ಮೆ ಯೋಚಿಸಿ. ಲವ್ವಲ್ಲಿ ಬಿದ್ದು, ಬಿದ್ದ ಮರುಕ್ಷಣವೇ ಕಳೆದುಕೊಂಡು ಒದ್ದಾಡುವ ಸಂಗತಿಯಿದೆಯಲ್ಲ ಅದು ಲವ್ ಬರ್ಡ್‌ಗಳಿಗೆ ತಿಳಿಯುವುದೇ ಇಲ್ಲ. ಲವ್ ಬಗ್ಗೆ ಮತ್ತೆ ಮಾತನಾಡೋಣ. ಈಗ ಹೃದಯದ ರಕ್ತ ಸರಬರಾಜು ಮಾಡುವ ಕೆಲಸಕ್ಕೆ ಅಡಚಣೆ ಬರದಿರಲು ಏನು ಮಾಡಬೇಕೆಂದು ನೋಡೋಣ. ಏನಂತೀರಿ?

1.ಕಡಿಮೆ ಪ್ರಮಾಣದ ಉಪ್ಪು:

ಅಧಿಕ ಉಪ್ಪು ತಿಂದರೆ ರಕ್ತದೊತ್ತಡ ಹೆಚ್ಚಾಗುತ್ತದೆ ಇದರಿಂದ ಹೃದಯ ಸಂಬಂಧಿ ಕಾಯಿಲೆಗಳು ಬರುತ್ತದೆ.

2. ಧೂಮಪಾನ ನಿಷೇಧಿಸಿ

15-20 ವರ್ಷ ಧೂಮಪಾನ ಮಾಡಿದರೆ ಹೃದಯಾಘಾತ, ಹೃದಯದಲ್ಲಿ ತೂತು, ಉಸಿರಾಟದ ತೊಂದರೆ, ಬಿಡದ ಕೆಮ್ಮು ಮುಂತಾದ ಸಮಸ್ಯೆಗಳು ಕಾಣಿಸಿಕೊಂಡು ಜೀವನವೇ ನರಕವಾಗಿ ಬಿಡುತ್ತದೆ. ಆದ್ದರಿಂದ ಸಾಧ್ಯವಾದಷ್ಟು ಬೇಗ ಧೂಮಪಾನ ಚಟದಿಂದ ಹೊರಬನ್ನಿ.

3. ಒತ್ತಡ ಕಡಿಮೆ ಮಾಡುವುದು

ವ್ಯಾಯಾಮ, ಯೋಗ, ಸಂಗೀತ ಕೇಳುವುದು ಇವುಗಳಿಂದ ಒತ್ತಡವನ್ನು ಕಡಿಮೆ ಮಾಡಿಕೊಳ್ಳಬೇಕು.

4. ಸಂತೋಷ:

ಜೀವನದಲ್ಲಿ ಪ್ರತಿಯೊಂದು ಕ್ಷಣವನ್ನು ಸಂತೋಷದಿಂದ ಕಳೆಯಬೇಕು. ಅಂದರೆ ಚಿಕ್ಕ ಪುಟ್ಟ ವಿಷಯಗಳಿಗೆ ಚಿಂತೆ ಮಾಡದೆ ಜೀವನವನ್ನು ನಡೆಸಬೇಕು. ರಕ್ತದೊತ್ತಡವನ್ನು ಆಗಾಗ ಪರೀಕ್ಷಿಸುತ್ತಿರಬೇಕು. ಕಾಯಿಲೆಯ ಲಕ್ಷಣ ಕಂಡು ಬಂದ ಕೂಡಲೇ ವೈದ್ಯರನ್ನು ಸಂಪರ್ಕಿಸಿದರೆ ಅನಾರೋಗ್ಯ ಸಮಸ್ಯೆ ನಿವಾರಣೆಯಾಗುತ್ತದೆ.

5. ಮೀನು:

ಮೀನಿನಲ್ಲಿರುವ ಒಮೆಗಾ 3 ಆಸಿಡ್ ಹೃದಯಕ್ಕೆ ತುಂಬಾ ಅವಶ್ಯಕ. ರಕ್ತನಾಳದಲ್ಲಿರುವ ಟ್ರಗ್ಲಿಸೆರಾಯಿಡ್ಸ್ ಎಂಬ ಕೊಬ್ಬನ್ನು ಕರಗಿಸಲು ಇದು ಸಹಕಾರಿ. ಮೀನನ್ನು ತಿನ್ನುವುದರಿಂದ ಎದೆ ಉರಿ ಮತ್ತು ಹೃದಯದಲ್ಲಿ ರಕ್ತ ಹೆಪ್ಪುಗಟ್ಟುವುದನ್ನು ತಡೆಯಬಹುದು. ಸಾಲ್ಮನ್, ಶ್ರಂಪ್, ಟ್ಯೂನ, ಟ್ರಾಟ್, ಹೆರ್ರಿಂಗ್ಮ ಮ್ಯಾಜೆರಲ್, ಸಾರ್ಡೈನ್ಸ್ ಮುಂತಾದ ಜಾತಿಯ ಮೀನುಗಳ ಸೇವನೆ ಹೃದಯಕ್ಕೆ ಉತ್ತಮ. ಎಣ್ಣೆಯಲ್ಲಿ ಕರಿದ ಮೀನುಗಳನ್ನು ಹೆಚ್ಚು ತಿನ್ನಬಾರದು.

6. ಕೆಂಪು ವೈನ್:

ದಿನಕ್ಕೆ 5-8 ಔನ್ಸ್ ಕೆಂಪು ವೈನ್ ಸೇವನೆಯಿಂದ ಹೃದಯದ ಖಾಯಿಲೆಯನ್ನು ತಡೆಯಬಹುದು. ಕೆಂಪು ವೈನನ್ನು ದ್ರಾಕ್ಷಿಯಿಂದ ತಯಾರಿಸುವುದರಿಂದ ಅದರಲ್ಲಿರುವ HDL ಎಂಬ ಅಂಶ ಹೃದಯಕ್ಕೆ ಉಪಯೋಗ. ಇದು ರಕ್ತನಾಳ ಸರಾಗ ಮಾಡುವುದರಿಂದ ಹೃದಯಾಘಾತದ ಸಾಧ್ಯತೆ ಕಡಿಮೆಯಾಗುತ್ತೆ. ವೈನ್ ಕುಡಿಯುವುದು ಬೇಡವೆಂದರೆ ಕಪ್ಪು ದ್ರಾಕ್ಷಿಯ ಜ್ಯೂಸನ್ನು ಕುಡಿಯಬಹುದು.

7. ಟೊಮೊಟೊ ಮತ್ತು ತರಕಾರಿ:

ಹಸಿರು ತರಕಾರಿಗಳಲ್ಲಿ ಹೃದಯಕ್ಕೆ ಉಪಯೋಗವಾಗುವ ಫೊಲೇಟ್ ಅಂಶವಿದೆ. ಪಾಲಾಕ್, ಹೂಕೋಸು, ಈರುಳ್ಳಿ ಎಲೆ ಮುಂತಾದವು ಆಹಾರದಲ್ಲಿರಲಿ. ಟೊಮೆಟೊದಲ್ಲಿ ಕೂಡ ಲೈಕೊಪೀನ್ ಎಂಬ ಅಂಶವಿದ್ದು, ಇದೂ ಕೂಡ ಹೃದಯಾಘಾತದ ಸಾಧ್ಯತೆ ಕಡಿಮೆಗೊಳಿಸುತ್ತೆ.

8. ಹೆಚ್ಚು ಫೈಬರ್ ಇರಲಿ:

ಎಲ್ಲಾ ದವಸ ಧಾನ್ಯಗಳಲ್ಲಿಯೂ ಹೆಚ್ಚಿನ ನಾರಿನಂಶವಿದ್ದು, ಕಡಿಮೆ ಕೊಬ್ಬಿನಂಶವಿರುತ್ತದೆ. ಧಾನ್ಯಗಳಲ್ಲಿರುವ ಮಿನರಲ್, ಪ್ರೊಟೀನ್ ಮತ್ತು ವಿಟಮಿನ್ ಗಳು ಹೃದಯವನ್ನು ಆರೋಗ್ಯವಾಗಿಡುತ್ತದೆ. ಓಟ್, ಬಾರ್ಲೆ, ಕೆಂಪಕ್ಕಿ, ಗೋಧಿ ಮತ್ತು ಕಾಳುಗಳಾದ ಬಟಾಣಿ, ಬೀನ್ಸ್ ನ ಸೇವನೆ ಇದ್ದರೆ ಉತ್ತಮ.

9. ಕೋಕೋ ಅಥವಾ ಚಾಕಲೇಟ್:

ಕೋಕೋ ಅಥವಾ ಡಾರ್ಕ್ ಚಾಕಲೇಟ್ ಹೃದಯದ ಆರೋಗ್ಯಕ್ಕೆ ಒಳ್ಳೆಯದು. ಇದರಲ್ಲಿನ ಫ್ಲೇವನಾಲ್ ಅಂಶ ರಕ್ತನಾಳವನ್ನು ಸರಾಗಗೊಳಿಸುತ್ತದೆ. ಇದು ಎದೆ ಉರಿಯನ್ನೂ ತಗ್ಗಿಸುತ್ತದೆ.