ಸ್ಫೋಟಕ ಹೊಡೆತಗಳ ಹೀರೋ ವಿರಾಟ್ ಕೊಹ್ಲಿಯ ಆರೋಗ್ಯದ ಗುಟ್ಟೇನು?

ಧೂಮಪಾನ, ಮದ್ಯಪಾನದಿಂದ ದೂರವಿರುವ ಗುಣ

ಸಾಧಾರಣವಾಗಿ ಕ್ರೀಡಾಪಟುಗಳು ತಮ್ಮ ವಿಜಯೋತ್ಸವವನ್ನು ಮದ್ಯ(ಶಾಂಪೇನ್) ಸಿಡಿಸಿ, ಕುಡಿಯುವ ಮೂಲಕ ಆಚರಿಸುತ್ತಾರೆ. ಆದರೆ ಇದಕ್ಕೆ ವಿರುದ್ಧವಾಗಿ ವಿರಾಟ್ ಎಂದೂ ಮದ್ಯಪಾನ, ಧೂಮಪಾನಕ್ಕೆ ತಮ್ಮನ್ನು ಒಡ್ಡಿಕೊಳ್ಳದೇ ಮಡಿವಂತ ಎಂಬ ಅನ್ವರ್ಥನಾಮವನ್ನು ತಮ್ಮ ಸಹ ಕ್ರೀಡಾಪಟುಗಳಿಂದ ಪಡೆದುಕೊಂಡಿದ್ದಾರೆ. ಆದರೆ ಈ ವ್ಯಸನಗಳಿಂದ ದೂರವಿರುವುದು ಅವರ ಆರೋಗ್ಯ ಮತ್ತು ಮೈಕಟ್ಟಿನ ಪ್ರಥಮ ಮತ್ತು ಪ್ರಮುಖ ರಹಸ್ಯವಾಗಿದೆ.

ತಮ್ಮ ಆಹಾರದ ಬಗ್ಗೆ ವಹಿಸುವ ಕಾಳಜಿ

ದೆಹಲಿಯ ಜನರು ಸಾಮಾನ್ಯವಾಗಿ ಭೋಜನಾಪ್ರಿಯರು. ಅವರ ಊಟದ ಪ್ರಮಾಣ ಹಾಗು ಪೌಷ್ಟಿಕತೆ ಉಳಿದ ರಾಜ್ಯಗಳಿಗೆ ಹೋಲಿಸಿದರೆ ಹೆಚ್ಚು. ಸಕಾರಣವಾಗಿ ಈ ಜನರು ಉತ್ತಮ ದೇಹದಾರ್ಢ್ಯತೆ ಹೊಂದಿರುತ್ತಾರೆ. ವಿರಾಟ್ ಸಹಾ ಇದೇ ರಾಜ್ಯಕ್ಕೆ ಸೇರಿದ್ದರೂ ಈ ಪೂರ್ವಾಗ್ರಹಕ್ಕೆ ಒಳಗಾಗದೇ ತಮ್ಮ ಆಹಾರದ ಪ್ರಮಾಣ ಮತ್ತು ಪೌಷ್ಟಿಕತೆಯನ್ನು ಅಳೆದು ತಮ್ಮ ದೇಹಕ್ಕೆ ಅಗತ್ಯವಿದ್ದುದಷ್ಟನ್ನು ಮಾತ್ರ ಸೇವಿಸುತ್ತಾರೆ. ಅವರಿಗೆ ಬಟರ್ ಚಿಕನ್ ಮತ್ತು ನಾನ್ ರೊಟ್ಟಿಗಳು ಅತಿ ಇಷ್ಟವಾದರೂ ತಮ್ಮ ತೂಕ ಹೆಚ್ಚದಷ್ಟೇ ಪ್ರಮಾಣವನ್ನು ಮಾತ್ರ ಸೇವಿಸುವುದು ಇನ್ನೊಂದು ರಹಸ್ಯವಾಗಿದೆ.

ಅನಾರೋಗ್ಯಕರ ಆಹಾರ (junk food)ಕ್ಕೆ ನೇರವಾಗಿ ಬೇಡ ಎಂದು ಹೇಳುವುದು

ಕ್ರೀಡೆಯ ನಿಮಿತ್ತ ವಿಶ್ವಪರ್ಯಟನೆಯ ಕಾಲದಲ್ಲಿ ವಿವಿಧ ದೇಶಗಳ ಅಥವಾ ನಮ್ಮ ದೇಶದ ವಿವಿಧ ನಗರಗಳಿಗೆ ಭೇಟಿ ನೀಡುವಾಗ ಅನಿವಾರ್ಯವಾಗಿ ತಿನ್ನಬೇಕಾದ ಅನಾರೋಗ್ಯಕರ ಆಹಾರವನ್ನು ಅವರು ಸ್ಪಷ್ಟವಾಗಿ ನಿರಾಕರಿಸುತ್ತಾರೆ. ಎಷ್ಟೇ ಆಕರ್ಷಕವಾಗಿದ್ದರೂ, ಜೊತೆಯವರು ಒತ್ತಡ ನೀಡಿದರೂ ಇಂತಹ ಆಹಾರಗಳಿಗೆ ಅವರು ತಮ್ಮ ಒಲವು ತೋರುವುದಿಲ್ಲ. ಕೆಲವೊಮ್ಮೆ ಬೇರೇನೂ ತಿನ್ನಲು ಸಿಗದೇ ಅನಿವಾರ್ಯವಾಗಿ ಇಂತಹ ಆಹಾರವನ್ನು ತಿನ್ನದೇ ನಿರ್ವಾಹವಿಲ್ಲದಾಗ ಮಾತ್ರ ಸೇವಿಸಿದರೂ ಮರುದಿನ ತಮ್ಮ ವ್ಯಾಯಾಮದಲ್ಲಿ ಹೆಚ್ಚಿನ ಶ್ರಮವಹಿಸಿ ಈ ಕಳಪೆ ಆಹಾರದ ಪ್ರಭಾವವನ್ನು ಕಡಿಮೆಗೊಳಿಸುತ್ತೇನೆ ಎಂದು ಅವರು ಇತ್ತೀಚೆಗೆ ಫೋರ್ಬ್ಸ್ ಇಂಡಿಯಾ ಪತ್ರಿಕೆಗೆ ನೀಡಿದ ಸಂದರ್ಶನದಲ್ಲಿ ಹೇಳಿಕೊಂಡಿದ್ದಾರೆ.

ರಾತ್ರಿಯೂಟ ಕಡಿಮೆ ಪ್ರಮಾಣದಲ್ಲಿ ಮಾಡುವುದು

ತಾನು ಕಡಿಮೆ ಪ್ರಮಾಣದಲ್ಲಿ ರಾತ್ರಿಯೂಟವನ್ನು ಮಾಡುತ್ತೇನೆ, ಪಂದ್ಯಗಳಿದ್ದಾಗ ಪ್ರೋಟೀನ್ ಪ್ರಮಾಣ ಹೆಚ್ಚಿರುವ ದ್ರವಾಹಾರ ಮತ್ತು ಕಾರ್ಬೋಹೈಡ್ರೇಟುಗಳು ಹೆಚ್ಚಿರುವ ಆಹಾರವನ್ನು ಸೇವಿಸುತ್ತೇನೆ. ಅನಾರೋಗ್ಯಕರ ಆಹಾರಕ್ಕೆ ಬೇಡ ಎಂದು ಸ್ಪಷ್ಟವಾಗಿ ಹೇಳುತ್ತೇನೆ. ಆದರೆ ಕೊಚ್ಚಿನ್ ನಂತಹ ಊರುಗಳಲ್ಲಿ ಸಿಗುವ ಆಹಾರ ಅತ್ಯಂತ ರುಚಿಕರವಾಗಿರುವುದರಿಂದ ಆಗ ಮಾತ್ರ ನನ್ನ ನಿಲುವನ್ನು ಕೊಂಚ ಸಡಲಿಸಿ ಸ್ವಲ್ಪ ಹೆಚ್ಚಿನ ಪ್ರಮಾಣದಲ್ಲಿ ಸೇವಿಸುತ್ತೇನೆ ಎಂದು ಇತ್ತೀಚೆಗೆ ಫೋರ್ಬ್ಸ್ ಇಂಡಿಯಾ ಪತ್ರಿಕೆಗೆ ನೀಡಿದ ಸಂದರ್ಶನದಲ್ಲಿ ಹೇಳಿಕೊಂಡಿದ್ದಾರೆ.

ತಾವು ಕುಡಿಯುವ ನೀರಿನ ಬಗ್ಗೆ ವಹಿಸುವ ಕಾಳಜಿ

ಎಷ್ಟೇ ಕಷ್ಟವಾದರೂ ತಮ್ಮ ಆಯ್ಕೆಯ ನೀರನ್ನೇ ಕುಡಿಯುವುದು ಅವರ ವೈಶಿಷ್ಟ್ಯವಾಗಿದೆ. ಅವರು ಯಾವುದೇ ಊರಿಗೆ ಹೋದರೂ ತಮ್ಮ ನೆಚ್ಚಿನ 'ಈವಿಯಾನ್ ಮಿನೆರಲ್ ವಾಟರ್' ಬಾಟಲಿ ನೀರನ್ನೇ ಅವರು ಆಯ್ದುಕೊಳ್ಳುತ್ತಾರೆ. ಅದೆಷ್ಟೇ ದುಬಾರಿಯಾದರೂ ಬೇರೆ ನೀರನ್ನು ಅವರು ಕುಡಿಯುವುದಿಲ್ಲ. ಇತ್ತೀಚೆಗೆ ಬಾಂಗ್ಲಾದೇಶಕ್ಕೆ ಹೋದಾಗ ಅಲ್ಲಿ ಅಲಭ್ಯವಿದ್ದ ಈ ನೀರನ್ನು ಫ್ರಾನ್ಸ್ ನಿಂದ ತರಿಸಬೇಕಾಗಿ ಬಂದಿತ್ತು. ಒಂದೂವರೆ ಲೀಟರ್ ನೀರಿನ ಬೆಲೆ ರೂ.389 ರಷ್ಟು ದುಬಾರಿಯಾದರೂ ಅವರು ಬೇರೆ ನೀರನ್ನು ಕುಡಿಯದಿರುವುದು ಅವರು ತಮ್ಮ ಆರೋಗ್ಯದ ಬಗ್ಗೆ ವಹಿಸುವ ಕಾಳಜಿಗೆ ಸಾಕ್ಷಿಯಾಗಿದೆ.