ರೇಷ್ಮೆಯಂಥ ತ್ವಚೆ ಬೇಕೆಂದರೆ ಮೊಸರು ಬಳಸಿ

ಮೊಸರು ಚರ್ಮದ ಪಿಎಚ್ ಮಟ್ಟವನ್ನೂ ಸರಿದೂಗಿಸಿಕೊಂಡು ಹೋಗಲು ಸಹಕಾರಿ. ಮೊಸರಿನ ನಿರಂತರ ಬಳಕೆಯಿಂದ ಸೌಂದರ್ಯಕ್ಕೆ ಅವಶ್ಯಕವಾದ ಅನೇಕ ಪ್ರಯೋಜನ ಪಡೆಯಬಹುದು. ಸೌಂದರ್ಯ ವೃದ್ಧಿಗೆ ಮೊಸರನ್ನು ಹೇಗೆ ಬಳಸುವುದು ಎಂದು ಇಲ್ಲಿ ತಿಳಿಯಿರಿ.

ತ್ವಚೆಗೆ ಮೊಸರನ್ನು ಯಾವ ರೀತಿ ಬಳಸಬಹುದು?

* ಮೊಸರಿನ ಬಾಡಿ ಸ್ಕ್ರಬ್: ಒಂದು ಕಪ್ ಮೊಸರಿಗೆ 1 ಚಮಚ ಸಕ್ಕರೆ, ಅರಿಶಿಣ, ಲೋಳೆಸರ ಬೆರೆಸಿ ಹಚ್ಚಿಕೊಳ್ಳಬೇಕು. ಅರಿಶಿಣ ತ್ವಚೆಯಲ್ಲಿನ ಕೊಳೆಯನ್ನು ಹೋಗಲಾಡಿಸಿದರೆ ಸಕ್ಕರೆ ಸ್ಕ್ರಬ್ ನಂತೆ ನಿರ್ಜೀವ ಕಣವನ್ನು ಹೋಗಿಸುತ್ತದೆ ಮತ್ತು ಲೋಳೆ ಸರ ಚರ್ಮವನ್ನು ಮೃದುಗೊಳಿಸುತ್ತೆ. ಓಟ್ ಮೀಲನ್ನು ಮೊಸರಿನೊಂದಿಗೆ ಬೆರೆಸಿ ಹಚ್ಚಿಕೊಂಡರೆ ಉತ್ತಮ ಫಲಿತಾಂಶ ಹೊಂದಬಹುದು.

* ಮೊಸರಿನ ಪ್ಯಾಕ್: ಸ್ವಲ್ಪ ಮುಲ್ತಾನಿ ಮಿಟ್ಟಿಗೆ ಮೊಸರು ಮತ್ತು ರೋಸ್ ವಾಟರ್ ಬೆರೆಸಿ ಪೇಸ್ಟ್ ನಂತೆ ಮಾಡಿಕೊಂಡು ಹಚ್ಚಿಕೊಳ್ಳುವುದರಿಂದ ಚರ್ಮ ತಿಳಿಗೊಂಡು ಟ್ಯಾನ್ ಕೂಡ ಪರಿಣಾಮಕಾರಿಯಾಗಿ ಹೋಗಿಸುತ್ತದೆ. ಇದನ್ನು ಮೊಣ ಕಾಲು, ಮಂಡಿ, ಮೊಣಕೈ ಮತ್ತು ಹೊಟ್ಟೆ ಮೇಲೆ ಹಚ್ಚಿಕೊಂಡರೆ ಸೂರ್ಯನ ಕಿರಣಗಳಿಂದಾದ ಕಪ್ಪನ್ನು ಬೇಗನೆ ನಿವಾರಿಸಿಕೊಳ್ಳಬಹುದು.

* ಮೊಸರಿನ ಲೋಶನ್: ಒಂದು ಚಮಚ ಬಾದಾಮಿ ಎಣ್ಣೆಯೊಂದಿಗೆ ಮೊಸರನ್ನು ಬೆರೆಸಿ ಸ್ನಾನಕ್ಕೆ ಮುನ್ನ ಹಚ್ಚಿಕೊಂಡು ಸ್ನಾನ ಮಾಡಿದರೆ ಚರ್ಮ ಆರೋಗ್ಯಕರ ಮತ್ತು ತಾಜಾ ಆಗಿರುತ್ತದೆ. ಈ ರೀತಿ ಮಾಡುವುದರಿಂದ ಚರ್ಮ ಒಣಗುವಿಕೆಯನ್ನು ತಡೆದು ರೇಷ್ಮೆ ಮತ್ತು ಹೊಳೆಯುವ ಚರ್ಮವನ್ನು ನೀಡುತ್ತದೆ.

* ಮೊಸರಿನ ಫೇಸ್ ಮಾಸ್ಕ್: ಕ್ಯಾರೆಟ್ ರಸ, ಕೇಸರಿ, ಜೇನು ಮತ್ತು ಮೊಸರನ್ನು ಬೆರೆಸಿ ಸ್ನಾನಕ್ಕೆ ಮುನ್ನ ಹಚ್ಚಿಕೊಂಡು ಅದು ಒಣಗಿದ ನಂತರ ಸ್ನಾನ ಮಾಡಿದರೆ ಚರ್ಮದಲ್ಲಿ ಆದ ಭಾರೀ ಬದಲಾವಣೆ ನಿಮಗೇ ಗೋಚರಿಸುತ್ತೆ.

* ಶೇವ್ ಆದ ನಂತರದ ಕ್ರೀಂ: ಸೌತೆಕಾಯಿ ರಸದೊಂದಿಗೆ ಮೊಸರು ಸೇರಿಸಿ ಶೇವ್ ಆದ ನಂತರ ಹಚ್ಚಿಕೊಂಡರೆ ಉರಿಯೂ ಇರುವುದಿಲ್ಲ, ಕಪ್ಪೂ ಆಗುವುದಿಲ್ಲ ಮತ್ತು ತ್ವಚೆ ತಾಜಾ ಆಗಿರುತ್ತೆ.