ಕೂದಲಿನ ವಿನ್ಯಾಸಕ್ಕೆ ಚಿನ್ನದ ಆಭರಣ

Make Up

oi-Reena

By Hema S

Published: Tuesday, December 6, 2011, 18:04 [IST]

ಹಿಂದಿನ ಕಾಲದಲ್ಲಿ ಕೂದಲಿನ ಅಲಂಕಾರಕ್ಕೆ ಚಿನ್ನದ ಹೂವಿನ ಪಿನ್ನು, ಕೂದಲಿನ ತುದಿಗೆ ಕುಚ್ಚು, ನೆತ್ತಿ ಸರ ಬಳಸುತ್ತಿದ್ದರು. ಆದರೆ ಕಾಲ ಬದಲಾದಂತೆ ಆ ತರಹದ ಕೂದಲಿನ ವಿನ್ಯಾಸ ಮಾಯವಾಗಿ ಬ್ಯೂಟಿ ಪಾರ್ಲರ್ ಗೆ ಹೋಗಿ ಮಾಡಿಸಿದ ಸ್ಟ್ರೈಟ್ ಹೇರ್ ಫ್ಯಾಷನ್ ಆಗಿ ಬಿಟ್ಟಿದೆ.

ಆದರೆ 'ಓಲ್ಡ್ ಈಸ್ ಗೋಲ್ಡ್ 'ಅನ್ನುವಂತೆ ಹಳೆಯ ರೀತಿಯ ಕೂದಲಿನ ವಿನ್ಯಾಸಗಳು ಪುನಃ ಫ್ಯಾಷನ್ ಆಗುತ್ತಿವೆ. ಅದರಲ್ಲೂ ಮದುಮಗಳಿಗೆ ಚಿನ್ನದಿಂದ ತಯಾರಿಸಿದ ಕ್ಲಿಪ್ ಮತ್ತು ಕೆಲವು ಆಭರಣಗಳನ್ನು ಬಳಸಿ ಕೂದಲಿನ ವಿನ್ಯಾಸ ಮಾಡಲಾಗುವುದು. ಅದೇ ರೀತಿ ಕೂದಲಿನ ವಿನ್ಯಾಸಕ್ಕೆ ಬಳಸುವ ಇನ್ನಿತರ ವಸ್ತುಗಳಾವುವು ಎಂದು ಇಲ್ಲಿ ತಿಳಿದುಕೊಳ್ಳಿ.

1. ಅಲಂಕಾರಿಕ ಬಾಚಣಿಗೆ: ಇದು ಕೂದಲನ್ನು ಬಾಚಲು ಇರುವ ಬಾಚಣಿಗೆ ಅಲ್ಲ, ಕೂದಲನ್ನು ತುರುಬು ಕಟ್ಟಿ ಅಲಂಕಾರವಾಗಿ ವಜ್ರ ಅಥವಾ ಚಿನ್ನದಿಂದ ತಯಾರಿಸಿದ ಬಾಚಣಿಗೆಯನ್ನು ಕೂದಲಿಗೆ ಸಿಕ್ಕಿಸಲಾಗುವುದು, ಈ ರೀತಿಯ ಕೇಶ ವಿನ್ಯಾಸ ಆಡಂಬರದ ಮದುವೆಗಳಿಗೆ ಚೆನ್ನಾಗಿ ಒಪ್ಪುತ್ತೆ.

2. ಚಿನ್ನದ ಬಲೆ: ಚಿನ್ನವನ್ನು ಚಿಕ್ಕ ಬಲೆಯ ರೀತಿಯಲ್ಲಿ ವಿನ್ಯಾಸಗೊಳಿಸಿರುತ್ತಾರೆ, ಕೂದಲನ್ನು ಬಾಚಿ ತುರುಬು ಕಟ್ಟಿ ಅದರ ಸುತ್ತ ಈ ಬಲೆಯನ್ನು ಹಾಕಲಾಗುವುದು, ಹೆಂಗಸರು ಕೊಂಡೆಗೆ ಕಪ್ಪು ಬಣ್ಣದ ನೆಡ್ ಹಾಕಿದ್ದನ್ನು ನೋಡಿರಬಹುದು, ಅದೇ ರೀತಿಯ ಚಿನ್ನದ ಬಲೆ. ಇದನ್ನು ಬಳಸಿದರೆ ಮದುಮಗಳ ಚೆಲುವು ಮತ್ತಷ್ಟು ಹೆಚ್ಚುವುದು.

3. ಟಯೆರಾ : ಮದುಮಗಳ ಕೇಶ ವಿನ್ಯಾಸದಲ್ಲಿ ಈ ಆಭರಣವನ್ನು ಹೆಚ್ಚಾಗಿ ಬಳಸಲಾಗುತ್ತೆ. ಇದನ್ನು ಮದುವೆ ಸಮಯದಲ್ಲಿ ಹೊರೆತು ಪಡಿಸಿ ಬೇರೆ ಸಮಯದಲ್ಲಿ ಹಾಕಲು ಸಾಧ್ಯವಿಲ್ಲ.

4. ಚಿನ್ನದ ಹೇರ್ ಪಿನ್ : ಹೂವಿನ, ಚಿಟ್ಟೆಯ ವಿನ್ಯಾಸದ ಈ ಪಿನ್ ಗಳನ್ನು ಮದುವೆ ಇನ್ನಿತರ ಸಮಾರಂಭಗಳಲ್ಲಿ ಮಹಿಳೆಯರು ತೊಟ್ಟುಕೊಳ್ಳುತ್ತಾರೆ. ಈ ರೀತಿಯ ಚಿನ್ನದ ಆಭರಣಗಳು ಹೆಣ್ಣು ಮಕ್ಕಳ ಚೆಲುವನ್ನು ಮತ್ತಷ್ಟು ಹೆಚ್ಚಿಸುತ್ತದೆ.