ಈ ಕಹಿಸತ್ಯ ಪುರುಷರ ಹತ್ತಿರ ಕೇಳಬೇಡಿ!

Relationship

oi-Reena

By Hema S

Published: Thursday, April 5, 2012, 18:46 [IST]

ಪುರುಷರಿಗೆ ಕೆಲವೊಂದು ವಿಷಯಗಳನ್ನು ಕೇಳಲು ಇಷ್ಪಡುವುದಿಲ್ಲ. ಒಂದು ವೇಳೆ ಅವುಗಳಲ್ಲಿ ಸತ್ಯಾಂಶವಿದ್ದರೂ ಕೂಡ ಅವರಿಗೆ ಅಂತಹ ಮಾತುಗಳನ್ನು ಕೇಳಲು ಇಷ್ಟಪಡುವುದಿಲ್ಲ. ಅಂತಹ ಮಾತುಗಳನ್ನು ಹೇಳಿದರೆ ಅವರ ಅಹಂಗೆ ಪೆಟ್ಟಾಗುವುದು. ಹೀಗೆ ಕೇಳಿದೆಯೆಲ್ಲಾ ಅಂತ ಕೋಪ ಮಾಡಿ ದೊಡ್ಡ ರಂಪಾಟ ಮಾಡಬಹುದು ಅಥವಾ ನಿಮ್ಮ ಬಗ್ಗೆ ಜಿಗುಪ್ಸೆ ಪಟ್ಟುಕೊಳ್ಳುತ್ತಾರೆ. ಇದರಿಂದ ಸಂತೋಷದಿಂದ ಇರಬೇಕಾದ ಸಂಬಂಧ ಹಾಳಾಗುತ್ತದೆ. ಪುರುಷರು ತನ್ನ ಹೆಂಡತಿ ಅಥವಾ ಪ್ರಿಯತಮೆ ಬಾಯಿಯಿಂದ ಕೇಳಲು ಇಷ್ಟಪಡದ ಮುಖ್ಯವಾದ 6 ಅಂಶಗಳು ನೋಡಿ ಇಲ್ಲಿದೆ.

1. ಇದುವರೆಗೆ ಎಷ್ಟು ಸಂಪಾದನೆ ಮಾಡಲು ಸಾಧ್ಯವಾಯಿತು?
ಯಾವುದೇ ಕಾರಣಕ್ಕೆ ಈ ರೀತಿ ಕೇಳಬಾರದು. ಈ ರೀತಿ ಕೇಳಿದರೆ ಪುರುಷರಿಗೆ ಕೀಳೆರಿಮೆ ಉಂಟಾಗುವುದು. ಅವರ ಆದಾಯದ ಬಗ್ಗೆ ಗೊತ್ತಿರುತ್ತದೆ. ಇಷ್ಟೆಲ್ಲಾ ಇದ್ದು ಈ ರೀತಿ ಕೇಳುವುದು ತಪ್ಪು. ಸಾಧ್ಯವಾದರೆ ಹಣಕಾಸಿನ ವಿಷಯದಲ್ಲಿ ನೆರವು ನೀಡಲು ಪ್ರಯತ್ನಿಸಿ. ಕಷ್ಟದಲ್ಲಿದ್ದಾಗ ಧೈರ್ಯ ಹೇಳಿ. ಅಗ ಸಂಬಂಧ ಮಧುರವಾಗಿರುತ್ತದೆ.

2. ನಿನಗೆ ಕೊಂಡು ಕೊಡಲು ಏಕೆ ಸಾಧ್ಯವಿಲ್ಲ?
ಅವನ ಆದಾಯದ ಮಿತಿ ಅರೆತು ನಿಮ್ಮ ಬೇಡಿಕೆಗಳನ್ನು ಹೇಳಬೇಕು. ಗಂಡ ಸಾಲ ಮಾಡಿ ಬೈಕ್ ಕೊಂಡಿರುತ್ತಾನೆ. ಆದರೆ ಹೆಂಡತಿ ಅದಕ್ಕೆ ತೃಪ್ತಿಗೊಳ್ಳದೆ ಕಾರು ಬೇಕು ಅನ್ನುವುದು ಸರಿಯಲ್ಲ. ಅದು ಅವನ ಅಸಹಾಯಕತೆಯನ್ನು ಎತ್ತಿ ತೋರಿಸಿದಂತೆ ಅಗುತ್ತದೆ. ಇಲ್ಲ, ಆಗಲ್ಲ ಅಂತ ಚುಚ್ಚು ಮಾತು ಹೇಳುವ ಬದಲು ಅವರ ಆದಾಯಕ್ಕೆ ಹೊಂದಿಕೊಂಡು ಹೋಗುವುದನ್ನು ಕಲೆತರೆ ಸಂಸಾರ ಚೆನ್ನಾಗಿ ನಡೆಸಬಹುದು.

3.ನನ್ನ ತಂದೆ ನಿನಗಿಂತ ಬೆಟರ್: ನನ್ನ ತಂದೆ ತುಂಬಾ ಚೆನ್ನಾಗಿ ನೋಡಿಕೊಂಡಿದ್ದರು. ಬೇಕಾಗಿದ್ದೆಲ್ಲಾ ಕೊಡಿಸುತ್ತಿದ್ದರು. ತುಂಬಾ ದುಡ್ಡು ಮಾಡಿದ್ದಾರೆ. ನಿನಗ್ಯಾಕೆ ಸಾಧ್ಯವಿಲ್ಲ ಎಂದು ಅನೇಕರು ಕೇಳುತ್ತಾರೆ. ಆದರೆ ಹಾಗೆ ಕೇಳುವ ಮೊದಲು ಯೋಚಿಸಬೇಕಾದ ವಿಷಯ ನಿಮ್ಮ ತಂದೆ ಇವರಿಗಿಂತ ಅನುಭವಸ್ಥರು. ಇವರಿಗೆ ಜೀವನದಲ್ಲಿ ಸಾಧಿಸಲು ಇನ್ನೂ ಸಮಯವಿದೆ. ಜೊತೆಗೆ ನಿಂತು ಮಾರ್ಗದರ್ಶನ ನೀಡಿ, ಕಷ್ಟಗಳನ್ನು ಹಂಚಿಕೊಳ್ಳಿ. ಖಂಡಿತ ಮುಂದೊಂದು ದಿನ ನಿಮ್ಮ ತಂದೆಗಿಂತ ಉತ್ತಮ ಸ್ಥಾನಮಾನ ಗಳಿಸುತ್ತಾರೆ.

4. ನಾನು ನಿನ್ನ ಮದುವೆಯಾಗಿ ತಪ್ಪು ಮಾಡಿದೆ: 'ನನಗೆ ನಿನಗಿಂತ ಒಳ್ಳೆಯ ಹುಡುಗ ಸಿಗುತ್ತಿದ್ದ. ನಿನ್ನ ಮದುವೆ ಮಾಡಿ ತಪ್ಪು ಮಾಡಿದೆ' ಇಂತಹ ಮಾತುಗಳನ್ನು ತಪ್ಪಿ ಕೂಡ ಹೇಳಬಾರದು. ಇವೆಲ್ಲಾ ಮದುವೆಗಿಂತ ಮೊದಲು ಯೋಚಿಸಬೇಕಾಗಿತ್ತು. ನಂತರ ಹೇಳಿದರೆ ಪ್ರಯೋಜನವಿಲ್ಲ. ಇಂತಹ ಮಾತುಗಳು ಗಂಡ ಹೆಂಡತಿ ನಡುವೆ ಸಾಕಷ್ಟು ಬಿರುಕು ತರುತ್ತದೆ.

5. ನಿಮ್ಮ ತಾಯಿಗೆ ಮತ್ತು ನನಗೆ ಸರಿ ಬರುವುದಿಲ್ಲ: ಅತ್ತೆ-ಸೊಸೆ ನಡುವೆ ಭಿನ್ನಾಭಿಪ್ರಾಯ ಹೆಚ್ಚಿನ ಮನೆಗಳಲ್ಲಿ ಸಾಮಾನ್ಯ. ಆದರೆ ಈ ರೀತಿ ಇದ್ದರೆ ಅದನ್ನು ನೇರವಾಗಿ ಹೇಳುವ ಬದಲು ನಿಮ್ಮ ತಾಯಿಗೆ ನನ್ನ ಏಕೆ ಇಷ್ಟವಿಲ್ಲ, ನನ್ನ ತಪ್ಪು ಏನು, ಹೇಗೆ ಇದನ್ನು ಸರಿಪಡಿಸಬಹುದು ಅವರ ಹತ್ತಿರ ಸಲಹೆ ಕೇಳಿ. ಸುಮ್ಮನೆ ಅತ್ತೆ ಮೇಲೆ ದೂರುವ ಅಭ್ಯಾಸವನ್ನು ನಿಲ್ಲಿಸಿ.

6. ನಿನ್ನ ಸ್ನೇಹಿತರು ನಿನಗಿಂತ ದುಡಿಯುತ್ತಾರೆ: ಯಾವುದೇ ಕಾರಣಕ್ಕೆ ಗಂಡನನ್ನು ಅವನ ಸ್ನೇಹಿತರಿಗೆ ಹೋಲಿಸಬೇಡಿ. ಅದು ಅವರಿಗೆ ಇಷ್ಟವಾಗುವುದಿಲ್ಲ. ಪ್ರತಿಯೊಬ್ಬರಿಗೆ ಚೆನ್ನಾಗಿ ದುಡಿಯಬೇಕು, ಕೈ ತುಂಬಾ ಸಂಬಳ ಬರಬೇಕು ಎಂದು ಬಯಸುತ್ತಾರೆ ಮತ್ತು ಪ್ರಯತ್ನಿಸುತ್ತಿರುತ್ತಾರೆ. ಆದ್ದರಿಂದ ಗಂಡ-ಹೆಂಡತಿ ಸಂಬಂಧ ಉತ್ತಮವಾಗಿರಬೇಕೆಂದು ಬಯಸುವವರು ಇಂತಹ ಮಾತುಗಳನ್ನು ಹೇಳದಿರುವುದೆ ಒಳ್ಳೆಯದು.