ಇವತ್ತು ಅಡುಗೆ ಏನಪ್ಪಾ? ಅವರೆಕಾಳು ಹುಳಿಯಪ್ಪ!

ಅವರೆ ಬೇಳೆಯ ಮುಂದೆ ಬೇರೆ ಯಾವ ಬೇಳೆಯ ಬೇಳೆಕಾಳು ಬೇಯುವುದಿಲ್ಲ.. ಅಡುಗೆಮನೆಯಿಂದ ಘಂ ಎನ್ನುವ ಪರಿಮಳ ಬರುತ್ತಿದೆ. ಎಲ್ಲಾರು ಊಟಕ್ಕೆ ಬನ್ನಿ..

ಬೇಕಾಗುವ ಪದಾರ್ಥ : ಸುಲಿದು, ಆರಿಸಿದ 2 ಪಾವಿನಷ್ಟು ಅವರೆಕಾಳು, 1 ಹೋಳು ತೆಂಗಿನಕಾಯಿ, 1 ಈರುಳ್ಳಿ, 1 ಚಮಚ ಜೀರಿಗೆ, ಒಂದೊಂದು ಚಮಚದಷ್ಟು ಕೊತ್ತಂಬರಿಬೀಜ, ಗಸಗಸೆ, ಅಕ್ಕಿ ಹಾಗೂ ಸಾಂಬಾರು ಪುಡಿ.

ಮಾಡುವ ವಿಧಾನ : ಚೆನ್ನಾಗಿ ಆರಿಸಿದ ಅವರೆಕಾಳಿಗೆ ಮೂರು ಲೋಟದಷ್ಟು ನೀರು ಹಾಕಿ ಕುಕ್ಕರ್‌ನಲ್ಲಿ ಬೇಯಿಸಿಕೊಳ್ಳಿ. ಆನಂತರ ತೆಂಗಿನಕಾಯಿ ತುರಿ, ಈರುಳ್ಳಿ, ಜೀರಿಗೆ, ಕೊತ್ತಂಬರಿ ಬೀಜ, ಗಸಗಸೆ, ಅಕ್ಕಿ, ಸಾಂಬಾರು ಪುಡಿ ಇವಿಷ್ಟನ್ನೂ ಹಸಿಯಾಗಿಯೇ ನುಣ್ಣಗೆ ರುಬ್ಬಿ ಬೆಂದ ಅವರೆಕಾಳಿಗೆ ಸೇರಿಸಿ.

ನಿಮ್ಮ ರುಚಿಗೆ ಅನುಗುಣವಾಗಿ ಕಲ್ಲುಪ್ಪು ಹಾಕಿ ಮತ್ತೊಂದು ಕುದಿ ಕುದಿಸಿ, ಕೆಳಗಿಳಿಸಿದ ತರುವಾಯ ಇಂಗು- ಸಾಸಿವೆ , ಕರಿಬೇವು ಒಗ್ಗರಣೆ ಹಾಕಿದರೆ, ಸೊಗಸಾದ ಅವರೆಕಾಳು ಹುಳಿ ಸಿದ್ಧ. ಹುಳಿ ದಪ್ಪನಾಗಿರಬಾರದು, ಸ್ಪಲ್ಪ ನೀರು ಜಾಸ್ತಿ ಹಾಕಿ ತೆಳ್ಳಗೆ ಮಾಡಿ. ಮುದ್ದೆ ಯ ಜತೆಗೆ ಅನ್ನದ ಜತೆಗೆ ಜೂಂಂಂ!