ಮುಂಬಯಿ ಶೈಲಿಯ ವಡಪಾವ್ ರೆಸಿಪಿ

Updated: Thursday, August 23, 2012, 16:05 [IST]

ರುಚಿಯಾದ ವಡಾಪಾವ್ ಗೆ ಮುಂಬಯಿ ತುಂಬಾ ಪ್ರಸಿದ್ಧ. ಬೆಂಗಳೂರಿನಲ್ಲಿ ಅನೇಕ ಅಂಗಡಿಗಳಲ್ಲಿ ವಡಾಪಾವ್ ದೊರೆಯುವುದಾದರೂ ಮುಂಬಯಿ ಮೂಲದವರು ಇಟ್ಟ ಅಂಗಡಿಯಲ್ಲಿ ವಡಾಪಾವ್ ತಿಂದರೆ ರುಚಿಸ್ವಲ್ಪ ಭಿನ್ನ ಅನಿಸುವುದು ಮತ್ತು ತಿನ್ನಲು ತುಂಬಾ ರುಚಿಕರವಾಗಿರುತ್ತದೆ. ಮುಂಬಯಿಯವರು ವಡಪಾವ್ ನ ರುಚಿ ಹೆಚ್ಚಿಸಲು ಬಳಸುವ ವಿಧಾನವೇನು ಎಂದು ತಿಳಿಯೋಣ ಬನ್ನಿ:

ಬೇಕಾಗುವ ಸಾಮಾಗ್ರಿಗಳು:

* 8 ಪಾವ್
* 4-5 ಆಲೂಗೆಡ್ಡೆ (ಬೇಯಿಸಿದ ಆಲೂಗೆಡ್ಡೆಯನ್ನು ಚೆನ್ನಾಗಿ ಹಿಸುಕಿರಬೇಕು)
* ಹಸಿ ಮೆಣಸಿನ ಕಾಯಿ
* ಒಂದೂವರೆ ಕಪ್ ತೆಂಗಿನ ತುರಿ
* ಒಂದು ಚಮಚ ಸಾಸಿವೆ
* ಚಿಟಿಕೆಯಷ್ಟು ಇಂಗು
* ಸ್ವಲ್ಪ ಕರಿಬೇವಿನ ಎಲೆ
* ಅರ್ಧ ಚಮಚ ಕರಿಮೆಣಸಿನ ಪುಡಿ
* ಒಂದು ಚಮಚ ಎಣ್ಣೆ

* 3/4 ಕಪ್ ಕಡಲೆ ಹಿಟ್ಟು
* 1/4 ಚಮಚ ಅರಿಶಿಣ ಪುಡಿ
* ಚಿಟಕೆಯಷ್ಟು ಅಡುಗೆ ಸೋಡಾ
* ರುಚಿಗೆ ತಕ್ಕ ಉಪ್ಪು
* ಹಸಿಮೆಣಸಿನ ಕಾಯಿ ಸಾಸ್

ತಯಾರಿಸುವ ವಿಧಾನ:

* ಹಸಿ ಮೆಣಸಿನಕಾಯಿ, ಶುಂಠಿ, ಬೆಳ್ಳುಳ್ಳಿ ಇವುಗಳನ್ನು ಮಿಕ್ಸಿಯಲ್ಲಿ ಅರೆದು ಪೇಸ್ಟ್ ಮಾಡಿಡಬೇಕು.

* ಒಂದು ಪಾತ್ರೆಯಲ್ಲಿ ಸ್ವಲ್ಪ ಎಣ್ಣೆಯನ್ನು ಬಿಸಿ ಮಾಡಿ ಸಾಸಿವೆ ಹಾಕಬೇಕು. ಸಾಸಿವೆ ಚಟಾಪಟ ಶಬ್ದ ಬರುವಾಗ ಚಿಟಿಕೆಯಷ್ಟು ಇಂಗು ಮತ್ತು ಕರಿಬೇವಿನ ಎಲೆಯನ್ನು ಹಾಕಬೇಕು. ಈಗ ಹಸಿ ಮೆಣಸಿನ ಕಾಯಿ, ಬೆಳ್ಳುಳ್ಳಿ, ಶುಂಠಿ ಇವುಗಳನ್ನು ಹಾಕಿ ತಯಾರಿಸಿದ ಪೇಸ್ಟ್ ಹಾಕಿ 2 ನಿಮಿಷ ಸೌಟುನಿಂದ ಆಡಿಸುತ್ತಾ ಹುರಿಯಬೇಕು. ಈಗ ಆಲೂಗೆಡ್ಡೆ, ಅರಿಶಿಣ ಪುಡಿ ಮತ್ತು ರುಚಿಗೆ ತಕ್ಕ ಉಪ್ಪು ಹಾಕಿ ಮಿಶ್ರ ಮಾಡಿ ಉರಿಯಿಂದ ತೆಗೆದು ಆರಲು ಇಡಬೇಕು.

* ಈಗ ಈ ಮಿಶ್ರಣದಿಂದ 6-7 ಚಿಕ್ಕ ಉಂಡೆಗಳನ್ನು ಕಟ್ಟಿ.

* ಈಗ ಕಡಲೆ ಹಿಟ್ಟು, ಅರಿಶಿಣ ಪುಡಿ, ಚಿಟಿಕೆಯಷ್ಟು ಅಡುಗೆ ಸೋಡಾ,ತೆಂಗಿನಕಾಯಿ ತುರಿ, ರುಚಿಗೆ ತಕ್ಕ ಉಪ್ಪು ಹಾಕಿ ಮಿಶ್ರ ಮಾಡಿ ಸ್ವಲ್ಪ ನೀರು ಹಾಕಿ ಬೋಂಡಕ್ಕೆ ಮಾಡುವಾಗೆ ಮಿಶ್ರಣವನ್ನು ಹದವಾಗಿ ಕಲೆಸಿ.

* ಬಾಣಲೆಯಲ್ಲಿ ಅರ್ಧದಷ್ಟು ಎಣ್ಣೆ ಹಾಕಿ ಕಾಯಿಸಿ

* ಈಗ ಆಲೂಗೆಡ್ಡೆ ಉಂಡೆಯನ್ನು ಈ ಮಿಶ್ರಣದಲ್ಲಿ ಅದ್ದಿ ಕುದಿಯುತ್ತಿರುವ ಎಣ್ಣೆಯಲ್ಲಿ ಹಾಕಿ ಕಂದು ಬಣ್ಣ ಬರುವವರೆಗೆ ಕರೆಯಬೇಕು.

ವಡಾ ಪಾವ್ ಮಾಡುವ ಕೊನೆಯ ಹಂತ:

ಪಾವ್ ಅನ್ನು ಎರಡು ಸಮ ಭಾಗಗಳಾಗಿ ಕತ್ತರಿಸಿ ಬೇಕು. ನಂತರ ತವಾವನ್ನು ಉರಿಯಲ್ಲಿ ಇಟ್ಟು ಸ್ವಲ್ಪ ಎಣ್ಣೆ ಹಾಕಿ ಪಾವ್ ನ ಎರಡೂ ಬದಿಯನ್ನು ಸ್ವಲ್ಪ ಬಿಸಿ ಮಾಡಿ ಅದರ ಮೇಲೆ ಹಸಿಮೆಣಸಿನ ಕಾಯಿ ಸಾಸ್ ಸವರಿ , ವಡಾವನ್ನು ಪಾವ್ ಮಧ್ಯೆದಲ್ಲಿಟ್ಟರೆ ಸವಿರುಚಿಯಾದ ವಡಾಪಾವ್ ರೆಡಿ. (ಹಸಿಮೆಣಸಿನ ಕಾಯಿ ಸಾಸ್ ಮತ್ತು ಟೊಮೆಟೊ ಸಾಸ್ ಸವರಬಹುದು)

ಸಲಹೆ: ವಡಾ ಪಾವ್ ಸಿಗದಿದ್ದರೆ ಸ್ವಲ್ಪ ದಪ್ಪ ಬ್ರೆಡ್ ನಡುವೆ ಕೂಡ ವಡಾ ಇಟ್ಟು ತಿನ್ನಬಹುದು.