ನೇಂದ್ರ ಬಾಳೆ ಹಣ್ಣಿನ ಬಜ್ಜಿ ತಿನ್ನಲು ಬಲುರುಚಿ

Snacks

oi-Reena

By Hema S

Updated: Friday, July 6, 2012, 18:14 [IST]

ಬಜ್ಜಿ ನೋಡಿದರೆ ಸಾಕು ಸಾಮಾನ್ಯವಾಗಿ ಎಲ್ಲರ ಬಾಯಲ್ಲಿ ನೀರೂರುತ್ತದೆ.ಆ ಕ್ಷಣ ಡಯಟ್ ಮರೆತು ಬಿಡುತ್ತೇವೆ. ಈ ಬಜ್ಜಿಯನ್ನು ಅನೇಕ ಬಗೆಯಲ್ಲಿ ತಯಾರಿಸಬಹುದಾಗಿದ್ದು, ಇವತ್ತು ನಾವು ಬಾಳೆ ಹಣ್ಣಿನಿಂದ ಬಜ್ಜಿ ಮಾಡುವ ವಿಧಾನ ತಿಳಿಯೋಣ.

ಈ ಬಜ್ಜಿಗೆ ನೇಂದ್ರ ಬಾಳೆ ಹಣ್ಣನ್ನು ಉಪಯೋಗಿಸಬೇಕು. ಈ ಬಾಳೆ ಹಣ್ಣು ಆರೋಗ್ಯಕ್ಕೆ ತುಂಬಾ ಒಳ್ಳೆಯದು. ಇದನ್ನು ಬಳಸಿ ಬಜ್ಜಿ ಮಾಡುವ ಸುಲಭ ವಿಧಾನ ನೋಡಿ ಇಲ್ಲಿದೆ.

ಬೇಕಾಗುವ ಸಾಮಾಗ್ರಿಗಳು:
* ನೇಂದ್ರ ಬಾಳೆ ಹಣ್ಣು 4
* ಕಡಲೆ ಹಿಟ್ಟು 2 ಕಪ್
* ಅಕ್ಕಿ ಹಿಟ್ಟು ಅರ್ಧ ಲೋಟ
* ಕೆಂಪು ಮೆಣಸಿನ ಪುಡಿ ಒಂದೂವರೆ ಚಮಚ
* ರುಚಿಗೆ ತಕ್ಕ ಉಪ್ಪು
* ಚಿಟಿಕೆಯಷ್ಟು ಅರಿಶಿಣ
* ಎಣ್ಣೆ

ತಯಾರಿಸುವ ವಿಧಾನ:

1. ನೇಂದ್ರ ಬಾಳೆ ಹಣ್ಣನ್ನು ಉದ್ದುದ್ದವಾಗಿ ಕತ್ತರಿಸಿದರೆ ಒಂದು ಬಾಳೆ ಹಣ್ಣಿನಲ್ಲಿ 4 ಬಜ್ಜಿ ಕರಿಯಬಹುದು, ಇಲ್ಲದಿದ್ದರೆ ಬಾಳೆ ಹಣ್ಣನ್ನು ಸಮ ಅರ್ಧ ಭಾಗವಾಗಿ ಕತ್ತರಿಸಿ ನಂತರ ಅರ್ಧ ಬಾಳೆ ಹಣ್ಣನ್ನು ಉದ್ದುದ್ದವಾಗಿ 4 ಪೀಸ್ ಮಾಡಿದರೆ 8 ಬಜ್ಜಿ ಕರಿಯಬಹುದು.

2. ಕಡಲೆಹಿಟ್ಟು,ಅಕ್ಕಿ ಹಿಟ್ಟು, ಅರಿಶಿಣ, ಕೆಂಪು ಮೆಣಸಿನ ಹುಡಿ, ಉಪ್ಪು ಮತ್ತು ನೀರು ಸೇರಿಸಿ ಚೆನ್ನಾಗಿ ಮಿಶ್ರ ಮಾಡಬೇಕು. ಮಿಶ್ರಣವು ಸ್ವಲ್ಪ ಗಟ್ಟಿಯಿರುವಂತೆ ಕಲೆಸಬೇಕು.

3. ನಂತರ ಬಾಣಲೆಯಲ್ಲಿ ಅರ್ಧದಷ್ಟು ಎಣ್ಣೆ ಹಾಕಿ ಕುದಿಸಬೇಕು, ಈಗ ಕತ್ತರಿಸಿದ ಬಾಳೆಹಣ್ಣನ್ನು ಕಡಲೆ ಹಿಟ್ಟಿನ ಹಿಟ್ಟಿನ ಮಿಶ್ರಣದಲ್ಲಿ ಅದ್ದಿ ಎಣ್ಣೆಗೆ ಹಾಕಿ ಕಂದು ಬಣ್ಣ ಬರುವವರೆಗೆ ಕರಿದರೆ ನೇಂದ್ರ ಬಾಳೆ ಹಣ್ಣಿನ ಬಜ್ಜಿ ರೆಡಿ. ಇದನ್ನು ಬಿಸಿಬಿಸಿಯಾಗಿರುವಾಗಲೇ ತಿಂದರೆ ತುಂಬಾ ರುಚಿಕರವಾಗಿರುತ್ತದೆ.

ಸಲಹೆ: ನೇಂದ್ರ ಬಾಳೆ ಹಣ್ಣು ಬಳಸುವ ಬದಲು , ಸಾರು ಬಾಳೆ ಕಾಯಿಯಿಂದ ಕೂಡ ತಯಾರಿಸಬಹುದು.