ಹೆಸರು ಬೇಳೆಯ ಧೋಕ್ಲಾ ರೆಸಿಪಿ

ಆರೋಗ್ಯದ ದೃಷ್ಟಿಯಿಂದ ಕಡಿಮೆ ಕ್ಯಾಲೋರಿಯ ಆಹಾರಗಳನ್ನು ತಿನ್ನುವುದು ತುಂಬಾ ಒಳ್ಳೆಯದು. ಆದರೆ ತುಂಬಾ ಕಡಿಮೆ ಕ್ಯಾಲೋರಿಯ ಅಡುಗೆಗಳು ಅಷ್ಟೇನು ರುಚಿ ಇರುವುದಿಲ್ಲ, ಆದ್ದರಿಂದ ತಿನ್ನಲು ಇಷ್ಟವಾಗುವುದಿಲ್ಲ. ಆದ್ದರಿಂದ ಅಂತಹ ಪದಾರ್ಥಗಳನ್ನು ತಿನ್ನಲು ಇಷ್ಟವಾಗುವುದಿಲ್ಲ.

ಆದರೆ ಧೋಕ್ಲಾ ಕಡಿಮೆ ಕ್ಯಾಲೋರಿ ತಿಂಡಿಯಾಗಿದ್ದು ತಿನ್ನಲು ತುಂಬಾ ರುಚಿಕರವಾಗಿರುತ್ತದೆ. ಇಲ್ಲಿ ನಾವು ಹೆಸರುಬೇಳೆ ಹಾಕಿ ತಯಾರಿಸುವ ಧೋಕ್ಲಾದ ರೆಸಿಪಿ ನೀಡಿದ್ದೇವೆ ನೋಡಿ:

ಬೇಕಾಗುವ ಸಾಮಾಗ್ರಿಗಳು:

* ಹೆಸರು ಬೇಳೆ 1 ಕಪ್ (ನೀರಿನಲ್ಲಿ ನೆನೆ ಹಾಕಿರಬೇಕು)
* ಕಡಲೆ ಬೇಳೆ 1 ಚಮಚ
* ಹಸಿ ಮೆಣಸಿನ ಕಾಯಿ 3-4
* ಕೊತ್ತಂಬರಿ ಬೀಜ 1 ಚಮಚ
* ಮೊಸರು 2 ಚಮಚ
* ಅರಿಶಿಣ ಪುಡಿ 1 ಚಮಚ
* ರುಚಿಗೆ ತಕ್ಕ ಉಪ್ಪು
* ಅಡುಗೆ ಸೋಡಾ ಅರ್ಧ ಚಮಚ

ಒಗ್ಗರಣೆಗೆ
* ಎಣ್ಣೆ 1 ಚಮಚ
* ಸಾಸಿವೆ ಅರ್ಧ ಚಮಚ
* ಚಿಟಿಕೆಯಷ್ಟು ಇಂಗು
* ಕರಿಬೇವಿನ ಎಲೆ7-8
* ಹಸಿ ಮೆಣಸಿನಕಾಯಿ 2 (ಚಿಕ್ಕದಾಗಿ ಕತ್ತರಿಸಿದ್ದು)

ತಯಾರಿಸುವ ವಿಧಾನ:

1. ಹೆಸರುಬೇಳೆಯನ್ನು ಚೆನ್ನಾಗಿ ತೊಳೆದು ಅದಕ್ಕೆ ಹಸಿಮೆಣಸಿನ ಕಾಯಿ, ಕಡಲೆ ಬೇಳೆ ಮತ್ತು ಸ್ವಲ್ಪ ಉಪ್ಪು ಹಾಕಿ ಸ್ವಲ್ಪ ನೀರು ಸೇರಿಸಿ ನುಣ್ಣನೆ ರುಬ್ಬಬೇಕು.

2. ಅದನ್ನು ಒಂದು ಬಟ್ಟಲಿನಲ್ಲಿ ಹಾಕಿ ಅದಕ್ಕೆ ಮೊಸರು, ಕೊತ್ತಂಬರಿ ಬೀಜ, ಅರಿಶಿಣ ಪುಡಿ ಮತ್ತು ಚಿಟಿಕೆಯಷ್ಟು ಅಡುಗೆ ಸೋಡಾ ಸೇರಿಸಬೇಕು.

3. ನಂತರ ಒಂದು ತಟ್ಟೆಯಲ್ಲಿ ಎಣ್ಣೆ ಹಾಕಿ ಅದರಲ್ಲಿ ಈ ಮಿಶ್ರಣವನ್ನು ಸುರಿದು ಆವಿಯಲ್ಲಿ ಬೇಯಿಸಬೇಕು (ತಟ್ಟೆ ಇಡ್ಲಿ ಮಾಡುವ ರೀತಿಯಲ್ಲಿ ಬೇಯಿಸಿ).

4. ನಂತರ ಅದನ್ನು ಚಿಕ್ಕ ತುಂಡುಗಳಾಗಿ ಕತ್ತರಿಸಬೇಕು.

5. ಪಾತ್ರೆ ಬಿಸಿ ಮಾಡಿ ಅದರಲ್ಲಿ ಒಂದು ಚಮಚ ಎಣ್ಣೆ ಹಾಕಬೇಕು. ಎಣ್ಣೆ ಬಿಸಿಯಾದಾಗ ಸಾಸಿವೆ, ಕರಿ ಬೇವಿನ ಎಲೆ, ಇಂಗು ಹಾಕಿ ನಂತರ ಕತ್ತರಿಸಿದ ತುಂಡುಗಳನ್ನು ಅದರಲ್ಲಿ ಹಾಕಿ ಮಿಶ್ರಣ ಮಾಡಿ ಉರಿಯಿಂದ ತೆಗೆದರೆ ಧೋಕ್ಲಾ ರೆಡಿ.

ಇದನ್ನು ಚಟ್ನಿ ಜೊತೆ ತಿನ್ನಲು ತುಂಬಾ ರುಚಿಕರವಾಗಿರುತ್ತದೆ.