ರುಚಿಕರವಾಗಿರುವ ಬಟಾಣಿ ಸ್ಯಾಂಡ್ ವಿಚ್ ರೆಸಿಪಿ

ಬಟಾಣಿ ಸ್ಯಾಂಡ್ ವಿಚ್ ರೆಸಿಪಿ ಸವಿಯಲು ತುಂಬಾ ರುಚಿಕರವಾಗಿರುತ್ತದೆ ಮತ್ತು ಆರೋಗ್ಯಕ್ಕೂ ಒಳ್ಳೆಯದು. ಇದರ ಮತ್ತೊಂದು ವಿಶೇಷವೆಂದರೆ ಇದನ್ನು ಬೆಳಗಿನ ತಿಂಡಿಯಾಗಿಯೂ ತಯಾರಿಸಬಹುದು, ಸಾಯಾಂಕಾಲದ ತಿಂಡಿಯಾಗಿಯೂ ತಯಾರಿಸಬಹುದು. ಈ ಸ್ಯಾಂಡ್ ವಿಚ್ ಅನ್ನು ಸುಲಭವಾಗಿ ತಯಾರಿಸಬಹುದಾಗಿದ್ದು ಮಾಡುವ ವಿಧಾನ ನೋಡಿ ಇಲ್ಲಿದೆ.

1. ಬೇಕಾಗುವ ಸಾಮಗ್ರಿಗಳು:

6-12 ಪೀಸ್ ಬ್ರೌನ್ ಬ್ರೆಡ್
ಬೇಯಿಸಿದ ಬಟಾಣಿ ಒಂದು ಕಪ್
ಚೀಸ್ ಅರ್ಧ ಕಪ್ (ತುರಿದಿರಬೇಕು)
ಬೆಣ್ಣೆ ಅರ್ಧ ಕಪ್
ಕರಿಮೆಣಸಿನ ಪುಡಿ 2 ಚಮಚ
ರುಚಿಗೆ ತಕ್ಕ ಉಪ್ಪು

2. ಸಾಮಾಗ್ರಿಗಳು:
ಮೊಸರು 2 ಕಪ್
ಈರುಳ್ಳಿ 2 (ಕತ್ತರಿಸಿದ್ದು)
ಟೊಮೆಟೊ 1 (ಕತ್ತರಿಸಿದ್ದು)
ಕತ್ತರಿಸಿದ ದುಂಡು ಮೆಣಸಿನ ಕಾಯಿ 1 (ಕತ್ತರಿಸಿದ್ದು)
ಟೊಮೆಟೊ ಸಾಸ್ 2 ಚಮಚ
ಹಸಿಮೆಣಸಿನಕಾಯಿ ಸಾಸ್ 1 ಚಮಚ
ಕೆಂಪು ಮೆಣಸಿನ ಪುಡಿ 1 ಚಮಚ
ಜೀರಿಗೆ 2 ಚಮಚ

ತಯಾರಿಸುವ ವಿಧಾನ:

1. ಒಂದು ಬಟ್ಟಲಿನಲ್ಲಿ ಮೊಸರು ಹಾಕಿ ಚೆನ್ನಾಗಿ ಕದಡಬೇಕು. ನಂತರ ಮೊಸರಿನಲ್ಲಿ ಎರಡನೇ ಸಾಮಾಗ್ರಿಗಳ ಲಿಸ್ಟ್ ನಲ್ಲಿ (2. ಸಾಮಾಗ್ರಿಗಳು) ಹೇಳಿರುವ ಎಲ್ಲಾ ಸಾಮಾಗ್ರಿಗಳನ್ನು ಹಾಕಿ ಮಿಶ್ರಣ ಮಾಡಬೇಕು. ನಂತರ ಬೇಯಿಸಿದ ಬಟಾಣಿಯನ್ನು ಸೌಟ್ ನಿಂದ ಚೆನ್ನಾಗಿ ಹಿಸುಕಿ ಸ್ವಲ್ಪ ಪೇಸ್ಟ್ ರೀತಿ ಮಾಡಿ ಈ ಮೊಸರಿನ ಮಿಶ್ರಣಕ್ಕೆ ಹಾಕಬೇಕು.ನಂತರ ರುಚಿಗೆ ತಕ್ಕ ಉಪ್ಪು ಹಾಕಿ ಚೆನ್ನಾಗಿ ಮಿಶ್ರಣ ಮಾಡಬೇಕು. ಈ ಮಿಶ್ರಣ ಸ್ವಲ್ಪ ಗಟ್ಟಿಯಾಗಿರಬೇಕು.

2. ತವಾವನ್ನು ಬಿಸಿ ಮಾಡಿ ಬೆಣ್ಣೆ ಹಾಕಿ ಬ್ರೆಡ್ ನ ಎರಡೂ ಕಡೆ ಬಿಸಿ ಮಾಡಬೇಕು. ನಂತರ ತುರಿದ ಚೀಸ್ ಹಾಕಿ ಅದರ ಮೇಲೆ ಬಟಾಣಿ ಹಾಕಿರುವ ಮೊಸರಿನ ಮಿಶ್ರಣ ಹಾಕಿ ಅದರ ಮೇಲೆ ಕರಿಮೆಣಸಿನ ಪುಡಿ ಉದುರಿಸಿ ನಂತರ ಮತ್ತೊಂದು ಬ್ರೆಡ್ ತುಂಡನ್ನು ಅದರ ಮೇಲೆ ಇಟ್ಟು ಮತ್ತೊಮ್ಮೆ ರೋಸ್ಟ್ ಮಾಡಿದರೆ ಬಟಾಣಿ ಸ್ಯಾಂಡ್ ವಿಚ್ ರೆಡಿ.

ಈ ಸ್ಯಾಂಡ್ ವಿಚ್ ಅನ್ನು ಹಣ್ಣಿನ ಜ್ಯೂಸ್ ಜೊತೆ ಸವಿಯಲು ತುಂಬಾ ರುಚಿಕರವಾಗಿರುತ್ತದೆ. ಅಲ್ಲದೆ ಈ ಸ್ಯಾಂಡ್ ವಿಚ್ ತುಂಬಾ ಆರೋಗ್ಯಕರವಾದ ತಿಂಡಿ ಕೂಡ.