ಚಿಕ್ಕವರಿಗೂ ಇಷ್ಟ ಆಲೂ ಟಿಕ್ಕಿ ಅಥವಾ ಆಲೂ ವೆಡ್ಜಸ್

By * ಕುಮುದಾ ಶಂಕರ್, ಸೌದಿ ಅರೇಬಿಯಾ

Published: Saturday, November 27, 2010, 19:21 [IST]

ಆಲೂಗೆಡ್ಡೆಯಿಂದ ತಯಾರಿಸದ ತಿಂಡಿಗಳೇ ಇಲ್ಲ. ಮನೆಯಲ್ಲಿ ಸಾಮಾನ್ಯವಾಗಿ ಆಲೂಗಡ್ಡೆ ಸ್ಟಾಕ್ ಇದ್ದೇ ಇರುತ್ತದೆ. ಸಾಮಾನ್ಯವಾಗಿ ಇದನ್ನು ಜಾಸ್ತಿ ಅಡಿಗೆಗಳಿಗೆ ಬಳಸುತ್ತೇವೆ. ಆಲೂಗೆಡ್ಡೆಯಿಂದ ಯಾವುದೇ ಪದಾರ್ಥ ತಯಾರಿಸಿದರೂ ಅದು ರುಚಿಯಾಗಿಯೇ ಇರುತ್ತದೆ. ಮಕ್ಕಳಿಗಂತೂ ಪೊಟ್ಯಾಟೋ ಅಂದರೆ ತಿನ್ನಲು ಬಲು ಖುಷಿ. ಅದರಲ್ಲೂ ಎಲ್ಲಕ್ಕಿಂತ ಹೆಚ್ಚಾಗಿ ಫ್ರೆಂಚ್ ಫ್ರೈಸ್ ಮತ್ತು ಆಲೂಗೆಡ್ಡೆ ಬಜ್ಜಿ ಎಂದರೆ ಯಾವ ಸಮಯದಲ್ಲಾದರೂ ಸರಿ ತಿನ್ನುತ್ತಾರೆ. ಈ ರೀತಿ ಫ್ರೈಸ್ ನಲ್ಲಿ ಎಣ್ಣೆಯ ಅಂಶ ಜಾಸ್ತಿ ಇರುತ್ತದೆ. ಅದಕ್ಕಾಗಿ ಆಲೂ ವೆಡ್ಜಸ್ ತಯಾರಿಸಿ ಕೊಡಿ. ಇದು ಹೆಚ್ಚು ಎಣ್ಣೆ ತೆಗೆದುಕೊಳ್ಳುವುದಿಲ್ಲ. ಮಕ್ಕಳು ಕೂಡ ತಿನ್ನಲು ಬೇಡ ಎನ್ನುವುದಿಲ್ಲ. ಜೊತೆಲಿ ದೊಡ್ಡವರು ಸಹ! ಇದನ್ನು ತಯಾರಿಸಲು ಸಮಯ ತುಂಬಾ ಬೇಕಾಗಿಲ್ಲ.

ಬೇಕಾಗುವ ಸಾಮಗ್ರಿಗಳು:

ಆಲೂಗೆಡ್ಡೆಯನ್ನು ಉದ್ದಕ್ಕೆ ಹೆಚ್ಚಿಕೊಳ್ಳಿ
ಮೆಣಸಿನಪುಡಿ
ಧನಿಯಾ ಪುಡಿ
ಅರಿಶಿಣ ಸ್ವಲ್ಪ
ಗರಂ ಮಸಾಲಾ ಸ್ವಲ್ಪ
ಉಪ್ಪು ರುಚಿಗೆ
ಎಣ್ಣೆ

ತಯಾರಿಸುವ ವಿಧಾನ:

ಪ್ಯಾನ್ ಗೆ ಒಂದೆರಡು ಚಮಚ ಎಣ್ಣೆಯನ್ನು ಹಾಕಿ, ಅದಕ್ಕೆ ಆಲೂಗೆಡ್ಡೆ ಹೋಳುಗಳನ್ನು ಹಾಕಿ, ಹಾಗೇ ಹುರಿಯುತ್ತಿರಿ. ಆಲೂ ಬಣ್ಣ ಬದಲಾಗುವವರೆಗೂ ಅಂದರೆ ಅದು ಚೆನ್ನಾಗಿ ಎಣ್ಣೆಯಲ್ಲಿಯೇ ಹೊಂಬಣ್ಣ ಬರುವವರೆಗು ಹುರಿದುಕೊಂಡು, ಆಮೇಲೆ ಅರಿಶಿಣ ಮತ್ತು ಉಪ್ಪು ಹಾಕಿ ಬೆರೆಸಿ. ನಂತರ ಅದಕ್ಕೆ ಅಚ್ಚಮೆಣಸಿನಪುಡಿ, ಧನಿಯಾ ಪುಡಿ ಮತ್ತು ಗರಂ ಮಸಾಲ ಹಾಕಿ ಚೆನ್ನಾಗಿ ಬೆರೆಸಿ. ಪೂರ್ತಿ ಎಲ್ಲಾ ಹೋಳುಗಳಿಗೂ ಮಸಾಲೆ ಹತ್ತಿದ ಮೇಲೆ ಕೆಳಗಿಳಿಸಿ. ಇದನ್ನು ಸ್ನಾಕ್ಸ್ ತರಹ/ಊಟಕ್ಕೆ ನೆಂಜಿಕೊಳ್ಳಲು/ಊಟಕ್ಕೆ ಮೊದಲು ನೀಡಬಹುದು. ಮಕ್ಕಳಿಗಂತೂ ತುಂಬಾ ಪ್ರಿಯವಾಗುತ್ತದೆ. ಫ್ರೆಂಚ್ ಫ್ರೈ ಗಳಿಗಿಂತ ಇದು ಉತ್ತಮ. ಎಣ್ಣೆಯಲ್ಲಿ ಕರಿಯದೇ ಇರುವುದರಿಂದ ಮಕ್ಕಳಿಗೆ ಒಳ್ಳೆಯದು. (ಕೃಪೆ : ಅಡುಗೆ ಸವಿರುಚಿ)