ಕೆಸುವಿನಷ್ಟೇ ರುಚಿ ಎಲೆಕೋಸಿನ ಪತ್ರೊಡೆ

Snacks

oi-Staff

Published: Wednesday, January 20, 2010, 16:54 [IST]

ಪತ್ರೊಡೆ ನೆನಪಾಗುವುದು ಮಳೆಗಾಲದಲ್ಲಿ. ಯಾಕೆಂದರೆ ಕೆಸುವಿನ ಎಲೆಗಳು ಮಳೆಗಾಲದಲ್ಲಿ ಧಂಡಿಯಾಗಿ ಸಿಗುತ್ತವೆ.ಆದರೆ ಎಲೆ ಕೋಸು ಮಾತ್ರ ಎಲ್ಲ ಕಾಲದಲ್ಲೂ ಸಿಗುತ್ತದೆ. ಕೆಸುವಿನ ಪತ್ರೊಡೆ ಕೊಡುವಷ್ಟೇ ರುಚಿಯನ್ನು ಎಲೆ ಕೋಸಿನ ಪತ್ರೊಡೆ ಸಹ ನೀಡುತ್ತದೆ. ನೀವು ಎಲೆ ಕೋಸಿನ ಪತ್ರೊಡೆ ಮಾಡಿದ ದಿನ ಮನೆಯಲ್ಲಿ ಹಬ್ಬದ ಖುಷಿ ತರುವುದು ಅಂತಹ ಕಷ್ಟವೇನಲ್ಲ. ನಿಮ್ಮದು ಮೊದಲ ಪ್ರಯೋಗವಾಗಿದ್ದರೆ ಪುರುಸೊತ್ತು ಮಾಡಿಕೊಂಡು ಶುರು ಹಚ್ಚಿಕೊಳ್ಳಿ.

ಈ ಪದಾರ್ಥಗಳನ್ನು ಹೊಂಚಿಕೊಳ್ಳಿ
*ಸಣ್ಣಗೆ ತುರಿದ ಕ್ಯಾಬೇಜ್‌ ಕಾಲು ಕೆಜಿ
*ಒಂದು ಸ್ಪೂನ್‌ ಕೊತ್ತಂಬರಿ ಬೀಜ
*ಒಂದು ಸ್ಪೂನ್‌ ಮೆಂತ್ಯ
*ಉದ್ದಿನ ಬೇಳೆ ಒಂದು ಸ್ಪೂನ್‌
*ಐದು ಕೆಂಪು ಮೆಣಸು
*ಹುಣಸೆ ಹಣ್ಣು, ಒಂದು ನಿಂಬೆಯಷ್ಟು
*ನಾಲ್ಕು ಬೆರಳಿನಷ್ಟಗಲದ ಬೆಲ್ಲದ ತುಂಡು
*ಭರ್ತಿ ಒಂದು ಚಿಟಿಕೆ ಅರಿಶಿಣ
*ಒಂದು ಕಪ್‌ ಕಾಯಿ ತುರಿ
*ಅರ್ಧ ಕಪ್‌ ಅಕ್ಕಿಯ ಸೋಜಿ
*ಉಪ್ಪು : ನಿಮ್ಮ ರುಚಿಗೆ ತಕ್ಕಷ್ಟು

ಮಾಡುವ ವಿಧಾನ
ಮೆಣಸು, ಮೆಂತ್ಯ ಮತ್ತು ಉದ್ದಿನ ಬೇಳೆಯನ್ನು ಸ್ವಲ್ಪ ಹುರಿಯಬೇಕು. ತೆಂಗಿನ ಕಾಯಿ, ಕೊತ್ತಂಬರಿ ಬೀಜ, ಹುಣಸೇ, ಬೆಲ್ಲ , ಅರಿಶಿಣ ಮತ್ತು ಹುರಿದ ಈ ಮಿಶ್ರಣವನ್ನು ಅರೆಯಿರಿ. ಉಪ್ಪು ಸೇರಿಸಿ ಇನ್ನೊಂದು ಸುತ್ತು ಮಿಕ್ಸಿ ತಿರುಗಿಸಿ. ಈ ಮಿಶ್ರಣ, ಅಕ್ಕಿ ಸೋಜಿ ಮತ್ತು ಕತ್ತರಿಸಿಟ್ಟಿರುವ ಕ್ಯಾಬೇಜ್‌ ಜೊತೆ ಚೆನ್ನಾಗಿ ಕಲೆಸಿ. ಕಡಿಮೆ ನೀರು ಸೇರಿಸಬೇಕು. ನಂತರ ಮಿಶ್ರಣವನ್ನು ಲಡ್ಡುವಿಗಿಂತ ಸ್ವಲ್ಪ ದೊಡ್ಡ ಸೈಜಿನಲ್ಲಿ ಉಂಡೆ ಮಾಡಿ ಅರ್ಧ ಗಂಟೆ ಕಾಲ ಹಬೆಯಲ್ಲಿ ಬೇಯಿಸಿ.

ಒಂದು ಬಾಣಲೆಯಲ್ಲಿ ಎರಡು ಸ್ಪೂನ್‌ ಎಣ್ಣೆ, ಎರಡು ಚಿಟಿಕೆಯಷ್ಟು ಉದ್ದಿನ ಬೇಳೆ , ಸಾಸಿವೆ, ಕರಿಬೇವಿನಸೊಪ್ಪು ಮತ್ತು ಕೆಂಪು ಮೆಣಸನ್ನು ಹುರಿಯಿರಿ. ಬೆಂದ ಯನ್ನು ಸಣ್ಣ ತುಂಡುಗಳಾಗಿ ಕತ್ತರಿಸಿ ಒಗ್ಗರಣೆ ಬಾಣಲೆಗೆ ಹಾಕಿ ಚೆನ್ನಾಗಿ ಮಿಕ್ಸ್‌ ಮಾಡಿ. ಸಿಹಿಯಾಗಿರಬೇಕಿದ್ದರೆ ಬೆಲ್ಲ ಒಂದಿಷ್ಟು ಹೆಚ್ಚು, ಖಾರ ಬೇಕಿದ್ರೆ ಎರಡು ಮೆಣಸು ಜಾಸ್ತಿ .. ಹೀಗೆ ಪತ್ರೊಡೆ ಪರಿಣತರಾಗುತ್ತಿದ್ದಂತೆ ನಿಮ್ಮದೇ ಆದ ಕೈಗುಣದ ಛಾಪು ಒತ್ತಿರುತ್ತೀರಿ.

ಕ್ಯಾಬೇಜ್‌ ಬದಲಿಗೆ ಕೆಸುವಿನೆಲೆ ಅಥವಾ ತಗತ್ತೆ ಸೊಪ್ಪನ್ನೂ ಹೆಚ್ಚಿ ಪತ್ರೊಡೆ ಮಾಡಬಹುದು. ನಿಮ್ಮ ಅಡುಗೆ ಕ್ಯಾಲ್ಕ್ಯುಲೇಷನ್‌ಗಳು ಒಂದು ಹದಕ್ಕೆ ಬಂದ ಮೇಲೆ ನಿಮಗೇ ಅಂದಾಜಾಗುತ್ತದೆ. ಆಲ್‌ ದ ಬೆಸ್ಟ್‌.