ಮಲಬಾರ್ ಪಾಲಾಕ್ ದಾಲ್ ರೆಸಿಪಿ

ಈ ಮಲಬಾರ್ ಪಾಲಾಕ್ ತೊಗರಿಬೇಳೆ ಸಾರನ್ನು ಮಾಡುವುದು ಬಲು ಸುಲಭ. ಸಂಜೆ ಕೆಲಸ ಮುಗಿಸಿ ಸ್ವಲ್ಪ ತಡವಾಗಿ, ದಣಿದು ಬಂದ ದಿನ ಅಡುಗೆಗೆ ಈ ರೀತಿಯ ಸರಳ ಅಡುಗೆಗಳು ಬೆಸ್ಟ್. ಇವು ಆರೋಗ್ಯಕರ, ಬಾಯಿ ರುಚಿಕರ ಮತ್ತು ನಿಮ್ಮ ಶ್ರಮವನ್ನೂ ಕಡಿಮೆ ಮಾಡುವುದು.

ಬನ್ನಿ ಈ ಮಲಬಾರ್ ಸಾರು ಮಾಡುವುದು ಹೇಗೆ ಎಂದು ನೋಡೋಣವೇ?

ಬೇಕಾಗುವ ಸಾಮಾಗ್ರಿಗಳು
ತೊಗರಿ ಬೇಳೆ 1 ಕಪ್
ಪಾಲಾಕ್ 2 ಕಟ್ಟು
ಈರುಳ್ಳಿ1
ಹಸಿ ಮೆಣಸಿನಕಾಯಿ 3
ಶುಂಠಿ
ಅರಿಶಿಣ ಪುಡಿ ಅರ್ಧ ಚಮಚ
ರುಚಿಗೆ ತಕ್ಕ ಉಪ್ಪು
ಹುಣಸೆ ಹಣ್ಣಿನ ರಸ 1 ಚಮಚ
ನೀರು 2 ಕಪ್

ಒಗ್ಗರಣೆಗೆ
ಸಾಸಿವೆ ಅರ್ಧ ಚಮಚ
ಜೀರಿಗೆ 1 ಚಮಚ
ಉದ್ದಿನ ಬೇಳೆ 1 ಚಮಚ
ಬೆಳ್ಳುಳ್ಳಿ ಎಸಳು 3-4 ಎಸಳು
ಒಣ ಮೆಣಸು 2
ಸ್ವಲ್ಪ ಕರಿ ಬೇವಿನ ಎಲೆ
ಎಣ್ಣೆ 2 ಚಮಚ

ತಯಾರಿಸುವ ವಿಧಾನ:

* ಪಾಲಾಕ್ ಸೊಪ್ಪನ್ನು ಶುದ್ಧ ಮಾಡಿ, ನಂತರ ತೊಗರಿ ಬೇಳೆಯನ್ನು ತೊಳೆದು ಪ್ರೆಶರ್ ಕುಕ್ಕರ್ ನಲ್ಲಿ ಹಾಕಿ, ಈರುಳ್ಳಿ, ಹುಣಸೆ ಹಣ್ಣಿನ ರಸ, ಹಸಿ ಮೆಣಸು, ಸ್ವಲ್ಪ ಜಜ್ಜಿದ ಶುಂಠಿ, ಅರಿಶಿಣ ಪುಡಿ ಹಾಕಿ 2 ಕಪ್ ನೀರು ಹಾಕಿ, ರುಚಿಗೆ ತಕ್ಕ ಉಪ್ಪು ಹಾಕಿ 3 ವಿಶಲ್ ಬರುವವರೆಗೆ ಬೇಯಿಸಿ.

* ನಂತರ ಪ್ಯಾನ್ ಅನ್ನು ಬಿಸಿ ಮಾಡಿ ಅದರಲ್ಲಿ ಎಣ್ಣೆ ಹಾಕಿ, ಎಣ್ಣೆ ಬಿಸಿಯಾದಾಗ ಸಾಸಿವೆ ಹಾಕಿ, ಸಾಸಿವೆ ಚಟಾಪಟಾ ಶಬ್ದ ಮಾಡುವಾಗ, ಬೆಳ್ಳುಳ್ಳಿ ಹಾಕಿ ಫ್ರೈ ಮಾಡಿ, ನಂತರ ಉದ್ದಿನ ಬೇಳೆ, ಒಣ ಮೆಣಸು, ಕರಿ ಬೇವಿನ ಎಲೆ ಒಂದು ನಿಮಿಷ ಫ್ರೈ ಮಾಡಿ, ಬೇಯಿಸಿದ ಪಾಲಾಕ್ ತೊಗರಿ ಬೇಳೆಯನ್ನು ಹಾಕಿ, 5 ನಿಮಿಷ ಕುದಿಸಿ, ನಂತರ ಉಪ್ಪು ಸರಿಯಾಗಿದೆಯೇ ನೋಡಿ, ಉಪ್ಪು ಬೇಕಿದ್ದರೆ ಸ್ವಲ್ಪ ಉಪ್ಪು ಸೇರಿಸಿ ಮತ್ತೆ 5 ನಿಮಿಷ ಕುದಿಸಿ, ಉರಿಯಿಂದ ಇಳಿಸಿದರೆ ಮಲಬಾರ್ ಪಾಲಾಕ್ ದಾಲ್ ಕರಿ ರೆಡಿ.