ಪಂಜಾಬಿ ಗ್ರೇವಿಯೊಂದಿಗೆ ಕರ್ನಾಟಕದ ರೊಟ್ಟಿ ತಿನ್ನಿ

Rasam

oi-Reena

By Hema S

Published: Friday, February 10, 2012, 16:34 [IST]

ಪಂಜಾಬಿ ಶೈಲಿಯ ಅಡುಗೆ ರುಚಿಯಲ್ಲಿ ತುಂಬಾ ಫೇಮಸ್ಸು. ಅವರ ನಾನ್ ವೆಜ್ ಸ್ಟೈಲ್ ಕರ್ನಾಟಕದ ಹೋಟೆಲ್ ನಲ್ಲಿ ತುಂಬಾ ಫೇಮಸ್. ಪಂಜಾಬಿಯವರು ತರಕರಿಯಿಂದಲೂ ರುಚಿಕರವಾದ ಖಾದ್ಯ ತಯಾರಿಸುತ್ತಾರೆ. ಅವರು ಕಿಡ್ನಿ ಬೀನ್ಸ್ ನಿಂದ ತಯಾರಿಸುವ ಗ್ರೇವಿ ತುಂಬಾ ರುಚಿಕರವಾಗಿರುತ್ತದೆ. ಈ ಗ್ರೇವಿಯನ್ನು ಕರ್ನಾಟಕದ ರೊಟ್ಟಿಯ ಜೊತೆ ಸೇರಿಸಿ ತಿನ್ನಲು ತುಂಬಾ ರುಚಿಕರವಾಗಿರುತ್ತದೆ. ಕರ್ನಾಟಕ ಮತ್ತು ಪಂಜಾಬಿ ಕಾಂಬಿನೇಷನ್ ಟ್ರೈ ಮಾಡಿ ನೋಡಿ.

ಬೇಕಾಗುವ ಸಾಮಾಗ್ರಿಗಳು:
* ಕಿಡ್ನಿ ಬೀನ್ಸ್ 2 ಕಪ್
* 1/4 ಚಮಚ ಅರಿಶಿಣ
* ಕತ್ತರಿಸಿದ ಈರುಳ್ಳಿ 1
* 1 ಇಂಚಿನಷ್ಟಿರುವ ಶುಂಠಿ
* ಹಸಿಮೆಣಸು 3 ( ಕತ್ತರಿಸಿದ್ದು)
* ಟೊಮೆಟೊ 3 ( ಕತ್ತರಿಸಿದ್ದು)
* 1/2 ಚಮಚ ಕೊತ್ತಂಬರಿ ಪುಡಿ
* 1 ಚಮಚ ಕೆಂಪು ಮೆಣಸಿನ ಪುಡಿ.
* 1/2 ಚಮಚ ಗರಂ ಮಸಾಲ
* 2 ಚಮಚ ಎಣ್ಣೆ
* ರುಚಿಗೆ ತಕ್ಕ ಉಪ್ಪು
* ಕೊತ್ತಂಬರಿ ಸೊಪ್ಪು

ತಯಾರಿಸುವ ವಿಧಾನ:

1. ಕಿಡ್ನಿ ಬೀನ್ಸ್ ಅನ್ನು ಒಂದು ರಾತ್ರಿ ನೆನೆ ಹಾಕಬೇಕು.

2. ಅದನ್ನು ಬೆಳಗ್ಗೆ ಪ್ರೆಶರ್ ಕುಕ್ಕರ್ ನಲ್ಲಿ ಬೇಯಿಸಿ.

3. ಬಾಣಲೆಯಲ್ಲಿ ಎಣ್ಣೆ ಹಾಕಿ ಜಜ್ಜಿದ ಶುಂಠಿ, ಬೆಳ್ಳುಳ್ಳಿ ಮತ್ತು ಮೆಣಸನ್ನು ಸೇರಿಸಿ ಹುರಿಯಬೇಕು.

4. ನಂತರ ಈರುಳ್ಳಿ ಮತ್ತು ಟೊಮೆಟೊವನ್ನು ಸೇರಿಸಿ ಟೊಮೆಟೊ ಮೆತ್ತಗೆಗಾಗುವವರೆಗೆ ಹುರಿಯಬೇಕು.

5. ಈಗ ಉಪ್ಪು, ಅರಿಶಿಣ ಹಾಕಿ ಚೆನ್ನಾಗಿ ಮಿಶ್ರ ಮಾಡಬೇಕು.

6. ಈ ಮಿಶ್ರಣಕ್ಕೆ ಬೇಯಿಸಿದ ಕಿಡ್ನಿ ಬೀನ್ಸ್ , ಕೆಂಪು ಮೆಣಸಿನ ಪುಡಿ, ಕೊತ್ತಂಬರಿ ಪುಡಿ, ಗರಂ ಮಸಾಲ ಹಾಕಿ ಚೆನ್ನಾಗಿ ಮಿಶ್ರ ಮಾಡಬೇಕು.

7. ಇವುಗಳಿಗೆ ಸ್ವಲ್ಪ ನೀರು ಹಾಕಿ ಗಟ್ಟಿ ಗ್ರೇವಿಯಾಗುವವರೆಗೆ ಕಾಯಿಸಬೇಕು.

8. ನಂತರ ಅದನ್ನು ಉರಿಯಿಂದ ತೆಗೆದು ಕೊತ್ತಂಬರಿ ಸೊಪ್ಪು ಹಾಕಿ ಅಲಂಕರಿಸಿದರೆ ರುಚಿಯಾದ ಕಿಡ್ನಿ ಬೀನ್ಸ್ ಗ್ರೇವಿ ರೆಡಿ.