ಎಳ್ಳು ಬೆಲ್ಲದ ಬೆಂಡೇ ಗೊಜ್ಜು

ಬೇಕಾಗುವ ಪದಾರ್ಥಗಳು :

* ಬೇಯಿಸಿದ ಅರ್ಧ ಕೆಜಿ ತರಕಾರಿ
* ಸಿದ್ಧವಾಗಿರುವ ಎಳ್ಳುಬೆಲ್ಲದ ಮಿಶ್ರಣ ಒಂದು ಕಪ್
* ಹಸಿ ತೆಂಗಿನಕಾಯಿ ತುರಿ ಒಂದು ಕಪ್
* ಎರಡು ಚಮಚ ಹುಳಿಪುಡಿ ಅಥವಾ 5 ಹಸಿಮೆಣಸಿನಕಾಯಿ
* ಸ್ವಲ್ಪ ಹುಣಿಸೆಹಣ್ಣು, ತುಂಡು ಬೆಲ್ಲ, ಉಪ್ಪು
* ಒಗ್ಗರಣೆಗೆ ಸಾಸಿವೆ, ಜೀರಿಗೆ, ಕರಿಬೇವಿನ ಸೊಪ್ಪು

ವಿಧಾನ :

ಎಳ್ಳುಬೆಲ್ಲದ ಮಿಶ್ರಣ, ತೆಂಗು, ಹುಣಿಸೆಹಣ್ಣು, ಹುಳಿಪುಡಿ, ಉಪ್ಪು ಮತ್ತು ಬೆಲ್ಲವನ್ನು ಸ್ವಲ್ಪ ನೀರು ಹಾಕಿ ಮಿಕ್ಸಿಗೆ ಹಾಕಿಕೊಳ್ಳುವುದು. ನುಣ್ಣಗೆ ರುಬ್ಬಿ ಚಟ್ನಿ ಆಗಬೇಕು. ಎರಡು ಚಮಚ ಅಕ್ಕಿ ಹಾಕಿಕೊಂಡು ರುಬ್ಬಿದರೆ ಗೊಜ್ಜಿಗೆ ಥಿಕ್ ನೆಸ್ ಬರತ್ತೆ. ಆನಂತರ ತವದಲ್ಲಿ ಎಣ್ಣೆ ಹಾಕಿ ಬಿಸಿಯಾದ ನಂತರ ಸಾಸಿವೆ, ಜೀರಿಗೆ, ಕರಿಬೇವು ಹಾಕಿ ಒಗ್ಗರಣೆ ಆಗಲಿ. ಇದಕ್ಕೆ ರುಬ್ಬಿಕೊಂಡಿರುವಂತಹ ಚಟ್ನಿ ಹಾಕಿ ಸಣ್ಣ ಉರಿಯಲ್ಲಿ ಕುದಿಸಬೇಕು.

ಇದಕ್ಕೆ ಬೇಯಿಸಿದ ಬದನೆಕಾಯಿ ಅಥವಾ ಹುರುಳಿಕಾಯಿ ಅಥವಾ ಚೆನ್ನಾಗಿ ಹುರಿದುಕೊಂಡ ಬೆಂಡೇಕಾಯಿಯನ್ನು ಬೆರೆಸಿ ಪುನಃ ಕುದಿಸಬೇಕು. ಸಾಮಾನ್ಯವಾಗಿ ನಾವೆಲ್ಲ ಮಾಡುವ ಗೊಜ್ಜಿನ ರೆಸಿಪಿ ಇದು. ಆದರೆ, ಎಳ್ಳುಬೆಲ್ಲ ಮಿಶ್ರಣದ ರುಚಿ ಗೊಜ್ಜಿಗೆ ಹೊಸ ಅರ್ಥ ಹೊಸ ರುಚಿ ತಂದುಕೊಡುತ್ತದೆ. ಟ್ರೈ ಮಾಡಿ. ನಮ್ಮ ಮನೆಯಲ್ಲಿ ಪ್ರತಿವರ್ಷ ಸಂಕ್ರಾಂತಿ ಆದನಂತರ ಈ ಗೊಜ್ಜು ತಯಾರಿಸುವುದು ತಪ್ಪುವುದೇ ಇಲ್ಲ.