ಎಗ್ ಕೋಫ್ತಾ- ಮೊಘಲಾಯಿ ನಾನ್ ವೆಜ್ ಸ್ಪೆಷಲ್

ಖೀಮಾ ಚಿಕನ್ ಬಳಸಿ ಮಾಡುವ ಈ ಎಗ್ ಕೋಫ್ತಾದ ರುಚಿ ನೋಡಿದ್ದೀರಾ? ಇಲ್ಲ ಅಂದರೆ ತಡಬೇಡಿ ಇವತ್ತೇ ಈ ಮೊಘಲಾಯಿ ರೆಸಿಪಿ ಟ್ರೈ ಮಾಡಿ. ಮೊಟ್ಟೆಯನ್ನು ಹಾಗೇ ಬೇಯಿಸಿ ಮಾಡುವ ಸಾರಿಗಿಂತ ಚಿಕನ್ ಖೀಮಾದಿಂದ ಎಗ್ ಕೋಫ್ತಾ ಮಾಡಿ ಅದರಿಂದ ಮಾಡುವ ಈ ಮೊಟ್ಟೆ ಪದಾರ್ಥವಂತೂ ಹೆಚ್ಚು ಸ್ವಾದಿಷ್ಟಕರವಾಗಿರುತ್ತದೆ.

ಈ ಎಗ್ ಕೋಫ್ತಾ ಮಾಡುವ ವಿಧಾನ ನೋಡಿ ಇಲ್ಲಿದೆ.

ಬೇಕಾಗುವ ಸಾಮಾಗ್ರಿಗಳು
ಚಿಕನ್ ಕಾಲು ಕೆಜಿ(minced)
ಕಡಲೆ ಹಿಟ್ಟು 2 ಚಮಚ
ಕೊತ್ತಂಬರಿ ಪುಡಿ 1 ಚಮಚ
ಅರಿಶಿಣ ಪುಡಿ ಅರ್ಧ ಚಮಚ
ಖಾರದ ಪುಡಿ ಅರ್ಧ ಚಮಚ
ರುಚಿಗೆ ತಕ್ಕ ಉಪ್ಪು
ಬೇಯಿಸಿದ ಮೊಟ್ಟೆ 4
ಜೋಳದ ಹಿಟ್ಟು 1 ಚಮಚ
ಎಣ್ಣೆ 1 ಕಪ್ (ಡೀಪ್ ಫ್ರೈಗೆ)

ಗ್ರೇವಿಗೆ ಸಾಮಾಗ್ರಿಗಳು
ದೊಡ್ಡ ಗಾತ್ರದ ಈರುಳ್ಳಿ 2(ಕತ್ತರಿಸಿದ್ದು)
ಶುಂಠಿ, ಬೆಳ್ಳುಳ್ಳಿ ಪೇಸ್ಟ್ 1 ಚಮಚ
ಪುದೀನಾ ಎಲೆ 1 ಚಮಚ(ಚಿಕ್ಕದಾಗಿ ಕತ್ತರಿಸಿದ್ದು)
ಕೊತ್ತಂಬರಿ ಪುಡಿ 1 ಚಮಚ
ಅರಿಶಿಣ ಪುಡಿ ಅರ್ಧ ಚಮಚ
ಖಾರದ ಪುಡಿ 1 ಚಮಚ(ಖಾರ ಬೇಡವೆಂದರೆ ಅರ್ಧ ಚಮಚ ಹಾಕಿ)
ಬಾದಾಮಿ 3-4
ಅರ್ಧ ಟೊಮೆಟೊ (ಬಾದಾಮಿ ಮತ್ತು ಟೊಮೆವನ್ನು ಸೇರಿಸಿ ಪೇಸ್ಟ್ ಮಾಡಿಡಿ)
ಮೊಸರು 2 ಚಮಚ
ಮೆಂತೆ ಬೀಜ 1 ಚಮಚ
ಚಕ್ಕೆ (ಒಂದು ಇಂಚಿನಷ್ಟು ದೊಡ್ಡದ್ದು)
ಲವಂಗ 2
ಹಸಿ ಮೆಣಸಿನಕಾಯಿ 2-3
ಸಕ್ಕರೆ ಅರ್ಧ ಚಮಚ
ಎಣ್ಣೆ 2 ಚಮಚ
ಕರಿ ಬೇವಿನ ಎಲೆ
ರುಚಿಗೆ ತಕ್ಕ ಉಪ್ಪು
ನೀರು 1 ಕಪ್

ತಯಾರಿಸುವ ವಿಧಾನ:

* ಚಿಕನ್ ಗೆ ಉಪ್ಪು, ಅರಿಶಿಣ, ಕಡಲೆ ಹಿಟ್ಟು, ಕೊತ್ತಂಬರಿ ಪುಡಿ, ಜೀರಿಗೆ ಪುಡಿ, ಜೋಳದ ಹಿಟ್ಟು, ಕಡಲೆ ಹಿಟ್ಟು, ಖಾರದ ಪುಡಿ ಹಾಕಿ ಮಿಕ್ಸ್ ಮಾಡಿ. ನಂತರ ಇದನ್ನು ನಾಲ್ಕು ಸಮ ಭಾಗಗಳಾಗಿ ವಿಂಗಡಿಸಿ.

* ಈಗ ಬೇಯಿಸಿದ ಮೊಟ್ಟೆ ತೆಗೆದು ಅದಕ್ಕೆ ಈ ಚಿಕನ್ ಮಿಕ್ಸ್ ಅನ್ನು ಮೆತ್ತಿ, ಅದೇ ರೀತಿ ಉಳಿದ 3 ಮೊಟ್ಟೆಗಿಗೆ ಮಾಡಿ. ಮೊಟ್ಟೆ ಖೀಮಾದಿಂದ ಸಂಪೂರ್ಣವಾಗಿ ಮುಚ್ಚಿರಲಿ.

* ಈಗ ಬಾಣಲೆಗೆ ಎಣ್ಣೆ ಹಾಕಿ ಬಿಸಿ ಮಾಡಿ ಅದರಲ್ಲಿ ಎಗ್ ಕೋಫ್ತಾ ಹಾಕಿ ಫ್ರೈ ಮಾಡಿ, ಮಾಂಸ ಬೆಂದು ಸ್ವಲ್ಪ ಕಂದು ಬಣ್ಣ ಬರುವವರೆಗೆ ಫ್ರೈ ಮಾಡಿ ಅವುಗಳನ್ನು ತೆಗೆದು ಒಂದು ಪಾತ್ರೆಯಲ್ಲಿ ಹಾಕಿಡಿ.

* ಈಗ ಮತ್ತೊಂದು ಪಾತ್ರೆಯನ್ನು ಉರಿ ಮೇಲೆ ಇಟ್ಟು 2 ಚಮಚ ಎಣ್ಣೆ ಹಾಕಿ, ಎಣ್ಣೆ ಬಿಸಿಯಾದಾಗ ಕರಿಬೇವಿನ ಎಲೆ ಹಾಕಿ, ಮೆಂತೆ, ಚಕ್ಕೆ, ಲವಂಗವನ್ನು ಜಜ್ಜಿ ಹಾಕಿ, ನಂತರ ಈರುಳ್ಳಿ ಹಾಕಿ ಕಂದು ಬಣ್ಣ ಬರುವವರೆಗೆ ಹುರಿಯಿರಿ.

* ಈಗ ಬಾದಾಮಿ, ಟೊಮೆಟೊ, ಶುಂಠಿ, ಬೆಳ್ಳುಳ್ಳಿ ಪೇಸ್ಟ್ ಹಾಕಿ. ಹಸಿ ಮೆಣಸಿನಕಾಯಿ ಹಾಕಿ 2 ನಿಮಿಷ ಆಡಿಸಿ, ನಂತರ ಕೊತ್ತಂಬರಿ ಪುಡಿ, ಖಾರದ ಪುಡಿ, ಗರಂ ಮಸಾಲ ಹಾಕಿ, ಪುದೀನಾ ಎಲೆ ಹಾಕಿ, ನಂತರ ಸಕ್ಕರೆ ಸೇರಿಸಿ ಮತ್ತೆ 2 ನಿಮಿಷ ಹುರಿಯಿರಿ, ಈಗ ರುಚಿಗೆ ತಕ್ಕ ಉಪ್ಪು, ಮೊಸರು ಸೇರಿಸಿ, ಮಿಶ್ರಣವನ್ನು ಒಮ್ಮೆ ಮಿಕ್ಸ್ ಮಾಡಿ, 1 ಕಪ್ ನೀರು ಸೇರಿಸಿ ಕುದಿಸಿ. ಮಿಶ್ರಣ ಚೆನ್ನಾಗಿ ಕುದಿ ಬಂದ ಮೇಲೆ ತಯಾರಿಸಿಟ್ಟ ಎಗ್ ಕೋಫ್ತಾ ಹಾಕಿ( ಕೋಫ್ತಾವನ್ನು ಎರಡು ಭಾಗವಾಗಿ ಕತ್ತರಿಸಿ ಹಾಕಿ) 10 ನಿಮಿಷ ಕಡಿಮೆ ಹುರಿಯಲ್ಲಿ ಬೇಯಿಸಿ.

ಇಷ್ಟು ಮಾಡಿದರೆ ಎಗ್ ಕೋಫ್ತಾ ರೆಡಿ.