ಚಿಕನ್ ಸ್ಪೆಷಲ್ - ಚಿಕನ್ ಹಲೀಮ್

Non Vegetarian

oi-Reena

By Hema S

Updated: Friday, August 17, 2012, 12:02 [IST]

ಹಲೀಮ್ ಅಡುಗೆ ಹೈದರಾಬಾದ್ ಕಡೆ ತುಂಬಾ ಪ್ರಸಿದ್ಧಿಯನ್ನು ಪಡೆದಿದೆ. ಈ ಹಲೀಮ್ ಅಡುಗೆಯನ್ನು ಮಟನ್ ಹಾಕಿಯೂ ತಯಾರಿಸಬಹುದು, ಚಿಕನ್ ಹಾಕಿಯೂ ತಯಾರಿಸಬಹುದು, ಇವತ್ತು ನಾವು ಚಿಕನ್ ಹಲೀಮ್ ತಯಾರಿಸುವ ವಿಧಾನ ತಿಳಿಯೋಣ:

ಈ ರಂಜಾನ್ ಗೆ ವಿಶೇಷ ಅಡುಗೆ ಮಾಡುವಾಗ ಚಿಕನ್ ಹಲೀಮ್ ತಯಾರಿಸಿದರೆ ಹಬ್ಬದ ಅಡುಗೆ ಮತ್ತಷ್ಟು ಸ್ಪೆಷಲ್ ಅನಿಸುವುದು.

ಬೇಕಾಗುವ ಸಾಮಾಗ್ರಿಗಳು:

1 ಕೆಜಿ ಬೋನ್ ಲೆಸ್ ಚಿಕನ್
2 ಕಪ್ ಗೋಧಿ ( ಒಂದು ಗಂಟೆ ಕಾಲ ನೀರಿನಲ್ಲಿ ನೆನೆ ಹಾಕಿರಬೇಕು)
3 ಈರುಳ್ಳಿ
ಅರ್ಧ ಕಪ್ ಹೆಸರು ಬೇಳೆ ( ಬೇಯಿಸಿದ್ದು)
ಒಂದು ಚಮಚ ಶುಂಠಿ ಪೇಸ್ಟ್
ಒಂದು ಗಾರ್ಲಿಕ್ ಪೇಸ್ಟ್
2 ಚಮಚ ಕೆಂಪು ಮೆಣಸಿನ ಪುಡಿ
2 ಚಮಚ ಕೊತ್ತಂಬರಿ ಪುಡಿ
1 ಚಮಚ ಅರಿಶಿಣ
ರುಚಿಗೆ ತಕ್ಕ ಉಪ್ಪು
1 ಚಮಚ ಗರಂ ಮಸಾಲ
ಅರ್ಧ ಚಮಚ ಕರಿಮೆಣಸಿಣ ಪುಡಿ
2 ಇಂಚಿನಷ್ಟು ಉದ್ದದ ಚಕ್ಕೆ
2 ಪಲಾವ್ ಎಲೆ
ಅರ್ಧಚಮಚ ಜೀರಿಗೆ ಪುಡಿ
1 ಕಪ್ ಎಣ್ಣೆ
ಅರ್ಧ ಕಪ್ ಕತ್ತರಿಸಿದ ಕೊತ್ತಂಬರಿ ಸೊಪ್ಪು
ಅರ್ಧ ಕಪ್ ಕತ್ತರಿಸಿದ ಪುದೀನಾ ಎಲೆ
ಚಿಕ್ಕದಾಗಿ ಕತ್ತರಿಸಿದ ಶುಂಠಿ2 ಚಮಚ
2 ನಿಂಬೆ ಹಣ್ಣು

ತಯಾರಿಸುವ ವಿಧಾನ:

1. ಒಂದು ಪಾತ್ರೆಯಲ್ಲಿ ಸ್ವಲ್ಪ ಎಣ್ಣೆ ಹಾಕಿ ಬಿಸಿ ಮಾಡಬೇಕು. ಕಾದ ಎಣ್ಣೆಗೆ ಈರುಳ್ಳಿ ಹಾಕಿ ಚೆನ್ನಾಗಿ ಕಂದು ಬಣ್ಣ ಬರುವವರೆಗೆ ಹುರಿಯಬೇಕು. ನಂತರ ಹುರಿದ ಈರುಳ್ಳಿಯನ್ನು ಒಂದು ಪೇಪರ್ ನಲ್ಲಿ ಹರಡಿ ಕೈಯಿಂದ ಪುಡಿ ಪುಡಿ ಮಾಡಬೇಕು.

2. ನಂತರ ಒಂದು ದೊಡ್ಡ ಪಾತ್ರೆಯಲ್ಲಿ 6 ಕಪ್ ನೀರು ಹಾಕಿ ಅದರಲ್ಲಿ ತೊಳೆದ ಗೋಧಿ ಹಾಕಿ ಅರ್ಧ ಗಂಟೆ ಬೇಯಿಸಬೇಕು. ಗೋಧಿ ಮೆತ್ತಗಾದ ಮೇಲೆ ಉರಿಯಿಂದ ತೆಗೆಯಬೇಕು.

3. ಬೇಯಿಸಿದ ಬೇಳೆಯನ್ನು ಮಿಕ್ಸಿಯಲ್ಲಿ ಅರೆದು ಒಂದು ಕಡೆ ಇಡಬೇಕು.

4. ಈಗ ಒಂದು ದೊಡ್ಡ ಪಾತ್ರೆಯಲ್ಲಿ ಎಣ್ಣೆ ಹಾಕಿ, ಎಣ್ಣೆ ಬಿಸಿಯಾದಾಗ ಶುಂಠಿ ಪೇಸ್ಟ್, ಬೆಳ್ಳುಳ್ಳಿ ಪೇಸ್ಟ್, ಕೆಂಪು ಮೆಣಸಿನ ಪುಡಿ, ಕೊತ್ತಂಬರಿ ಪುಡಿ, ಅರಿಶಿಣ ಪುಡಿ, ರುಚಿಗೆ ತಕ್ಕ ಉಪ್ಪು, ಪಲಾವ್ ಎಲೆ, ಜೀರಿಗೆ, ಚಕ್ಕೆ, ಗರಂ ಮಸಾಲ, ಕರಿಮೆಣಸಿನ ಪುಡಿ ಹಾಕಿ 1 ಒಂದು ನಿಮಿಷ ಸೌಟ್ ನಿಂದ ಅಡಿಸಿ ಅರ್ಧ ಕಪ್ ನೀರು ಹಾಕಿ 2 ನಿಮಿಷ ಕುದಿಸಬೇಕು. ಈಗ ಶುಚಿ ಮಾಡಿದ ಬೋನ್ ಲೆಸ್ ಚಿಕನ್ ಮತ್ತು ಅರೆದ ಬೇಳೆಯನ್ನು ಹಾಕಬೇಕು. ನಂತರ ಬೇಯಿಸಿದ ಗೋಧಿ ಮತ್ತು ಎಣ್ಣೆ ಹಾಕಿ ಹಾಕಿ ಬೇಯಿಸಬೇಕು (ಉಪ್ಪು ಸರಿಯಾದ ಅಳತೆಯಲ್ಲಿ ಇದೆಯೇ ಎಂದು ನೋಡಬೇಕು).

5. ನಂತರ ಆಗಾಗ ಸೌಟ್ ನಿಂದ ಮಿಶ್ರಣವನ್ನು ಆಡಿಸುತ್ತಾ ಈ ಮಿಶ್ರಣ ಗಟ್ಟಿಯಾಗುವವರೆಗೆ ಬೇಯಿಸಬೇಕು.

6. ನಂತರ ಇದನ್ನು ಉರಿಯಿಂದ ತೆಗೆದು ಕತ್ತರಿಸಿದ ಕೊತ್ತಂಬರಿ ಸೊಪ್ಪು ಮತ್ತು ಪುದೀನಾ ಸೊಪ್ಪು, ಹುರಿದ ಈರುಳ್ಳಿ ಮತ್ತು ಎಣ್ಣೆಯಲ್ಲಿ ಹುರಿದ ಶುಂಠಿ ಮತ್ತು ಹಸಿಮೆಣಸಿನಕಾಯಿ ಹಾಕಿ ಮಿಶ್ರ ಮಾಡಿ ಸ್ವಲ್ಪ ನಿಂಬೆ ರಸ ಹಿಂಡಿದರೆ ರುಚಿಕರವಾದ ಚಿಕನ್ ಹಲೀಮ್ ರೆಡಿ.