ಸರಳ ಪೂರಿ ಅಲ್ಲ ಬ್ರೇಕ್ ಫಾಸ್ಟ್‌ಗೆ ಮಾಡಿ ವಿಶೇಷ ಮಸಾಲ ಪೂರಿ: ಈ ರುಚಿಗೆ ಫಿದಾ ಆಗದವರಿಲ್ಲ!

ನೀವೆಲ್ಲಾ ಪೂರಿ ಸವಿಯಲು ಇಷ್ಟಪಡುವ ಮಂದಿ ಆಗಿರಬಹುದು. ಅದ್ರಲ್ಲೂ ಹೋಟೆಲ್‌ನಲ್ಲಿ ನೀಡುವಂತಹ ರುಚಿ ರುಚಿಯ ಪೂರಿ ಅಂದ್ರೆ ಎಲ್ಲರ ಬಾಯಲ್ಲೂ ನೀರು ಬರುತ್ತೆ. ಮೃದುವಾದ ಪೇಪರ್‌ನಂತಹ ಪೂರಿಯನ್ನು ತೆಂಗಿನ ಕಾಯಿ ಚಟ್ನಿಯೊಂದಿಗೆ ಸವಿಯುತ್ತಿದ್ದರೆ ಅದರ ರುಚಿಗೆ ಎಲ್ಲರು ಫಿದಾ ಆಗುತ್ತಾರೆ. ಪೂರಿ ಮನೆಯಲ್ಲೂ ಕೂಡ ನೀವು ಮಾಡಿ ಸವಿದಿರುತ್ತೀರಿ.

ಆದ್ರೆ ಪೂರಿಯನ್ನು ಯಾವಾಗಲು ಒಂದೇ ರೀತಿ ಮಾಡುವಂತೆ ಸಾಧಾರಣ ಪೂರಿ ಮಾಡಬೇಡಿ, ಆದ್ರೆ ಇಂದು ಮಸಾಲ ಪೂರಿ ಮಾಡುವ ಕುರಿತಾಗಿ ತಿಳಿದುಕೊಳ್ಳೋಣ. ಈ ಮಸಾಲ ಪೂರಿ ಒಮ್ಮೆ ಸವಿದರೆ ನಿತ್ಯವೂ ಇದೇ ತಿಂಡಿ ಮಾಡಿ ಸವಿಯಲು ಮುಂದಾಗುವುದು ಖಚಿತ. ಹಾಗಾದ್ರೆ ಈ ರುಚಿ ರುಚಿಯ ಮಸಾಲ ಪೂರಿ ಮಾಡುವುದು ಹೇಗೆ ನೋಡಿ.

ಪೂರಿ ಮಾಡಲು ಗೋಧಿ ಅಥವಾ ಮೈದಾ ಹಿಟ್ಟು ಬಳಸುತ್ತಾರೆ. ಆದ್ರೆ ಈ ಮಸಾಲ ಪೂರಿಗೆ ಯಾವುದೇ ಚಟ್ನಿ, ಕುರ್ಮಾ ಯಾವುದೂ ಬೇಕಾಗಿಲ್ಲ. ಅದರ ರುಚಿಯನ್ನು ನೀವು ಹಾಗೆಯೇ ಸವಿಯಬಹುದು. ಹಾಗಾದ್ರೆ ಈ ಮಸಾಲ ಪೂರಿ ಮಾಡೋದು ಹೇಗೆ?, ಮಾಡುವ ವಿಧಾನವೇನು ಎಷ್ಟು ಸಮಯ ಹಿಡಿಯಲಿದೆ ಎಂಬುದನ್ನು ನಾವಿಂದು ತಿಳಿದುಕೊಳ್ಳೋಣ.

ಮಸಾಲ ಪೂರಿ ಮಾಡಲು ಅಗತ್ಯವಿರುವ ವಸ್ತುಗಳು

• ಗೋಧಿ ಹಿಟ್ಟು 1 ಕಪ್
• ಕಡಲೆ ಹಿಟ್ಟು 1 ಕಪ್
• ಚಿರೋಟಿ ಕಾಲು ಕಪ್
• ಕಸೂರಿ ಮೆಂತ್ಯ 1 ಟೇಬಲ್ ಸ್ಪೂನ್
• ಓಂಕಾಳು 1 ಟೀ ಸ್ಪೂನ್
• ಅಚ್ಚಕಾರದ ಪುಡಿ 1 ಟೀ ಸ್ಪೂನ್
• ಅರಿಶಿಣದ ಪುಡಿ ಅರ್ಧ ಟೀ ಸ್ಪೂನ್
• ಕೊತ್ತಂಬರಿ ಸೊಪ್ಪು ಸ್ವಲ್ಪ
• ಎಣ್ಣೆ ಡೀಪ್ ಫ್ರೈ ಮಾಡಲು
• ಉಪ್ಪು ರುಚಿಗೆ ತಕ್ಕಷ್ಟು

ಮಸಾಲ ಪೂರಿ ಮಾಡುವ ಸುಲಭದ ವಿಧಾನವೇನು?

• ಪೂರಿ ಹಿಟ್ಟು ಕಲಸಿಕೊಳ್ಳಲು ಒಂದು ಬೌಲ್‌ಗೆ 1 ಕಪ್ ಗೋಧಿ ಹಿಟ್ಟು, 1 ಕಪ್ ಕಡಲೆ ಹಿಟ್ಟು, ಕಾಲು ಕಪ್ ಚಿರೋಟಿ ರವೆ, ಅರಶಿಣ ಪುಡಿ, ಖಾರದ ಪುಡಿ, ಉಪ್ಪು, ಕಸೂರಿ ಮೆಂತ್ಯ, ಓಂಕಾಳು ಹಾಕಿಕೊಂಡು ಒಮ್ಮೆ ಡ್ರೈ ಮಿಕ್ಸ್ ಮಾಡಿಕೊಳ್ಳಿ. ಈಗ ಒಂದು ಕಪ್ ಅಳತೆಯ ನೀರು ತೆಗೆದುಕೊಂಡು ಸ್ವಲ್ಪ ಸ್ವಲ್ಪ ಹಾಕಿಕೊಳ್ಳುತ್ತಾ ಮಿಕ್ಸ್ ಮಾಡುತ್ತಾ ಇರಬೇಕಾಗುತ್ತದೆ.
• ನೀರು ಹಾಕಿಕೊಂಡು ಚೆನ್ನಾಗಿ ಚಪಾತಿ ಹಿಟ್ಟಿನ ಹದಕ್ಕೆ ರೆಡಿ ಮಾಡಿಕೊಳ್ಳಿ. ನಂತರ ಹಿಟ್ಟಿನ ಮೇಲೆ ಎಣ್ಣೆ ಹಾಕಿ ಮಿಕ್ಸ್ ಮಾಡಿಕೊಂಡು ಮುಚ್ಚಳ ಮುಚ್ಚಿ ಹಾಗೆಯೆ ಬಿಡಿ. 10 ನಿಮಿಷ ಬಿಟ್ಟರೆ ಸಾಕಾಗುತ್ತದೆ.
• ಈಗ ಒಲೆ ಮೇಲೆ ಬಾಣಲೆ ಇಟ್ಟು ಅದಕ್ಕೆ ಎಣ್ಣೆ ಹಾಕಿ ಬಿಸಿಯಾಗಲು ಬಿಡಿ. ಈಗ 10 ನಿಮಿಷದ ಬಳಿಕ ಹಿಟ್ಟನ್ನು ಉಂಡೆ ಕಟ್ಟಿಕೊಂಡು ಚಪಾತಿಯಂತೆ ಲಟ್ಟಿಸಿಕೊಳ್ಳಿ. ಉಳಿದ ಎಲ್ಲಾ ಹಿಟ್ಟನ್ನು ಉಂಡೆ ಮಾಡಿಕೊಂಡು ಪೂರಿ ಲಟ್ಟಿಸಿ ಇಟ್ಟುಕೊಳ್ಳಿ.
• ಅನಂತರ ಒಂದೊಂದಾಗಿ ಬಾಣಲೆಯ ಎಣ್ಣೆಯಲ್ಲಿ ಇಳಿಬಿಟ್ಟು ಕರಿದುಕೊಳ್ಳಬೇಕು. ಎಣ್ಣೆಯಲ್ಲಿ ಎರಡೂ ಭಾಗವೂ ಚೆನ್ನಾಗಿ ಕರಿದುಕೊಳ್ಳಬೇಕು. ಇದೇ ರೀತಿ ಎಲ್ಲಾ ಪೂರಿಯನ್ನು ಕರಿದುಕೊಳ್ಳಬೇಕು.
• ಇಷ್ಟಾದರೆ ನಿಮ್ಮ ಮುಂದೆ ರುಚಿ ರುಚಿಯ ಮಸಾಲೆ ಪೂರಿ ಸಿದ್ದವಾಗುತ್ತೆ. ನೀವು ಕೂಡ ಮನೆಯಲ್ಲಿ ಬೆಳಗ್ಗಿನ ತಿಂಡಿಗೆ ಇದನ್ನು ಮಾಡಿ ನೋಡಿ. ಎಲ್ಲರಿಗೂ ಇದು ಇಷ್ಟವಾಗುತ್ತೆ.